Մեր արտաքին քաղաքականությունը դարձել է համահունչ միջազգային գործընթացների հետ։ Այս մասին Կապանում օտարերկրյա պետություններում ՀՀ դիվանագիտական ներկայացուցչությունների ղեկավարների տարեկան աշխատաժողովի մեկնարկի ժամանակ հայտարարել է ՀՀ վարչապետ Նիկոլ Փաշինյանը։

«Բոլոր այն աղետները, որոնք մենք մեր պատմության ընթացքում ունեցել ենք, առանձնահատկությունները ուսումնասիրելիս, գալիս ենք մի արձանագրման, որ մենք այդպես էլ, որպես կանոն, չենք կարողացել մեր պատմության տակտը համահունչ դարձնել միջազգային զարգացումների տակտի հետ:

Այն, ինչ Վաշինգտոնում տեղի է ունեցել, նշանակում է՝ մեր քաղաքականության տակտը դարձել է համահունչ միջազգային որոշակի պրոցեսների հետ: Սա չափազանց կարևոր է, և սա, թերևս, մեր մի քանի հարյուրամյակների առաջին իրատեսական և ռեալ հնարավորությունն է դառնալ միջազգային զարգացումներին համահունչ: Սա չափազանց կարևոր արձանագրում է»,- ասել է նա:

Իսրայելը պատրաստ է աջակցել Լիբանանի կառավարությանը՝ շիական «Հեզբոլլահ» շարժումը զինաթափելու ջանքերում, հայտարարել է Իսրայելի վարչապետ Բենիամին Նեթանյահուի գրասենյակը։

«Լիբանանի կառավարության վերջերս ընդունած որոշումը՝ մինչև 2025 թվականի վերջը «Հեզբոլլահ»-ը զինաթափելու ուղղությամբ աշխատանքներ տանելու վերաբերյալ, նշանակալի զարգացում է։ Այս կարևոր զարգացման լույսի ներքո Իսրայելը պատրաստ է աջակցել Լիբանանին «Հեզբոլլահ»-ը զինաթափելու նրա ջանքերում և համատեղ աշխատել երկու երկրների համար ավելի անվտանգ և կայուն ապագայի հասնելու համար: Եթե Լիբանանի զինված ուժերը ձեռնարկեն անհրաժեշտ քայլեր «Հեզբոլլահ»-ը զինաթափելու համար, Իսրայելը կձեռնարկի պատասխան միջոցներ, այդ թվում՝ Իսրայելի պաշտպանության բանակի ներկայության աստիճանական կրճատում Լիբանանում», - ասվում է հայտարարության մեջ։

Գերատեսչությունը նշել է, որ Իսրայելը «բարձր է գնահատում Լիբանանի կառավարության կողմից ձեռնարկված նշանակալի քայլը»։ «Այս որոշումը (Հեզբոլլահի զինաթափման վերաբերյալ) հնարավորություն է ընձեռում Լիբանանին վերականգնել իր ինքնիշխանությունը, վերականգնել պետական ​​ինստիտուտները, բանակը և կառավարման համակարգը», - շարունակել է գերատեսչությունը։

«Հիմա ժամանակն է, որ Իսրայելն ու Լիբանանը առաջ շարժվեն համագործակցության ոգով՝ կենտրոնանալով «Հեզբոլլահ»-ի զինաթափման և երկու երկրներում կայունության ու բարգավաճման խթանման ընդհանուր նպատակի վրա», - եզրափակել է Իսրայելի վարչապետի գրասենյակը։

Ադրբեջանագետ Տաթևիկ Հայրապետյանը գրում է․

««Այս [հայ] հասարակությունը հիվանդ է, և ես սա բացահայտ ասում եմ»։ Սա Ալիևն ասել է օգոստոսի 21-ի իր ելույթում՝ ի շարս այս թշնամական ու ագրեսիվ արտահայտությունների։ Դրանից անցել է չորս օր և ՀՀ ԱԳՆ-ն ոչինչ չունի ասելու այս արտահայտության ու հայ ժողովրդի, հայ հանրության հասցեին հնչած ատելության ու անհանդուրժողականության խոսքի առթիվ։

Մի պահ զուտ պատկերացրեք, թե ինչ աղմուկ կբարձրացներ Ադրբեջանը, եթե նման արտահայտություն երբևէ հնչեր Հայաստանի ղեկավարությունից, ավելին՝ դա արվեր Թրամփի միջնորդությամբ «խաղաղության պայմանագրի» նախաստորագրումից հետո, որտեղ նույնիսկ դրույթ կա անհանդուրժողականության, ռասսայական ատելության և խտրականության դեմ պայքարի մասին․․․ »։

