Ռումինիան պատրաստ է ավելացնել իր պաշտպանական ծախսերը և ՆԱՏՕ-ի նոր նպատակներին հասնել նույնիսկ սեփական ռեկորդային բյուջետային դեֆիցիտի կրճատման պայմաններում։ Այս մասին հայտնել է երկրի նորընտիր նախագահ Նիկուշոր Դանը բրիտանական Financial Times թերթին տված հարցազրույցում։

Նա ասել է, որ Ռումինիան ցանկանում է իրագործել ՆԱՏՕ-ի գլխավոր քարտուղարի առաջարկը և ավելացնել պաշտպանական ծախսերը՝ դրանք հասցնելով ՀՆԱ-ի 3,5%-ի, ինչպես նաև 1,5% հատկացնել ենթակառուցվածքներին և կիբերանվտանգությանը։

«Այո, ես դրան աջակցում եմ, – ասել է Դանը՝ նշելով, որ պաշտպանական ծախսերի ավելացման ժամկետները դեռ պետք է քննարկել ԱՄՆ-ի և մյուս դաշնակիցների հետ։

Նիկուշոր Դանը նաև խոստացել է շարունակել աջակցությունը Կիևին։

«Մենք կմնանք եվրոպական ջանքերի մաս՝ աջակցելու Ուկրաինային ձեռք բերել ավելի խելամիտ խաղաղություն։ Դա նշանակում է, որ մենք կշարունակենք օգնություն ցուցաբերել Ուկրաինային և կմասնակցենք եվրոպական ջանքերին, որ նա իր անվտանգությունն իր սեփական ձեռքը վերցնի», – ասել է նորընտիր նախագահը։

Ըստ g4media.ro լրատվական հարթակի՝ 2024 թվականին Ռումինիայում գրանցվել է Եվրամիությունում ամենաբարձր բյուջետային դեֆիցիտը` 9.3%։ Ռումինիան մշակել է հարկային կոնսոլիդացիայի պլան դեֆիցիտի կրճատման համար՝ այն նախորդ տարվա 9.3%-ից այս տարի հասցնելով 7%-ի։ Սակայն տարեսկզբի տվյալները ցույց են տալիս, որ դեֆիցիտը մնում է բարձր։

ՆԱՏՕ-ի գլխավոր քարտուղար Մարկ Ռյուտեն առաջարկում է պաշտպանական ծախսերը մեծացնել՝ հասցնելով ՀՆԱ-ի 5%-ին։ Ենթադրվում է, որ 3,5%-ը կուղղվի անմիջապես ռազմական ծախսերին, իսկ մնացած 1,5%-ը՝ պատերազմական ժամանակներում ենթակառուցվածքային օբյեկտների կառուցման համար։

Նորընտիր նախագահ Նիկուշոր Դանը հաղթել է մայիսի 18-ին Ռումինիայում անցկացված նախագահական ընտրություններում՝ ստանալով ձայների 53,60%-ը։ Նրա երդմնակալության արարողությունը կկայանա մայիսի 26-ին։

Հունական Կրետե կղզու ափերի մոտ 6,2 մագնիտուդով երկրաշարժ է գրանցվել։ «Արմենպրես»-ի փոխանցմամբ՝ այս մասին հաղորդում է Եվրոպամիջերկրածովյան սեյսմոլոգիական կենտրոնը։

Ստորգետնյա ցնցումների էպիկենտրոնը գտնվել է Հերակլիոն քաղաքից 74 կմ դեպի հյուսիս։ Երկրաշարժի օջախը գտնվել է 15 կմ խորության վրա։

Տուժածների և ավերածությունների մասին տեղեկություններ չեն ստացվել։

Independent պարբերականը նշում է, որ ցունամիի սպառնալիք է հայտարարվել։

Ցնցումները զգացվել են ամբողջ Էգեյան ծովում, այդ թվում՝ Թուրքիայի և Իսրայելի որոշ հատվածներում։

Հայաստանը մի շարք երկրների համար առանց վիզայի ռեժիմ կսահմանի. նախագիծը այսօր Կառավարության նիստում զեկուցել է ԱԳ նախարար Արարատ Միրզոյանը։

Այսպիսով՝ Բահրեյնի Թագավորության, Սաուդյան Արաբիայի Թագավորության և Օմանի Սուլթանության քաղաքացիների, ինչպես նաև Ամերիկայի Միացյալ Նահանգների, Եվրոպական միության երկրների, Շենգենյան համաձայնագրի երկրների, Արաբական Միացյալ Էմիրությունների, Բահրեյնի Թագավորության, Կատարի Պետության, Սաուդյան Արաբիայի Թագավորության, Քուվեյթի Պետության կամ Օմանի Սուլթանության տարածքում կացության կարգավիճակ ունեցող օտարերկրացիների համար Հայաստանի Հանրապետություն առանց մուտքի վիզայի այցելությունների ռեժիմ կսահմանվի։

