Մամուկա Մդինարաձեն կզբաղեցնի Վրաստանի պետական անվտանգության ծառայության ղեկավարի պաշտոնը։ Այս մասին ճեպազրույցում հայտարարել է Վրաստանի վարչապետ Իրակլի Կոբախիձեն, հայտնում է Грузия Online-ը։

Մդինարաձեն կփոխարինի Անրի Օխանաշվիլիին, որն այսօր հրաժարական է տվել Վրաստանի պետական անվտանգության ծառայության ղեկավարի պաշտոնից։

Հայտարարության մեջ ասվում է, որ Օխանաշվիլին կզբաղեցնի Վրաստանի վարչապետի՝ ազգային անվտանգության հարցերով խորհրդականի պաշտոնը։

«Այսօրվա համաշխարհային մարտահրավերների ֆոնին համաշխարհային և տարածաշրջանային անվտանգությունը բախվում է նոր մարտահրավերների, որոնք հատուկ ազդեցություն են ունենում մեր երկրի անվտանգության վրա։ Հաշվի առնելով դա՝ այս մարտահրավերների մասին տեղեկատվության վերլուծական մշակումը և հակազդման միջոցառումների վերաբերյալ առաջարկությունների մշակումը մեծ նշանակություն ունեն Վրաստանի կառավարության համար։ Վստահ եմ, որ իմ փորձն ու գիտելիքներն ինձ կօգնեն հաջողությամբ գլուխ հանել ազգային անվտանգության հարցերի վերաբերյալ վերլուծական աշխատանքից։

Միևնույն ժամանակ, ես մնում եմ Վրաստանի պետական անվտանգության ծառայության առանձնահատուկ կողմնակիցը։ Ցանկանում եմ շնորհակալություն հայտնել ծառայության անձնակազմին այս կարճ ժամանակահատվածում համատեղ կարևոր և հաջող աշխատանքի համար։ Հաջողություն եմ մաղթում ապագա ղեկավարին և ծառայության յուրաքանչյուր աշխատակցի»,- ասվում է Օխանաշվիլիի հայտարարության մեջ։

ԱՄՆ պաշտպանության նախարար Փիթ Հեգսեթը պաշտոնանկ է արել Պենտագոնի հետախուզական վարչության ղեկավարին այն բանից ընդամենը մի քանի շաբաթ անց, երբ Սպիտակ տունը քննադատության ենթարկեց զեկույցը, որում գնահատվում էին Իրանի դեմ ամերիկյան հարվածների հետևանքները, հայտնում են ամերիկյան լրատվամիջոցները։

Ըստ նրանց տեղեկությունների, գեներալ-լեյտենանտ Ջեֆրի Կրուզն այլևս չի կատարի ԱՄՆ պաշտպանության նախարարության հետախուզական վարչության (DIA) ղեկավարի պարտականությունները։

Պենտագոնը պաշտոնանկ է արել ևս երկու բարձրաստիճան զինվորականի։ Պաշտպանության նախարարությունը դեռևս բացատրություններ չի տրամադրել պաշտոնանկությունների վերաբերյալ։

Հունիսին ԱՄՆ նախագահ Դոնալդ Թրամփը խիստ քննադատության է ենթարկել Գործակալության արտահոսած զեկույցը, որում ասվում էր, որ Իրանի վրա հարձակումները ընդամենը մի քանի ամսով են հետաձգել նրա միջուկային ծրագիրը։ Սպիտակ տունը գործակալության գնահատականը «բացարձակապես սխալ» է որակել։

Թրամփը հայտարարել է, որ Իրանի միջուկային օբյեկտներն ամբողջությամբ ոչնչացված են, և մեղադրել է լրատվամիջոցներին «պատմության մեջ ամենահաջող ռազմական հարվածներից մեկի նշանակությունը նվաստացնելու փորձի մեջ»։

Այն ժամանակ ՆԱՏՕ-ի գագաթնաժողովում ելույթ ունենալիս Հեգսեթն ասել է, որ զեկույցը կազմվել է «ցածր մակարդակի հետախուզական տվյալների» պատճառով, և որ ՀԴԲ-ն հետաքննում է արտահոսքը։

Վարչությունը Պենտագոնի մաս է կազմում և մասնագիտացած է ռազմական հետախուզության ոլորտում՝  գործողություններին աջակցելու համար։ Այն հավաքում է մեծ քանակությամբ տեխնիկական տեղեկատվություն, սակայն տարբերվում է այլ գործակալություններից, ինչպիսին է ԿՀՎ-ն։

Ենթադրվում է, որ Հեգսեթը նաև հրաման է տվել պաշտոնից ազատել ԱՄՆ ռազմածովային ուժերի պահեստազորի պետին և ռազմածովային հատուկ նշանակության հրամանատարության հրամանատարին, ուրբաթ օրը Reuters-ին հայտնել է անանուն աղբյուրը։ 

