Թուրքիայի արտաքին գործերի նախարար Հաքան Ֆիդանը հայտնել է, որ օգոստոսի 25-ին Ջիդդայում իր իրանցի գործընկեր Աբբաս Արաղչիի հետ կայացած հանդիպման ժամանակ քննարկել է Իրանի միջուկային ծրագրի շուրջ Թեհրանի և Վաշինգտոնի ընդհատված բանակցային գործընթացը։

Թուրքիայի ԱԳ նախարարն այդ մասին ասել է լրագրողների հետ զրույցում։

«Իրանը Եվրոպայի հետ ճանապարհ ունի ընթանալու։ Ինչ վերաբերում է միջուկային ծրագրի շուրջ բանակցություններին  ԱՄՆ-ի հետ, որոնք ներկայում դադարեցված են… ես հեռախոսազրույցներ եմ ունեցել ԱՄՆ-ի պետքարտուղար Մարկո Ռուբիոյի հետ։ Ես իմ իրանցի գործընկերոջ հետ նույնպես քննարկել եմ այս հարցը, մենք հնարավորություն ունեցանք այս օրակարգը գնահատել ԱՄՆ-ից արված մի քանի մեկնաբանությունների համատեքստում»,- ասել է Ֆիդանը։

Մոսկվան չի պատրաստվում փոխել Ուկրաինայի հետ կապված փողոցների և քաղաքի այլ օբյեկտների անվանումները. հայտարարել է քաղաքապետ Սերգեյ Սոբյանինը «Կոմսոմոլսկայա պրավդա»-ին տված հարցազրույցում:

Լրագրողը հիշեցրել է, որ Ուկրաինայում վերանվանում են ՍՍՀՄ հետ կապված փողոցները, և ոմանք առաջարկում են պատասխան միջոցներ ձեռնարկել: Նա նշել է, որ Մոսկվայում կան, օրինակ, Լեսյա Ուկրաինկայի փողոցը, Տարաս Շևչենկոյի ափամերձը և «Կիևսկայա» մետրոյի կայարանը:

«Դուք կարդում եք, թե ինչ է ասում նախագահը. ուկրաինական ժողովուրդը եղբայրական ժողովուրդ է: Այն, որ այսօր Ուկրաինայի կառավարության ղեկին կանգնած են ինչ-որ խելագարներ, դա չի նշանակում, որ պետք է խզել կապը հենց ժողովրդի հետ, փոխել անվանումները և հայտարարել, որ այժմ նրանց ատում ենք: Դա անպատասխանատու կլիներ»,- պատասխանել է Սոբյանինը:

Ադրբեջանի նախարարների կաբինետում տեղի կունենա հատուկ նիստ՝ նվիրված Իլհամ Ալիևի Վաշինգտոն այցին։ 

Ինչպես հաղորդում է ԱՊԱ-ն, նիստը կկայանա այսօր:

Հիշեցնենք, որ օգոստոսի 8-ին Սպիտակ տանը կայացած Հայաստանի Հանրապետության վարչապետ Նիկոլ Փաշինյանի, Ամերիկայի Միացյալ Նահանգների նախագահ Դոնալդ Թրամփի և Ադրբեջանի Հանրապետության նախագահ Իլհամ Ալիևի եռակողմ հանդիպմանը ստորագրվել է Ադրբեջանի Հանրապետության նախագահի, Հայաստանի Հանրապետության վարչապետի և Ամերիկայի Միացյալ Նահանգների նախագահի համատեղ Հռչակագիրը` Ամերիկայի Միացյալ Նահանգների մայրաքաղաք Վաշինգտոնում տեղի ունեցած հանդիպման արդյունքների մասին:

Թեհրանը սպառնում է պատասխան միջոցներով Ավստրալիայից Իրանի դեսպանի արտաքսումից հետո:

«Մեղադրանքները լիովին անհիմն են: Դիվանագիտական ​​մակարդակով ցանկացած անտեղի և անհիմն գործողություն կպատասխանվի փոխադարձ միջոցներով», - հայտարարել է Իրանի ԱԳՆ խոսնակ Էսմայիլ Բաղային:

Ցուցարարները հրդեհել են Իսրայելի փողոցները:

Նրանք, այրելով անվադողեր և ձեռքներին պահելով «Մեռած պատանդները չեն խոսում» և «Կառավարությունը սպանում է պատանդներին» գրություններով պաստառներ, պահանջել են անհապաղ համաձայնության գալ ՀԱՄԱՍ-ի հետ։

Տեղեկատվական անվտանգության հարցերով փորձագետ, կիբերանվտանգության մասնագետ Սամվել Մարտիրոսյանը զգուշացնում է նոր խաբեության մասին։

«Կրկնին նոր ալիք է խաբեությունների։ Զանգում են, առաջարկում 5G կաօը միացնել։ Կամ բանկից։ Բոլոր դեպքերում առաջարկում են կպնել WhatsApp-ով, ինչ-որ գործողություններ անել, հավելված ներբեռնել։

