Բնօրինակ հիթի պրեմիերայից քսան տարի անց 20th Century Fox-ը հայտարարել է «Սատանան կրում է Pradaդա» ֆիլմի շարունակության թողարկման ամսաթիվը՝ 2026 թվականի մայիսի 1-ը։ News.am-ը փոխանցում է, որ պրոդյուսեր Վենդի Ֆայներմանը և սցենարիստ Ալին Բրոշ Մաքքեննան վերադառնում են շարունակության վրա աշխատելու, որի սյուժեն խոստանում է լինել ոչ պակաս դրամատիկ։

Այս անգամ պատմությունը կկենտրոնանա Միրանդա Փրիստլիի վրա, որի դերը մարմնավորում է Մերիլ Սթրիփը, ով բախվում է ամսագրերի բիզնեսի անկմանը։ Փայլուն ցուցադրությունը փրկելու համար նա ստիպված է լինում դիմել իր նախկին օգնականին, իսկ այժմ՝ ազդեցիկ նորաձևության տան ղեկավար Էմիլի Չարլթոնին՝ գովազդային պայմանագրերի համար։

Մերիլ Սթրիփի, Անն Հեթուեյի և Էմիլի Բլանտի մասնակցությունը շարունակությունում դեռևս հաստատված չէ, սակայն աշխարհի տարբեր ծայրերում գտնվող երկրպագուներն արդեն հույս ունեն նրանց վերադարձի։

Լորեն Վայսբերգերի Vogue-ի համար Աննա Վինտուրի հետ նրա աշխատանքից ոգեշնչված 2006 թվականի բնօրինակ ֆիլմը համաշխարհային եկամուտ է ստացել 326 միլիոն դոլարով և Սթրիփին առաջադրել «Օսկար» մրցանակի։

Մայիսի 20-ի դրությամբ Լեռնային Ղարաբաղից բռնի տեղահանված 9,451 անձ դիմել է քաղաքացիություն ստանալու համար, և նույն օրվա դրությամբ մենք ունենք 8,315 անձ, որ ՀՀ նախագահի հրամանագրով ստացել է ՀՀ քաղաքացիություն: Այս մասին ասուլիսի ժամանակ ասաց ՆԳ փոխնախարար Արմեն Ղազարյանը:

Փոխնախարարը հիշեցրեց՝ քաղաքացիություն ստանում են չափահաս անձինք, իսկ անչափահասները ծնողներից մեկի՝ ՀՀ քաղաքացիություն ստանալու միջոցով ավտոմատ կերպով կարող են ստանալ քաղաքացիություն:

«Նույն օրվա դրությամբ մենք ունենք 8,315 անձ, որոնք ՀՀ նախագահի հրամանով ստացել են ՀՀ քաղաքացիություն։ Վերջին շրջանում նկատվում է որոշակի ակտիվացում ՀՀ քաղաքացիության համար դիմելու մասով։ Եթե տարվա սկզբին ունենում էինք օրական մոտ 20 դիմում, ապա այժմ օրական 40-50 դիմում ենք ստանում»,-ասել է ՆԳ փոխնախարարը։

Ռուսաստանը հաջողություն է մաղթում Հայաստանին և Ադրբեջանին խաղաղության պայմանագրի ստորագրման հարցում. այս մասին, ՏԱՍՍ-ի փոխանցմամբ, ասել է ՌԴ ԱԳՆ ղեկավար Սերգեյ Լավրովը:

Վերջինս ընդգծել է, որ Մոսկվան պատրաստ է աջակցել գործընթացին:

Օրերս Լավրովն ԱԳ նախարար Արարատ Միրզոյանի հետ հանդիպմանն ասել էր, որ Մոսկվան անկեղծ հետաքրքրված է Երևան-Բաքու ամբողջական կարգավորմամբ:

«Կարծում ենք՝ դրա համար ամուր հիմք են 2020 և 2022թթ. ՌԴ նախագահի, Ադրբեջանի նախագահի և ՀՀ վարչապետի միջև ամենաբարձր մակարդակով ձեռք բերված համալիր եռակողմ պայմանավորվածությունները: Մենք ողջունել են խաղաղության պայմանագրի տեքստի համաձայնեցումը Հայաստանի և Ադրբեջանի միջև: Պատրաստ ենք օգնել այդ փաստաթղթի ստորագրման համար կարգավորման կարիք ունեցող բոլոր խնդիրների լուծման հարցում: Միշտ կարող եք մեզ վրա հույս դնել, այդ թվում՝ տրանսպորտային տնտեսական ուղիների ապաշրջափակման, հայ-ադրբեջանական սահմանի սահմանազատման, սահմանագծման, առաջացող բոլոր մարդասիրական խնդիրների լուծման հարցերում՝ հաշվի առնելով կողմերից յուրաքանչյուրի շահերը», - ասել է նա:

