Պատգամավորի հարցը վերաբերում էր նրան, որ Ադրբեջանի նախագահ Իլհամ Ալիևը վաշինգտոնյան պայմանավորվածություններից հետո շարունակում է կիրառել «Զանգեզուրի միջանցք» արտահայտությունը։ Արդյոք այս արտահայտության կիրառումը չի՞ հակասում ձեռք բերված պայմանավորվածություններին։

Փաշինյանը նշեց, որ գոյություն ունեն օբյեկտիվ իրականություն ու սուբյեկտիվ ընկալումներ։

Ըստ նրա` օբյեկտիվ իրականությունն այն է, որ Հայաստանն ու Ադրբեջանը Վաշինգտոնում ևս մեկ անգամ ճանաչել են միմյանց տարածքային ամբողջականությունն ու ինքնիշխանությունը, իրավազորությունն ու սահմանների անխախտելիությունը։

Այնուհետեև նա ցույց տվեց Վաշինգտոնում Հայաստանի, ԱՄՆ–ի, Ադրբեջանի ղեկավարների ստորագրած փաստաթղթի մեծ պատճենը` նշելով, որ այնտեղ նշված է TRIPP–ի («Թրամփի ուղու») մասին նախագիծը։ Այն հայ–ամերիկյան քննարկման օրակարգի հարց է։ 

Մնացածը, նրա խոսքով, սուբյեկտիվ իրականություն է և ՀՀ տարածքում չի կարող գոյություն ունենալ «Զանգեզուրի միջանցք» անունով գոյություն ունեցող ենթակառուցվածք։

«Միաժամանակ ես նաև չեմ կարող բացառել, որ Ադրբեջանում այդ անունը օբյեկտիվ և սուբյեկտիվ հանգամանքների բերումով այնքան պոպուլյար է դարձել, որ Ադրբեջանը կարող է իր տարածքով անցնող որևէ ենթակառուցվածք, այդ թվում` այն ենթակառուցվածքներից, որոնք պետք է միանան «Թրամփի ուղուն», անվանել ցանկացած անունով ու ցանկացած մարդու անունով, սակայն դա ՀՀ ինքնիշխան տարածքի, օրակարգի, ձեռք բերված պայմանավորվածությունների հետ որևէ կապ չունի»,– հայտարարեց ՀՀ վարչապետը։

Ըստ նրա` եթե անգամ երդվեն, որ այդ արտահայտությունը ՀՀ–ի հետ կապ ունի, չպետք է հավատալ, քանի որ երդումն էլ է սուբյեկտիվ։

Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան: ԱՄՆ–ն ճանապարհը վարձակալում է 99 տարով` ևս 99 տարով երկարաձգելու հնարավորությամբ։