Սլովակիայի արտաքին գործերի նախարար Յուրայ Բլանարը հայտարարել է, որ նավթատարի վրա հարվածները հակասում են ոչ միայն Սլովակիայի շահերին, այլև օգուտ չեն բերում Ուկրաինային, քանի որ «Սլովնաֆտ» նավթավերամշակման գործարանը ապահովում է Ուկրաինայի դիզելային վառելիքի սպառման 10%-ը՝ արտադրելով տարբեր ապրանքներ ռուսական նավթից։

«Մենք հասկանում ենք, որ Ուկրաինան դժվար ժամանակներ է ապրում, բայց այս ենթակառուցվածքը շատ կարևոր է մեզ համար, հատկապես, երբ տեսնում ենք, որ Ուկրաինան ինքն է վնասում իր շահերին՝ սպառնալով մնալ առանց վառելիքի», – ասել է նա։

Գերմանիայի փոխվարչապետ, ֆինանսների նախարար Լարս Քլինգբայլը չհայտարարված այցով ժամանել է Ուկրաինայի մայրաքաղաք Կիև։ Այս մասին հաղորդում է DW լրատվական գործակալությունը։

Ժամանելուն պես պատասխանելով լրագրողների հարցին՝ Քլինգբայլը հայտարարել է, որ ուկրաինացիները կարող են շարունակել ապավինել Գերմանիային։

«Պուտինը չպետք է պատրանքներ ունենա, որ Գերմանիայի աջակցությունը Ուկրաինային կարող է թուլանալ։ Ընդհակառակը։ Մենք մնում ենք Ուկրաինայի երկրորդ ամենամեծ աջակիցն աշխարհում և ամենամեծը Եվրոպայում։ Ուկրաինան կարող է շարունակել հույսը դնել Գերմանիայի վրա», – ասել է Քլինգբեյլը։

Նա նշել է, որ ուկրաինացիներից շատ ոչ ոք չի տենչում խաղաղության, սակայն խաղաղության հաստատման շուրջ բանակցությունները «չեն կարող իրականացվել ուկրաինացի ժողովրդի հաշվին»։

«Հրադադարն անհրաժեշտ է։ Ուկրաինայում երկարատև խաղաղություն ապահովելու համար անհրաժեշտ են նաև հուսալի անվտանգության երաշխիքներ։ Մենք այս հարցում սերտորեն համակարգում ենք մեր գործողությունները միջազգային մակարդակով։ Գերմանիան կկատարի իր պարտավորությունները», – վստահեցրել է Քլինգբեյլը՝ նշելով, որ «Ռուսաստանը վերջապես պետք է լուրջ հետաքրքրություն ցուցաբերի արդար խաղաղության նկատմամբ»։ Գերմանիայի փոխվարչապետը հայտարարել է նաև, որ իրենք քննարկում են Եվրամիությանը Ուկրաինայի անդամակցության հեռանկարները, սակայն այդ նպատակին հասնելու համար Կիևը պետք է հետևողականորեն անցնի բարեփոխումների ճանապարհով։

Գերմանիայի փոխվարչապետը Կիևում բանակցություններ կվարի Ուկրաինայի կառավարության և Գերագույն ռադայի, ինչպես նաև քաղաքացիական հասարակության ներկայացուցիչների հետ։

Իսրայելական «13-րդ ալիքի» հաղորդմամբ՝ Ռուսաստանը սկսել է տարհանել իր դիվանագետներին Իսրայելից։

«13-րդ ալիքի» տեղեկությունների համաձայն՝ արդեն մի քանի չվերթներ են իրականացվել դեպի Թել Ավիվ, որոնցով և դիվանագիտական ​​​​առաքելության աշխատակիցներ են լքել երկիրը։

Չինաստանը չի պլանավորում ռազմական կոնտինգենտ ուղարկել Ուկրաինա՝ անվտանգության երաշխիքների շրջանակներում, ճեպազրույցի ժամանակ հայտարարել է Չինաստանի արտաքին գործերի նախարարության պաշտոնական ներկայացուցիչ Լին Ցզյանը՝ մեկնաբանելով Welt թերթի հրապարակումը։ Այս մասին հաղորդում է ՏԱՍՍ-ը:

«Չինաստանի դիրքորոշումը ուկրաինական հարցում հստակ է և հետևողական», - նշել է դիվանագետը:

