ՀԱՊԿ մամուլի ծառայությունը չորեքշաբթի օրը հաղորդել է, որ Պեկինում ՇՀԿ պետությունների ղեկավարների խորհրդի նիստի և ՇՀԿ+ ձևաչափի շրջանակներում տեղի է ունեցել Հավաքական անվտանգության պայմանագրի կազմակերպության, Անկախ Պետությունների Համագործակցության և Շանհայի համագործակցության կազմակերպության ավագ վարչական պաշտոնյաների հանդիպում։

Միջոցառմանը մասնակցել են ՀԱՊԿ գլխավոր քարտուղար Իմանգալի Տասմագամբետովը, ԱՊՀ գլխավոր քարտուղար Սերգեյ Լեբեդևը և ՇՀԿ գլխավոր քարտուղար Նուրլան Երմեկբաևը։

«Կայացել է ՀԱՊԿ-ի, ԱՊՀ-ի և ՇՀԿ-ի միջև համագործակցության զարգացման ճանապարհային քարտեզի, ինչպես նաև ՀԱՊԿ-ի, ԱՊՀ-ի և ՇՀԿ-ի գլխավոր քարտուղարների համատեղ հայտարարության ստորագրման արարողությունը՝ Երկրորդ համաշխարհային պատերազմի ավարտի 80-ամյակի և Միավորված Ազգերի Կազմակերպության հիմնադրման 80-ամյակի կապակցությամբ», - ասվում է հայտարարության մեջ։ 

Նշվել է, որ «մտքերի փոխանակում է տեղի ունեցել միջազգային իրավիճակի արդիական հարցերի, ինչպես նաև երեք կազմակերպությունների գործունեության առաջնահերթ ոլորտների վերաբերյալ»։ «Քննարկվել են տարածաշրջանային անվտանգության ոլորտում համագործակցության հետագա զարգացման և ամրապնդման, ինչպես նաև նոր մարտահրավերներին ու սպառնալիքներին հակազդելու առաջարկներ», - հավելել է մամուլի ծառայությունը։

«Միաձայն կարծիք է հայտնվել, որ ՀԱՊԿ-ը, ԱՊՀ-ն և ՇՀԿ-ն կոչված են ավելի ու ավելի մեծ դեր խաղալու համաշխարհային խաղաղության և տարածաշրջանային անվտանգության պահպանման, անկայունության կանխարգելման գործում։ Նշվել է եվրասիական նոր անվտանգության ճարտարապետության ձևավորման, տնտեսական համագործակցության զարգացման և մշակութային ոլորտում փոխգործակցության վրա կենտրոնացումը։ Հաստատվել է Եվրասիայի զարգացման կենտրոնների միջև ինտեգրացիոն նախագծերի համադրման և հարաբերությունների ներդաշնակեցման ապահովման մտադրությունը», - հավելել է ՀԱՊԿ մամուլի ծառայությունը։

Սեպտեմբերի 2-ին օրենքի և իրավունքի կոպտագույն ոտնահարմամբ, ևս մեկ անգամ երկարաձգվեց Գերշանորհ Տ․ Միքայել արքեպիսկոպոս Աջապահյանի կալանքի ժամկետը։ Այս մասին հայտարարություն է տարածել Մայր Աթոռը:

«Խիստ բացահայտ է, որ դատարանը, արդարադատություն իրականացնելու փոխարեն, ակնհայտորեն միացել է իշխանությունների հրահրած հակաեկեղեցական արշավին՝ ստանձնելով եկեղեցականների և Եկեղեցուն աջակցող անձանց նկատմամբ հաշվեհարդար կիրառելու անպատվաբեր դերակատարություն։

Հարկ է վերջ տալ ապօրինություններին, այդ թվում՝ խտրական մոտեցմանը, և անհապաղ ազատ արձակել ինչպես Գերաշնորհ Տ․ Միքայել արքեպիսկոպոս Աջապահյանին, այնպես և կեղծ մեղադրանքներով կալանավորված անձանց»,- նշված է հայտարարության մեջ:

Ռուսաստանյան կողմը սպասում է ԱՄՆ նախագահ Դոնալդ Թրամփին պատասխան այցով: «Արմենպրես»-ի փոխանցմամբ՝ դա  հաստատել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան ՏԱՍՍ-ին տված հարցազրույցում։ 

«Այդ մասին ասել է մեր երկրի նախագահն՝ ամփոփելով Ալյասկայի գագաթնաժողովին իր մասնակցության արդյունքները: Նա համապատասխան հայտարարություններ է արել: Եվ ես կարող եմ նաև մեջբերել նրան: Նա հրապարակավ հրավիրել է ԱՄՆ նախագահին Ռուսաստան», - նշել է դիվանագետն Արևելյան տնտեսական ֆորումի շրջանակներում:

