Ադրբեջանի դատարանը Ռուսաստանի օգտին լրտեսության մեղադրանքով ազատազրկման է դատապարտել Եվրասիական շարժման առաջնորդին և նրա տեղակալին: Այս մասին հայտնում են ռուսական զլմ-ները։ 

Ադրբեջանի Եվրասիական շարժման առաջնորդ Իբրահիմ Հասանովը և նրա տեղակալ Իբրահիմ Գումբատովը Ադրբեջանում դատապարտվել են, համապատասխանաբար, 14 և 13 տարվա ազատազրկման: Նրանց մեղավոր են ճանաչել Ռուսաստանի օգտին լրտեսության մեղադրանքով։

Հասանովն ու Գումբատովը ձերբակալվել էին Ադրբեջանի պետական անվտանգության ծառայության կողմից՝ 2023 թվականի հունիսին:

ԱՄՆ նախագահ Դոնալդ Թրամփը հայտարարել է, որ մտադիր չէ վերանայել ԵՄ-ի նկատմամբ ներմուծման 50 % մաքսատուրքերի սահմանման որոշումը, սակայն հաստատել է բանակցություններ վարելու պատրաստակամությունը։

«Ես գործարք չեմ ուզում կնքել: Մենք արդեն մաքսերով գործարք ենք կնքել 50%-ի չափով, սակայն, կրկին, մաքսատուրքերը չեն կիրառվի, եթե ԵՄ երկրները արտադրություն ստեղծեն ԱՄՆ-ում», – ասել է Թրամփը՝ պատասխանելով Սպիտակ տանը լրագրողների հարցին, թե հնարավոր է ԵՄ-ի հետ գործարքի հասնել մինչև հունիսի 1-ը, երբ ուժի մեջ կմտնեն 50%-անոց մաքսատուրքերը:

«Եթե ինչ-որ մեկը գա և ցանկություն հայտնի այստեղ գործարան կառուցել, մենք կարող ենք քննարկել որոշ ուշացումներ, երբ նրանք կառուցեն այն: «Կարծում եմ, որ դա տեղին կլինի», -նշել է Թրամփը:շ

Հիշեցնենք, որ ապրիլի 2-ին Դոնալդ Թրամփը հայտարարեց 185 երկրներից, այդ թվում՝ Չինաստանից և ԵՄ-ից ներմուծվող ապրանքների համար «արդար» մաքսատուրքեր սահմանելու մասին՝ 10%-ից մինչև 50%: Նա որոշումը անվանեց «ջրբաժան» ամերիկյան տնտեսության համար՝ մեղադրելով մյուս երկրներին ԱՄՆ-ի առևտրային քաղաքականության տասնամյակների թուլություններից օգուտ քաղելու մեջ:

Մայիսի 23-ի ժամը 21.00-ի դրությամբ մայրաքաղաքում և մարզերում պահպանվող հատուկ տարածքներ է տեղափոխվել «Վերջին զանգի» միջոցառումների մասնակից անձանց 262 տրանսպորտային միջոց, որոնցից 148-ի ղեկին եղել են անչափահասներ: Այս մասին տեղեկացնում է Ոստիկանությունը: 

«Կրկին հորդորում ենք զերծ մնալ ավտոմեքենաները երեխաներին վստահելուց․ յուրաքանչյուր դեպք առաջացնելու է իրավական հետևանք։

Ուժեղացված հսկողությունը շարունակվում է»,-նշվում է հաղորդագրության մեջ։

Ուկրաինայի ԱԳՆ-ն աշխատում է Ուկրաինայի և Ռուսաստանի նախագահներ Վլադիմիր Զելենսկիի և Վլադիմիր Պուտինի հանդիպման ուղղությամբ։

Այս մասին, ըստ Unian.net  լրատվական գործակալության, հայտարարել է Ուկրաինայի արտաքին գործերի նախարար Անդրեյ Սիբիգան։

«Այն դիրքորոշումը, որի վրա մենք նույնպես աշխատում ենք, նախագահների մակարդակով հանդիպումն է, մենք ընդունում ենք, որ այդ հանդիպումը կարող է լինել ընդլայնված կազմով»,- նշել է նա։

Նախարարը հիշեցրել է, որ կողմերը պայմանավորվել են իրականացնել ռազմագերիների փոխանակում, և դրա իրականացումն արդեն սկսվել է։ Այժմ Ուկրաինան սպասում է, որ Ռուսաստանի Դաշնությունը կներկայացնի ապագա անվերապահ զինադադարի իր տեսլականը: Նման փաստաթուղթ է պատրաստվում նաև Կիևում։

