ՀՀ–ում օտարալեզու ֆիլմերի հայերեն պարտադիր թարգմանությունը հնարավոր է` ներդրվի ոչ թե 2030 թվականից, այլ արդեն 2026 թվականին: Ազգային ժողովի այսօրվա նիստի ժամանակ այս մասին ասաց ՀՀ կրթության, գիտության, մշակույթի և սպորտի նախարար Ժաննա Անդրեասյանը` ներկայացնելով «Լեզվի մասին» ՀՀ օրենքում փոփոխությունները։

Նախարարը հիշեցրեց, որ 2021 թվականին ընդունված «Կինեմատոգրաֆիայի մասին» օրենքում գործող փոփոխությունների համաձայն՝ այս պահանջը պետք է ուժի մեջ մտնի 2030 թվականից, սակայն նախարարությունն այդ ժամկետը չափազանց ուշ է համարում և մտադիր է օրենսդրական նոր փոփոխությունների նախագիծը շրջանառության մեջ դնել 2026 թվական տեղափոխելու համար:

Անդրեասյանը հստակեցրեց, որ թարգմանության ձևաչափը՝ ձայնային կրկնօրինակում կամ ենթագրեր, ինչպես նաև կիրառման ոլորտը՝ կինոթատրոններ կամ հեռուստատեսություն, կորոշվի լրացուցիչ խորհրդակցությունների ընթացքում։