Լավրովը հավելել է, որ ՌԴ-ն մեծ ներուժ է տեսնում «3+3» տարածաշրջանային հարթակի զարգացման հարցում:

ԵՄ խորհուրդը մայիսի 27-ին լսումներ կանցկացնի Հունգարիային ձայնի իրավունքից զրկելու հարցի շուրջ՝ Եվրոպական միության վերաբերյալ պայմանագրի 7-րդ հոդվածին համապատասխան։ Այս մասին նշված է ԵՄ խորհրդի կայքում հրապարակված օրակարգում։

Եվրամիության մասին պայմանագրի 7-րդ հոդվածը նախատեսում է ԵՄ պետությունների առանձին իրավունքների, այդ թվում՝ ԵՄ խորհրդում երկրի ներկայացուցչի ձայնի իրավունքի կասեցման հնարավորություն՝ կապված ընդհանուր արժեքներին հակասող գործողությունների հետ։

Ոստիկանությունն այսօր արդեն հայտնաբերել է շուրջ 80 ավտոմեքենա, որոնց ղեկին անչափահաս է եղել։ Այս մասին հայտնում է ՆԳՆ ոստիկանության մամուլի ծառայությունը։

«Մայիսի 23-ի ժամը 12.00-ի դրությամբ մայրաքաղաքում և մարզերում պահպանվող հատուկ տարածքներ է տեղափոխվել Վերջին զանգի միջոցառումների մասնակից անձանց 109 տրանսպորտային միջոց, որոնցից 78-ի ղեկին եղել են անչափահասներ»,–ասվում է հաղորդագրության մեջ:

Ոստիկանությունը հորդորում է զերծ մնալ ավտոմեքենաները երեխաներին վստահելուց` նշելով, որ յուրաքանչյուր դեպք առաջացնելու է իրավական հետևանք։շ

Ուժեղացված հսկողությունը շարունակվում է։

Հիշեցնենք, որ այսօր Հայաստանի ավելի քան 1500 կրթական հաստատություններում ավելի քան 60 հազար շրջանավարտների համար հնչում է Վերջին զանգը: Ավարտական դասարաններում անցկացվում է «Վերջին դաս» միջոցառումը:

Սմարթֆոնը կարող է վտանգված լինել լրտեսական ծրագրերով, և կարևոր է իմանալ, թե ինչպես ճանաչել դրանց առկայությունը: Կիբերանվտանգության փորձագետ Նիկիտա Նովիկովն առանձնացրել է մի քանի հիմնական նշաններ, որոնք կարող են վկայել սարքի գաղտնալսման մասին.

Գերտաքացում սպասման ռեժիմում: Եթե հեռախոսը տաքանում է նույնիսկ այն ժամանակ, երբ դուք չեք օգտագործում այն, դա կարող է կապված լինել ֆոնային գործընթացների հետ, ներառյալ տվյալների փոխանցումը երրորդ կողմի սերվերներին, փոխանցում է news.am-ը։

• Մարտկոցի արագ սպառում: Զգալիորեն բարձր էներգիայի սպառումը, հատկապես նվազագույն ակտիվության դեպքում, կարող է վկայել վնասակար ծրագրի մասին:
• Ինտերնետ տրաֆիկի աճ: Ֆոնային տրաֆիկի աճը առանց ակնհայտ պատճառների կարող է ցույց տալ լրտեսական ծրագրի աշխատանքը, որը տվյալներ է ուղարկում արտաքին սերվերներին:

Ինչպե՞ս ստուգել հեռախոսը

Համոզվելու համար, որ Ձեր սմարթֆոնը վտանգված չէ, կատարեք հետևյալ քայլերը.