Իր հայտարարության մեջ ամերիկացի սենատոր Մարկ Ուորները նախազգուշացրել է, որ Կրուզի պաշտոնանկությունը նշան է այն բանի, որ Թրամփն ունի «հետախուզական տվյալները որպես հավատարմության թեստ դիտարկելու վտանգավոր սովորություն, այլ ոչ թե որպես մեր երկրի անվտանգության երաշխիք»։ Թրամփը պաշտոնանկ է արել մի շարք պաշտոնյաների, որոնց վերլուծականները, ինչպես նկատվել է, տարբերվել են նախագահի կարծիքից։

Թուրքիայի առաջին տիկին Էմինե Էրդողանը նամակ է գրել ԱՄՆ նախագահ Դոնալդ Թրամփի կնոջը՝ Մելանյա Թրամփին, որում կոչ է արել կապ հաստատել Իսրայելի վարչապետի հետ և «բարձրացնել Գազայի երեխաների անմխիթար վիճակի հարցը», հայտնում է Reuters-ը՝ հղում անելով Անկարայի աղբյուրներին։ 

Էմինե Էրդողանը գրում է, որ իրեն ոգեշնչել է Մելանյա Թրամփի նամակը, որն այս ամսվա սկզբին ուղարկվել էր Ռուսաստանի նախագահ Վլադիմիր Պուտինին՝ Ուկրաինայի և Ռուսաստանի երեխաների մասին։

«Ես հավատում եմ, որ այն կարևոր հոգատարությունը, որը Դուք ցուցաբերել եք 648 ուկրաինացի երեխաների նկատմամբ... կտարածվի նաև Գազայի վրա»,- գրում է Էմինե Էրդողանը ուրբաթ օրով թվագրված նամակում, որը հրապարակել է Թուրքիայի նախագահի աշխատակազմը։ 

«Մեր օրերում, երբ աշխարհը կոլեկտիվ զարթոնք է ապրում, իսկ Պաղեստինի ճանաչումը դարձել է համաշխարհային կամք, ես հավատում եմ, որ Գազայի անունից Ձեր կոչը կծառայի պաղեստինցի ժողովրդի առջև պատմական պատասխանատվության կատարմանը»,- ասվում է Էմինե Էրդողանի նամակում։

Սիտկայի և Ալյասկայի արքեպիսկոպոս Ալեքսին ներողություն է խնդրել Ռուսաստանի նախագահ Վլադիմիր Պուտինի հետ Ալյասկայում հանդիպման համար: Նրա հայտարարության տեքստը հրապարակվել է Ամերիկայի Ուղղափառ Եկեղեցու կայքում:

Արքեպիսկոպոսը հայտարարել է, որ «խորապես զղջում է» իր գործողությունների արդյունքում առաջացած «սկանդալի» համար։

«Որպես Սիտկայի և Ալյասկայի արքեպիսկոպոս՝ ես Ամերիկայի Ուղղափառ Եկեղեցու Եպիսկոպոսների Սուրբ Սինոդի անդամ եմ, որը նախագահում է Նորին Գերազանցություն Մետրոպոլիտ Տիխոնը։ Հետևաբար, ես հետևում եմ այս ողբերգական պատերազմի վերաբերյալ Սուրբ Սինոդի ցուցումներին և հովվական խորհուրդներին և ձգտում եմ Ալյասկայի հավատացյալներին առաջնորդել աղոթքի և ողորմության գործերի մեջ՝ հանուն բոլոր տառապողների։ Ալյասկայի թեմը Ամերիկայի Ուղղափառ Եկեղեցու թեմերից մեկն է, որը ինքնավար եկեղեցի է, որի առաքելությունը տարածվում է Հյուսիսային բևեռային շրջանից մինչև Կենտրոնական Ամերիկա և ընդգրկում է բազմաթիվ ժողովուրդների, մշակույթներ և լեզուներ։ Անցյալ շաբաթ ես ողջունեցի նախագահ Վլադիմիր Պուտինին Անքորիջի գագաթնաժողովի ժամանակ՝ խաղաղ հյուրընկալության ոգով, ամբողջ թեմում երեք օր շարունակ խաղաղության համար աղոթելուց հետո։

«Դրանից հետո շատերից լսել եմ, որ այդ պահը դիտարկվել է որպես կշտամբանքի կամ շարունակվող հակամարտության և տառապանքների պայմաններում խաղաղություն պահանջելու բաց թողնված հնարավորություն։ Եվս մեկ անգամ կրկնում եմ, բոլորից, ովքեր իմ գործողությունները տխրության կամ շփոթության պատճառ են համարել՝ ես անկեղծորեն ներողություն եմ խնդրում», - նշվում է արքեպիսկոպոս Ալեքսիոսի հայտարարության մեջ։