Կապանում դեսպանաժողովի աշխատանքները շարունակվել են ԱԳ նախարար Արարատ Միրզոյանի հետ քննարկումով։ Այս մասին հայտնում են ԱԳՆ-ից:

Նախարար Միրզոյանն անդրադարձ է կատարել օգոստոսի 8-ին Վաշինգտոնում կայացած հանդիպումների արդյունքներով ձեռքբերված համաձայնություններին։

Անդրադառնալով Հայաստան-Ադրբեջան նախաստորագրված համաձայնագրին՝ Արարատ Միրզոյանն ընդգծել է հաստատված խաղաղության կարևորությունը Հայաստանի և տարածաշրջանի համար, ներկայացրել այս նոր իրողության պայմաններում ՀՀ արտաքին քաղաքական տեսլականը, ձևավորված նոր հնարավորություններն ու դրանց իրացման նպատակով իրականացվելիք աշխատանքները։

Նախարար Միրզոյանն ընդգծել է, որ տարածաշրջանում խաղաղության օրակարգի շարունակական կյանքի կոչումը և ՀՀ քաղաքացիների համար կայուն, անվտանգ ու բարեկեցիկ միջավայրի ապահովումը հանդիսանում է ՀՀ կառավարության, այդ թվում՝ դիվանագիտական ծառայության առաջնային նպատակ։

Արարատ Միրզոյանն անդրադարձ է կատարել տարածաշրջանային հաղորդակցությունների ապաշրջափակման միջոցով ընձեռնվող հնարավորություններին, միջազգային կապուղիների ընդլայնվող զանցին ՀՀ արդյունավետ ներգրավածության ապահովմանն ուղղված ջանքերին և այդ նպատակով Վաշինգտոնում ստորագրված եռակողմ հռչակագրի կյանքի կոչման ուղղությամբ առաջիկա աշխատանքներին։

Արձանագրելով արձանագրված հաջողություններին՝ մտքեր են փոխանակվել տարբեր ուղղություններով այդ թվում նաև ռազմավարական գործընկերությունների հետագա զարգացման ուղղությամբ ընթացող աշխատանքների շուրջ։

Հայկական բանկերն ու բրոքերները սկսել են ռուսներից տեղեկություններ պահանջել՝ նրանց հարկային ռեզիդենտության վերաբերյալ։

Ինչպես հաղորդում է ՌԲԿ-ն, հարցումները կատարվում են Ռուսաստանի հետ ավտոմատ կերպով տեղեկատվություն փոխանակելու համար։

Ակնկալվում է, որ փոխանակումը կսկսվի արդեն այս տարի:

Արդյունքում, Հայաստանում Ռուսաստանի քաղաքացիների և ռուսներին պատկանող ընկերությունների եկամուտների ու ակտիվների մասին տեղեկությունները հասանելի կդառնան Դաշնային հարկային ծառայությանը։

ՀՀ վիճակագրական կոմիտեի տվյալների համաձայն`  2025 թվականի հունիսին, 2024թ․ հունիսի նկատմամբ Հայաստանի Հանրապետությունում արձանագրվել է 3.9% գնաճ։ Սննդամթերքի և ոչ ալկոհոլային խմիչքների գները  աճել են 6.2%-ով։ Մասնավորապես՝  հացը թանկացել է 3.9%-ով, կարագը՝ 14%-ով, մակարոնեղենը՝ 5.3%-ով, մսամթերքը՝ 1.6%-ով, մրգերը՝ 3.7%-ով, բանջարեղենը՝ 25%-ով, իսկ կարտոֆիլի՝ 67.3%- ով։

Միևնույն ժամանակ, որոշ ապրանքների գներ նվազել են. պանրի և կաթնաշոռի գներն` 1.5%-ով, իսկ ձվինը՝ 6.2%-ով։

Նման գնաճի միտումները` հատկապես առաջին անհրաժեշտության ապրանքների պարագայում, խորացնում են սոցիալապես խոցելի խմբերի վիճակը։

ՀՀ վիճակագրական կոմիտեի կողմից հրապարակված «Հայաստանի սոցիալական պատկերը և աղքատությունը, 2024թ.» զեկույցի համաձայն՝ 2023թ․ տնային տնտեսությունների մեկ շնչի հաշվով միջին ամսական ծախսերի 42.9%-ը ուղղվում է սննդին, իսկ 32.8%-ը՝ ծառայություններին։ Ոչ պարենային ապրանքների բաժինը կազմում է 19.4%, ծխախոտի գնումը՝ 4.5%, իսկ անկոհոլային խմիչքները՝ 0.4%։ Հայաստանի արհմիությունների կոնֆեդերացիայի վերլուծությանմբ՝ այս թվերը վկայում են այն մասին, որ բնակչության եկամուտների մեծ մասը ծախսվում է կենսական անհրաժեշտության ապրանքների վրա, մինչդեռ կրթությանը, ժամանցին կամ խնայողություններին  ուղղվող գումարները մնում են սահմանափակ։ 