• Վերահասցեագրման ստուգում: Հեռախոսի զանգերի հավելվածում հավաքեք *#21# հրամանը՝ պարզելու համար, արդյոք միացված է զանգերի կամ հաղորդագրությունների վերահասցեագրում:
• Ակտիվության վերլուծություն: Ստուգեք զանգերի և ինտերնետ տրաֆիկի մանրամասները Ձեր բջջային օպերատորի անձնական կաբինետում: Կասկածելի միացումները, հատկապես գիշերային ժամերին կամ էկրանը կողպված վիճակում, կարող են կասկածելի լինել:
• Կասկածելի հավելվածների որոնում: Ուշադրություն դարձրեք առանց պատկերակների ծրագրերին, որոնք ներբեռնված չեն պաշտոնական հավելվածների խանութներից (Google Play կամ App Store), կամ նրանց, որոնք մուտք ունեն միկրոֆոնին, տեսախցիկին, գեոլոկացիային կամ ծառայողական տվյալներին:

Ի՞նչ անել, եթե կան կասկածներ

Եթե նկատել եք գաղտնալսման նշաններ, կարող եք ձեռնարկել հետևյալ միջոցները.

• Հակալրտեսական սկաներների օգտագործում: Հատուկ հավելվածներ, ինչպիսիք են Malwarebytes-ը կամ Kaspersky-ը, կօգնեն հայտնաբերել վնասակար ծրագրերը:
• Սարքի լրիվ վերակայում: Լրտեսական ծրագրերից ազատվելու ամենահուսալի միջոցը սմարթֆոնը գործարանային կարգավորումներին վերադարձնելն է՝ բոլոր հաշիվների գաղտնաբառերը փոխելուց հետո: Վերակայումից առաջ անպայման ստեղծեք կարևոր տվյալների կրկնօրինակ:

Արտադրողների զգուշացումները

2025 թվականի մայիսին Apple-ը ծանուցումներ է ուղարկել ավելի քան 100 երկրների օգտատերերին՝ զգուշացնելով լրտեսական ծրագրերով վարակման հնարավորության մասին և խորհուրդ տալով թարմացնել iOS-ը մինչև վերջին տարբերակը: Օպերացիոն համակարգի և հավելվածների կանոնավոր թարմացումները օգնում են փակել խոցելիությունները, որոնց միջոցով կարող են գործել լրտեսական ծրագրերը:

Լրացուցիչ նախազգուշական միջոցներ

Գաղտնալսման ռիսկը նվազագույնի հասցնելու համար.

• Տեղադրեք հավելվածներ միայն պաշտոնական խանութներից:
• Կանոնավոր կերպով թարմացրեք օպերացիոն համակարգը և հավելվածները:
• Խուսափեք միանալ անպաշտպան Wi-Fi ցանցերին:
• Օգտագործեք բարդ գաղտնաբառեր և երկգործոն նույնականացում հաշիվների համար:

ԱՄՆ նախագահ Ռոնալդ Ռեյգանի նախկին հատուկ օգնական Դուգ Բենդոուն the American Conservative ամսագրի համար հոդվածում «լկտիություն» է անվանել ԵՄ-ի ներկայացուցիչ Կայա Կալլասի՝ Ռուսաստանի վրա ճնշում գործադրելու պահանջը: 

Բենդոուն հավելել է, որ եվրադիպլոմատիայի ղեկավարը բազմիցս քննադատել է ԱՄՆ նախագահ Դոնալդ Թրամփի մոտեցումը Ռուսաստանի առաջնորդ Վլադիմիր Պուտինի հետ բանակցություններին:

Ստամբուլում Ռուսաստանի և Ուկրաինայի բանակցություններից հետո նա նշել է, որ Եվրոպան այդպես էլ Մոսկվայի վրա ճնշում չի տեսել Վաշինգտոնի կողմից։

Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայյա Կալլասը Բելգրադ կատարած այցի ժամանակ հայտարարել է, որ Սերբիան կանգնած է ռազմավարական, աշխարհառազմավարական ընտրության առջև, թե որտեղ է ուզում լինել: ԵՄ դիվանագիտության ղեկավարի խոսքերը մեջբերել Է Associated Press գործակալությունը:

«Սերբիայի եվրոպական ապագան կախված է այն արժեքներից, որոնք նա կորոշի պաշտպանել», – ասել է Կալլասը երկու շաբաթ անց այն բանից հետո, երբ Սերբիայի նախագահ Ալեքսանդար Վուչիչն անտեսել էր Բրյուսելի նախազգուշացումները և մայիսի 9-ին մասնակցել Մոսկվայում Հաղթանակի զորահանդեսին:

«Սերբիայի քաղաքական ղեկավարության հետ իմ քննարկումներից պարզ է դառնում, որ ԵՄ անդամակցությունը մնում է ռազմավարական նպատակ: Սակայն ես ուզում եմ ընդգծել, որ մենք պետք է գործողություններ տեսնենք այդ խոսքերն ապացուցելու և աջակցելու համար։ Բարեփոխումներն այն են, թե ինչպես է Սերբիան առաջ շարժվելու ԵՄ ճանապարհով»,- ասել է Կալլասը։

Կոռուպցիայի կանխարգելման հանձնաժողովը (ԿԿՀ) վարույթ է հարուցել վարչապետ Նիկոլ Փաշինյանի վարքագծի կանոնների առերևույթ խախտման վերաբերյալ: Այս մասին հայտարարել է ԱԺ անկուսակցական պատգամավոր Թագուհի Թովմասյանը:
«Ես դիմումով պահանջել էի վարույթ հարուցել Նիկոլ Փաշինյանի ցուցաբերած վարքագծի վերաբերյալ: Երեկ Հանձնաժողովից ինձ տեղեկացրին, որ
2025 թվականի մայիսի 15-ին արդեն հարուցվել է վարքագծի կանոնների առերևույթ խախտման վերաբերյալ թիվ 07/2025/Վ/Վ վարույթը՝ հիմք ընդունելով միջադեպի վերաբերյալ զանգվածային լրատվության միջոցների հրապարակումները։
Ուշադրության կենտրոնում են եղել հետևյալ դրվագները․
«Համբալ» արտահայտությունը,
«Վեր ընկի տեղդ, ներվերս չուտես» արտահայտությունը,
«Ձեզ տանելու եմ, լցնեմ ԱԱԾ պադվալները» սպառնալիքն ու կրկնվող անհարգալից խոսքը:
Հարկ է նկատել, որ հանրային բարձր պատասխանատվություն կրող յուրաքանչյուր պաշտոնյա պետք է գիտակցի՝ իր վարքագիծն ու խոսքը չեն կարող լինել անսահմանափակ։ Դրանք պետք է լինեն իրավունքի և բարոյականության շրջանակներում։
Նիկոլ Փաշինյանի վարքագիծը խաթարում է իշխանության նկատմամբ հանրային վստահությունը, սրում է ինստիտուցիոնալ քայքայման ռիսկերը և խախտում է քաղաքացի-պետություն հարաբերությունների հիմքը՝ հարգանքը։
Այս վարքագիծը իշխանության շահարկում է՝ ընդդիմախոսներին նվաստացնելու և ժողովրդավարական դիսկուրսը ճնշելու համար։
Ոչ մի օրենք թույլ չի՛ տալիս պաշտոնյային, լինի նա նույնիսկ վարչապետ, դուրս գալ պատասխանատվության դաշտից՝ հղում անելով իր «նյարդերին» կամ «հույզերին»։
Հուսամ, որ սա իրավական նախադեպ է դառնալու։ Եվ ԿԿՀ-ի վարույթը ձևական չի լինի, այլ որոշմամբ կփաստի, որ պետության ներսում անգամ սահմանադրական ինստիտուտներն արձագանքում են իշխանական անթույլատրելի վարքի դրսևորմանը:
Նաև այս ձևաչափով պահանջում եմ Հանձնաժողովից՝
Հանրային բաց ու թափանցիկ քննություն,
Պատշաճ մասնագիտական գնահատական:
Վարչապետը չի՛ կարող շարունակել իրեն դրսևորել որպես իրավունքից վեր կանգնած անձ։
Պետական պատիվը սկսվում է խոսքից։
Իսկ պետության հեղինակությունը՝ պահվածքից»,- նշել է նա:

Այսօր հանրապետության դպրոցներում հնչելու է վերջին զանգը: Ավելի քան 1500 կրթական հաստատություններում շրջանավարտները հրաժեշտ են տալու իրենց հարազատ կրթօջախներին ու մուտք են գործելու նոր կյանք:

Ավարտական դասարաններում կազմակերպված են «Վերջին դաս» միջոցառումները:

ՆԳՆ ոստիկանությունը հանրապետության ողջ տարածքում իրականացնում է ուժեղացված ծառայություն՝ Վերջին զանգի միջոցառումների անվտանգությունն ապահովելու նպատակով։ Կարգախմբերը կլինեն ուսումնական հաստատությունների և, առհասարակ, այն տարածքներում, որտեղ անցկացվելու են ավարտական միջոցառումներ։