Պատասխանելով Թրամփի այցի հնարավոր ժամկետների վերաբերյալ պարզաբանող հարցին՝ Զախարովան բացատրել է, որ «դա նախագահի վարչակազմի իրավասությունն է»:

«Ինչ վերաբերում է մնացած բոլոր մանրամասնություններին, դա թե՛ մեր երկրի և թե՛ ԱՄՆ-ի նախագահների վարչակազմերի խնդիրն է», - հավելել է նա:

Օգոստոսին Անքորիջում հանդիպման արդյունքների վերաբերյալ ՌԴ նախագահ Վլադիմիր Պուտինի հետ համատեղ մամուլի ասուլիսում Դոնալդ Թրամփն ի պատասխան Մոսկվա ժամանելու հրավերին հայտարարել էր, որ դա հնարավոր է համարում:

Համաձայն Հայաստանի Հանրապետության «Ազգային Ժողովի կանոնակարգ» սահմանադրական օրենքի 25-րդ հոդվածի, Ազգային Ժողովի նախագահին ուղարկվեց 2020 թվականի սեպտեմբերի 27-ին սանձազերծված 44-օրյա ռազմական գործողությունների հանգամանքների ուսումնասիրման նպատակով ստեղծված քննիչ հանձնաժողովի զեկույցը: 

 Այս մասին տեղեկանում ենք ՀՀ ԱԺ պաշտպանության և անվտանգության հարցերի մշտական հանձնաժողովի ֆեյսբուքյան էջից։

Bloomberg-ը հրապարակել է Ռուսաստանի և Չինաստանի առաջնորդների միջև երկխոսությունը, երբ նրանք, հավանաբար, պատահաբար բարձրախոսները միացված են թողել: 

«Մարդիկ նախկինում հազվադեպ էին ապրում մինչև 70 տարեկան, բայց այսօր 70 տարեկանում դու դեռ երեխա ես», - ասել է Սին։ «Կենսատեխնոլոգիայի զարգացման շնորհիվ մարդու օրգանները կարող են անընդհատ փոխպատվաստվել, և մարդիկ կկարողանան ավելի ու ավելի երկար ապրել և նույնիսկ հասնել անմահության», - պատասխանել է Պուտինը։

«Կանխատեսումներն այն են, որ այս դարում կա մինչև 150 տարի ապրելու հնարավորություն», - ասել է Սին։

Հայաստանի քաղաքացիները կկարողանան Ղազախստանում մնալ առանց վիզայի մինչև 90 օր. երկրի Մաջիլիսը վավերացրել է Երևանի հետ համաձայնագիրը: 

Այժմ երկու երկրների քաղաքացիները կկարողանան մյուս կողմի տարածքում մնալ մինչև երեք ամիս առանց վիզայի, եթե ունենան վավեր փաստաթղթեր՝ անձնագիր (ներառյալ ծառայողական և դիվանագիտական)։

2024 թվականի ապրիլին Երևանում ստորագրված փաստաթուղթը նախատեսում է մինչև 90 օր ժամկետով առանց վիզայի ռեժիմ։

Սեպտեմբերի 3-4-ին Արարատյան դաշտում, Կոտայքի, Արագածոտնի և Վայոց ձորի նախալեռներում, Սյունիքի հովիտներում, ինչպես նաև Երևանում սպասվում է բարձր կարգի հրդեհավտանգ իրավիճակ։ Այս մասին հայտնում են  «Հիդրոօդերևութաբանության և մոնիթորինգի կենտրոն»-ից: 

​​​​​Երևանում սեպտեմբերի 3-ի և 7-ի երեկոյան, 4-ի գիշերը և երեկոյան սպասվում է, 5-ի երեկոյան հնարավոր է կարճատև անձրև և ամպրոպ, ամպրոպի ժամանակ սպասվում է նաև քամու ուժգնացում 16-19մ/վ արագությամբ։ Սեպտեմբերի 6-ին և 8-ին սպասվում է առանց տեղումների եղանակ։

​​​​Մարզերում սեպտեմբերի 3-ի ցերեկը, 6-8-ին կեսօրից հետո, 4-5-ին գիշերը և կեսօրից հետո առանձին շրջաններում սպասվում է կարճատև անձրև և ամպրոպ։ 

Քամին՝ հարավարևմտյան՝ 2-5մ/վ, ամպրոպի ժամանակ սպասվում է քամու ուժգնացում՝ 17-20մ/վ արագությամբ։

