Գլխավոր դատախազությունը տեղեկացրել էր, որ 2023 թվականի օգոստոսի 17-ին հանրային քրեական հետապնդում է հարուցվել Լանջիկ բնակավայրի մոտակայքում 2023 թվականի օգոստոսի 14-ին տեղի ունեցած ավտովթարի մասնակից-վարորդ Հ.Պ.-ի նկատմամբ՝ Քրեական օրենսգրքի 342-րդ հոդվածի 3-րդ մասով (ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը, որն անզգուշությամբ առաջացրել է երկու կամ ավելի մարդու մահ): 

Քրեական վարույթով պարզվել էր, որ 2023 թվականի օգոստոսի 14-ին՝ ժամը 00:20-ի սահմաններում, Հ.Պ.-ն, իր վարած «Զիլ - ՄՄԶ-554Մ» մակնիշի ավտոմեքենայով, խախտելով ճանապարհային երթևեկության կանոնները, տրանսպորտային միջոցը դուրս է բերել հանդիպակաց երթևեկելի ուղեմաս, ինչի արդյունքում տեղի է ունեցել բախում «Վոլկսվագեն Քրաֆթեր» մակնիշի ավտոմեքենայի հետ՝ անզգուշությամբ առաջացնելով 12 մարդու մահ, 4 անձի առողջությանն անզգուշությամբ պատճառելով կյանքին վտանգ սպառնացող ծանր մարմնական վնասվածքներ:

Դատախազը 2024 թվականի մայիսի 31-ին վարույթի նյութերը՝ հաստատված մեղադրական եզրակացությամբ հանձնել էր Շիրակի մարզի առաջին ատյանի ընդհանուր իրավասության դատարան: 

Դատարանի՝ 2025 թվականի հոկտեմբերի 20-ի դատավճռով՝ Հ.Պ.-ն մեղավոր է ճանաչվել Քրեական օրենսգրքի 342-րդ հոդվածի 3-րդ մասով. նրա նկատմամբ որպես պատիժ է նշանակվել ազատազրկումը՝ 7 տարի 4 ամիս ժամկետով:

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Երևանի Աջափնյակ և Մալաթիա-Սեբաստիա վարչական շրջանների Լենիգրադյան փողոցը կանվանափոխվի։ Որոշման նախագիծը Երևանի ավագանու նիստի օրակարգում է։

«Ղեկավարվելով «Երևան քաղաքում տեղական ինքնակառավարման մասին» օրենքի 12-րդ հոդվածի 1-ին մասի 23-րդ կետի դրույթներով, Հայաստանի Հանրապետության կառավարության 2005 թվականի դեկտեմբերի 29-ի հ.2387-Ն որոշման հավելվածով սահմանված կարգի 4-րդ կետով՝ Երևան քաղաքի ավագանին որոշում է. 

1. Երևան քաղաքի Աջափնյակ և Մալաթիա-Սեբաստիա վարչական շրջանների Լենիգրադյան փողոցը (սկսվում է Հրազդանի մեծ կամրջից, հասնում Սեբաստիայի և Գ. Հասրաթյան փողոցների խաչմերուկ) անվանափոխել բարերար Քըրք Քըրքորյանի անվամբ՝ « Քըրք Քըրքորյան փողոց»»,-նշված է նախագծում։

Հոկտեմբերի 10-ին` ժամը 4.40-ին, Ոստիկանության օպերատիվ կառավարման կենտրոն ստացվել էր ահազանգ, որ Երևանի Քեռու փողոցում գտնվող հյուրանոցում, որտեղ վարձակալական հիմունքներով բնակվում են օտարերկրյա քաղաքացիներ, դիմակավորված անձինք են մուտք գործել տարբեր սենյակներ։

ՀՀ ՆԳՆ ոստիկանությունից հայտնում են, որ քրեական ոստիկանության Երևան քաղաքի վարչության օպերատիվ խումբը շտապ մեկնել էր Քեռու փողոց: 

