Ներկայացնում ենք տարադրամի փոխարժեքները՝ ըստ rate.am-ի: 

ԱՄՆ դոլարի առքի առավելագույն արժեքն է 382 դրամ, վաճառքի նվազագույն արժեքը՝ 384 դրամ:

Եվրոյի առքի առավելագույն արժեքն է 444 դրամ, վաճառքի նվազագույն արժեքը՝ 449 դրամ։ 

Ռուսական ռուբլու առքի առավելագույն արժեքն է 4.66 դրամ, վաճառքի նվազագույն արժեքը՝ 4.74 դրամ:

ԱՄՆ նախագահ Դոնալդ Թրամփը կրկին դատական ​​հայց է ներկայացրել The New York Times-ի (NYT) դեմ՝ 15 միլիարդ դոլար պահանջելով զրպարտության համար։ Այս մասին գրում է The Washington Post-ը (WP)։

Սեպտեմբերին, ինչպես հիշեցնում է հրատարակությունը, դաշնային դատավորը «մերժել էր սկզբնական ​​հայցը և կտրուկ քննադատել դատական դիմումի քաղաքական տոնը»։ Շտկված բողոքի մեջ, որը ներկայացվել է Ֆլորիդայի նահանգի Տամպա քաղաքի շրջանային դատարան, շեշտը դրվել է NYT-ի, դրա երեք թղթակիցների և Penguin Random House հրատարակչական տան հայտարարությունների վրա։ Թրամփի փաստաբանները դրանք որակել են «չարամիտ, զրպարտչական և նվաստացուցիչ»։ 

Խոսքը Թրամփի գործնական ձեռքբերումների և նրա հարստության ծագման վերաբերյալ պնդումների մասին է, որոնք հիշատակվել են The New York Times-ի հետաքննող լրագրողներ Սյուզան Քրեյգի և Ռաս Բյութների կողմից գրված Lucky Loser (2024) գրքում, ինչպես նաև NYT-ի տարբեր հոդվածների մասին։ 

WP-ի տեղեկատվությամբ՝ ԱՄՆ շրջանային դատավոր Սթիվեն Մերիդեյը, որը նշանակվել է Ջորջ Բուշ Ավագի (1924-2018) կողմից, մերժել է Սպիտակ տան ղեկավարի նախնական բողոքը։ Մերիդեյը հայտարարել է, որ սկզբնական 85-էջանոց բողոքն «ակնհայտորեն անտեղի և անթույլատրելի էր», հավելելով, որ այն ավելի շատ նման էր քաղաքական երկարաշունչ ճառի, քան լուրջ իրավաբանական դիմումի։ Դատավորի որոշման համաձայն՝ ցանկացած վերանայված դիմում չպետք է գերազանցի 40 էջը։

ԱՄՆ նախագահի երկրորդ դիմումը տեղավորվում է Մերիդեյի կողմից որոշված շրջանակներում։ Դրանում բացակայում են 2024 թ. նախագահական ընտրություններում Թրամփի հաղթանակի վերաբերյալ առանձին քաղաքական մեկնաբանություններ։

«Հիշատակված հայտարարություններն անիրավաչափորեն արատավորում և նսեմացնում են Թրամփի մասնագիտական ​​հեղինակությունը, որը նա քրտնաջան կերպով տասնամյակների ընթացքում ձեռք է բերել որպես մասնավոր անձ՝ նախքան ԱՄՆ նախագահ դառնալը, այդ թվում՝ որպես հաջողակ գործարար և բոլոր ժամանակների ամենահաջողված «Թեկնածուն» ռեալիթի շոուի աստղ, – ասվում է վերանայված բողոքում։

Չեռնոգորիայի նախարարների կաբինետը փոփոխություններ է մտցրել Հայաստանի, Ուզբեկստանի և Եգիպտոսի քաղաքացիների համար ժամանակավորապես առանց մուտքի թույլտվության ճանապարհորդության վերաբերյալ որոշումներում։

Այդ փոփոխությունները կասեցնում են վերոնշյալ երկրների քաղաքացիների համար ժամանակավորապես առանց վիզայի ճանապարհորդության վերաբերյալ նախկին որոշումները։

