Հայկական «IdeasColl» ստարտափն առաջիկա ամիսներին պատրաստվում է թողարկել գործառույթների լայն հնարավորությամբ կորպորատիվ մեսենջեր։ «Sevan Startup Summit»–ի շրջանակում Sputnik Արմենիայի հետ զրույցում այս մասին հայտնեց ստարտափի համահիմնադիր Կարեն Սիմոնյանը։

Այս ծրագրում կմիավորվեն տարբեր ֆունկցիաներ` զրուցարան, տվյալների ու նիշքերի (file) արխիվ և մի շարք ուրիշներ, օրինակ` ղեկավարը կկարողանա հեռավար ուղարկել կամ ջնջել տվյալներ ենթակաների օգտահաշիվներից։

Նման լայն ֆունկցիաներով մեսենջերներ բանկերն ունեն, բայց դրանք թանկ են և ունեն տեղեկատվության պաշտպանության բարձր չափանիշներ։ Սիմոնյանի խոսքով` ամեն բիզնես չէ, որ այդքան ուժեղ պաշտպանության կարիք ունի և այդքան բարձր գնով։

Ընկերությունը մտադիր է շուկա դուրս գալ հաջորդ տարվա հունվարին, սկզբում` Հայաստանում, իսկ հետո` այլ փոքր երկրներում, որոնք առանձնապես չեն հետաքրքրում խոշոր ծրագրավորողներին։

«Իհարկե, «Microsoft»-ը կամ «Amazon»-ը կարող են մեկ օրում ստեղծել նման համակարգ, սակայն հազիվ թե ցանկանան ժամանակ և ջանք ծախսել փոքր շուկաների համար», - նշեց Սիմոնյանը:

Համակարգում սարքերի քանակի լուրջ սահմանափակումներ չկան. դրան կարելի է միացնել հարյուրավոր հեռախոսներ։