«Պարզեցինք, որ ժամը 4.20-ի սահմաններում անհայտ անձինք, ոստիկանության համազգեստով և դիմակներով, մուտք են գործել հյուրանոցի տարբեր սենյակներ, զենքի սպառնալիքով, ոմանց էլ կապկպելով` հափշտակել են բջջային հեռախոսներ, գումար և դիմել փախուստի»,-ներկայացնում է ավագ քրեական ոստիկան Դավիթ Բաբինյանը: 

Արաբկիր վարչական շրջանի քննչական բաժնում նախաձեռնվեց քրեական վարույթ` բնակարան ապօրինի մուտք գործելով ավազակության հատկանիշներով։

Քրեական ոստիկանության Երևան քաղաքի վարչության սեփականության դեմ ուղղված հանցագործությունների դեմ պայքարի բաժնի աշխատակիցները դեպքի վայրի հարակից տարածքում հայտնաբերեցին բջջային չորս հեռախոս, պնևմատիկ ատրճանակ, դիմակներ ու ձեռնոցներ։ 

«Ենթադրեցինք, որ հանցանք կատարած անձինք փախուստի ժամանակ դիտավորությամբ նետել էին դիմակներն ու ձեռնոցները, իսկ հափշտակած բջջային հեռախոսների մի մասն ու ատրճանակն ընկել էին իրենց կամքից անկախ հանգամանքներում, քանի որ հեռանալու ճանապարհը կտրուկ վայրէջք էր»,- մանրամասնում է Դավիթ Բաբինյանը: 

Օպերատիվ-հետախուզական հետագա միջոցառումերը ձեռնարկվեցին Քրեական ոստիկանության գլխավոր վարչության ծառայողների հետ: Պարզվեց, որ ավազակությունը կատարած ինը տղմարդկանցից մեկը մայրաքաղաքի Ֆրիկի փողոցի բնակիչ է` 41 տարեկան, իսկ մյուսները` օտարերկրացիներ։ 

Հետագա համատեղ միջոցառման շնորհիվ հոկտեմբերի 10-ի երեկոյան երևանցին հայտնաբերվեց ու ձերբակալվեց։ Հաջորդ օրն առավոտյան ձերբակալվեցին նաև 38-ամյա հասակակից օտարերկրացիներ։

«Հանցանք կատարած մյուս օտարերկրացիներին հայտնաբերելու նպատակով համագործակցեցինք Քրեական ոստիկանության Սյունիքի մարզային վարչության ծառայողների հետ: Հոկտեմբերի 11-ին, առավոտյան ժամը 6.30-ի սահմաններում, նրանցից չորսը հայտնաբերվեցին Մեղրիի անցակետում: Շարունակվում են միջոցառումները` հանցանքին մասնակից ևս երկու անձին հայտնաբերելու ուղղությամբ»,-քրեական ոստիկանների հետագա միջոցառումներն է ներկայացնում Դավիթ Բաբինյանը: 

Ձերբակալվածները ներկայացվել են նախաքննական մարմին: Նրանց խուզարկություններով հայտնաբերվել են գողոն հանդիսացող իրեր` պլանշետներ, բջջային հեռախոսներ և գումար։

Ձեռնարկվում են միջոցներ` դեպքի բոլոր հանգամանքները պարզելու ուղղությամբ:

Այս ամեն ինչը գնում է նրան, որ իշխանությունն ուզում է հասնել իր նպատակին, վերցնել քաղաքը։ Այս մասին, այսօր՝ հոկտեմբերի 22–ին, ԱԺ–ում լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Մարտուն Գրիգորյանը՝ անդրադառնալով Գյումրիում ստեղծված իրավիճակին։