Ըստ 2024-2027 թվականների բարեփոխումների ծրագրում և ԵՄ անդամակցության վերջնական փուլերում սահմանված պարտավորությունների՝ Չեռնոգորիան շարունակում է իր վիզային քաղաքականությունը համապատասխանեցնել Եվրամիության քաղաքականությանը։Չեռնոգորիայի Vijesti պարբերականի տվյալներով՝ որոշումն ուժի մեջ կմտնի հոկտեմբերի 29-ին։

Զելենսկին պատրաստ է բանակցել Պուտինի հետ աշխարհի ցանկացած կետում, բայց ոչ Ռուսաստանի կամ Բելառուսի տարածքում։ Հայտարարել է Ուկրաինայի նախագահի աշխատակազմի ղեկավար Անդրեյ Երմակը՝ Axios-ին տված հարցազրույցում:

Նրա խոսքով՝ Զելենսկին այդ մասին տեղեկացրել է Թրամփին վերջին հեռախոսազրույցի ժամանակ։

Ադրբեջանում հայտարարել են նախագահ Իլհամ Ալիևի դեմ պլանավորված մահափորձի և դրա արդյունքում երկրում հեղաշրջում իրականացնելու ծրագրի բացահայտման մասին։ 

«Արմենպրես»-ի փոխանցմամբ՝ այս մասին հայտնում են ադրբեջանական լրատվամիջոցները՝ պնդելով, որ ոսումնասիրությունների արդյունքում բացահայտվել է Ադրբեջանի անվտանգության խորհրդի անդամ և նախագահի աշխատակազմի նախկին ղեկավար Ռամիզ Մեհդիևի կողմից կազմված գործողությունների մանրամասն պլանը, որը նպատակ է ունեցել զավթել պետական ​​իշխանությունը և դավաճանություն կատարել։ 

Ադրբեջանական APA-ն, հղում կատարելով հավաստի աղբյուրներին, հայտնում է, որ Ռամիզ Մեհդիևը Ռուսաստանի աջակցությամբ պատրաստել է պետական ​​հեղաշրջման պլան և այն առաջարկել է ռուսական կողմին իր սեփական տեղեկատվական խողովակներով։ 

Նշվում է, որ Ռամիզ Մեհդիևը փորձել է օգտվել Ադրբեջանի և Ռուսաստանի միջև հարաբերություններում լարվածության շրջանից, որն առաջացել է դեռևս 2024 թվականի դեկտեմբերին 25-ի միջադեպից հետո, երբ ադրբեջանական AZAL ինքնաթիռն, ըստ ադրբեջանական պնդումների, ոչնչացվել էր Ռուսաստանի օդային տարածքում, ՌԴ հակաօդային պաշտպանության ուժերի կողմից։ 

Այս իրադարձության արդյունքում Ռուսաստանի կողմից պաշտոնապես ներողություն խնդրելու և փոխհատուցում վճարելու մերժումը Բաքվի կողմից բուռն բողոք էր առաջացրել։ Ռուսաստանի ու Ադրբեջանի միջև լարվածության սրումը լայն քննարկման և քննադատության առարկա էր դարձել երկու երկրների հանրային և լրատվական շրջանակներում։ 

Ադրբեջանական լրատվամիջոցների փոխանցմամբ՝ Ռամիզ Մեհդիևը, օգտվելով այս իրավիճակից, իր և հին ընկերների միջոցով Մոսկվային է փոխանցել, որ Ադրբեջանում հեղաշրջման ծրագիրն արդեն իսկ մշակվել է, և որ ինքը հույսը դնում է Ռուսաստանի աջակցության վրա։ 

Նշվում է, որ Ռամիզ Մեհդիևի ծրագրի համաձայն՝ գործողության հիմնական դրվագն ինքնաթիռի վթարը պետք է լիներ՝ ազդարարելով հեղաշրջման սկիզբը։ 2024 թվականի դեկտեմբերին պլանավորվել էր Իլհամ Ալիևին տեղափոխող նախագահական ինքնաթիռի մասնակցությամբ «վթար», որն, առաջին հայացքից, նման կլիներ ուկրաինական անօդաչու թռչող սարքի հարձակման։ Մինչ երկիրը ցնցված կլիներ, պետք է հայտարարվեր «արտակարգ դրություն»։ Պետական ​​իշխանության բռնի զավթումից հետո, Ռամիզ Մեհդիևը առաջարկում էր ստեղծել ժամանակավոր մարմին՝ Ժամանակավոր Պետական ​​խորհրդի ձևաչափով՝ անցումային շրջանը կառավարելու համար։ Այս ծրագրի համաձայն՝ 87-ամյա Մեհդիևը պետք է անձամբ գլխավորեր այս Խորհուրդը։ Ըստ աղբյուրի տեղեկությունների՝ Մեհդիևը նաև Ռուսաստանին է փոխանցել տեղեկություններ այն անձանց մասին, ովքեր իր ղեկավարությամբ կծառայեին Պետական ​​խորհրդում։ 

