Մի քանի եվրոպական երկրներ դադարեցրել են փոստային ծառայությունը Միացյալ Նահանգների հետ այն բանից հետո, երբ ԱՄՆ-ի նախագահ Դոնալդ Թրամփը չեղարկեց 800 դոլարից (682 եվրո) պակաս արժողությամբ ներմուծվող ապրանքների հարկային արտոնությունները։ Այդ մասին տեղեկացնում է «Արմենպրես»-ը՝ վկայակոչելով Euronews-ը։ 

Սպիտակ տունը հայտարարել է, որ այն ուղղված է անօրինական և չարաշահող գործողությունների դեմ, որոնցից է դեպի ԱՄՆ անօրինական թմրանյութերի ներմուծումը։

Որոշումը չի ազդի նամակների և փոքր փաթեթների վրա, որոնց արժեքը 100 դոլարից (85 եվրո) պակաս է։

Մեծ Բրիտանիան, Ֆրանսիան, Գերմանիան, Իտալիան, Իսպանիան և Նիդեռլանդները հաջորդ շաբաթվանից ժամանակավորապես կդադարեցնեն ծառայությունները, իսկ Բելգիան արդեն իսկ դադարեցրել է դեպի ԱՄՆ ծանրոցներ ուղարկելը։ Պորտուգալիան դեռ որևէ գործողություն չի ձեռնարկել։

ՆԳՆ ոստիկանության ծառայողները շարունակում են բնակչության հետ ամենօրյա բացատրական աշխատանքները՝ ապօրինի զենք-զինամթերքը կամավոր հանձնելու ուղղությամբ: Այդ մասին հայտնել է ՀՀ ՆԳՆ ոստիկանության հասարակայնության հետ կապի և լրատվության վարչությունը։

Մասնավորապես նշվում է, որ քրեական ոստիկանության Շիրակի մարզային վարչության ծառայողների բացատրական աշխատանքի արդյունքում օգոստոսի 20-ին 911 ծառայություն զանգած քաղաքացին հայտնել է, որ Գյումրի-Մարմաշեն խճուղում գտնվող կիսակառույց շենքերից մեկում զենք-զինամթերք է թողել։ Նշված վայրում քրեական ոստիկանները հայտնաբերել են 5 ինքնաձիգ, 3 ատրճանակ, հրացաններ, ինքնաձիգի 2 պահունակ, նռնակ ու տարբեր տրամաչափի 521 փամփուշտ։

ԱՄՆ նախագահ Դոնալդ Թրամփը հաճախ է շփվում կնոջ՝ Մելանիայի հետ, չնայած նրա հրապարակային ելույթների համեմատաբար հազվադեպությանը, հաղորդում է CNN-ը՝ հղում անելով նախագահական ընտանիքին մոտ կանգնած աղբյուրներին։

«Մինչ այժմ Դոնալդ Թրամփի նախագահական ընթացիկ ժամկետի ընթացքում նա հանրության առջև հայտնվել է ընդամենը 19 օր, նախորդ նույն ժամանակահատվածի 40 օրվա համեմատ… Այնուամենայնիվ, Մելանիան հաճախակի շփվում է ամուսնու հետ հաղորդագրությունների կամ զանգերի տեսքով»,- РИА Новости-ի հաղորդմամբ՝ հայտնել է աղբյուրը:

Աղբյուրը հեռուստաալիքին ասել է, որ Թրամփը լսում է կնոջ կարծիքը և պարբերաբար խորհրդակցում նրա հետ։

Հայաստանի և Ադրբեջանի միջև տրանսպորտային միջանցքը, որը կառավարելու է ԱՄՆ-ը, կարող է դառնալ Չինաստանի և Եվրոպայի միջև առևտրային ուղու մի մասը, եթե Վաշինգտոնը չսահմանափակի դրա օգտագործումը, գրում է Bloomberg-ը՝ վկայակոչելով անանուն թուրք պաշտոնյաների։

Ամերիկյան լրատվամիջոցի զրուցակիցները նշել են, որ միջանցքը կառավարելու բացառիկ իրավունքը թույլ կտա Միացյալ Նահանգներին որոշել, թե ինչպես այն կօգտագործվի, հետևաբար՝ Վաշինգտոնի դիրքորոշումից է կախված, թե արդյոք խոշոր արտահանողները, այդ թվում՝ Չինաստանը, կկարողանան օգտվել առևտրային ուղուց։