«Այս փոփոխության անhրաժեշտությունը հիմնավորվել է տնտեսական նկատառումներով։ Ակնհայտ է, որ այս փոփոխությամբ մենք կհեշտացնենք և մարդկանց այցելությունը մեր երկիր, և մեր քաղաքացիների շփումները, ինչպես նաև կմեծացնենք ներդրումային գրավչությունը»,- նշեց Միրզոյանը։

Էկոնոմիկայի նախարար Գևորգ Պապոյանը նշեց, որ սա նաև կխթանի զբոսաշրջությունը։

Հայաստանը կմիանա Խոշոր կատվազգիների հարցերով միջազգային դաշինքին։ Համապատասխան որոշումն ընդունվեց ՀՀ կառավարության այսօրվա նիստին։

«Դաշինքին միանալը կհանդիսանա որպես լայն հնարավորություն ընձառյուծի, այլ կատվազգիների պահպանման գործողությունների ծրագրի իրականացման, նոր մոտեցումների կիրառման, ինչպես նաև մեր երկրի կենդանական աշխարհի հազվագյուտ և արժեքավոր ներկայացուցիչների պահպանման և թվաքանակի ավելացման հարցում»,- ասված է որոշման մեջ:

Նշվում է, որ դաշինքի հետ փոխգործակցությունը թույլ կտա փոխանակել լավագույն փորձը, համատեղ հետազոտություններ և մոնիտորինգ իրականացնել, խնդիրն ավելի մանրամասն ուսումնասիրել և կատարելագործել խոշոր կատվազգիների պաշտպանությանն ուղղված միջոցառումները։

Դաշինքին միանալու նպատակահարմարությունը կարևոր է նրանով, որ Հայաստանի Հանրապետությունը 2024 թ. Կոլումբիայի Կալի քաղաքում կայացած ՄԱԿ-ի «Կենսաբանական բազմազանության մասին» կոնվենցիայի Կողմերի 16-րդ համաժողովի ընթացքում ընտրվել է որպես հաջորդ՝ 17-րդ համաժողովը 2026 թվականին հյուրընկալող երկիր։

Իսրայելի վարչապետ Բենիամին Նեթանյահուն կարգադրել է  ամբողջ աշխարհում Իսրայելի դիվանագիտական ​​առաքելություններում և կառավարության աշխատակիցների համար ուժեղացնել անվտանգության ապահովումը` Վաշինգտոնում Իսրայելի դեսպանատան երկու աշխատակցի սպանությունից հետո, հայտնել են Նեթանյահուի գրասենյակից:

Գրասենյակը հայտնել է, որ Նեթանյահուն «ապշած է Վաշինգտոնում Իսրայելի դեսպանատան երկու աշխատակիցների սարսափելի հակասեմական սպանությունից», գրում է ՌԻԱ «Նովոստի»-ն:

«Իսրայելի դեմ արյունալի հարձակումներն աճում են և պետք է պայքարել մինչև վերջ... Ես կարգադրել եմ ուժեղացնել անվտանգության միջոցառումներն ամբողջ աշխարհում Իսրայելի առաքելություններում և կառավարության ներկայացուցիչների համար»,- ասել է վարչապետը։

Ավելի վաղ ԱՄՆ ներքին անվտանգության նախարար Քրիստի Նոեմը հայտարարել էր, որ Վաշինգտոնում հրեական թանգարանի մոտ սպանվել են Իսրայելի դեսպանատան երկու աշխատակիցներ։ ՄԱԿ-ում Իսրայելի դեսպան Դենի Դանոնը X սոցիալական մեդիայի էջում հարձակումը որակել է «հակասեմական ահաբեկչության դաժան գործողություն»:

Պարտադիր զինվորական ծառայություն անցնելու սահմանային առավելագույն տարիքը 27-ի փոխարեն սահմանել 37 տարեկանը։ Համապատասխան առաջարկն արվեց կառավարության այսօրվա նիստին։

Առաջարկվեց պարտադիր զինծառայության անցնելու սահմանային առավելագույն տարիքը 27-ի փոխարեն սահմանել 37 տարեկան։ Մինչև 18 տարին լրանալը կամ զորակոչային տարիքում ՀՀ քաղաքացիություն ստացած և մինչև ՀՀ քաղաքացիություն ստանալն այլ պետությունում զինծառայություն չանցած կամ 1 տարուց պակաս ժամկետով ծառայություն անցած քաղաքացիների համար ՀՀ զինված ուժերում օրենքով սահմանված 24-ամսյա ծառայության ժամկետը փոխարինել 12-ամսյա ժամկետով ծառայությամբ, ինչպես նաև այդ ժամկետով ծառայության չզորակոչվելու դիմաց նախատեսել 2,5 միլիոն դրամ պետբյուջե վճարելու պարտականություն։ 

Մինչև 16 տարին լրանալը (զինվորական հաշվառման տարիք) ՀՀ քաղաքացիությունից դուրս գալու համար արական սեռի քաղաքացիների կողմից դիմում ներկայացնելու պետական տուրքի գումարը սահմանել 15 միլիոն դրամ։

Ռուսաստանի և Ուկրաինայի միջև բանակցությունների նոր փուլը կարող է տեղի ունենալ 2025 թվականի հունիսին Վատիկանում։ Այս մասին հայտնում է The Wall Street Journal պարբերականը՝ հղում անելով սեփական աղբյուրներին: 

