Հիմա արդեն շուտով հոկտեմբերն է, իսկ եկող տարվա հունիսին ընտրություններ են լինելու, ի՞նչ արտահերթ ընտրությունների մասին կարող է խոսք լինել։ Այս մասին, այսօր՝ սեպտեմբերի 29–ին, Ստրասբուրգում հայ լրագրողների հետ ճեպազրույցում նշեց ՀՀ վարչապետ Նիկոլ Փաշինյանը՝ հավելելով, որ արտահերթ ընտրությունների թեման ՔՊ–ում քննարկվել ու մերժվել է։ 

Անդրադառնալով 2026 թվականի խորհրդարանական ընտրություններին, նա ասաց. «Հույս ունեմ՝ իմ ասածը առոգանդ չի հնչի, բայց ես մեծ համոզմունք ունեմ, որ 2026 թվականի խորհրդարանական ընտրություններում ժողովուրդը Հայաստանի կառավարման մեզ տված մանդատը երկարացնելու է, որովհետև այս քաղաքականությունը, խաղաղության օրակարգը, որ մենք վարում ենք, այդ քաղաքականության հեղինակը ժողովուրդն է։ 

ՔՊ կուսակցության համագումարում ես իմ ելույթում ասեցի, որ 2021 թվականի նախընտրական պրոցես, մենք մտել ենք ստանդարտ երրորդ Հանրապետությանը հատուկ ռազմահայրենասիրական նախընտրական ծրագրով։ ՔՊ դաշնակցական նախընտրական ծրագիրը գրել ենք, մտել ենք նախընտրական քարոզարշավի մեջ, բայց հընթացս ժողովուրդը այդ տրամաբանությունը փոխել է։ Մեր մոտ չկա ինստիտուտ ընտրություններից հետո նախընտրական ծրագիրը փոխել, բայց նախընտրական քարոզարշավի ողջ ընթացքում տեղի է ունեցել մի բան, ամբողջ քաղաքական նարատիվի և ընկալման ռազմավարության փոփոխություն է տեղի ունեցել, ինչը արտահայտված է կառավարության ծրագրում։ ԱՅնտեղ գրված է, որ ժողովրդի առաջ կառավարության ստանձնած մեծագույն պարտավորությունը խաղաղ զարգացման դարաշրջան բացելն է»,– հայտարարեց Փաշինյանը։