Օգոստոսի 8-ին Սպիտակ տանը Միացյալ Նահանգների, Հայաստանի ու Ադրբեջանի ղեկավարները համատեղ հռչակագիր ստորագրեցին, որի կետերից մեկն էլ ապաշրջափակման մասին է: Փաստաթղթով ամրագրվում է, որ Երևանն աշխատելու է Վաշինգտոնի և փոխադարձաբար համաձայնեցված երրորդ կողմերի հետ՝ Հայաստանի տարածքում «Թրամփի ուղի՝ հանուն միջազգային խաղաղության և բարգավաճման» («Trump Route for International Peace and Prosperity» (TRIPP)) հաղորդակցության ծրագրի իրականացման շրջանակը սահմանելու նպատակով։

Փարիզում Իտալիայի դեսպան Էմանուելա Դ՛Ալեսանդրոյին կանչել են Ֆրանսիայի ԱԳՆ՝ Իտալիայի փոխվարչապետ, տրանսպորտի և ենթակառուցվածքների նախարար Մատեո Սալվինիի անընդունելի արտահայտություններից հետո: Այդ մասին հայտնում են տեղական ԶԼՄ-ները՝ վկայակոչելով դիվանագիտական ներկայացուցչին, որը ցանկացել է անանուն մնալ։

Դեսպանին հիշեցրել են, որ նման արտահայտությունները հակասում են երկու երկրների միջև վստահության մթնոլորտին, նրանց պատմական հարաբերություններին և վերջին շրջանում ձևավորված երկկողմ իրադարձություններին։ Իսկապես, այդ իրադարձությունները, հատկապես Ուկրաինային անվերապահ աջակցության համատեքստում, ցույց տվեցին երկու մայրաքաղաքների ամուր մերձեցումը, ասել է ներկայացուցիչը։

Ավելի վաղ Սալվինին ծաղրել էր Արևմտյան զորքեր Ուկրաինա ուղարկելու գաղափարը: Նա Ֆրանսիայի նախագահ Էմանուել Մակրոնին առաջարկել է վերցնել սաղավարտն ու հրացանը և ինքնուրույն մեկնել այդ երկիր։

Թուրքիայի արևմուտքում 4.2 մագնիտուդով երկրաշարժ է տեղի ունեցել, հայտնում է երկրի աղետների դեմ պայքարի AFAD ծառայությունը։

Երկրաշարժի օջախը գտնվել է 7 կմ խորության վրա։

Ստորգետնյա ցնցումները գրանցվել են Բալիկեսիո քաղաքից 58 կմ հարավ-արևելք և Սինդիրգիից 6 կմ հարավ-արևելք ընկած հատվածում։

Չինաստանը հայտարարել է նոր հսկայական արևային նախագծի մասին Տիբեթյան բարձրավանդակում, որը նախատեսված է դառնալ աշխարհի ամենամեծ արևային կայանը։ Այս մասին հաղորդում է Euronews-ը:

Այն կզբաղեցնի շուրջ 610 քառակուսի կիլոմետր տարածք, ինչը համարժեք է Չիկագո քաղաքի չափի հետ։ Ավարտին հասցվելուց հետո կայանը կունենա ավելի քան 7 միլիոն արևային վահանակ և կկարողանա էլեկտրաէներգիա մատակարարել մոտ 5 միլիոն ընտանիքի։

Վահանակները կծառայեն որպես քամու արգելք՝ նվազեցնելով փոշին և գոլորշիացումը, իսկ ներքևում հնարավոր կլինի բուսականություն աճեցնել։ Տեղացիներն այս համակցությունը նույնիսկ կոչում են «ֆոտովոլտային ոչխարներ», քանի որ անասունները հանգիստ կարող են արածել վահանակների տակ։

2025 թվականի ամռանը Եվրոպայում կարող են աճել մոծակների միջոցով փոխանցվող հիվանդությունները, այդ թվում՝ Արևմտյան Նեղոսի վիրուսը և չիկունգունյան։ Կլիմայի փոփոխությունը մեծացնում է ռիսկերը, և կանխարգելումը մնում է մարդկանց պաշտպանելու գլխավոր բանալին։ Այս մասին հաղորդում է Euronews-ը:

