Գիտնականները ինքնատիպ նախագիծ են իրականացնում. աշխարհում առաջին ինքնավար ստորջրյա «գլայդերը»՝ Redwing-ը, շուրջերկրյա ստորջրյա ճամփորդություն կկատարի, հաղորդել է Interesting Engineering-ը։

Redwing-ը Slocum Sentinel Glider է՝ ինքնավար ստորջրյա տրանսպորտային միջոց, որը նախատեսված է երկար ժամանակ առանց մարդու միջամտության գործելու համար։ Դրա առաքելությունն է՝ հավաքել տվյալներ օվկիանոսների վիճակի մասին, աջակցել ծովային հետազոտություններին եւ բարելավել ծովային անվտանգությունն ու մոնիթորինգը։ 

Գլայդերն ուղեւորությունը կսկսի ԱՄՆ Մասաչուսեթս նահանգի Մարթաս Վինյարդ քաղաքից։ Redwing-ի երթուղին կհետեւի Մագելանի երթուղուն. այն կայցելի Աֆրիկայի հյուսիսարեւմտյան ափին գտնվող Գրան Կանարիա, Հարավային Աֆրիկայի Քեյփթաուն, Արեւմտյան Ավստրալիա, Նոր Զելանդիա, Ֆոլքլենդյան կղզիներ եւ, հնարավոր է, Բրազիլիա՝ ճանապարհորդությունն ավարտվելով Քեյփ Քոդում։ Ընդհանուր տարածությունը մոտ 73 000 կիլոմետր է։

Սարքը կարող է սուզվել մինչեւ 1 000 մետր խորությամբ եւ ունի մեկ տարուց ավելի տեւողությամբ առաքելություններ իրականացնելու հնարավորություն։ Այն նախատեսված է բազմաթիվ սենսորներ եւ սարքավորումներ տեղավորելու համար. Redwing-ը կարող է միաժամանակ օգտագործել ութ սենսոր, հավաքել տվյալներ եւ արդյունքները յուրաքանչյուր 12 ժամը մեկ փոխանցել արբանյակին։ 

Sentinel Mission անվամբ նախագիծն իրականացվում է Teledyne Marine-ի կողմից՝ Rutgers University-ի համալսարանի հետ համատեղ։ Մասնակցում են նաեւ NOAA-ն, ՄԱԿ-ը (Ocean Decade-ի շրջանակում) եւ Marine Technology Society-ն։ Նպատակն է զարգացնել օվկիանոսի դիտարկման տեխնոլոգիաները, ամրապնդել ծովային միջավայրի պաշտպանության ջանքերը եւ ստանալ նոր տվյալներ կլիմայի, հոսանքների եւ էկոհամակարգերի վերաբերյալ։

Գերմանական Capricorn ընկերությունը, համագործակցելով հայտնի Zagato ստուդիայի հետ, ներկայացրել է նոր հիպերմեքենա, որը կրկին նորաձեւ է դարձնում վարելու «անալոգային զվարճանքը»,- գրել է Autocar-ը։

Capricorn 01 Zagato անվանումը ստացած մոդելը համատեղում է ժամանակակից շարժչի հզորությունը մեխանիկական փոխանցատուփի դասական զգացողության հետ։

Թափքի տակ տեղադրված է 5.2 լիտրանոց տուրբոլիցքավորված V8 շարժիչ, որը զարգացնում է ավելի քան 900 ձիաուժ եւ մոտավորապես 1 000 Նմ պտտող պահ։ 1 200 կիլոգրամից պակաս քաշով մեքենան խոստանում է հիանալի արտադրողականություն. 0-ից 100 կմ/ժ արագացումը տեւում է երեք վայրկյանից պակաս, իսկ առավելագույն արագությունը հասնում է 220 մղոն/ժ-ի (360 կմ/ժ)։

Մեքենայում ամեն ինչ նախատեսված է վարորդի համար՝ առանց էկրանների կամ թվային մենյուների։ Սրահում կան միայն անալոգային գործիքներ, ներքաշվող հետեւի տեսախցիկի էկրան եւ տախոմետր վահանակի կենտրոնում։

Նույնիսկ ղեկը հզորության օգնական ունի, որն ամբողջությամբ անջատվում է արագության դեպքում՝ ճանապարհի զգացողությունը պահպանելու համար։ Արգելակները Brembo ածխածնային-կերամիկական են, դռները բացվում են վերեւ, իսկ փոխանցատուփը՝ հազվագյուտ հինգ աստիճան մեխանիկական։

Թափքի դիզայնը մշակվել է Zagato-ի կողմից՝ առանձնահատուկ գծեր, կարբոնային մանրաթելային վահանակներ եւ դասական գրան-տուրիզմի կերպար։ Կարտադրվի ընդամենը 19 միավոր, որոնցից յուրաքանչյուրի գինը մոտ 2.95 միլիոն եվրո է։

