Վրաստանում վերսկսվել են ընդդիմության ցույցերը։ Վրաստանի դրոշներից բացի ցուցարարների ձեռքերին կան նաև ԵՄ-ի, ԱՄՆ-ի և Ուկրաինայի դրոշները։

Ավելի վաղ հայտնել էինք, որ ընտրություններից հետո Վրաստանում բողոքի ակցիաներ էին սկսվել, ցուցարարները կոտրելով երկաթե արգելապատնեշները ներխուժել էին Վրաստանի նախագահ Միխեիլ Կավելաշվիլիի նստավայրի բակ: Հատուկ նշանակության ուժերը նրանց դեմ արցունքաբեր գազ են կիրառել: Ավելի ուշ շենքի դրսում լրացուցիչ հատուկ նշանակության ուժեր էին մոբիլիզացվել, իսկ ցուցարարների դեմ ջրցան մեքենա էր կիրառվել:

Հազարավոր իսրայելցիներ հավաքվել են Թել Ավիվի կենտրոնում գտնվող այսպես կոչված «Պատանդների հրապարակում»՝ սպասելով Գազայի հատվածում երկու տարուց ավելի գերության մեջ անցկացրած առևանգված տղամարդկանց ազատ արձակմանը, հաղորդում է «Պատանդների ընտանիքների ֆորումը»։

Kan պետական ​​հեռարձակողը հաղորդում է, որ պատանդների հարազատները ներկայումս հավաքվում են Իսրայելի հարավում գտնվող Ռեյմի ավիաբազայում, որտեղ, ինչպես սպասվում է, առևանգվածներին կտեղափոխեն ազատ արձակվելուց հետո։

Երկուշաբթի առավոտյան պաղեստինյան «ՀԱՄԱՍ» շարժումը հրապարակել է այսօր ազատ արձակվելիք 20 կենդանի պատանդների ցուցակը։ Նրանց թվում է Դոնբասի տարածաշրջանի բնիկ Մաքսիմ Խարկինը։ Պատանդների առաջին խումբը, ինչպես սպասվում է, կազատ արձակվի Մոսկվայի ժամանակով ժամը 8:00-ին։

Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են։

Կորեայի ձորի ճանապարհի հիմնանորոգման աշխատանքներով պայմանավորված, հաշվի առնելով քարաթափման վտանգը, օգոստոսի 19-ից ճանապարհը ժամանակավորապես փակ է երթևեկության համար։

Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը բաց է բոլոր տեսակի տրանսպորտային միջոցների համար։

Disney ընկերությունը վերսկսել է 2010թ. «Ռապունցել. խճճված պատմություն» մուլտֆիլմի խաղարկային ռիմեյքի աշխատանքները: Այս մասին հաղորդում է Deadline-ը:

Հաղորդվում է, որ Սքարլեթ Յոհանսոնին առաջարկվել է գլխավոր անտագոնիստի՝ Գոթել մայրիկի դերը։ Մայքլ Գրեյսին («Մեծագույն շոումեն») կնկարահանի ֆիլմը, իսկ սցենարը կադապտացնի Ջենիֆեր Քեյթին Ռոբինսոնը:

«Ռապունցել. խճճված պատմություն» մուլտֆիլմի ռիմեյքի ծրագրերի մասին առաջին անգամ հայտարարվեց 2023 թվականին: Այս գարնանը լրատվամիջոցները հայտնեցին, որ Disney-ը հրաժարվել է նկարահանումներից՝ «Սպիտակաձյունիկը» ֆիլմի ցածր ցուցանիշների պատճառով։

Մեկօրյա հանգստից հետո շախմատի Եվրոպայի թիմային առաջնության մասնակիցները Բաթումում այսօր վերսկսել են պայքարը:

7-րդ տուրում Հայաստանի կանանց ազգային հավաքականը 2,5:1,5 հաշվով հաղթել է հունգարուհիներին եւ ընթանում է մրցաշարային աղյուսակի 9-րդ հորիզոնականում, իսկ տղամարդկանց ընտրանին 2:2 է խաղացել Իսպանիայի հավաքականի հետ եւ եզրափակում է ուժեղագույն տասնյակը:

ՀՀԿ Գործադիր մարմնի անդամ Էդուարդ Շարմազանովի ֆեյսբուքյան գրառումը. «Համեմատեք Սերժ Սարգսյանի բանակցային փաթեթն ու Փաշինյանի բերած աղետը։

2008-2018թթ. Արցախյան հարցի բանակցությունների ժամանակ ՀՀ իշխանությունները բանակցել են հանրաքվեի միջոցով Արցախի կարգավիճակի հստակեցումը, իսկ փաստացի Արցախի անկախության միջազգային ճանաչման հարցը։

