Մայիսի 9-ին ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը Լվովում կհայտարարի Կիևին պաշտպանության համար ևս 1 միլիարդ եվրո հատկացնելու մասին, ինչպես նաև Ուկրաինայի դեմ իրագործված ագրեսիայի և հանցագործությունների համար Հատուկ տրիբունալի ստեղծման գործընթացի վերջնական քայլի մասին: Այս մասին հայտնում է Deutshe Welle պարբերականը: 

Համապատասխան հայտարարությամբ Կալլասը հանդես է եկել մայիսի 8-ին Վարշավայում՝ ԵՄ ԱԳ նախարարների ոչ պաշտոնական հանդիպման ժամանակ։ Նա նշել է, որ «վաղը վերջնական քաղաքական հաստատում կտան ռազմական հանցագործությունների և ագրեսիայի հանցագործությունների համար տրիբունալի ստեղծման համար»։

Հատուկ տրիբունալի նախագիծը, որը ոչ պաշտոնապես կոչվում է «Պուտինի տրիբունալ», արդեն պատրաստ է և սպասում է քաղաքական հաստատմանը։ Միջազգային իրավագիտության մեջ ագրեսիայի հանցագործության պատասխանատվությունը կրում է պետության բարձրագույն ղեկավարությունը, ինչն այս քայլը դարձնում է միջազգային քաղաքականության կարևոր քայլ:

Բացի այդ, ինչպես հայտնում է Reuters-ը, Եվրահանձնաժողովը մտադիր է ընդունել Ռուսաստանի դեմ պատժամիջոցների 17-րդ փաթեթը մինչև մայիսի 20-ը։ Կալլասը պարզաբանել է, որ նոր պատժամիջոցների մանրամասները դեռ համաձայնեցված չեն։