Նոյեմբերի կեսին Ստամբուլում մահացած Գերմանիայից Բյոջեկ ընտանիքը մահացել է հյուրանոցի սենյակի ախտահանման ժամանակ օգտագործված միջատասպանից թունավորումից։ Դժբախտ պատահարի մասին ասված է AHaber հեռուստաալիքի հրապարակած դատաբժշկական զեկույցում։ 

Ըստ փորձագետների եզրակացությունների՝ ողբերգության պատճառը սննդային թունավորումը չէր, այլ միջատներին ոչնչացնելու համար նախատեսված քիմիական նյութի ազդեցությունը։ Ֆոսֆինի հետքեր են հայտնաբերվել հյուրանոցից առգրավված սրբիչների և այլ իրերի վրա։

Ավելի վաղ հաղորդվել էր, որ ախտահանումից հետո հյուրանոցի աշխատակիցներն առաջինն են վատ զգացել, սակայն թաքցրել են այս փաստը։ Աշխատակիցներից մեկը նույնիսկ փակել է հյուրանոցի դռները, սակայն հարցաքննության ժամանակ դրա մասին լռել է։

AHaber-ի տվյալներով՝ զբոսաշրջիկներն, ըստ ամենայնի, թունավորվել են ալյումինի ֆոսֆիդով՝ նյութ, որն օգտագործվում է փայտոջիլներին ոչնչացնելու համար և հակաթույն չունի։ Փորձագետները պարզել են, որ տարածքը ախտահանվել է հյուրերի մոտ առաջին ախտանիշների ի հայտ գալուց ընդամենը մի քանի ժամ առաջ, և թունավոր գոլորշիները, ամենայն հավանականությամբ, թափանցել են նրանց սենյակ օդափոխության համակարգի միջոցով։ Պարզվել է նաև, որ վնասատուների դեմ պայքարի ընկերության ձերբակալված աշխատակիցը անհրաժեշտ վկայագրեր չի ունեցել։

Ինչպես ավելի վաղ հայտնել էր Ստամբուլի առողջապահության դեպարտամենտի ղեկավար Աբդուլլահ Գյուները, ընտանիքի չորրորդ անդամը՝ հայրը, մահացել է նոյեմբերի 17-ին՝ կնոջ և երկու անչափահաս երեխաների մահից մի քանի օր անց։ Harbour Suites հյուրանոցի վրա, որտեղ ընտանիքը հանգրվանել էր, կնիք է դրվել։ 

Տուժածներին հիվանդանոց տեղափոխած տաքսու վարորդ Սերջան Թանրիվերդին հայտնել է, որ երեխաները և մայրը ճանապարհին արյուն են փսխել։

Բացի դրանից, նույն հյուրանոցից հոսպիտալացվել են ևս երեք օտարերկրյա զբոսաշրջիկներ, որոնց վիճակը կայուն է։