«Քաղաքացիական պայմանագիր» խմբակցության պատգամավորներն առաջարկում են տուգանել ավտոմեքենայի մեջ լրացուցիչ ուժեղացուցիչներ կամ խլացուցիչներ տեղադրած վարորդներին աշխատավարձի 10-ապատիկի չափով, բացի այդ՝ վարորդները կկորցնեն 2 միավոր։ Խախտումը պետք է արձանագրվի տեխզննման ժամանակ, որտեղ բացի գործարանային սարքերից մնացած ամեն ինչ, եթե ստանդարտին չի համապատասխանում ու ակնհայտ է, որ լրացուցիչ սարքավորում է, կհանվի մեքենայից։

Գաբոյանն ընդունում է՝ խնդիրը վաղուց կա, այն լուծելու համար պետք է մտածված ու լավ մշակված նախագիծ լինի, իսկ այս մեկով թվում է, թե պայքարը ոչ թե աղմուկի, այլ սարքավորումների դեմ է։

«Օրինագծում չի սահմանվում որևէ դեցիբել, պարզապես նշվում է՝ մեքենայում ունես ոչ գործարանային աուդիոսարքավորում, դու ենթակա ես տուգանման»,- ասաց նա` հավելելով, որ հիմա կան բազմաթիվ ավտոմեքենաներ, որոնք գործարանային արտադրությամբ արդեն շատ բարձր ձայնով նվագարկիչներ ունեն։ Ստացվում է՝ նրանք չեն տուգանվելու, անգամ եթե ձայնը բարձր է։

Փորձագետը մատնանշեց տարբեր երկրների փորձը` եվրոպական որոշ պետություններում, անկախ այն հանգամանքից՝ նվագարկիչը միացված է, թե ոչ, եթե տեղադրվել է մի սարք, որը կարող է սահմանված դեցիբելից բարձր աղմուկ ստեղծել, ապա այն հանելու պահանջ է դրվում։

«Ֆրանսիայի խաչմերուկներում հատուկ չափիչ սարքեր են տեղադրել․ եթե բարձր աղմուկ արձանագրեց, տեսախցիկը նկարում է, որոշում է հստակ, թե ով է խախտումն արել, ու խախտում կատարածը պատժվում է»,- նշեց Գաբոյանը։