Նշվում է, որ հանդիպմանը ներկա կլինեն նաև ԱՄՆ պետքարտուղար Մարկո Ռուբիոն և Միացյալ Նահանգների նախագահի հատուկ բանագնաց Քիթ Քելլոգը:

«Օրենքի նախագծով առաջարկվում է 24 ամսից պակաս ժամկետով զինվորական ծառայության անցնելու հնարավորություն, 1 ամսի ժամկետով ժառայության անցնելու դեպքում վճարելով 20 մլն դրամ և 6 ամիս ժամկետով անցնելու դեպքում 15 մլն դրամ պետական բյուջե վճարելու պայմանով»,-կառավարության նիստում հայտնեց պաշտպանության նախարար Սուրեն Պապիկյանը։

Նրա խոսքով՝ պարտադիր զինվորական ծառայության անցնելու առավելագույն տարիքը 27-ի փոխարեն սահմանել 37 տարի։

«Մինչև 18 տարին և զորակոչային տարիքը լրացած քաղաքացիություն ստացած և այլ պետությունում զինվորական ծառայություն չանցած կամ մեկ տարուց պակաս ժամկետով ծառայություն անցած քաղաքացիների համար օրենքով սահմանված 24 ամսյա զինվորական ծառայությունը փոխարինել 12 ամսյա ժամկետով ծառայության։ Իսկ այդ ժամկետով ծառայության չզորակոչելու դիմաց նախատեսել 2.5 մլն դրամ պետական բյուջե վճարելու պարտականություն»,-հայտնեց պաշտպանության նախարարը։շ

Նոր նախագծով առաջարկվում է նաև Մինչև 16 տարեկանը ՀՀ քաղաքացիությունից դուրս գալու համար արական սեռի քաղաքացիների համար դիմում ներկայացնելու պետական տուրքի գումարը սահմանել 15 մլն դրամ։

 Պապիկյանը նաև հայտնեց, որ օրենքի հեղինակը ԱԺ ՔՊ-ական պատգամավոր Հայկ Սարգսյանն է և նախարարական կոմիտեում կառավարությունը ձևակերպվել է առաջարկություն, ըստ որի կրճատ ժամկետով՝ մեկ ամսով զորակոչվելու դիմաց վճարվի 24 մլն դրամ և 4-ամիս ժամկետով 18 մլն դրամ և սահմանել տվյալ զորակոչի ընթացքում սահմանել դիմումների առավելագույն քանակը, առավելագույն տարիքն էլ սահմանել 32 տարեկանը և այդ առաջարկություններով կներկայացվի ԱԺ։

Ամերիկացի սենատոր Ռոն Ջոնսոնը հայտարարել է, որ հետաքննություն է սկսել ԱՄՆ նախկին նախագահ Ջո Բայդենի առողջական վիճակի վերաբերյալ, ում մոտ վերջերս քաղցկեղ են ախտորոշել: Նա մտադիր է պարզել՝ ով կարող էր իրականում ղեկավարել երկիրը քաղաքական գործչի նախագահական պաշտոնավարման ընթացքում, գրում Է Axios-ը:

«Մենք պետք է պարզենք՝ ով է ղեկավարել կառավարությունը», - նշել Է հանրապետականը։

Նա պատմել է, որ շուտով կսկսի նամակներ ուղարկել մի քանի տասնյակ մարդկանց, ովքեր ուղիղ կապ են ունեցել Բայդենի հետ 2021-2024 թվականներին։ 

Վաշինգտոնի և Թեհրանի միջև Իսլամական Հանրապետության միջուկային ծրագրի շուրջ տարաձայնությունները հարթելու նպատակով բանակցությունների 5-րդ փուլը տեղի կունենա մայիսի 23-ին Հռոմում: Այս մասին հայտնում է Իրանի ԱԳՆ Telegram ալիքը՝ վկայակոչելով գերատեսչության ղեկավար Էսմայիլ Բաղաին։

Բաղաին հավելել է, որ Թեհրանը «վճռական է պաշտպանել Իրանի ժողովրդի իրավունքներն ու շահերը միջուկային էներգիայի խաղաղ օգտագործման հարցում»։

Իրանի և ԱՄՆ-ի միջև միջուկային հիմնախնդրի և ամերիկյան պատժամիջոցների վերացման շուրջ բանակցությունները շարունակվում են ապրիլից։ Վաշինգտոնը մտավախություն ունի, որ Թեհրանը կարող է միջուկային զենք ստեղծել սեփական ծրագրի շրջանակում:

Միաժամանակ Իրանը պնդում է, որ այդ ծրագիրն օգտագործվում է խաղաղ ճանապարհով։ ԱՄՆ նախագահ Դոնալդ Թրամփը պարզաբանել է, որ Իսլամական Հանրապետության հետ պոտենցիալ նոր համաձայնագիրը կտարբերվի Գործողությունների համատեղ համապարփակ ծրագրից (ԳՀՀԾ) և կլինի «ավելի ուժեղ»։