Այսօր՝ սեպտեմբերի 9-ին, կրակոցներ և սպանություն է տեղի ունեցել Երևանում։ Ինչպես հայտնում է Shamshyan.com-ը, ժամը 10:00-ի սահմաններում ՀՀ Ներքին գործերի նախարարության ոստիկանության քրեական ոստիկանության գլխավոր վարչությունում,  նույն գլխավոր վարչության Երևանի քրեական վարչությունում և ՀՀ ՆԳՆ ոստիկանության համայնքային ոստիկանության գլխավոր վարչության Էրեբունու բաժնում օպերատիվ տեղեկություններ են ստացվել, որ Ռոստովյան 17 շենքում կրակոցներ են հնչել և կա վիրավոր։

Տեղում պարզվել է, որ օպերատիվ տեղեկությունը հավաստի է և նշված վայրից մեկ հոգի շտապօգնության ավտոմեքենայով տեղափոխվել է «Էրեբունի» բժշկական կենտրոն, սակայն ճանապարհին գիտակցության չգալով մահացել է։

Դեպքի փաստով Էրեբունու քննչական բաժնում սպանություն հատկանիշներով նախաձեռնվել է քրեական վարույթ։

Դեպքի վայրում՝ շենքի մուտքի մոտ, աստիճաններին և 2-րդ հարկի բնակարանում հայտնաբերվել են կրակված պարկուճներ, գնդակ արնանման հետքեր, պատշգամբի դռան ապակու վրա նույնպես կան կրակոցի հետքեր, իսկ դրսում հայտնաբերվել է մետաղե սանդուղք, որով կասկածյալներից մեկը մտել է տուն, իսկ մյուսը մուտքից է մտել ու այդ ժամանակ տանը մնացող տղամարդը, ով նախկինում սպանության համար եղել է դատապարտված և ոտքին էլ եղել է «բրասլետ», իր մոտ եղած ատրճանակով կրակոցներ է արձակել, ինչի հետևանքով 1 հոգին վնասվածքներ է ստացել և հիվանդանոցի ճանապարհին մահացել է։

Կրակոցներ արձակողին տեղում վնասազերծել են ՊԾ Երևան քաղաքի գնդի 3-րդ գումարտակի 1-ին վաշտի պարեկները:

The Times պարբերականը գրել է, որ Պեկին կատարած ուղևորությունից հետո, որտեղ Պուտինը հայտարարել է Չինաստանի հետ հարաբերությունների «աննախադեպ մակարդակի» մասին և ցուցադրական աջակցություն ստացել Սի Ծինփինի և Կիմ Չեն Ընի կողմից, սկսել է պատերազմի նոր փուլ։ Ուկրաինայում պատերազմի ընթացքում առաջին անգամ ռուսական կողմը հարվածել է Կիևի կառավարության շենքին։ 

Վերլուծաբանները սա համարում են հարված «որոշումների կայացման կենտրոնների» վրա, որը վաղուց պահանջում էին «կոշտ գծի» ռուսական կողմնակիցները։ 

The Times-ը նշում է, որ Պեկինից վերադառնալուց հետո Պուտինի մոտ նկատելիորեն «ավելացել է ինքնավստահությունը», և նրա հռետորաբանությունը վերջապես դադարել է ներառել նույնիսկ բանակցությունների պատրաստակամության տպավորություն։

RT-ի գլխավոր խմբագիր Մարգարիտա Սիմոնյանը սեպտեմբերի 8-ին վիրահատության է ենթարկվել։ Սեպտեմբերի 9-ի վաղ առավոտյան Սիմոնյանը տելեգրամի իր ալիքում գրել է, որ լավ է և շնորհակալություն հայտնել բոլոր նրանց, ովքեր անհանգստանում էին իր համար։

«Մի քանի ժամ առաջ ես դուրս եկա անզգայացումից և արդեն շոկոլադե սալիկ եմ ուտում։ Դեռ դանդաղ եմ տպում և ծուռ, ներեք ինձ։ Շնորհակալություն բոլոր նրանց, ովքեր անհանգստանում և աղոթում էին։ Ես ձեզ նույնպես սիրում և գնահատում եմ։ Շարունակությունը Տիրոջ ձեռքերում է։ Ես կվստահեմ նրան», – գրել է Սիմոնյանը։

Ավելի վաղ, Սիմոնյանին մոտ կանգնած աղբյուրը The Moscow Times-ին ասել է, որ նրա մոտ քաղցկեղ է ախտորոշվել և շատ լուրջ առողջական խնդիրներ ունի: Աղբյուրի խոսքով, որոշվում է Russia Today-ում նրա աշխատանքը շարունակելու հարցը, և քննարկվում է նրա հեռանալու տարբերակը:

Գալստյանի բնութագրմամբ` գնաճը հիմնականում պայմանավորված է սեզոնային պարենի հետ։ Բացի այդ, ըստ նրա, տարեսկզբին համահունչ են աճել նաև կարգավորող ծառայությունների, մասնավորապես տրանսպորտի սակագները։