ԱՄՆ-ում ՀՀ դեսպանությունում տեղի է ունեցել հրաժեշտի ընդունելություն՝ ԱՄՆ-ում ՀՀ դեսպան Լիլիթ Մակունցի պատվին՝ վերջինիս պաշտոնավարման ավարտի կապակցությամբ։

Միջոցառմանը ներկա էին ԱՄՆ բարձրաստիճան պաշտոնյաներ, Կանզասի Ազգային գվարդիայի և երկկուսակցական առաջատար վերլուծական կենտրոնների ներկայացուցիչներ, ԱՄՆ-ում ՀՀ պատվո հյուպատոսները, ինչպես նաև ԱՄՆ-ում հայ համայնքի ներկայացուցիչներ։

Իրանի հետախուզական ուժերը երկրի հարավ-արևելյան Սիստան և Բելուջիստան նահանգում ահաբեկչական խմբավորում են վնասազերծել՝ սպանելով վեց զինյալի, գերեվարելով ևս երկուսին և առգրավելով ժամանակակից զենքի, տրանսպորտային միջոցների և այլ օպերատիվ տեխնիկայի մեծ պահեստ, հայտնում է Tasnim-ը։ 

Սիստան և Բելուջիստանում Հետախուզության նախարարության ներկայացուցչությունը հայտնել է, որ հիմնական օպերատիվ խումբը բաղկացած է եղել ոչ իրանական ծագումով յոթ ահաբեկիչներից, որոնք զինված են եղել լազերային նշանառությամբ ՌՊԳ-7-ներով, ամերիկյան արտադրության M4 և M16 հրացաններով, ձեռքի նռնակներով, ենթափողային նռնականետերով, պայթուցիկներով լցված ժիլետներով, շարժական ռադիոկայաններով, մեծ քանակությամբ զինամթերքով և հակահետևակային զենքով։ 

Գործողության ընթացքում առգրավվել են նաև մի քանի տրանսպորտային միջոցներ, մոտոցիկլետներ և հարակից գործիքներ։ Ահաբեկչական խումբը մտադիր է եղել հարված հասցնել Իրանի արևելքում գտնվող կարևորագույն օբյեկտներից մեկին։ Նախատեսված թիրախը շատ նման է եղել այն ռազմական օբյեկտներին, որոնց Իսրայելը հարվածներ է հասցրել 12-օրյա պատերազմի ժամանակ, ինչը վկայում է ահաբեկչական խմբի և Իսրայելի միջև կապերի մասին, գրում է լրատվամիջոցը։ 

Հետաքննությունը ցույց է տվել, որ խումբը հատուկ ռազմական պատրաստություն է անցել, ներառյալ ենթադրյալ թիրախի մակետի վրա վարժանքները։

Այս պատրաստությունը համապատասխանել է օպերատիվ սխեմաներին, որոնք նախկինում կապված են եղել իսրայելական «Մոսադ» լրտեսական ծառայության հետ, և մի քանի նախորդ դեպքերում կիրառվել են նմանատիպ մեթոդներ և ուսումնական դասընթացներ։ 

Լարված փոխհրաձգության ընթացքում վեց ահաբեկիչ սպանվել է, ևս երկուսը՝ ձերբակալվել։ Ընդհարման հետևանքով վիրավորվել է Իրանի անվտանգության ծառայության երեք աշխատակից, այդ թվում՝ երկուսը նահանգային հետախուզական վարչությունից և մեկը՝ ոստիկանությունից։ Պաշտոնատար անձինք հայտարարել են, որ վիրավոր զինծառայողներին բուժօգնություն է ցուցաբերվում։

Շաբաթ օրը ՌԴ Սանկտ Պետերբուրգ քաղաքը և Լենինգրադի մարզը ենթարկվել են անօդաչուների հարձակման։ «Պուլկովո» օդանավակայանը դադարեցրել է աշխատանքը, հետաձգվել են տասնյակ չվերթներ։ Տարածաշրջանում նախազգուշացրել են բջջային ինտերնետի դանդաղեցման մասին, հայտնում է «Коммерсантъ»-ը։ 

Սկզբում մեկ ԱԹՍ-ի ոչնչացման մասին հայտնել է Լենինգրադի մարզի նահանգապետ Ալեքսանդր Դրոզդենկոն։ Անօդաչուն խոցվել է Տոսնենսկի շրջանում։ Շուտով նա հայտնել է Տոսնոյի շրջանում ևս երեք, Կիրիշիում և Գատչինայում՝ մեկական ԱԹՍ-ի ոչնչացման մասին։ 

