Ռուսաստանի Մախաչկալա քաղաքի մոտակայքում երկրաշարժ է գրանցվել, որը զգացվել է նաև Հայաստանում։ Տեղեկությունը հայտնում է ՀՀ ՆԳՆ փրկարար ծառայությունը։

«ՀՀ ՆԳՆ սեյսմիկ պաշտպանության տարածքային ծառայության սեյսմոլոգիական ցանցը օգոստոսի 27-ին` տեղական ժամանակով 00:33-ին, Ռուսաստանի Մախաչկալա քաղաքից 75 կմ հարավ-արևելք 10 կմ խորությամբ 5.5 մագնիտուդով երկրաշարժ է գրանցել։ Էպիկենտրոնային գոտում ստորգետնյա ցնցման ուժգնությունը կազմել է 7-8 բալ»,– ասված է հաղորդագրությունում:

Երկրաշարժը 2-3 բալ ուժգնությամբ զգացվել է Տավուշի մարզի մի շարք համայնքներում:

ՌԴ արտակարգ իրավիճակների նախարարությունն իր հերթին հայտնում է, որ զոհեր և ավերածություններ չկան: Երկրաշարժը տեղի է ունեցել Կասպից ծովի շրջանում։