Սուրգուտից Բաքու թռչող ինքնաթիռում ուղևոր է մահացել: Ինչպես հայտնում են ադրբեջանական լրատվամիջոցները, վայրէջք կատարելիս ինքնաթիռում մահացել է ՌԴ քաղաքացի Էսմիրա Ռախմանովան:

Նշվում է, որ կինը երկար ժամանակ քաղցկեղի դեմ էր պայքարում։ Փաստի առթիվ հետաքննություն է տարվում։

Ես Աժ-ում ասել եմ, որ կարիքի պարագայում իմ այցը հնարավոր եմ համարում Վրաստան և մենք ուզում ենք  ասել, որ շատ ակտիվ քննարկումների մեջ ենք, իսկ իմ այցի հնարավորության դուռը ևս փակված չէ,  չունենք այնպիսի իրավիճակ, որ իմ այցը կարողանա  իրավիճակը փոխել: Օնլայն կապի մեջ ենք, օրական պարբերականությամբ կապի մեջ ենք կոնյակագործների հետ:   Այս մասին կառավարության նիստից հետո ճեպազրույցում ասաց Էկոնոմիկայի նախարար Գևորգ Պապոյանը՝  պատասխանելով լրագրողի այն հարցին, թե ինչո՞ւ չի գնացել Վրաստան, քանի որ հայտարարել էր, որ կոնյակագործների պահաջն արդարացի է եւ ինքն անձամբ մեկնելու է Վրաստան այս խնդրին լուծում տալու համար։

«Ես ուզում եմ մի կարևոր բան այդ թեմայով ասել, շատ չեմ բացի փակագծեր, բայց ես ուզում եմ նշել, որ կառավարությունը հիմա մշակում է աջակցության ծրագրեր մեր կոնյակագործների համար, որոնք պետք է ապահովեն սեպտեմբեր-հոկտեմբեր ամիսներին խաղողի անխափան մթերումները, այսինքն մթերում-արտահանում տրամաբանութւյան մեջ մենք մեր բոլոր կազմակերպություններին, որոնք որ ներգրավված են այդ գործընթացում՝ կաջակցենք, բայց պայմանը պետք է լինի խաղողի անխափան և պատշաճ որակի մթերման գործընթացի կազմակերպումը», -նշել է Պապոյանը:

Նա նշեց, որ կա որոշակի քննարկման արդյունքների ամփոփում վրացական կողմի հետ: «Ուզում եմ նշել, որ կառավարությունը խաղող արտադրողներին, մեր գյուղացիներին, մեր ֆերմերներին և կոնյակ արտահանողներին միայնակ չի թողելու»,-ասաց Պապոյանը:

Bitcoin կրիպտոարժույթի գինը գերազանցել է պատմական առավելագույնը՝ գերազանցելով 110,000 դոլարը՝ համաձայն Binance հարթակի տվյալների։ Երևանի ժամանակով ժամը 0327-ի դրությամբ կրիպտոարժույթի գինը գերազանցել է 110,000 դոլարի շեմը (+3,65%)։

Սակայն որոշ ժամանակ անց Bitcoin-ի աճը դանդաղել է՝ կազմելով 109,600 դոլար (+2,59%):

«Հիվանդությունն արդեն բավականին զարգացած է», շագանակագեղձի քաղցկեղի պատճառով Ջո Բայդենին մնացել է 12-18 ամիս ապրելու, գրում է The Washington Free Beacon-ը՝ հղում անելով Սպիտակ տան նախկին բժիշկ և հանրապետական ​​կոնգրեսական Ռոնի Ջեքսոնին։

Նրա կարծիքով՝ ԱՄՆ նախկին նախագահի բուժող բժիշկ Քևին Օ’Քոնորը «կամ ստել է ամերիկացի ժողովրդին, կամ էլ անգործունակ է»։ Ջեքսոնը նաև ենթադրել է, որ Սպիտակ տունը, հնարավոր է, ախտորոշման մասին շատ ավելի վաղ է իմացել։

Հոդվածի հեղինակներն ընդգծում են, որ Բայդենների ընտանիքն ունի «հանրությանը առողջապահական հարցերի վերաբերյալ մոլորեցնելու երկար պատմություն»։ Մասնավորապես, նրանք գրեթե երկու տարի թաքցրել են մի շարք հիվանդություններ։

