Ռուսաստանի զինված ուժերի բոլոր խմբավորումները հաջողությամբ առաջ են շարժվում բոլոր ուղղություններով, այս մասին ասել է ՌԴ նախագահ Վլադիմիր Պուտինը։

Նա նշել է, որ հարձակումն ընթանում է տարբեր տեմպերով, թշնամին փորձում է «խցանել անցքերը»։

Ըստ Պուտինի՝ «լույս է երևում թունելի վերջում» ուկրաինական կարգավորման մեջ, բայց Ռուսաստանի Դաշնությունը պատրաստ է լուծել իր առջև դրված խնդիրները ռազմական միջոցներով։

Այսօր Արևմտյան Ադրբեջան վերադառնալու գաղափարը Ադրբեջանում ազգային գաղափար է։ Այս մասին հայտարարել է Ադրբեջանի Միլլի Մեջլիսի պատգամավոր, այսպես կոչված «Արևմտյան Ադրբեջան համայնքի» «նախագահ» Ազիզ Ալեքպեռլին։

«Այսօր Արևմտյան Ադրբեջան վերադառնալու գաղափարը Ադրբեջանում ազգային գաղափար է, մեր հայրենակիցների իրավունքը՝ հիմնված միջազգային իրավունքի վրա, և մի հարց, որը համապատասխանում է ոչ միայն ադրբեջանական, այլև հայ ժողովրդի շահերին։ Որովհետև Արևմտյան Ադրբեջանից փախստականների վերադարձն իրենց հայրենի հողեր՝ Հայաստանում, երկու երկրների և երկու ժողովուրդների միջև վստահության կայունության պայման և երաշխիք է»,- հայտարարել է ադրբեջանցի պատգամավորը։

Ադրբեջանում պահվող հայ գերի Վիգեն Էուլջեքջյանի կինը՝ Լինդա Էուլջեքջյանը, ահազանգել է այն մասին, որ ամուսինը արդեն 20 օր է հացադուլ է անում Բաքվի բանտում։

«Փաստինֆո»-ի հետ զրույցում Լինդա Էուլջեքջյանը պատմեց, որ երեկ իրեն զարմացրել է ամուսնու զանգը։

«Ես նրա հետ խոսեցի նաև անցյալ ամիս։ Նա արդեն 20 օր հացադուլ է անում։ Իմ ամուսինը փորձում է իր հացադուլի միջոցով դիմել աշխարհին՝ իր և իր բանտարկյալ ընկերների համար։ Ես կորցնում եմ ամուսնուս։ Իմ ամուսնու կյանքը վտանգված է։ Նա ասաց, որ իրեն բժիշկ է պետք, որ անտանելի ցավեր ունի։ Ադրբեջանցիները նրան բժշկական օգնություն չեն տրամադրում։ Ես դիմում եմ ամբողջ աշխարհին, նպատակս մեկն է՝ ուզում եմ, որ ամուսինս առողջ մնա»։ 

Կինը պատմեց, որ վերջին անգամ կարողացել է տեսնել ամուսնուն ամիսներ առաջ՝ տեսակապի միջոցով, որի ժամանակ նա հիվանդ էր և նիհարած։ «Պատկերացրեք հիմա՝ հացադուլից հետո ինչ վիճակում կլինի։ Խաղաղության պայմանագրից հետո գերիները պետք է ազատ արձակվեն։ Եթե պատերազմն ավարտվել է, ապա ինչի՞ են սպասում։ Ես նաև չգիտեմ՝ իմ ահազանգերն անտեսվո՞ւմ են, թե՞ ոչ։ Չգիտեմ՝ ինչ է կատարվում այնտեղ, բայց ամուսինս խնամքի կարիք ունի։ Ես գրառում եմ անում, բայց արդյո՞ք որևէ մեկը ինչ-որ բան անում է։ Ուզում եմ դիմել Նիկոլ Փաշինյանին։ Դիմում եմ նրան որպես կին, ով կարիք ունի իր աջակցության։ Մենք կործանված ընտանիք ենք։ Ես խնդրում եմ նրան նայել բոլոր հուսահատ մայրերին։ Իմ խնդրանքը մեկն է բոլոր ղեկավարներից. խնդրում եմ օգնեք ինձ։ Շուտով կկորցնեմ մորս, չեմ ցանկանում ամուսնուս կորցնել։ Ինձ ամուսինս է պետք»։