Ադրբեջանական լրատվամիջոցները նաև նշում են, որ գործողությունը ձախողվել է, քանի որ կազմակերպիչները սխալ են թույլ տվել՝ նախագահական ինքնաթիռի փոխարեն խոցելով քաղաքացիական AZAL ինքնաթիռը։ Նշվում է, որ ռուսական կողմն ինքն է ադրբեջանական կողմին տեղեկացրել Ռամիզ Մեհդիևի առաջարկի և նրա ցանցի ծրագրի մասին՝ Դուշանբեում Ադրբեջանի և Ռուսաստանի նախագահների հանդիպման ժամանակ։ Արդյունքում, Ռուսաստանը, նրա մեջ որևէ հեռանկար չտեսնելով, լիովին լքել է նրան և ինքնուրույն փոխանցել նրա ծրագրի և ցանցի մասին տեղեկատվությունը պաշտոնական Բաքվին։

Նշենք, որ Ռամիզ Մեհդիևը մեղադրվում է Ադրբեջանի քրեական օրենսգրքի 278.1 (պետական ​​իշխանությունը զավթելուն ուղղված գործողություններ), 274 (պետական ​​դավաճանություն) և 193-1.3.2 (հանցավոր ճանապարհով ձեռք բերված գույքի լվացում) հոդվածներով։ Այս տարվա հոկտեմբերի 14-ին Բաքվի Սաբայիլի շրջանային դատարանը որոշում է կայացրել Ռամիզ Էնվեր օղլու Մեհդիևի դեմ հարուցված քրեական գործով, որի համաձայն՝ դատարանը, բավարարելով հատկապես ծանր հանցագործությունների մեջ մեղադրվող Ռամիզ Մեհդիևի դեմ ներկայացված միջնորդությունը, նրա նկատմամբ նշանակել է չորս ամսվա տնային կալանք՝ հաշվի առնելով նրա տարիքը։

Ադրբեջանական լրատվամիջոցների կողմից հաճախ «գորշ կարդինալ» անվանվող Ռամիզ Մեհդիևը զգալի ազդեցություն է ունեցել Ադրբեջանի քաղաքականության վրա՝ նախագահի աշխատակազմի ղեկավարի պաշտոնում գտնվելու գրեթե 25 տարիների ընթացքում։ Նա եղել է ինչպես  ներկայիս նախագահ Իլհամ Ալիևի, այնպես էլ նրա հոր՝ Հեյդար Ալիևի աշխատակազմի ղեկավարը։ Մեհդիևը պաշտոնանկ է արվել նախագահի հրամանագրով 2019 թվականի հոկտեմբերին։ Նույն օրը Ալիևը նրան շնորհել է երկրի բարձրագույն պետական պարգևը՝ առաջարկելով, որ նա «տեղը զիջի երիտասարդ սերնդին»։

Ավելի վաղ հայտնի էր դարձել, որ Ռամիզ Մեհդիևը կհեռացվի Ադրբեջանի Անվտանգության խորհրդից, ինչի մասին հայտարարել էր գործակալության փոխքարտուղար Մադաթ Գուլիևը, իսկ ավելի ուշ Ռամիզ Մեհդիևը քննիչներին ցուցմունք է տվել գրեթե յոթ ժամ։

Թուրքիան պատրաստ է զբաղվել Ուկրաինայի վերականգնմամբ։ Նման հայտարարություն է արել Թուրքիայի ԱԳ նախարար Հաքան Ֆիդանը։

Նա հայտնել է, որ Անկարան պատրաստ է ստանձնել Ուկրաինայի ենթակառուցվածքների վերականգնման պարտավորությունները, սակայն առաջնային խնդիրը հրադադարն է․