«Դա էլ կախված է ընդդիմադիր քաղաքական դաշտի պահվածքից։ Անցած անգամ տառացիորեն զգուշացրեցի, որ եթե ուզում եք, որ հավաքական ընդդիմությունը պահի իր հաղթանակը, ուրեմն պետք է գտնել քիչ խոցելի, քիչ  պրոբլեմատիկ տարբերակը։ Բայց ընտրություններից անմիջապես հետո 4 ընդդիմադիրներից երեքը գիշերն արդեն հայտարարությունը արել էին։ Տարբերակը, որ ես պնդեի իմ տարբերակը, արդեն փակված էր։ 4–ից երեքը հայտարարել էին, որ համաձայն են քվեարկել Վարդան Ղուկասյանի օգտին և ես մենակ էի»,–ասաց նա։

Մարոտւն Գրիգորյանը հիշեցրեց, որ ընտրություններից հետո շատերը հայտարարում էին, թե ինքը ՔՊ–ի հետ գործարքի է գնացել, սակայն կյանքը հակառակը ցույց տվեց. «Այս պահի դրությամբ, Մարտունը արել է իր քայլը այս մասով, հիմա որ ընդդիմությունը պրոբլեմի առաջ է կանգնել, հիմա «կռայնին» էլի մնալու է Մարտունը, թե Մարտուն ջան, դե որ գիտեիր, որ այդպես է, չանեիր։ 

Ես ձգելով, հարվածը իմ վրա վերցնելով, փորձում էի իմ տարբերակը առաջ տանել։ Այդ ժամանակ դեռ իշխանությունը լուռ էր, սպասում էր, միգուցե Մարտունը այնպիսի բան անի, որ իրենց սրտով լինի։ Այդ ընթացքում ընդդիմադիր լրատվամիջոցներն էին հարձակման ենթարկել Մարտուն Գրիգորյանին»,– ընդգծեց ԱԺ պատգամավորը։

2025 թվականի օգոստոսի 8-ից ապօրինի կալանավորված է ՀՀ պետական եկամուտների կոմիտեի նախկին նախագահ Վարդան Հարությունյանը:

Փաստաբանական խմբի հաղորդմամբ, սույն գործի միակ տվյալը, որն ամբողջությամբ ուսումնասիրվել էր դեռևս 2018 թվականին և փաստացի հերքվել էր Վարդան Հարությունյանի որևէ առնչությունը որևէ ենթադրյալ հանցանքի, հանդիսանում է օպերատիվ հետախուզական միջոցառման արդյունքը:

Նշված միջոցառումը կարող էր տեղի ունենալ միայն Դատարանի որոշմամբ, եթե մինչև 2018 թվականը և դրան հաջորդած ժամանակահատվածում այդ որոշման կայացման համար իրավապահների կողմից Դատարանին ներկայացվեին լուրջ հիմնավորումներ, պատճառաբանություններ և կից նյութեր:

Վարդան Հարությունյանի փաստաբանական խումբը բողոքարկել էր դեռևս 2018 թվականին կայացված Դատարանի որոշումը՝ անհրաժեշտ ու բավարար հիմքերի ընդհանրապես բացակայության և նման միջամտության անհամաչափության հիմքով: Վերաքննիչ դատարանն ի դեմս Դատավոր Լ. Ալավերդյանի, առանց որևէ պատճառաբանության, նախ՝ էապես ձգձգեց բողոքի քննությունը և, ի վերջո, առանց որևէ պատճառաբանության մերժեց բողոքը, չնայած նման հազարավոր այլ դեպքերով, նույնիսկ ավելի նվազ հիմքերով բողոքները բավարարվում են:

Փաստաբանական խումբը հայտնում է, որ Վճռաբեկ բողոք է մուտքագրվել Վերաքննիչ դատարանի նշված որոշման դեմ՝հիմք ընդունելով  նույն Վճռաբեկ դատարանի նախկինում կայացված որոշումները` փաստացի նախադեպային իրավունքը, որոնցով նման բողոքներին լուծում է տրվել ճիշտ հակառակ ձևով, այն է բավարարելով նման բողոքները:

Ակնհայտ է, որ սա ևս մի տվյալ է, որ Վարդան Հարությունյանի գործով  արձանագրվում են ակնհայտ խախտումներ` դատավարական բնույթի, նյութական բնույթի և ամենաինտենսիվ խափանման միջոցի՝ կալանքի ընտրության, որը մինչ օրս չի վերացվել և ամեն կերպ պահպանվում է:

Եվրոպական Միությունը և Ադրբեջանը նախատեսում են մոտ ապագայում շարունակել քննարկումները բարձր մակարդակի տրանսպորտային երկխոսության շրջանակներում, հաղորդում է «Report»-ը Ադրբեջանում ԵՄ դեսպան Մարիանա Կույունջիչի փոխանցմամբ:

Դեսպանը նաև ընդգծել է, որ Եվրամիությունը ողջունում է Ադրբեջանի և Հայաստանի միջև խաղաղության համաձայնագրի նախաստորագրումը և հարաբերություններում դրական փոփոխությունները, որոնք նպաստում են տարածաշրջանում իրավիճակի կարգավորմանը։

Ականազերծման ոլորտում համագործակցության վերաբերյալ Կույունջիչը հավելել է, որ առաջիկա նախագծերի վերաբերյալ քննարկումները շարունակվում են, սակայն 2026 թվականի համար վերջնական ֆինանսավորման չափը դեռևս որոշված ​​չէ։

ԱՄՆ պետքարտուղար Մարկո Ռուբիոն Իրաքի վարչապետ Մոհամեդ Շիա աս-Սուդանիի հետ ունեցած հեռախոսազրույցի ընթացքում քննարկել է առևտրային հարաբերությունները, Թուրքիա-Իրաք խողովակաշարով նավթի արտահանման վերսկսումը: Այդ մասին հաղորդագրություն է տարածել ԱՄՆ պետքարտուղարությունը։

«Պետքարտուղարը և վարչապետը քննարկել են Իրաքում ամերիկյան առևտրային գործարքների ձևակերպումն ավարտելուն ուղղված ջանքերը», – ասվում է հաղորդագրության մեջ։

Նշվում է, որ Ռուբիոն նաև շնորհավորել է իրաքցի վարչապետին Իրաքի և Թուրքիայի միջև խողովակաշարով նավթի արտահանումը վերսկսելու կապակցությամբ։ 

Պետքարտուղարը հավելել է, որ «դա օգուտ կբերի Իրաքին, Թուրքիային և ամերիկյան բիզնեսին»։

Հաղորդագրության համաձայն՝ Ռուբիոն նշել է, որ ԱՄՆ-ն հանձնառու է իրաքցի գործընկերների հետ աշխատանքին՝ Իրաքի ինքնիշխանությունը պահպանելու, տարածաշրջանային կայունությունն ու տնտեսական կապերն ուժեղացնելու համար։

Հայաստան բեռների տարանցման սահմանափակումները վերացնելով՝ Ադրբեջանը նպաստել է տարածաշրջանում համագործակցության և վստահության վերականգնմանը։ Այս մասին հայտարարել է Ադրբեջանի վարչապետ Ալի Ասադովը Թբիլիսիի «Մետաքսի ճանապարհ» 5-րդ ֆորումի ժամանակ, հաղորդում է APA-ն։

Վարչապետը նշել է, որ խաղաղության գործընթացի օրակարգի շուրջ Ադրբեջանի և Հայաստանի միջև ձեռք բերված համաձայնությունները պատմական նշանակություն ունեն տարածաշրջանում կայուն համագործակցություն ապահովելու համար։