Սիբիգան նաև նշել է, որ ուկրաինական կողմը շատ կցանկանար, որ հանդիպմանը մասնակցեր ԱՄՆ նախագահ Դոնալդ Թրամփը։

«Մենք շատ կցանկանայինք, որ նախագահ Թրամփը միանա դրան: Եվ մենք միշտ պնդում ենք, որ Եվրոպան պետք է լինի ապագա հնարավոր բանակցությունների սեղանի շուրջ»,- ընդգծել է Սիբիգան։

ԱՄՆ նախագահ Դոնալդ Թրամփը հայտարարել է, որ խորհուրդ է տալիս Եվրամիությունից ներմուծվող ապրանքների նկատմամբ 50% մաքսատուրքեր սահմանել հունիսի 1-ից՝ նշելով, որ առևտրի հարցում ԵՄ-ի հետ դժվար է գործ ունենալ: Այս մասին նա գրել է իր Truth Social հարթակում։

«Շատ դժվար է եղել գործ ունենալ Եվրամիության հետ, որը ձևավորվել է առևտրի ոլորտում ԱՄՆ-ից օգուտ քաղելու հիմնական նպատակով…. Նրանց հետ մեր քննարկումները ոչ մի տեղ չեն տանում», – գրել է Թրամփը։

«Հետևաբար, ես խորհուրդ եմ տալիս ուղիղ 50% մաքսատուրքեր սահմանել Եվրոպական միության նկատմամբ, սկսած 2025 թ. հունիսի 1-ից։ Մաքսատուրք չի լինի, եթե ապրանքը կառուցվի կամ արտադրվի Միացյալ Նահանգներում», – հավելել է ԱՄՆ նախագահը։

Դոնալդ Թրամփը մեծ մաքսատուրքեր էր սահմանել իր առևտրային գործընկերների նկատմամբ, սակայն 90 օրով կասեցրել էր դրանց գործողությունը՝ բանակցություններ վարելու ժամանակ տրամադրելու համար։ Այժմ երկրների մեծ մասից ներմուծվող ապրանքների համար գործում են 10% բազային մաքսատուրքեր։

Թուրքիայի իրավապահ մարմինները ուրբաթ ձերբակալել են 56 զինվորականի և 9 ոստիկանի՝ մեղադրելով նրանց արգելված «Հիզմեթ» կազմակերպությանը մասնակցելու համար: Այն ղեկավարում էր թուրք հոգևորական Ֆեթուլլահ Գյուլենը, որն անցյալ տարվա հոկտեմբերին մահացել է Միացյալ Նահանգներում։

Թուրքիայի իշխանությունները «Հիզմեթ» կազմակերպությանը մեղադրում են «պետության մեջ պետություն» ստեղծելու համար։ Նրանց նաև պատասխանատու են համարում երկրում 2016 թվականի հուլիսի 15-ին տեղի ունեցած ռազմական հեղաշրջման փորձի համար։ Այդ ժամանակ զոհվել էր մոտ 250 մարդ։ Հեղաշրջումը ճնշվել էր, հետաքննության ընթացքում մոտ 77.000 մարդ էր կալանավորվել, իսկ ևս 130.000-ը՝ ազատվել պետական ​​ծառայությունից։

Թուրքիայի իրավապահ մարմինները ձերբակալել են նաև Ստամբուլի քաղաքապետարանի 45 աշխատակցի, այդ թվում՝ կալանավորված քաղաքապետ Էքրեմ Իմամօղլուի մի քանի բարձրաստիճան օգնականի, հաղորդում է Anadolu-ն։

AFP-ի հաղորդմամբ՝ կոռուպցիայի համար կասկածվող պաշտոնյաների դեմ գործողությունը սկսվել է մայիսի 20-ին և այդ օրը ձերբակալվել է ևս 20 մարդ։ Թուրքիայի նախագահ Ռեջեփ Թայիփ Էրդողանը հայտարարել է, որ Իմամօղլուի հետ կապված կա «աննախադեպ հանցավոր կազմակերպություն»։

Երկրի գլխավոր ընդդիմադիր քաղաքական ուժը՝ Ժողովրդահանրապետական ​​կուսակցությունը, կարծում է, որ իշխանությունների այս գործողությունները նպատակ ունեն խոչընդոտել կուսակցությունը ներկայացնող Իմամօղլուի մասնակցությունը 2028-ի նախագահի ընտրությանը:

Հռոմում ավարտվել է Իրանի միջուկային ծրագրի շուրջ ԱՄՆ-ի և Իրանի պաշտոնյաների միջև բանակցությունների հինգերորդ փուլը։ Այն տևել է երեք ժամ։