Օդի ջերմաստիճանը սեպտեմբերի 3-5-ին աստիճանաբար կնվազի 4-7 աստիճանով։

«Բաքվի բանտերում պահվող հայ գերիների շրջանում եղել են ինքնասպանության փորձեր», - «Ազատությանն» այսօր փոխանցեց Եվրոպական դատարանում գերիների շահերի պաշտպան Սիրանուշ Սահակյանը:

Իրավապաշտպանի խոսքով՝ գերիները օրերս հեռախոսազրույց են ունեցել իրենց հարազատների հետ, որոնց ժամանակ էլ հայտնի է դարձել ինքնասպանության փորձերի մասին: Առանց անուններ հնչեցնելու Սահակյանը միայն տեղեկացրեց, որ ինքնասպանության փորձ իրականացնողները եղել են ոչ թե Արցախի ռազմաքաղաքական ղեկավարության, այլ մյուս գերիների շրջանում:

«Ցավոք, չեմ կարող որոշակիացնել ... Այսինքն՝ Կարմիր Խաչի այցելությունների դադարից հետո նման փորձեր են եղել, կրկնվել են, ինչը ցույց է տալիս ուղղակի կապը Կարմիր Խաչի գործունեության դադարեցման, մեկուսացվածության և մարդկային տառապանքների հետ», - ընդգծեց իրավապաշտպանը:

Եվրոպական դատարանում գերիների շահերի պաշտպանն ահազանգում է՝ գերիները շուրջ երկու ամիս է հայտնվել են կատարյալ մեկուսացման մեջ, որևէ միջազգային անկախ կառույց նրանց չի տեսակցել: Նրանց պահման, առողջական ու հոգեբանական վիճակի մասին տեղեկություն չկա:

Կարմիր Խաչի միջազգային կոմիտեի ներկայացուցիչները վերջին անգամ հայ գերիներին տեսակցել էին հունիսին: Միջազգային այս կառույցն այսօրվանից Ադրբեջանի իշխանությունների պահանջով վերջնականապես դադարեցրեց իր գործունեությունը Բաքվում:

«Այս օրերին տեղի են ունեցել հեռախոսազանգեր, և ընտանիքները մեզ փոխանցեցին, որ այդ զրույցների միջոցով արդեն իսկ նրանց համար նկատելի են եղել առողջական լուրջ խնդիրներ և իհարկե հոգեբանական ծանր վիճակ: Հուսալքությունը խորանում է», - ընդգծեց Սիրանուշ Սահակյանը:

Օգոստոսի 25-ին Transavia ավիաընկերության Փարիզ-Երևան չվերթը նախատեսվածից հինգ ժամ ուշացումով վայրէջք կատարեց Երևանում։ Պատճառը, ըստ ավիաընկերության, ինքնաթիռի դռան արանքում հայտնաբերված ապակու կտորն էր, ինչի հետևանքով ինքնաթիռը օդում շուրջ մեկուկես ժամ պտույտ կատարելուց հետո վերադարձել էր Փարիզի Օռլի օդանավակայան։  Գրում է Հետքը: 

Ինչ էր պատահել ինքնաթիռին

Ֆրանսիական Transavia ավիաընկերությունը «Հետքի» հարցմանն ի պատասխան հաստատել է, որ օգոստոսի 25-ի Փարիզ-Երևան թռիչքի ընթացքում տեխնիկական խնդիր է առաջացել։

«Ինքնաթիռի առջևի աջ դռան արանքում ապակու կտոր էր մնացել` չնայած դուռը պատշաճ և անվտանգ փակված է եղել։ Օդաչուն հետևել է անվտանգության բոլոր ընթացակարգերին, և ինքնաթիռը բարեհաջող վայրէջք է կատարել Օռլիում»,- նշվում է ընկերության պատասխանում։

Ընկերությունը չի մանրամասնել, թե ապակու կտորն ինչպես է հայտնվել դռան արանքում, սակայն Boeing 737-800 օդանավը, որում 187 ուղևոր է եղել, Փարիզի մոտակայքում 6 պտույտ կատարելուց հետո ստիպված է եղել վերադառնալ Օրլի օդանավակայան։

Ուղևորներից մեկը «Հետքին» փոխանցել էր, որ հայտարարվել է այլ օդանավով դեպի Երևան թռիչքն իրականացնելու մասին, սակայն մի քանի անգամ նախատեսված թռիչքը հետաձգելուց հետո՝ տեղի ժամանակով 15։17-ին, Փարիզից մեկնել է նույն ինքնաթիռը։ 

«Մանրակրկիտ ստուգումից հետո ինքնաթիռը թռիչքը շարունակելու համար պիտանի է ճանաչվել և նույն օրը բոլոր ուղևորների հետ մեկնել է Երևան։ Transavia France-ը հիշեցնում է, որ իր ուղևորների և անձնակազմի անվտանգությունն իր բարձրագույն առաջնահերթությունն է»,- նշել է ավիաընկերությունը։