Եվրոպական առողջապահական մարմինները զգուշացրել են, որ 2025 թվականի ամռանը կարող է գրանցվել մոծակների միջոցով փոխանցվող հիվանդությունների ռեկորդային աճ։ Արևմտյան Նեղոսի վիրուսը և չիկունգունյան ամենամեծ մտահոգությունն են առաջացնում։

Հիվանդությունների կանխարգելման և վերահսկման եվրոպական կենտրոնի (ECDC) տվյալներով՝ Եվրոպայում մոծակների սեզոնը դառնում է ավելի երկար և ինտենսիվ։ Սա պայմանավորված է միջին ջերմաստիճանի բարձրացմամբ, ավելի մեղմ ձմեռներով և տեղումների փոփոխությամբ՝ գործոններ, որոնք ստեղծում են բարենպաստ պայմաններ մոծակների բազմացման և նրանց կողմից տարածվող հիվանդությունների տարածման համար։

Առողջապահության և կլիմայի փորձագետները նշում են, որ կլիմայի փոփոխությունը կարող է հանգեցնել մոծակների միջոցով փոխանցվող հիվանդությունների էնդեմիկ դառնալուն Եվրոպայում։

«Եվրոպան մտնում է նոր փուլ, որտեղ մոծակների միջոցով փոխանցվող հիվանդությունների ավելի երկար, ավելի մեծ և ավելի ինտենսիվ փոխանցումը դառնում է նոր իրականություն», - ասել է Հիվանդությունների կանխարգելման և վերահսկման եվրոպական կենտրոնի (ECDC) տնօրեն Պամելա Ռենդի-Վագները։

Գործակալության տվյալներով՝ 2025 թվականին Եվրոպայում գրանցվել է չիկունգունիայի 27 բռնկում՝ ռեկորդային թիվ մայրցամաքի համար։ Բացի այդ, գրանցվել է Արևմտյան Նեղոսի վիրուսային վարակի 335 դեպք, որը ամենաբարձր մակարդակն է վերջին երեք տարիների ընթացքում։ Վիճակագրությունը ներառում է ինչպես Եվրամիությունը, այնպես էլ մայրցամաքային Եվրոպայի մի շարք այլ երկրներ։

Այսօր տեղի է ունեցել Ադրբեջանի Արտաքին գործերի նախարար Ջեյհուն Բայրամովի հեռախոսազրույցը Ռուսաստանի Դաշնության Արտաքին գործերի նախարար Սերգեյ Լավրովի հետ։

Հեռախոսազրույցի ընթացքում քննարկվել են Ռուսաստանի և Ադրբեջանի երկկողմ և բազմակողմ օրակարգի մի շարք հարցեր, ինչպես նաև քաղաքական, տնտեսական և հումանիտար համագործակցության, տարածաշրջանային և միջազգային անվտանգության հարցեր:

Կողմերը մտքեր են փոխանակել օգոստոսի 22-ին Աստրախանում Ռուսաստանի Դաշնության և Ադրբեջանի միջև տնտեսական համագործակցության միջկառավարական հանձնաժողովի վերջին նիստի վերաբերյալ և բարձր գնահատել դրա արդյունքները: Զրույցի ընթացքում մտքեր փոխանակվեցին նաև փոխադարձ հետաքրքրություն ներկայացնող այլ հարցերի շուրջ:

Ֆրանսիայի նախագահ Էմանուել Մակրոնը Օլիվիե Կուրտոյին նշանակել է Վրաստանում նոր դեսպան։

«Արմենպրես»-ի հաղորդմամբ՝ այս մասին հայտնում է Sputnik գործակալության վրացական ծառայությունը՝ հղում կատարելով Ֆրանսիայի նախագահի համապատասխան հրամանագրին։ 

«Պարոն Օլիվիե Կուրտոն, ավագ ադմինիստրատոր, նշանակվում է Վրաստանում Ֆրանսիայի արտակարգ և լիազոր դեսպան»,-ասված է հրամանագրում։  

Նշվում է, որ Կուրտոն կփոխարինի Շերազ Գասրիին, որը Վրաստանում Ֆրանսիայի դեսպանի պաշտոնը զբաղեցնում է 2023 թվականից։