Ծայրահեղ արմատական երկու իսրայելցի նախարարներ կիրակի օրը հանդես են եկել Իսրայելի կողմից օկուպացված Արևմտյան ափն անեքսիայի ենթարկելու կոչով՝ ի պատասխան Մեծ Բրիտանիայի, Կանադայի և Ավստրալիայի կողմից Պաղեստին պետության ճանաչման, հաղորդում է AFP-ն։

Իսրայելի ազգային անվտանգության նախարար Իթամար Բեն Գվիրը հայտարարել է․ «Մեծ Բրիտանիայի, Կանադայի և Ավստրալիայի կողմից Պաղեստին պետության ճանաչումը պահանջում է անհապաղ հակաքայլեր․ Հրեաստանի և Սամարիայի վրա շտապ հաստատել Իսրայելի ինքնիշխանությունը և ամբողջությամբ լուծարել պաղեստինյան վարչակազմը»։ Նա հավելել է, որ պատրաստվում է ներկայացնել ինքնիշխանության հաստատման առաջարկ՝ առաջիկա կառավարության նիստում։

Իսրայելի ֆինանսների նախարար Բեցալել Սմոտրիչը, որը բազմիցս հանդես է եկել Արևմտյան ափի անեքսիայի օգտին, նույնպես հանդես է եկել նմանատիպ հայտարարությամբ։

«Այն օրերը, երբ Բրիտանիան և այլ երկրներ որոշում էին մեր ապագան, անցել են։ Մանդատի ժամկետը սպառվել է, և այս հակաիսրայելական քայլին միակ պատասխանը մեր պատմական հայրենիքի՝ Հրեաստանի և Սամարիայի վրա ինքնիշխանության հաստատումն է և Պաղեստին պետության ստեղծման հարցը վերջնականապես օրակարգից հանելը», – հայտարարել է Սմոտրիչը «X»-ում։ «Պարոն վարչապետ, ժամանակը եկել է, ամեն ինչ ձեր ձեռքում է»։