Boeing 737-800 օդանավը Երևանում պիտի լիներ տեղի ժամանակով 16։10-ին, սակայն այն «Զվարթնոց» օդանավակայանում վայրէջք է կատարել շուրջ 5 ժամ անց։

Ինքնաթիռի ուշ ժամանման պատճառով օգոստոսի 25-ին Երևանից Օռլի մեկնող TO7499 չվերթն իրականացնող ինքնաթիռը ստիպված է եղել վայրէջք կատարել Շառլ դը Գոլ (CDG) օդանավակայանում՝ Օռլի օդանավակայանի պարետային ժամի պատճառով։

Սկանդալներ Boeing-ի շուրջ

Ուղևորների իրավունքներով զբաղվող Passenger.am հարթակի համահիմնադիր Վաներ Հարությունյանն ասում է՝ վերջին տարիներին ամերիկյան որոշ տիպի Boeing-ների հետ կապված տեխնիկական և անվտանգային խնդիրներ են առաջանում։

Նման մի աղմկահարույց դեպք էր տեղի ունեցել 2024 թվականի հունվարի 5-ին՝ Ալյասկա ավիաուղիների (Alaska Airlines) թիվ 1282 չվերթի ժամանակ: Boeing 737 MAX 9 ինքնաթիռը Օրեգոն նահանգի Փորթլենդ քաղաքից պիտի ուղևորվեր դեպի Կալիֆոռնիա նահանգի Օնտարիո քաղաք, սակայն թռիչքից ընդամենը մի քանի րոպե անց, մոտ 4.9 կիլոմետր բարձրության վրա, օդում պոկվել էր ինքնաթիռի միջնամասում գտնվող վթարային ելքի դուռը: Օդի ճնշման կտրուկ անկում էր գրանցվել, և ինքնաթիռն արտակարգ վայրէջք էր կատարել՝ վերադառնալով Փորթլենդի օդանավակայան։ 

Ավելին՝ սկզբնաղբյուրում:

Պեկինում՝ Ժողովուրդների մեծ պալատում, կայացել է Հայաստանի Հանրապետության վարչապետ Նիկոլ Փաշինյանի հանդիպումը Չինաստանի Ժողովրդական Հանրապետության փոխնախագահ Հան Ճենի հետ։ Այս մասին հայտնում են Կառավարությունից:

Հան Ճենը ողջունել է վարչապետ Փաշինյանի այցը ՉԺՀ և մասնակցությունը ՇՀԿ գագաթնաժողովին ու Պեկինում անցկացված շքերթին։ Նա նշել է, որ ՀՀ վարչապետի և ՉԺՀ նախագահ Սի Ծինփինի արդյունավետ հանդիպման արդյունքն է Հայաստանի և Չինաստանի միջև ռազմավարական գործընկերության հաստատումը, ինչը կնպաստի բոլոր ոլորտներում համագործակցության զարգացմանն ու ընդլայնմանը։ Հան Ճենն իր խոսքում նշել է, որ Չինաստանը մեծապես կարևորում է Հայաստանի հետ ռազմավարական գործընկերության հաստատումը, և այդ առումով վարչապետի այցը ունի առանցքային նշանակություն։

Վարչապետ Փաշինյանը շնորհակալություն է հայտնել հրավերի և ջերմ ընդունելության համար՝ շեշտելով, որ Չինաստան կատարած աշխատանքային այցը կարևոր նշանակություն ունի Հայաստանի համար։ Վարչապետը նշել է, որ այցի արդյունքում Հայաստանի և Չինաստանի հարաբերությունները բարձրացվել են ռազմավարական գործընկերության մակարդակի, ինչը նոր հնարավորություններ է ստեղծում կապերի հետագա խորացման ու ընդլայնման համար։ Նա նաև նշել է, որ վերջին տարիներին համագործակցությունը զարգանում է քաղաքական, տնտեսական և մշակութային ոլորտներում, ամրապնդվում են ժողովուրդների միջև կապերը։ Վարչապետի խոսքով՝ երկու ժողովուրդները մեծ համակրանք ունեն միմյանց նկատմամբ, ինչը ամուր հիմք է համապարփակ համագործակցության առաջխաղացման համար։

Զրուցակիցները մտքեր են փոխանակել միջազգային կարևորություն ունեցող մի շարք հարցերի շուրջ և համոզմունք հայտնել, որ առաջիկայում Հայաստան–Չինաստան համագործակցությունը կզարգանա ինչպես երկկողմ մակարդակում, այնպես էլ բազմակողմ հարթակներում։