Երևանում մայիսի 22-ի ցերեկը, 23-ին, 25-26-ին սպասվում է առանց տեղումների եղանակ։ Մայիսի 24-ին ժամանակ առ ժամանակ, 27-ի երեկոյան ժամերին սպասվում է կարճատև անձրև և ամպրոպ, ամպրոպի ժամանակ քամու ուժգնացում՝ 13-15 մ/վ արագությամբ։ Այս մասին հայտնում են «Հիդրոօդերևութաբանության և մոնիթորինգի կենտրոն»-ից:

Մարզերում մայիսի 22-ի ցերեկը, 23-ի գիշերը և 26-ին սպասվում է առանց տեղումների եղանակ։

Մայիսի 23-ին ուշ երեկոյան ժամերին, 24-ին ժամանակ առ ժամանակ, 25-ին և 27-ին կեսօրից հետո առանձին շրջաններում սպասվում է կարճատև անձրև և ամպրոպ։ Քամին՝ արևմտյան՝ 2-5 մ/վ, ամպրոպի ժամանակ սպասվում է քամու ուժգնացում՝ 17-20 մ/վ արագությամբ։ Օդի ջերմաստիճանն էապես չի փոխվի։

84,5 մլն դրամ ՀՀ պետական բյուջեից կհատկացվի սնանկացած ԱՆԻՖ պետական ընկերությանը շահութահարկը վճարելու համար։ Որոշումն ընդունվեց ՀՀ կառավարության այսօրվա նիստի ժամանակ։

Նշենք, որ «Հայաստանի պետական հետաքրքրությունների ֆոնդ» ՓԲԸ–ն (ANIF) ստեղծվել է ՀՀ կառավարության 2019 թ. ապրիլի որոշմամբ: 2022-2023 թթ. կոռուպցիայի կանխարգելման հանձնաժողովը և ՀՀ պետական վերահսկողական ծառայությունը բացահայտել են հիմնադրամում չարաշահումների և հափշտակությունների դեպքեր: Քննչական կոմիտեն այժմ ուսումնասիրում է այդ գործերը։

Ռումինիան պատրաստ է ավելացնել իր պաշտպանական ծախսերը և ՆԱՏՕ-ի նոր նպատակներին հասնել նույնիսկ սեփական ռեկորդային բյուջետային դեֆիցիտի կրճատման պայմաններում։ Այս մասին հայտնել է երկրի նորընտիր նախագահ Նիկուշոր Դանը բրիտանական Financial Times թերթին տված հարցազրույցում։

Նա ասել է, որ Ռումինիան ցանկանում է իրագործել ՆԱՏՕ-ի գլխավոր քարտուղարի առաջարկը և ավելացնել պաշտպանական ծախսերը՝ դրանք հասցնելով ՀՆԱ-ի 3,5%-ի, ինչպես նաև 1,5% հատկացնել ենթակառուցվածքներին և կիբերանվտանգությանը։

«Այո, ես դրան աջակցում եմ, – ասել է Դանը՝ նշելով, որ պաշտպանական ծախսերի ավելացման ժամկետները դեռ պետք է քննարկել ԱՄՆ-ի և մյուս դաշնակիցների հետ։

Նիկուշոր Դանը նաև խոստացել է շարունակել աջակցությունը Կիևին։

«Մենք կմնանք եվրոպական ջանքերի մաս՝ աջակցելու Ուկրաինային ձեռք բերել ավելի խելամիտ խաղաղություն։ Դա նշանակում է, որ մենք կշարունակենք օգնություն ցուցաբերել Ուկրաինային և կմասնակցենք եվրոպական ջանքերին, որ նա իր անվտանգությունն իր սեփական ձեռքը վերցնի», – ասել է նորընտիր նախագահը։

Ըստ g4media.ro լրատվական հարթակի՝ 2024 թվականին Ռումինիայում գրանցվել է Եվրամիությունում ամենաբարձր բյուջետային դեֆիցիտը` 9.3%։ Ռումինիան մշակել է հարկային կոնսոլիդացիայի պլան դեֆիցիտի կրճատման համար՝ այն նախորդ տարվա 9.3%-ից այս տարի հասցնելով 7%-ի։ Սակայն տարեսկզբի տվյալները ցույց են տալիս, որ դեֆիցիտը մնում է բարձր։

ՆԱՏՕ-ի գլխավոր քարտուղար Մարկ Ռյուտեն առաջարկում է պաշտպանական ծախսերը մեծացնել՝ հասցնելով ՀՆԱ-ի 5%-ին։ Ենթադրվում է, որ 3,5%-ը կուղղվի անմիջապես ռազմական ծախսերին, իսկ մնացած 1,5%-ը՝ պատերազմական ժամանակներում ենթակառուցվածքային օբյեկտների կառուցման համար։