Ստեղծողները նշել են, որ Capricorn 01-ը պարզապես հիպերմեքենա չէ, այլ հիշեցում այն ​​ժամանակների մասին, երբ վարելը արհեստ էր, այլ ոչ թե թվային սիմուլյացիա։

Քաթարի բարձրագույն պետական հաստատության՝ Ամիրի Դիվանի, երեք աշխատակից զոհվել է ավտովթարի հետևանքով Կարմիր ծովի ափին գտնվող եգիպտական Շարմ էլ Շեյխ հանգստավայրի մոտ, հայտնում է Եգիպտոսում Քաթարի դեսպանությունը։

Դեսպանության տվյալներով, ևս երկու մարդ վիրավորվել է և ստանում է անհրաժեշտ բուժօգնություն քաղաքային հիվանդանոցում։ Դեսպանությունից հայտնել են, որ վիրավորները և զոհվածների մարմինները կիրակի օրն ավելի ուշ կտեղափոխվեն Դոհա։

Անվտանգության ծառայության երկու աղբյուր Reuters-ին հայտնել է, որ քաթարցի դիվանագետներով մեքենան շրջվել է ճանապարհի ոլորանում՝ քաղաքից 50 կիլոմետր հեռու։

Դեպքը տեղի է ունեցել մի քանի օր անց այն բանից հետո, երբ Քաթարի, Թուրքիայի և Եգիպտոսի պաշտոնյաները մասնակցել են Շարմ էլ Շեյխում այս շաբաթ ավելի վաղ կայացած անուղղակի բանակցություններին, որոնք հանգեցրել են Իսրայելի և պաղեստինյան ՀԱՄԱՍ խմբավորման միջև համաձայնության՝ ԱՄՆ նախագահ Դոնալդ Թրամփի՝ Գազայի պատերազմը դադարեցնելու ծրագրի առաջին փուլի շրջանակում։ Երկուշաբթի օրը նույն քաղաքում տեղի կունենա գլոբալ գագաթնաժողով՝ համաձայնագրի վերջնականացման նպատակով։

Արդարադատության նախկին նախարար Արփինե Հովհաննիսյանը հայտնում է․

«Երեկ գիշեր  ըստ նախնական հաշվարկների 1.6 մլն մարդ կորցրել է իր կարողությունը, որը գնահատվում է շուրջ 19-40 մլրդ դոլար` կրիպտոարժույթների շուկայում աննախադեպ անկման պատճառով: Սա անգամներ ավելին է քան, օրինակ, անկումը, որը տեղի էր ունեցել կովիդի ժամանակ կամ FTX-ի սնանկացման ժամանակ: Կրիպտո ոլորտում պրոֆեսիոնալ մի քանի տրեյդերներ, որոնք կառավարում էին բազմաթիվ մարդկանց պատկանող տասնյակ միլիոնավոր դոլարների ակտիվներ….. ինքնասպան են եղել:

Հայաստանում հայտնի են նման  տարբեր սխեմաներ, երբ  հազարավոր մարդկանցից, ովքեր իրենց խնայողությունները ցանկանում են ներդնել որևէ տեղ, ներգրավում են ահռելի գումարներ` առանց բուրգի վերևում գտնվող մարդկանց մասին ինֆորմացիա ունենալու, առանց գրավոր ձևակերպումների ու դետալների: Ուզում եմ հասկանալ, իրավասու մարմինները` ֆինանսական և ոչ միայն, տեղյա՞կ են այս ամենի մասին թե՞ ոչ»:

Երեկ՝ հոկտեմբերի 11-ին, դանակահարություն է տեղի ունեցել Կոտայքի մարզում: Ժամը 23:20-ի սահմաններում օպերատիվ տեղեկություններն են ստացվել, որ «Աբովյան» բժշկական կենտրոն մի քաղաքացի է տեղափոխվել՝ դանակահարված վիճակում: 

Ինչպես հայտնում է ֆոտոլրագրող Գագիկ Շամշյանը, տեղում պարզվել է, որ ստացված օպերատիվ տեղեկությունները հավաստի են: Իսկ բժիշկները քրեական և համյանքային ոստիկաններին հայտնել են, որ վիրավորը իրենց մոտ է բերվել «որովայնի առաջային պատի կտրած-ծակած վերք» ախտորոշմամբ, գտնվում է վիրահատարանում ու ի վիճակի չէ բացատրություն տալու: 

Մինչ բժիշկները պայքարում էին նրա կյանքի համար, Կոտայքի ոստիկանության բաժնի և Կոտայքի մարզի քրեական ոստիականները պարզել են, որ վիրավորը Կոտայքի մարզի բնակիչ 51-ամյա Արշակ Մ.-ն է:

Իրավապահները պարզել են նաև, որ նույն օրը՝ ժամը 23:00-ի սահմաններում, Աբովյան քաղաքի Չափիչի 3-րդ շենքի բակում Կոտայքի մարզի բնակիչ 36-ամյա Սամվել Հ.-ն անհիմն հարցերի շուրջ վիճաբանություն է ունեցել Արշակ Մ.-ի հետ, որի ժամանակ էլ իր մոտ եղած սուր կտող-ծակող առարկայով հարվածել է Արշակ Մ.-ին: 

