Հայաստանի հավաքականի նախկին ավագ Հենրիխ Մխիթարյանը մտադիր է ավարտել իր կարիերան Միլանի «Ինտերում»։ Այս մասին Մխիթարյանը լրագրողներին ասել է ԱՄՆ-ում, որտեղ գտնվում է «Ինտերի» հետ։

«Չեմ ցանկանում ավարտել կարիերաս և հետո զղջալ, որ շուտ եմ ավարտել։ «Ինտերից» հետո՝ վերջ։ Չեմ ցանկանում իջեցնել մակարդակը։ Հայաստան չեմ վերադառնա։ Սաուդյան Արաբիայի նման ուղղությունները նույնպես ինձ չեն հետաքրքրում։ Ամենայն հարգանքով, բայց ես սիրում եմ ֆուտբոլը ֆուտբոլի, այլ ոչ թե փողի համար։ Ամեն առավոտ արթնանում եմ՝ ցանկանալով մարզվել և ցույց տալ, թե ինչի եմ ընդունակ», - ասել է հայ ֆուտբոլիստը։

Մխիթարյանը խոստովանել է, որ դեռ չի որոշել, թե ինչով է զբաղվելու կարիերան ավարտելուց հետո։

«Այսօր ասում եմ՝ կցանկանայի հեռանալ ֆուտբոլային աշխարհից։ Բայց երբեք մի ասա՝ երբեք։ Ժամանակ կպահանջվի մտածելու, հանգստանալու և ընտանիքիս հետ լինելու համար»,- ասել է Մխիթարյանը։

Նշենք, որ Հենրիխ Մխիթարյանը «Ինտերի» հետ գտնվում է Միացյալ Նահանգներում, որտեղ մասնակցում է աշխարհի ակումբային առաջնությանը։