Իրանա-ամերիկյան խորհրդակցությունների հինգերորդ փուլից հետո Իրանի արտաքին գործերի նախարար Աբբաս Արաղչին հայտարարել է, որ Հռոմում կայացած հանդիպումից հետո Միացյալ Նահանգները սկսել է շատ ավելի լավ հասկանալ Թեհրանի դիրքորոշումը միջուկային ծրագրի վերաբերյալ։

«Այսօր Հռոմում տեղի ունեցավ Միացյալ Նահանգների հետ անուղղակի բանակցությունների հինգերորդ փուլը։ Ես կարող եմ այն անվանել ամենապրոֆեսիոնալներից մեկը։ Մենք ներկայացրել ենք Իրանի դիրքորոշումը, որը չափազանց պարզ է: Կարծում եմ, որ ամերիկյան կողմը սկսել է շատ ավելի լավ հասկանալ Իրանի Իսլամական Հանրապետության դիրքորոշումը»,- ասել է նա իրանական պետական հեռուստառադիոընկերության եթերում:

Օմանի արտգործնախարար Բադր Ալբուսաիդին էլ X-ի իր էջում գրել է. «Այսօր Հռոմում ավարտվեց իրանա-ամերիկյան բանակցությունների հինգերորդ փուլը՝ որոշ, բայց ոչ վերջնական առաջընթացով: Մենք հույս ունենք առաջիկա օրերին որոշակիացնել մնացած հարցերը, ինչը թույլ կտա առաջ շարժվել դեպի ընդհանուր նպատակ՝ հասնել կայուն և արժանապատիվ համաձայնության»:

Բանակցությունների ընթացքում Իրանը բազմիցս ընդգծել է, որ ուրանի հարստացման գործընթացը շարունակելու իր իրավունքը քննարկման ենթակա չէ։ Միաժամանակ, ԱՄՆ գլխավոր բանակցող Սթիվ Ուիթքոֆը խնդիրը որակել Է որպես «կարմիր գիծ», հիշեցնելով, որ «ԱՄՆ-ն չի կարող թույլ տալ ուրանի նույնիսկ աննշան հարստացում»։

ԱՄՆ նախագահ Դոնալդ Թրամփի այցը Մերձավոր Արևելք նշանավորեց այլ երկրների գործերին միջամտելու և արտասահմանում պետականաշինության քաղաքականությունը Վաշինգտոնի կողմից մերժմամբ: Այս մասին հայտարարել է ԱՄՆ փոխնախագահ Ջեյ Դի Վենսը՝ ելույթ ունենալով Մերիլենդ նահանգի Անապոլիս քաղաքում գտնվող Միացյալ Նահանգների ռազմածովային ակադեմիայի ավարտական ​​կուրսի առջև:

Նա հիշեցրել է, որ անցած շաբաթ Թրամփը մերձավորարևելյան շրջագայություն է կատարել, որի ընթացքում այցելել է Սաուդյան Արաբիա, Քաթար և ԱՄԷ։ Ուղևորության ամենակարևոր տարրը, Վենսի խոսքերով «այն արտաքին քաղաքականությունից շեղումն էր, որը Միացյալ Նահանգները ունեցել է տասնամյակներ շարունակ»:

«Մենք իրականացրել ենք երկարաժամկետ արտաքին քաղաքականության փորձ, որտեղ մենք փոխանակել ենք մեր դաշնակիցների համար պաշտպանությունն ու անվտանգությունը այլ երկրների գործրին միջամտության հետ», - ասել է ԱՄՆ փոխնախագահը՝ նշելով, որ դա տեղի է ունեցել «նույնիսկ այն երկրներում, որոնք քիչ առնչություն ունեն ԱՄՆ հիմնական շահերի հետ»:

Նա նշել է, որ սա «քաղաքականության զգալի փոփոխություն» է Միացյալ Նահանգներում:

Մայիսի 23-ին, ժամը 15:56-ին Արմավիրի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Այգեշատ գյուղի ջրանցքը եղնիկ է ընկել․ դուրս բերելու համար անհրաժեշտ է փրկարարների օգնությունը։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ:

Փրկարարները եղնիկին դուրս են բերել ջրանցքից և հանձնել Արմավիր քաղաքի կենդանաբանական այգի։

Ռուսաստանը շարունակում է մնալ զենքի խոշորագույն արտահանողների հնգյակում, հայտարարել է Ռուսաստանի նախագահ Վլադիմիր Պուտինը։

«Ռուսաստանը շարունակում է մնալ համաշխարհային զենքի շուկայի առաջատար հնգյակում և պահպանում է իր առաջատար դիրքերը արտահանման ոլորտում բազմաթիվ ոլորտներում», - ասել է Պուտինը ռազմատեխնիկական համագործակցության վերաբերյալ խորհրդակցության ժամանակ։