Հիշեցնենք, որ 2021 թվականի հունիսի 14-ին Բաքվի դատարանը Վիգեն Էուլջեքջյանին դատապարտեց 20 տարվա ազատազրկման։

Վիգեն Էուլջեքջյանը գերեվարվել է 2020թ. նոյեմբերի 9-ին՝ հրադադարի մասին հայտարարությունից մեկ օր անց, Շուշիի մոտակայքում, մեկ այլ լիբանանցու՝ Մարալ Նաջարյանի հետ։ Նրանք Արցախ էին գնացել, որպեսզի Շուշիի հյուրանոցներից մեկից վերցնեին Նաջարյանի իրերը։ Նրանք ձերբակալվել էին ադրբեջանցի զինվորականների կողմից և տեղափոխվել Բաքու՝ բազմաթիվ այլ հայ քաղաքացիական և ռազմական գերիների հետ։

Մարալ Նաջարյանը ազատ է արձակվել 2021 թվականի մարտին։

Ուկրաինայի նախագահ Վլադիմիր Զելենսկին մոտ ապագայում զրույց կունենա ԱՄՆ նախագահ Դոնալդ Թրամփի հետ, հայտնում է «Интерфакс-Украина»-ն։

Ռուսաստանի նախագահ Վլադիմիր Պուտինը հայտարարել է, որ չի բացառում Ուկրաինայի նախագահ Վլադիմիր Զելենսկու հետ հանդիպումը։ Ռուսաստանի առաջնորդի խոսքերը փոխանցում է РИА Новости-ն։

«Ինչ վերաբերում է պարոն Զելենսկու հետ հնարավոր հանդիպումներին, ես արդեն խոսել եմ այդ մասին։ Ընդհանուր առմամբ, ես երբեք չեմ բացառել նման հանդիպման հնարավորությունը»,- ասել է Պուտինը։

Նա հավելել է, որ եթե Վլադիմիր Զելենսկին պատրաստ է հանդիպում անցկացնել, ապա պետք է գա Մոսկվա, և հանդիպումը կկայանա։

Մոսկվայում տեղի է ունեցել Ռուսաստանում առաջին անօդաչու տրամվայի գործարկման մեկնարկի արարողությունը։ Դրան մասնակցել է Մոսկվայի քաղաքապետ Սերգեյ Սոբյանինը, գրում է Москва 24-ը։

Նոր տրամվայը կսկսի ուղևորներ տեղափոխել քաղաքի հյուսիս-արևմուտքում՝ «Մետրո Շչուկինսկայա – Կուլակով փողոց» երթուղով։ Պաշտոնական մեկնարկից առաջ տրանսպորտը անցել է փորձարկման երեք փուլ։

Սոբյանինը նշել է, որ մինչև տարեվերջ Մոսկվայում կհայտնվեն ևս երեք անօդաչու տրամվայներ, մինչև 2026 թվականը թիվը կհասնի 15-ի, իսկ մինչև 2030 թվականը նման տրանսպորտը կփոխարինի մայրաքաղաքի բոլոր տրամվայների երկու երրորդին։ 

Սոբյանինի խոսքով՝ հաջորդ խնդիրը կլինի անօդաչու մետրոյի գնացքի մեկնարկը, որը տեղի կունենա 2026 թվականին՝ 2025 թվականի փորձարկումներից հետո։