«Տարածաշրջանում հաղորդակցությունների բացումը, այդ թվում՝ Ադրբեջանի մայրցամաքային մասը երկրի անբաժանելի մասը հանդիսացող Նախիջևանի  հետ կապելը, կնպաստի տարածաշրջանի միջազգային բեռնափոխադրումների տարանցիկ հզորությունների ընդլայնմանը։ Մենք վստահ ենք, որ այս տարվա օգոստոսի 8-ին Վաշինգտոնում ձեռք բերված պայմանավորվածությունների հիման վրա տարածաշրջանում բացվող նոր երթուղին կդառնա Միջին միջանցքի կարևոր հատվածներից մեկը և կնպաստի դրա դերի բարձրացմանը համաշխարհային տրանսպորտային ցանցում։ Ադրբեջանը շարունակում է ցուցադրել իր հանձնառությունը տարածաշրջանում համագործակցության և վստահության վերականգնմանը։ Ադրբեջանն այս ուղղությամբ զգալի ներդրում է ունեցել՝ վերացնելով օկուպացիայից մնացած Հայաստան բեռների տարանցման բոլոր սահմանափակումները։ Ղազախական հացահատիկի Ադրբեջանի միջոցով Հայաստան տեղափոխումը այս ծրագրի առաջին գործնական քայլն է։ Ինչպես նշել է Ադրբեջանի նախագահ Իլհամ Ալիևը, սա ցույց է տալիս, որ խաղաղությունն այլևս միայն թղթի վրա չի իրականացվում, այլ իրական կյանքում»,- ասել է նա։

Եվրոպական երկրները Ուկրաինայի հետ համատեղ մշակում են հրադադարի նոր առաջարկ՝ հիմնված ներկայիս մարտական գծերի վրա. հայտնում է Reuters-ը։ Առաջարկը հիմնականում ներառում է արդեն քննարկվող գաղափարներ՝ ընդգծելով ԱՄՆ-ի կենտրոնական դերի պահպանման անհրաժեշտությունը։

Եվրոպացի դիվանագետը Reuters-ին հայտնել է, որ առաջարկը ներառում է խաղաղության խորհրդի ստեղծում, այն կղեկավարի ԱՄՆ նախագահ Դոնալդ Թրամփը և կվերահսկի առաջարկվող ծրագրի իրականացումը։ «Սա ազգային անվտանգության խորհրդատուների ջանք է՝ ԱՄՆ-ին ներգրավված պահելու համար»,- ասել է դիվանագետը։ 

Երեքշաբթի օրը եվրոպական առաջնորդները Վաշինգտոնին կոչ են արել պնդել Ուկրաինայում անհապաղ հրադադարի պահանջը՝ ներկայիս մարտական գծերը որպես հետագա բանակցությունների հիմք ընդունելու պայմանով։ 

Ուկրաինայի դաշնակից 35 երկրի ներկայացուցիչներ ուրբաթ օրը Լոնդոնում կհանդիպեն՝ քննարկելու Կիևին երկարաժամկետ աջակցություն տրամադրելու հարցը։ Նաև հավանական է, որ առաջիկա շաբաթներին Թրամփը հանդիպի ՌԴ նախագահ Վլադիմիր Պուտինի հետ։

Նաև նշվում է, որ խորհրդի գաղափարը հիմնված է Գազայի հատվածի համար ԱՄՆ-ի առաջարկած 20 կետանոց ծրագրի վրա։

Հաշվի առնելով, որ երկու կողմերն էլ համաձայնեն հրադադարին, նրանք կսկսեն բանակցություններ տարածքների վերաբերյալ, սակայն Ռուսաստանի կողմից գրավված տարածքները չեն ճանաչվի որպես ռուսական, ասել է ավագ դիվանագետը։

«Այս ջանքերը մենք փորձել ենք նաև մայիսին և օգոստոսին։ Սակայն Ռուսաստանը դիրքորոշումը փոխելու որևէ նշան ցույց չի տալիս»,- ասել է Reuters-ի աղբյուրը։ Հարցին, թե արդյոք սա հին կետերի նոր տարբերակն է, դիվանագետը պատասխանել է. «Ինչ-որ առումով՝ այո, բայց որոշ նոր տարրերով»։