Այդ փաստը բազմիցս արձանագրել են ԵԱՀԿ Մինսկի խմբի համանախագահները, իսկ վերջին անգամ դրա մասին համանախագահներից խոսեց ռուսաստանցի համանախագահ Պոպովը 2021-ի հունվարի 13-ին։
2009-2013թթ. ԱՄՆ, ՌԴ և Ֆրանսիայի նախագահները 5 հայտարարություն են ընդունել, որտեղ ամրագրված էր Արցախի ժողովրդի ինքնորոշման իրավունքի պարտադիր իրացման փաստը։

Այդ սկզբունքն ամրագրված էր թե ՀՀ-ԵՄ գործըկերության պայմանագրում/CEPA/, թե ՀԱՊԿ ղեկավարների պաշտոնական հայտարարության մեջ։

Որոշվում էր Արցախում պարտադիր իրավական ուժ ունեցող հանրաքվեի անցկացման փաստը, որի արդյունքում Լաչինի ու Քելբաջարի շրջանները մնալու էին հայկական վերահսկողության տակ մինչև հանրաքվեի անցկացումը, 5 շրջաններից էլ դուրս էին գալու հայկական ուժերը և տեղակայվելու էին միջազգային խաղաղապահներ։

Այսինքն Լաչինի ու Քելբաջարի հարցը հանրաքվեի ժամկետ չնշելու պարագայում հստակ փոխկապակցված էր հանրաքվեի անցկացման հետ։

Ի դեպ, այդ ամենն արվելու էր խաղաղ ճանապարհով,առանց զոհերի, բացառելով պատերազմի հեռանկարը։

Հենց այդ պատճառով էր Իլհամ Ալիևը 44-օրյա պատերազմից հետո Քելբաջարում ասում, որ «Քելբաջարը պետք է մնար հայերին»։

Սա էր բանակցում Սերժ Սարգսյանը, որի բանակցած փաթեթին կապիտուլյանտ Փաշինյանն անուն էր կպցնում։

Դե հիմա համեմատեք Սերժ Սարգսյանի բանակցածն ու Փաշինյանի «բանակցածի» արդյունքում Արցախի և հազարավոր հայորդիների կորուստը, Արցախի հայաթափումն ու արցախահայերի բռնագաղթը, ինչպես նաև Տավուշի տարածքների հանձնումն ու Ադրբեջանի կողմից ՀՀ ինքնիշխան տարածքի 240 քառ.կմ օկուպացիան»։

Աղբյուրը` Էդուարդ Շարմազանով

Հոկտեմբերի 12-ին ՆԳՆ փրկարար ծառայության ստորաբաժանումները ՆԳ նախարար Արփինե Սարգսյանի հանձնարարությամբ շարունակել են հրդեշիջման աշխատանքները Երևանի Նուբարաշենի կենցաղային աղբավայրի մոտ 4 հա տարածքում։

Հրդեհաշիջման աշխատանքների ընթացքում ՆԳՆ փրկարարական ծառայողներն արդյունավետ համագործակցել են Երևանի քաղաքապետարանի աշխատակիցների հետ: 

Տեղում աշխատանքները համակարգել է ՆԳՆ Փրկարար ծառայության տնօրեն-ՆԳ նախարարի տեղակալ Կամո Ցուցուլյանը:  

Օգտագործվել է շուրջ 1400 տոննա ջուր, իրականացվել է շուրջ 900 երթ հողալցում՝ կրակի տարածումը կանխելու համար։ 

Բաց կրակ չկա․ ծխի ծավալը էականորեն նվազել է: 

Աղբավայրում բռնկված հրդեհը մեկուսացվել է ժամը 20։06-ին։

Հրդեհաշիջման աշխատանքներն նույն ինտենսիվությամբ շարունակվում են:

Արամուսում կատարված հանցագործությունը բացահայտվել է․ կա մեկ ձերբակալված։

Հոկտեմբերի 12-ին ՆԳՆ ոստիկանության Կոտայքի մարզի օպերատիվ կառավարման կենտրոն հաղորդում է ստացվել, որ Արամուս բնակավայրի վարչական տարածքում գտնվող դաշտամիջյան հատվածում տղամարդու և կնոջ դիեր կան։

Ըստ նախնական տեղեկությունների՝ սպանությունը կատարել է Արամուսի 61-ամյա մի բնակիչ։ Նա իր անունով հաշվառված որսորդական հրացանով կրակոցներ է արձակել ամուսինների՝ Արամուս գյուղի բնակիչներ՝ 64-ամյա տղամարդու ու 59-ամյա կնոջ ուղղությամբ։

Սպանություն կատարելու անմիջականորեն ծագած կասկածանքով 61-ամյա տղամարդը հայտնաբերվել և ձերբակալվել է։ Հայտնաբերվել է նաև հանցագործության գործիք հրազենը։

Նախաձեռնվել է քրեական վարույթ, հանգամանքները պարզվում են։