«Սիսական» ջոկատի հրամանատար Աշոտ Մինասյանը, որը երեք պատերազմի մասնակից է, դատապարտվել է ազատազրկման՝ զենք պահելու մեղադրանքով։ Այս մասին հայտնում է «Փաստինֆո»-ն։

Վերաքննիչ քրեական դատարանը Աշոտ Մինասյանի  նկատմամբ որպես պատիժ սահմանված 1 տարի 10 ամիս ժամկետով ազատազրկումը պայմանականորեն չկիրառելու որոշումը բեկանել է՝ սահմանելով ռեալ ազատազրկում։

Հիշեցնենք, որ Աշոտ Մինասյանն ի սկզբանե մեղադրվում էր Նիկոլ Փաշինյանի նկատմամբ սպանության նախապատրաստության ենթադրյալ գործով, որը հարուցումից ավելի քան մեկ տարի անց կարճվել է։ Քրեական գործը հարուցվել էր 2020թ նոյեմբերի 9-ին Փաշինյանի կողմից ստորագրված կապիտուլյացիոն ակտից հետո, երբ պարբերաբար զանգվածային ընդվզումներ էին տեղի ունենում՝ ընդդեմ իշխանության գործողությունների, որոնք ճնշելու համար տեղի ունեցան մի շարք աղմկահարույց ձերբակալություններ։

Մանրամասն՝ սկզբնաղբյուր կայքում։

Այսօր՝ սեպտեմբերի 3-ին, արտակարգ դեպք է տեղի ունեցել Արարատի մարզում։ Ժամը 15:45-ի սահմաններում Երևան-Երասխ ավտոճանապարհի 22 կմ հատվածում, դեռևս անհայտ հանգամանքներում, Երևանի բնակիչ 22-ամյա Թելման Ղ.-ն իր վարած «Tesla» մակնիշի ավտոմեքենայով դուրս է եկել երթևեկելի գոտուց և հայտնվել դաշտում։

Ինչպես դեպքի վայրից հայտնում է ֆոտոլրագրող Գագիկ Շամշյանը, Tesla-ում հրդեհ է բռնկվել ու մինչ դեպքի վայր կժամանեին ՀՀ Ներքին գործերի նախարարության Փրկարար ծառայության Արտաշատի հրշեջ-փրկարարական ջոկատի փրկարարները, կրակի տարածման դեմ պայքարել են վարորդը և քաղաքացիները, ապա ժամանած հրշեջները մարել են այն, սակայն ավտոմեքենան ամբողջությամբ վերածվել է մոխրակույտի։ Վարորդը այնուհետև տեղափոխվել է «Արտաշատ» բժշկական կենտրոն։

Դեպքի փաստով քննչական վարչությունում նախաձեռնվել է քրեական վարույթ։

Սպիտակ տան ղեկավար Դոնալդ Թրամփը Պենտագոնին հանձնարարել է նախապատրաստվել մերձեցված ՌԴ-ին եւ ՉԺՀ-ին զսպելուն: Այս մասին Fox News-ին տված հարցազրույցում հայտարարել է ԱՄՆ պաշտպանության նախարար Փիթ Հեգսեթը, փոխանցում է ՏԱՍՍ-ը:

«Ցավոք, նախորդ վարչակազմի թուլությունը մերձեցրել է Ռուսաստանն ու Չինաստանը։ Դա սարսափելի իրադարձություն էր, որը պայմանավորված էր ամերիկյան առաջնորդության և ուժի բացակայությամբ»,-ասել է Հեգսեթը:

 «Ահա թե ինչու նախագահ Թրամփը մեզ հանձնարարել է պատրաստ լինել վերակառուցելու մեր բանակը, վերականգնելու մարտական ​​ոգին և վերականգնելու զսպման ուժը»։

Պենտագոնի ղեկավարը շեշտել է, որ ԱՄՆ-ն հակամարտություն չի փնտրում, այլ դրան պատրաստ լինելը «ապահովում է ամերիկացիների անվտանգությունը»։