«Թուրքիան պատրաստ է շարունակել ջանքեր գործադրել Ուկրաինայի կարգավորման ուղղությամբ, Էրդողանը հարցը առաջնային է համարում»,-հավելել է նա։

Սպիտակ տանը Վլադիմիր Զելենսկու հետ հանդիպումից առաջ ԱՄՆ նախագահ Դոնալդ Թրամփը մտադիր չէ համաձայնել Ուկրաինային Tomahawk թևավոր հրթիռներ փոխանցելուն, սակայն հարցը «օրակարգից հանված չէ», հաղորդում է CNN-ը՝ հղում կատարելով տեղեկացված աղբյուրներին։
Հեռուստաալիքի տվյալներով՝ ԱՄՆ առաջնորդը ներկայումս չի պլանավորում համաձայնել սպառազինության մատակարարմանը, սակայն նրա դիրքորոշումը «կարող է փոխվել» ուկրաինական պատվիրակության հետ զրույցից հետո։

Պերուում ցածր աշխատավարձերի և կենսաթոշակների, ինչպես նաև պետական մարմիններում կոռուպցիայից դժգոհության ֆոնին մեկ ամիս առաջ սկսված մասշտաբային բողոքի ցույցերը շարունակվում են։ 

Պերուի նախագահը հրաժարվում է հրաժարական տալ հասարակական ճնշման ներքո՝ կապված հակակառավարական բողոքի ակցիայի ժամանակ ցուցարարի մահվան հետ: 

Հատկանշական է, որ Խոսե Հերին պաշտոն ստանձնել է ընդամենը մեկ շաբաթ առաջ՝ հոկտեմբերի 10-ին, փոխարինելով իմպիչմենտի ենթարկված երկրի առաջին կին նախագահ Դինա Բոլուարտեին։

Ըստ ընթացակարգի՝ Հերին պետք է իշխանության ղեկին լինի մինչև 2026 թվականի հուլիսը, այդ ընթացքում երկրում պետք է նախագահական ընտրություններ անցկացվեն: Հերին վերջին 10 տարվա ընթացքում Պերուի՝ արդեն 7-րդ նախագահն է։

Իշխանությունները մայրաքաղաք Լիմայում արտակարգ դրություն են հայտարարել հանցավորության դեմ պայքարի և «քաղաքացիների հանգստությունը վերականգնելու համար»: Երկրի վարչապետ Էռնեստո Ալվարեսը չի բացառել հետագայում պարետային ժամ սահմանելը:

ԱՄՆ-ի և Ռուսաստանի նախագահներ Դոնալդ Թրամփի ու Վլադիմիր Պուտինի՝ Բուդապեշտում նախատեսվող հանդիպման նախապատրաստման ֆոնին ԵՄ-ում հայտարարել են, որ ողջունում են Ուկրաինայում կայուն խաղաղության հանգեցնող բոլոր ջանքերը։ Այդ մասին «Արմենպրես»-ը տեղեկանում է «Ինտերֆաքս» գործակալությունից:

«(Եվրահանձնաժողովի) նախագահ ֆոն դեր Լայենը ողջունում է ցանկացած քայլ, որը կտանի Ուկրաինայի համար արդարացի և կայուն խաղաղության։ Եթե այս հանդիպումը ծառայի այդ նպատակին, ապա մենք այն ողջունում ենք», - հայտարարել է Եվրահանձնաժողովի պաշտոնական ներկայացուցիչ Օլոֆ Ժիլը հոկտեմբերի 17-ին Բրյուսելում կայացած ճեպազրույցում` մեկնաբանելով Բուդապեշտում նախատեսվող Թրամփ-Պուտին հանդիպումը։ 

Բացի այդ, The Guardian-ի հրապարակման համաձայն՝ ԵՄ-ում նշել են, որ պաշտոնական առարկություններ չունեն Ռուսաստանի առաջնորդի՝ ԵՄ տարածք ուղևորության դեմ։ Միությունում հավելել են, որ Պուտինի նկատմամբ գործում են պատժամիջոցներ, որոնք ենթադրում են ակտիվների սառեցում, այլ ոչ թե ուղևորության արգելք։