«Այս ամենին զուգահեռ հիմնարար գնաճի տեսանկյունից հարաբերականորեն կոշտ գներով բնութագրվող ոչ արտահանելի ապրանքների գնաճը պահպանվել է համեմատաբար կայուն մակարդակում` վերջին ամիսներին ձևավորվելով 2–2.5 տոկոսի միջակայքում։ Այս պայմաններում գնաճային սպասումները սկսել են նվազել` մոտենալով թիրախային մակարդակին»,– հայտարարեց նա։

ԿԲ նախագահի խոսքով` ֆինանսական շուկայի մասնակիցները 2025 թվականի համար 12–ամսյա գնաճը գնահատում են 3 տոկոսի շրջանակում։

«Մենք կշարորւնակենք մշտադիտարկել տնտեսության զարգացման սցենարները և պատրաստ ենք ձեռնարկել համարժեք գործողություններ` միջնաժամկետ հորիզոնում գնաճը 3 տոկոսի մակարդակի և գների կայունության ապահովման համար»,– վստահեցրեց նա։

Գալստյանը տեղեկացրեց, որ թեև ծառայությունների նկատմամբ արտաքին պահանջարկը վերջին ամիսներին ավելացել է, ընդհանուր պահանջարկի միջավայրը գնաճի տեսանկյունից շարունակում է գնահատվել չեզոք։ Այս զարգացումների պարագայում 2025 թվականի համար տարբեր կազմակերպությունների և ֆինանսական շուկայի մասնակիցների կողմից ՀՀ տնտեսական աճը գնահատվում է 4,9–5.3 տոկոսի միջակայքում, թեև վերջին ամիսներին զարգացումները տարվա արդյունքում ավելի բարձր աճի ձևավորման ազդակներ են պարունակում։

Գալստյանը չթաքցրեց, որ ստեղծված իրավիճակը լի է մեծ անորոշություններով և ռիսկերով, որոնք խելամիտ կառավարելու համար ԿԲ–ի ներդրած դրամավարկային համակարգը հուշում է, որ մեր երկիրն ի վիճակի է լինելու հասնել իր նախանշված նպատակներին։

Նա նաև նշեց, որ ՀՀ առևտրային բանկերի վարկային պորտֆելը վերջին տարիներին աճել է բավականին մեծ տեմպերով, միայն այս տարվա սկզբից` 20 տոկոսով։

«Զուգահեռ պետք է նշել, որ վատորակ վարկերի տեսակարար կշիռը բանկային համակարգում պատմականորեն երևի թե նվազագույն մակարդակի վրա է»,– ԱԺ–ում ասաց ԿԲ նախագահը։

«Հրապարակ» թերթը գրում է. «Արդարադատության նախարարության պետական ռեգիստրը մերժել էր գրանցել ՔՊ-ական նախկին պատգամավորներ Հովիկ Աղազարյանի եւ Հակոբ Ասլանյանի հիմնած նոր կուսակցությունը՝ ՄԱՍԿ-ը` Միասնական ազգային սահմանադրական կուսակցությունը, որի հիմնադիր համագումարն անցած տարեվերջին էր կայացել։ 

Պետռեգիստրից նրանք դիտողություններ են ստացել եւ հոկտեմբերի 4-ին նոր համագումար են հրավիրելու, որպեսզի շտկեն մատնանշված թերացումները:

Այս անգամ համագումարը կլինի ոչ թե «Մարիոթ»-ում, այլ՝ Կույրերի միավորման շենքում, որը դահլիճի վարձակալության համար անհամեմատ ավելի համեստ գներ է պահանջում։

Առավել մանրամասն թերթի այսօրվա համարում

«Փաստ» թերթը գրում է. «Ներքին գործերի նախարարությունն առաջարկում է փոփոխություն կատարել «Ոստիկանության մասին» օրենքում։ Ըստ այդմ, կառավարությունը կլիազորվի՝ սահմանելու Հայաստանի Հանրապետության ներքին գործերի նախարարության ոստիկանության ծառայողների կողմից բնակարանի կամ բնակելի տան ձեռքբերմանը կամ բնակելի տան կառուցմանը պետական աջակցության նպատակային ծրագիրը հաստատելու և Հայաստանի Հանրապետության ներքին գործերի նախարարության ոստիկանության ծառայողների կողմից բնակարանի կամ բնակելի տան ձեռքբերման կամ բնակելի տան կառուցման նպատակով մատչելի և արտոնյալ պայմաններով երկարաժամկետ հիփոթեքային վարկավորման կարգը և պայմանները։