Նորընտիր նախագահ Նիկուշոր Դանը հաղթել է մայիսի 18-ին Ռումինիայում անցկացված նախագահական ընտրություններում՝ ստանալով ձայների 53,60%-ը։ Նրա երդմնակալության արարողությունը կկայանա մայիսի 26-ին։

Հունական Կրետե կղզու ափերի մոտ 6,2 մագնիտուդով երկրաշարժ է գրանցվել։ «Արմենպրես»-ի փոխանցմամբ՝ այս մասին հաղորդում է Եվրոպամիջերկրածովյան սեյսմոլոգիական կենտրոնը։

Ստորգետնյա ցնցումների էպիկենտրոնը գտնվել է Հերակլիոն քաղաքից 74 կմ դեպի հյուսիս։ Երկրաշարժի օջախը գտնվել է 15 կմ խորության վրա։

Տուժածների և ավերածությունների մասին տեղեկություններ չեն ստացվել։

Independent պարբերականը նշում է, որ ցունամիի սպառնալիք է հայտարարվել։

Ցնցումները զգացվել են ամբողջ Էգեյան ծովում, այդ թվում՝ Թուրքիայի և Իսրայելի որոշ հատվածներում։

Հայաստանը մի շարք երկրների համար առանց վիզայի ռեժիմ կսահմանի. նախագիծը այսօր Կառավարության նիստում զեկուցել է ԱԳ նախարար Արարատ Միրզոյանը։

Այսպիսով՝ Բահրեյնի Թագավորության, Սաուդյան Արաբիայի Թագավորության և Օմանի Սուլթանության քաղաքացիների, ինչպես նաև Ամերիկայի Միացյալ Նահանգների, Եվրոպական միության երկրների, Շենգենյան համաձայնագրի երկրների, Արաբական Միացյալ Էմիրությունների, Բահրեյնի Թագավորության, Կատարի Պետության, Սաուդյան Արաբիայի Թագավորության, Քուվեյթի Պետության կամ Օմանի Սուլթանության տարածքում կացության կարգավիճակ ունեցող օտարերկրացիների համար Հայաստանի Հանրապետություն առանց մուտքի վիզայի այցելությունների ռեժիմ կսահմանվի։

«Այս փոփոխության անhրաժեշտությունը հիմնավորվել է տնտեսական նկատառումներով։ Ակնհայտ է, որ այս փոփոխությամբ մենք կհեշտացնենք և մարդկանց այցելությունը մեր երկիր, և մեր քաղաքացիների շփումները, ինչպես նաև կմեծացնենք ներդրումային գրավչությունը»,- նշեց Միրզոյանը։

Էկոնոմիկայի նախարար Գևորգ Պապոյանը նշեց, որ սա նաև կխթանի զբոսաշրջությունը։

Հայաստանը կմիանա Խոշոր կատվազգիների հարցերով միջազգային դաշինքին։ Համապատասխան որոշումն ընդունվեց ՀՀ կառավարության այսօրվա նիստին։

«Դաշինքին միանալը կհանդիսանա որպես լայն հնարավորություն ընձառյուծի, այլ կատվազգիների պահպանման գործողությունների ծրագրի իրականացման, նոր մոտեցումների կիրառման, ինչպես նաև մեր երկրի կենդանական աշխարհի հազվագյուտ և արժեքավոր ներկայացուցիչների պահպանման և թվաքանակի ավելացման հարցում»,- ասված է որոշման մեջ:

Նշվում է, որ դաշինքի հետ փոխգործակցությունը թույլ կտա փոխանակել լավագույն փորձը, համատեղ հետազոտություններ և մոնիտորինգ իրականացնել, խնդիրն ավելի մանրամասն ուսումնասիրել և կատարելագործել խոշոր կատվազգիների պաշտպանությանն ուղղված միջոցառումները։

Դաշինքին միանալու նպատակահարմարությունը կարևոր է նրանով, որ Հայաստանի Հանրապետությունը 2024 թ. Կոլումբիայի Կալի քաղաքում կայացած ՄԱԿ-ի «Կենսաբանական բազմազանության մասին» կոնվենցիայի Կողմերի 16-րդ համաժողովի ընթացքում ընտրվել է որպես հաջորդ՝ 17-րդ համաժողովը 2026 թվականին հյուրընկալող երկիր։