Երբ բնակչության եկամտի գրեթե կեսը ծախսվում է սննդի վրա, նույնիսկ փոքր գնաճն անմիջական ազդեցություն է ունենում նրանց կյանքի որակի վրա։

2025 թվականի հունվար-հունիսին Հայաստանի Հանրապետությունում միջին ամսական անվանական աշխատավարձը կազմել է 294 621 դրամ, ինչը նախորդ տարվա նույն ժամանակահատվածի համեմատ աճել է 5.6 տոկոսով, իսկ  2025 թվականի հունիսին այն  կազմել է 297 624 դրամ։

Որոշ ոլորտներում աշխատավարձերի մակարդակը զգալիորեն ցածր է երկրի միջին ցուցանիշից՝ մասնավորապես․ Կացության և հանրային սննդի կազմակերպման ոլորտում միջին աշխատավարձը կազմել է 148 014 դրամ, Սպասարկման այլ ծառայությունների ոլորտում՝ 150 351 դրամ, Մշակույթ և արվեստի ոլորտում՝ 159 520 դրամ, իսկ կրթության ոլորտում՝ 166 118 դրամ։

Ամենացածր միջին ամսական անվանական աշխատավարձը գրանցվել է Գեղարքունիքի մարզում՝ 146 355 դրամ, իսկ ամենաբարձրը՝ Սյունիքի մարզում՝ 306 283 դրամ։ Երևանում այն  կազմել է ՝ 298 879 դրամ։

Թեպետ 2025 թվականի հունվար-հունիսին Հայաստանում արձանագրվել է միջին ամսական անվանական  աշխատավարձի աճ, ապրանքների և ծառայությունների թանկացումը շարունակում է պատճառ հանդիսանալ աշխատողների իրական եկամուտների ցածր մակարդակի պահպանմանը։

Հայաստանի Հանրապետությունում 2023 թվականին աղքատության մակարդակը գնահատվել է 23.7%, ինչը 1.1 տոկոսային կետով ցածր է 2022 թվականի ցուցանիշից։ Ծայրահեղ աղքատության մակարդակը կազմել է 1.1%՝ նվազելով 0.1 տոկոսային կետով։ Վարձու աշխատողների շրջանում աղքատության մակարդակը կազմել է 19.4%։

Աղքատության տարածվածությունը տարբերվում է ըստ բնակավայրերի։ Քաղաքային բնակավայրերում այն կազմել է  21.5%, իսկ գյուղական բնակավայրերում 27.0%։ Երևանում այն կազմել է 17.9%։

Աղքատության ամենաբարձր մակարդակը գրանցվել է Շիրակի մարզում՝ 43.1%, իսկ ամենացածրը՝ Սյունիքի մարզում՝ 7.0%։

2025թ. թվականի  երկրորդ եռամսյակում ՀՀ առողջապահության նախարարության մեթոդաբանությամբ հաշվարկված նվազագույն սպառողական զամբյուղի արժեքը  կազմել է 81 680.9 դրամ, ինչը բարձր է նվազագույն աշխատավարձի չափից։ Համաշխարհային բանկի մեթոդաբանությամբ հաշվարկված նվազագույն սպառողական զամբյուղի արժեքը կազմել է 64 713.9 դրամ։

Նվազագույն սպառողական զամբյուղների արժեքները Հայաստանի Հանրապետությունում որևէ օրենքով կամ այլ իրավական ակտով ընդունված չեն (պաշտոնապես սահմանված չեն) ։

Աղքատության մակարդակի կրճատման, աշխատողների և նրանց ընտանիքների կենսամակարդակի բարձրացման,  ինչպես նաև երկրում արժանապատիվ աշխատանքի ապահովման համար անհրաժեշտ է պաշտոնապես սահմանել նվազագույն սպառողական զամբյուղի արժեքը, ինչպես նաև ընդունել  աշխատավարձի ինդեքսավորման կարգ, ինչը, սահմանված է դեռևս  2004 թվականին ընդունված  ՀՀ աշխատանքային օրենսգրքի 182-րդ հոդվածով։