«Հաշվի առնելով Լենինգրադի մարզի օդային տարածքում ԱԹՍ-ների քանակով պայմանավորված ներկա իրավիճակը, խնդրում եմ ձեռնպահ մնալ արդյունաբերական գոտիների և ձեռնարկությունների մոտ գտնվելուց, ինչպես նաև հասարակական վայրեր այցելելուց,- հայտարարել է պաշտոնյան։- Հանձնարարել եմ բոլոր կառուցվածքային ստորաբաժանումներին անցնել բարձր պատրաստականության ռեժիմի»։ 

Պետերբուրգի նահանգապետ Ալեքսանդր Բեգլովը հայտնել է Պուշկինի շրջանում անօդաչուի ոչնչացման մասին. «Խոցումը տեղի է ունեցել բնակելի շենքերից անվտանգ հեռավորության վրա»։ Այնուհետև՝ Կրասնոսելսկի շրջանում։ Տուժածների և ավերածությունների մասին տվյալներ չեն ստացվել։

Վարչապետ Նիկոլ Փաշինյանն այցելել է «Մերիդիան» էքսպո կենտրոն, որտեղ նախատեսվում է անցկացնել Հայաստանում 2026 թվականին կայանալիք Կենսաբազմազանության մասին կոնվենցիայի կողմերի 17-րդ համաժողովը (COP17): Վարչապետը շրջայցի ընթացքում ծանոթացել է կենտրոնի պայմաններին և տեխնիկական հնարավորություններին:

Նիկոլ Փաշինյանին ներկայացվել են ենթակառուցվածքների և ծառայությունների մատչելիությունն ու համապատասխանությունն ապահովելուն ուղղված աշխատանքները, կենտրոնի շենքային, նախագծային և ինժեներատեխնիկական հնարավորությունները, ինչպես նաև համաժողովի անցկացման համար անհրաժեշտ ենթակառուցվածքների ձևավորման վերաբերյալ մասնագիտական առաջարկները։ Քննարկվել են COP17-ի արդյունավետ կազմակերպման և միջգերատեսչական համագործակցության ապահովման վերաբերյալ տարբեր առաջարկություններ:

Վարչապետն ընդգծել է COP17-ը բարձր մակարդակով կազմակերպելու և անցկացնելու կարևորությունը՝ շեշտելով, որ այն ևս մեկ լավ հնարավորություն է միջազգային հանրությանը ներկայացնելու Հայաստանը՝ իր տնտեսական ու մշակութային հնարավորություններով: Նիկոլ Փաշինյանը պատասխանատուներին տվել է կոնկրետ հանձնարարականներ, որոնց կատարման ընթացքի վերաբերյալ պարբերաբար կանցկացվեն խորհրդակցություններ:

Այսօր՝ օգոստոսի 23-ին, խոշոր ավտովթար է տեղի ունեցել Արագածոտնի մարզում: Ժամը 08:20-ի սահմաններում Երևան-Վանաձոր ավտոճանապարհին՝ Ուշիի ոլորաններում, բախվել են Լոռու մարզի բնակիչ 33-ամյա Արամ Թումանյանի վարած «SHACMAN» մակնիշի ինքնաթափ բեռնատարն ու Կոտայքի մարզի բնակիչ 41-ամյա Հայկարամ Գարսևանյանի վարած «VOLVO» մակնիշի գլանատակառ բեռնատարը:

Ինչպես հայտնում է ֆոտոլրագրող Գագիկ Շամշյանը, վթարի հետևանքով, ըստ նախնական տեղեկությունների՝ բարեբախտաբար տուժածներ չկան: Դեպքի վայր ժամանած «Աշտարակ» բժշկական կենտրոնի շտապօգնության բժիշկների հերթապահ խումբը տեղում օգնություն է ցուցաբերել վարորդներից Ա. Թումանյանին, սակայն վերջինը հրաժարվել է հիվանդանոց մեկնելուց:  Բախման հետևանքով բեռնատարից վառելիքի արտահոսք է սկսվել:

Օպերատիվորեն ժամանել են ՀՀ ներքին գործերի նախարարության Փրկարար ծառայության Աշտարակի հրշեջ-փրկարարական ջոկատից 1 մարտական հաշվարկ:  Հրշեջ-փրկարարները սահմանազատել են տարածքը, իրականացրել են հերթապահություն, մինչև ժամանել են ճանապարհը սպասարկող ճանշինի աշխատակիցները, ապա համատեղ ուժերով իրականացրել են ճանապարհի լվացան աշխատանքներ:

Վթարի փաստով ՊԾ Արագածոտնի մարզի գումարտակում փաստաթղթեր են ձևակերպվում: