Իսրայելական կողմը պատրաստ է անհապաղ ընդունել Գազայի հատվածում պահվող բոլոր պատանդներին, որոնք պետք է ազատ արձակվեն ՀԱՄԱՍ–ի ղեկավարության կողմից՝ հրադադարի համաձայնագրի շրջանակներում: Այս մասին հայտարարել է վարչապետ Բենիամին Նեթանյահուն, հաղորդում է Գազետան:

«Իսրայելը պատրաստ է անհապաղ ընդունել բոլոր պատանդներին», - ասել է նա:

Ավելի վաղ The Wall Street Journal-ը (WSJ), հղում անելով աղբյուրներին, հաղորդել էր, որ ՀԱՄԱՍ–ի ղեկավարությունը պատրաստ է Իսրայելին հանձնել 20 պատանդի արդեն կիրակի՝ հոկտեմբերի 12-ին, սակայն կա հնարավորություն, որ դա հետաձգվի: Ըստ տեղեկությունների՝ պաղեստինյան շարժումը համապատասխան հաղորդագրություն է ուղարկել արաբ միջնորդների միջոցով:

Նորվեգիայի հավաքականը ջախջախիչ հաղթանակ տարավ Իսրայելի նկատմամբ ֆուտբոլի աշխարհի 2026 թվականի առաջնության ընտրական մրցաշարի փուլի՝ 5:0։ Խաղը տեղի է ունեցել Օսլոյի «Ուլևոլ» մարզադաշտում։

Նորվեգական թիմի հարձակվող Էրլինգ Հալանդը երկու անգամ չիրացրեց 11-մետրանոցը, սակայն խաղում հեթ-տրիկ ձևակերպեց և հավաքականի կազմում իր գոլերի թիվը հասցրեց 51-ի։ Իսրայելի թիմի ֆուտբոլիստներ Անան Խալիլին և Իդան Նախմիասը մեկական ինքնագոլի հեղինակ դարձան այս խաղում։

Նորվեգիայի հավաքականը վաստակեց 18 միավոր և շարունակում է գլխավորել I խումբը։ Իսրայելը 9 միավորով գտնվում է երրորդ հորիզոնականում։

Աշխարհի առաջնության ընտրական փուլի հաջորդ խաղը նորվեգացիները կանցկացնեն նոյեմբերի 13-ին Էստոնիայի դեմ, իսկ իսրայելցիները հոկտեմբերի 14-ին կհանդիպեն Իտալիայի հետ։

Իսրայելի զինվորականները պլանավորում են ոչնչացնել Գազայում ՀԱՄԱՍ-ի թունելները պատանդների ազատ արձակումից հետո, հայտարարել է պաշտպանության նախարար Իսրայել Կացը։

«Պատանդների վերադարձից հետո Իսրայելի համար ամենամեծ խնդիրը կլինի Գազայի բոլոր ՀԱՄԱՍ-ի ահաբեկչական թունելների ոչնչացումը՝ անմիջապես Իսրայելի պաշտպանության բանակի և ԱՄՆ ղեկավարության ու վերահսկողության ներքո ստեղծվող միջազգային մեխանիզմի կողմից։ Սա Գազայի ապառազմականացման և ՀԱՄԱՍ-ի զինաթափման համաձայնեցված սկզբունքի իրականացման գլխավոր նպատակն է», - նրա խոսքերն է մեջբերել նախարարության մամուլի ծառայությունը։

Երեկ՝ հոկտեմբերի 11-ին, արտակարգ դեպք է տեղի ունեցել Երևանում: Ժամը 18:00-ին ՀՀ ներքին գործերի նախարարության ոստիկանության համայնքային ոստիկանության գլխավորությամբ վարչության Շենգավիթի բաժին է դիմել Երևանի բնակիչ 40-ամյա մի կին, և հայտնել, որ իր 12-ամյա տղան հոկտեմբերի 9-ին՝ ժամը 18:00-ի սահմաններում, դուրս է եկել տնից և մինչև այժմ ոչ մի տեղեկություն չունի երեխայի գտնվելու մասին ու այդ օրերին չի դիմել ոստիկանություն, փորձել է իր և բարեկամների ուժերով գտնել երեխային: Այս մասին հայտնում է Shamshyan.com-ը։ 

Մի քանի ժամ շարունակ ոստիկանության Շենգավիթի բաժնի 20-ից ավելի համայնքային ոստիկաններ ձեռնարկել են անհրաժեշտ օպերատիվ հետախուզական միջոցառումներ և երեկ պարզել են՝ որտեղ է գտնվում երեխան ու կարողանում են բացատրական աշխատանքների արդյունքում ճշտել երեխային գտնվելու վայրը: 

Համայնքային ոստիկանները ժամանում են նշված վայր, որտեղից էլ տղային տեղափոխում են ոստիկանության Շենգավիթի բաժին: 

Ֆոտոլրագրողի տեղեկություններով՝ երխան ոստիկաններին հայտնել էր, որ ինքը հոկտեմբերի 9-ից դուրս է եկել տնից, շրջել Երևան քաղաքի տարբեր փողոցներում, գիշերել դրսում, իսկ տնից հեռացել է, քանի որ 36-ամյա հայրը իրեն անընդհատ ենթարկել է ֆիզիկական ներգործության: 

Դեպքի փաստով ոստիկանության Շենգավիթի բաժնում փաստաթղթեր են կազմվել, որոնք փոխանցվել են ՀՀ քննչական կոմիտեի Երևան քաղաքի քննչական վարչութան Շենգավիթի քննչական բաժին:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։

ՀՀ ՄԻՊ-ից հայտնում են․

Բոլորիս պարտականությունն է ապահովել յուրաքանչյուրի հավասար իրավունքներն ու հնարավորությունները կյանքի բոլոր ոլորտներում։ Յուրաքանչյուր աղջիկ պետք է ունենա զարգանալու, կրթություն ստանալու և արժանապատիվ կյանքով ապրելու հնարավորություն՝ զերծ որևէ խտրականությունից, ասել է ՄԻՊ Անահիտ Մանասյանը։

Դեռևս հոկտեմբերի 7-ին Մարդու իրավունքների պաշտպանի և Հայաստանում Նիդերլանդների Թագավորության դեսպանության համագործակցությամբ Գեղարքունիքի մարզի Գավառ համայնքում անցկացվել է «Սեռով պայմանավորված հղիության արհեստական ընդհատումների կանխարգելում․ իրազեկում և հասարակական գիտակցության ձևավորում» թեմայով քննարկում և ֆիլմի դիտում, որն ուղղված էր, ի թիվս այլնի, աղջիկների իրավունքների պաշտպանությանը և ոլորտում հանրային ընկալումների փոփոխությանը։

ՀԱՄԱՍ-ը հրաժարվել է մասնակցել Եգիպտոսում կայանալիք «Խաղաղության գագաթնաժողովին», AFP-ին հայտնել է շարժման քաղաքական բյուրոյի անդամ Հուսան Բադրանը։

Իսրայելի վարչապետ Բենիամին Նեթանյահուն դեռևս չի հաստատել գագաթնաժողովին իր մասնակցությունը։

Գազայի հատվածում պատերազմի ավարտի հարցով Շարմ էլ Շեյխի գագաթնաժողովը տեղի կունենա հոկտեմբերի 13-ին։

Հոկտեմբերի 12-ի՝ ժամը 10։00-ի դրությամբ, փրկարար ծառայությունը շարունակում է հրդեհաշիջման աշխատանքները․ օգտագործվել է շուրջ 1100 տոննա ջուր և իրականացվել շուրջ 500 երթ հողալցում՝ կրակի տարածումը կանխելու համար։ 

Հրդեհաշիջման աշխատանքներին ներգրավվել են 9 մարտական հաշվարկ և 2 օպերատիվ խումբ․ ընդհանուր 43 փրկարարական ծառայող, Երևանի քաղաքապետարանի ուժերը՝ ջրատարներով և ինժեներական տեխնիկայով։

Կան հրդեհի ծխացող օջախներ։

Հրդեհաշիջման աշխատանքներն ինտենսիվորեն շարունակվում են։

ԱՄՆ պատվիրակությունը ժամանել է Գազա, հայտարարել է Թրամփի հատուկ բանագնաց Ուիթքոֆը։

«Ծովակալ Քուփերը, Ջարեդ Քուշները (Թրամփի փեսան - խմբ.) և ես այսօր մեկնեցինք Գազա՝ ստուգելու Իսրայելի կողմից առաջին փուլի համաձայնագրի կատարումը»,-գրել է նա և հրապարակել լուսանկարներ։

«Մենք ստացանք մանրամասն տեղեկատվություն անվտանգության, մարդասիրական օգնության և հակամարտության կարգավորման միջոցառումների վերաբերյալ։ Շարունակական նվիրվածության դեպքում խաղաղությունը մնում է հասանելի»,- ավելացրել է Ուիթքոֆը։

Նշենք, որ վաղը տեղի կունենա Գազայի հատվածում խաղաղության հաստատման վերաբերյալ գագաթնաժողով։