Մի տրվեք, ընկերությունը երբեք նման բան չի առաջարկի»,- գրել է Ս. Մարտիրոսյանը։

ԱՄՆ նախագահ Դոնալդ Թրամփը պատրաստ է հանդիպել Հյուսիսային Կորեայի առաջնորդ Կիմ Չեն Ընի հետ։ Այս մասին նա ասել է իր հարավկորեացի գործընկերոջ հետ հանդիպման ժամանակ, հաղորդում է CNN-ը։

Լին ասել է. «Ես կարծում եմ, որ դուք առաջին նախագահն եք, ով այդքան մեծ հետաքրքրություն է ցուցաբերել համաշխարհային խաղաղության խնդիրների նկատմամբ և իսկապես հաջողությունների է հասել»։ «Ուստի հույս ունեմ, որ դուք խաղաղություն կհաստատեք Կորեական թերակղզում… և կհանդիպեք Կիմ Չեն Ընի հետ»։

Նա հավելել է, որ «ակտիվորեն կաջակցի» Թրամփին, եթե վերջինս ցանկանա «խաղաղարարի դեր ստանձնել» և որ ԱՄՆ նախագահը «միակ մարդն է, ով իսկապես կարող է լուծել» Հյուսիսային և Հարավային Կորեաների միջև լարվածությունը։ Երկու երկրները տեխնիկապես մնում են պատերազմի վիճակում՝ 1953 թվականի Կորեական պատերազմի ավարտից հետո կնքված զինադադարով 

«Ես դա կանեմ և մենք բանակցություններ կվարենք։ Նա կցանկանար հանդիպել իմ հետ։ Մենք անհամբեր սպասում ենք նրա հետ հանդիպմանը և մենք կբարելավենք հարաբերությունները», - ասել է Թրամփը։

Թրամփի հետ հանդիպումից հետո Լին հայտարարել է, որ Հյուսիսային Կորեան այժմ տարեկան կարող է 10-ից 20 միավոր միջուկային զենք արտադրել, քանի որ երկիրն ընդլայնել է իր ներուժը։

Ֆրանսիայում ձախակողմյան կուսակցությունը խորհրդարանին կներկայացնի Մակրոնին պաշտոնանկ անելու առաջարկ:

Կուսակցության առաջնորդ Ժան-Լյուկ Մելանշոնն այս մասին ասել է France Inter ռադիոկայանի եթերում։

«Մեկ տարի առաջ մենք արդեն բարձրացրել էինք նախագահի հրաժարականի հարցը։ Հիմա մենք դա կրկին կանենք սեպտեմբերի 23-ին, և, բացի անվստահության քվեարկությունից, որը, ամենայն հավանականությամբ, կկորցնի իր իմաստը, քանի որ այդ ժամանակ կառավարությունն արդեն տապալված կլինի, մենք կներկայացնենք Մակրոնին իշխանությունից հեռացնելու առաջարկ», - ասել է նա։

Ուկրաինայի զինված ուժերի կողմից «Դրուժբա» նավթամուղի վրա հարձակումը համարժեք է Ուկրաինայի կողմից Հունգարիայի և Սլովակիայի վրա հարձակմանը, հայտարարել է Հունգարիայի արտաքին գործերի նախարար Պետեր Սիյարտոն «Մարտիկների ժամ» հաղորդման ժամանակ։

«Այս հարձակումները ուղղված են Հունգարիայի և Սլովակիայի դեմ, դրանք վնասում են Հունգարիային և Սլովակիային, դրանք որևէ կապ չունեն Ռուսաստանի հետ», – ասել է նա։

Նախարարը նաև նշել է, որ Ուկրաինայի նախագահ Վլադիմիր Զելենսկին «բացահայտ, կոպիտ և անամոթաբար սպառնացել է Հունգարիային»։ Նա նկատի ուներ այն հայտարարությանը, որում նախագահը «Դրուժբա»-ի գոյությունը կապել է Բուդապեշտի դիրքորոշման հետ՝ Ուկրաինայի ԵՄ-ին անդամակցության հարցում։

«Նախագահ Զելենսկին հստակեցրել է, որ եթե Հունգարիան չընդունի ուկրաինամետ դիրքորոշում նրանք կշարունակեն հարձակվել «Դրուժբա» խողովակաշարի վրա, որը կարևոր է Հունգարիայի էներգետիկ անվտանգության համար», – ասել է նախարարը։

Գերմանիան մտադիր չէ ճանաչել Պաղեստինի պետականությունը՝ չնայած իր որոշ գործընկերների դիրքորոշմանը։ Այս մասին հայտարարել է Գերմանիայի կանցլեր Ֆրիդրիխ Մերցը Կանադայի վարչապետ Մարկ Քառնիի հետ համատեղ մամուլի ասուլիսում, փոխանցում է ՏԱՍՍ-ը:

«Մենք չենք միանա այս նախաձեռնությանը [Պաղեստինի ճանաչումը]: Մենք կարծում ենք, որ պետականության ճանաչման պայմանները ոչ մի կերպ չեն կատարվել»,-ասել է Մերցը՝ ավելացնելով. «Վերջին օրերի և ժամերի իրադարձությունները չեն փոխել մեր դիրքորոշումը այս հարցում»:

Մերցն ասել է, որ Գերմանիայի իշխանությունները նույնպես մտադիր չեն ճանաչել Պաղեստինը ՄԱԿ-ի Գլխավոր ասամբլեայի նստաշրջանում։