Քրեական և համայնքային ոստիկանները ձեռնարկում են անհրաժեշտ միջոցառումներ՝ հանցագործությունը կատարած կասկածյալին և հանցագործության գործիք առարկան հայտնաբերելու համար:

Կյանքից հեռացել է 70-80-ականների հոլիվուդյան աստղ, Վուդի Ալենի մուսա, դերասանուհի Դայան Քիթոնը։

Դերասանուհին 79 տարեկան էր։ Նրա մահվան մասին հայտնում է People-ը՝ վկայակոչելով հարազատներին։

Քիթոնը հայտնի է դարձել 70-ականներին «Կնքահայրը» ֆիլմից հետո, որտեղ մարմնավորել է Մայքլ Կորլեոնեի կնոջը։

1977 թվականին նա «Օսկար» է ստացել «Էննի Հոլլ» ֆիլմում իր դերի համար և նույն ֆիլմի համար արժանացել է «Ոսկե գլոբուսի» և BAFTA մրցանակի։

Երևան քաղաքում՝ 

Հոկտեմբերի 14-16-ին սպասվում է առանց տեղումների եղանակ։ Հոկտեմբերի 12-ի երեկոյան ժամերին և 13-ին սպասվում է անձրև։

Հանրապետության տարածքում` 

Հոկտեմբերի 12-ի գիշերը, 14-16-ին սպասվում է առանց տեղումների եղանակ։ Հոկտեմբերի 12-ի երեկոյան առանձին շրջաններում, 13-ին շրջանների մեծ մասում սպասվում է անձրև։ Քամին՝ հյուսիսարևմտյան՝ 2-5մ/վ, հոկտեմբերի 13-ին առանձին շրջաններում սպասվում է քամու ուժգնացում ՝ 15-18 մ/վ արագությամբ։ Օդի ջերմաստիճանը հոկտեմբերի 13-ի ցերեկը կնվազի 5-7 աստիճանով:

Հոկտեմբերի 10-ին Փարիզի Աստվածամոր տաճարում հայտնաբերվել է հնարավոր հարձակման մասին նախազգուշացնող նամակ, հաղորդում է Le Figaro-ն

Անհայտ անձինք կոչ են արել չբացել տաճարն առաջիկա հանգստյան օրերին՝ պնդելով, որ ներսում դանակներ են թաքցված և ահաբեկչություն է պլանավորվում։

Հաղորդվում է, որ Փարիզի ոստիկանությունը խուզարկություն է անցկացրել տաճարում՝ գրության մասին հաղորդագրությունից հետո, սակայն եզրակացրել է, որ ստուգման ընթացքում անվտանգությանը սպառնացող որևէ սպառնալիք չի հայտնաբերվել: Հրատարակության համաձայն՝ տաճարի պաշտոնյաները դեռևս չեն որոշել՝ բողոք ներկայացնե՞լ իրավապահ մարմիններին՝ հետագա քննության համար, թե՞ ոչ:

Պակիստանը և Աֆղանստանը փոխանակվել են ռազմական թիրախների հարվածներով։ Աֆղանստանի իշխանությունները «պատասխան գործողությունը» հաջողված են հայտարարել։ 

Ալ Ջազիրան, հղում անելով Աֆղանստանի պաշտպանության նախարարությանը, հաղորդել է սահմանային յոթ նահանգներում բախումների բռնկման մասին։ Գործողությունը սկսվել է Քաբուլում և Խոստ ու Նանգարհար նահանգներում հրետակոծություններին ի պատասխան։

Աֆղանստանը հարվածներ է հասցրել արևելյան և հարավային սահմանի երկայնքով գտնվող ռազմական բազաներին։ Ըստ Tolo News-ի, հղում անելով Թալիբանի կառավարության պաշտպանության նախարարության հայտարարությանը, հարվածները թիրախավորել են Աֆղանստան անօդաչու թռչող սարքերի արձակման համար օգտագործվող օբյեկտները:

Պակիստանի SAMAA հեռուստաընկերությունը պնդում է, որ Աֆղանստանը կրակ է բացել առանց որևէ պատճառաբանության։ Պակիստանը պատասխանել է՝ ոչնչացնելով մի քանի աֆղանական դիրքեր։

Աֆղանստանի պաշտպանության նախարարությունը հայտարարել է «պատասխան գործողության» ավարտի մասին և զգուշացրել, որ եթե Պակիստանը կրկին խախտի սահմանը, երկրի զինված ուժերը «կտան վճռական պատասխան»։

Ավելի ուշ Պակիստանը հայտարարեց բախումների արդյունքում 19 աֆղանական սահմանային դիրքերի գրավման մասին։

Ըստ TOLO լրատվական պորտալի՝ սպանվել է 12 պակիստանցի զինվոր։