Սա Եվրոպայի ամենաերկարատև պատերազմն է Երկրորդ համաշխարհայինից հետո։ Այս մասին Fox News-ին տված հարցազրույցում հայտարարել է Ուկրաինայի հարցով ԱՄՆ-ի հատուկ բանագնաց Քիթ Քելոգը։ Ըստ նրա, զոհերի և վիրավորների թվերը «պարզապես աստղաբաշխական են»։

«Դուք չեք կարող գնահատել դա, մինչև չհայտնվեք տեղում։ Դուք տեսնում եք վիրավորներին, որոնք գտնվում են հիվանդանոցներում և առաջնագծում։ Նախագահ Թրամփը վերջ կդնի դրան։ Պետք է արժանին մատուցել նախագահին։ Սա պատերազմ է, որը նա ժառանգել է, այն տեղի չի ունեցել նրա օրոք, բայց հանգեցրել է նրան, որ, ինչպես բանակում ենք ասում, վերջին 10 մետրը դեպի նպատակը ամենադժվարն են։ Վերջին 2 մետրերը գրեթե անցած են, որպեսզի խաղաղության ծրագիրը կյանքի կոչվի», — ասել է Քելոգը։

Նրա վկայությամբ, աշխատանքը շարունակվում է, ինչը նշանակում է, որ «մենք կաշխատենք այն ավարտին հասցնելու համար»։

Քելոգը հավելել է, որ կա հնարավորություն հաջողության հասնելու, և անհրաժեշտ է ծրագիրը ամրապնդել անվտանգության երաշխիքներ ապահովող փաստաթղթերով։ «Սա որոշակի շրջանակ է։ Երբ կարդում եք, այնտեղ 28 կետ կա։ Ասվածը իսկապես կարևոր է, որովհետև բառերը կարևոր են։ Նրանք, ովքեր մոռանում են պատմությունը, դատապարտված են կրկնելու այն։ Մենք չենք ուզում, որ դա կրկնվի։ Միացյալ Նահանգները մասամբ դա երաշխավորում է», — նշել է նա։

Հատուկ բանագնացն ընդգծել է, որ ուկրաինական կողմը վստահում է ԱՄՆ-ին։ Նա նաև նշել է, որ խաղաղության համաձայնության պատասխանատվությունը, ինչպես ամերիկացիների, այնպես էլ եվրոպական պետությունների վրա է։

«Բայց նախագահ Թրամփը հասել է իր նպատակին, և ես կարծում եմ, որ մենք մոտեցել ենք ավարտին։ Սա լավ ծրագիր է։ Կան բաներ, որոնք պետք է հստակեցնել և մի փոքր ավելի մանրամասն բացատրել, բայց մենք գրեթե հասել ենք նպատակին», — ասել է Քելոգը։