Օրենքի 39-րդ հոդվածը նախատեսում է ոստիկանության ծառայողների սոցիալական ապահովության պետական երաշխիքները։ Սահմանադրության 6-րդ հոդվածի 1-ին մասի համաձայն՝ պետական և տեղական ինքնակառավարման մարմիններն ու պաշտոնատար անձինք իրավասու են կատարելու միայն այնպիսի գործողություններ, որոնց համար լիազորված են Սահմանադրությամբ կամ օրենքներով: Նույն հոդվածի 2-րդ մասի համաձայն՝ Սահմանադրության և օրենքների հիման վրա և դրանց իրականացումն ապահովելու նպատակով Սահմանադրությամբ նախատեսված մարմինները կարող են օրենքով լիազորվել ընդունելու ենթաօրենսդրական նորմատիվ իրավական ակտեր: Լիազորող նորմերը պետք է համապատասխանեն իրավական որոշակիության սկզբունքին:

Ներկայում ընթացող ներքին գործերի նախարարության ոստիկանության լայնամասշտաբ բարեփոխումների շրջանակներում, նպատակ ունենալով մեծացնելու գրավչությունը և բարձրացնելու հետաքրքրությունը ոստիկանությունում ծառայության անցնելու կամ ծառայությունը շարունակելու հարցերում, նախագծով առաջարկվում է կառավարության համար սահմանել վերոնշյալ լիազորող նորմը: 

Նախագծով առաջարկվում է «Ոստիկանության մասին» օրենքի 39-րդ հոդվածը շարադրել հետևյալ խմբագրությամբ.

«1. Ոստիկանության ծառայողների սոցիալական ապահովության հարցերը կարգավորվում են «Զինվորական ծառայության և զինծառայողի կարգավիճակի մասին» օրենքին համապատասխան, բացառությամբ սույն օրենքով նախատեսված դեպքերի:

Կառավարության սահմանած կարգով և պայմաններով ոստիկանության ծառայողները կարող են բնակարան կամ բնակելի տուն ձեռք բերելու կամ բնակելի տուն կառուցելու նպատակով օգտվել մատչելի և արտոնյալ պայմաններով երկարաժամկետ հիփոթեքային վարկավորման պետական նպատակային ծրագրերից:
Ոստիկանության ծառայողները կարող են ապահովվել նաև Հայաստանի Հանրապետության օրենսդրությամբ սահմանված սոցիալական ապահովության այլ երաշխիքներով»:

Առավել մանրամասն թերթի այսօրվա համարում

«Հրապարակ» թերթը գրում է. «Ութերորդ գումարման 10-րդ` աշնանային նստաշրջանի մեկնարկը խորհրդարանում երեկ անցավ արտասովոր համերաշխության մթնոլորտում․ ընդդիմությունն ու իշխանությունն անգամ փոխադարձ կսմիթներով հանդես չեկան: Տպավորություն էր, որ մի անտես ձեռք կողմերին հորդորել էր․ «Ребята давйте жить дружно»։

Իշխանական շրջանակներից, սակայն, շտապեցին հիասթափեցնել, թե՝ սպասեք, կինոն դեռ առջեւում է: Նրանք վստահ են, որ աշունը թեժ է լինելու օրենսդիր մարմնում։

Պարզապես ՔՊ-ականներին հրահանգվել է դեռ ափեղ-ցփեղ չխոսել, հարցազրույցներ չտալ, ավելորդ կրքեր չհրահրել։ Երեկ իշխանական պատգամավորների մեծ մասը տարատեսակ պատճառաբանություններով մերժում էր լրագրողների` հարցազրույցներ տալու, մեկնաբանելու առաջարկները։

Առավել մանրամասն թերթի այսօրվա համարում

Իսրայելը մի շարք օդային հարվածներ է հասցրել Սիրիայում, Հոմսի, Լաթակիայի և Պալմիրայի մերձակա տարածքներում, ինչն առաջացրել է Դամասկոսի կտրուկ արձագանքը և տարածաշրջանային նոր լարվածություն: Այս մասին հայտնում է Reuters-ը։ 

Իսրայելը շարունակում է ակտիվ գործողություններ կատարել Սիրիայում։ Սեպտեմբերի 8-ի լույս երկուշաբթի գիշերը, տեղական լրատվամիջոցների փոխանցմամբ, իսրայելական ավիացիան հարվածներ է հասցրել Հոմսի, Լաթակիայի և Պալմիրայի մերձակա տարածքներին։

Սիրիայի արտաքին գործերի նախարարությունը կտրուկ դատապարտել է հարձակումները՝ դրանք անվանելով «ինքնիշխանության կոպիտ խախտում» և սպառնալիք ամբողջ տարածաշրջանի անվտանգության համար։ Պաշտոնական հայտարարության մեջ նշվում է, որ այս հարվածները դիտարկվում են որպես Իսրայելի կողմից վերջին ամիսներին իրականացվող էսկալացիոն գործողությունների շարունակություն։ 

Միաժամանակ, սիրիական լրատվամիջոցները տեղեկություններ չեն հայտնել ավիահարվածների հետևանքով ավերածությունների կամ զոհերի թվի մասին։ Իսրայելի կողմից նույնպես դեռևս պաշտոնական մեկնաբանություններ չեն ստացվել։ 

Դեռևս հուլիսի 16-ին Իսրայելի պաշտպանության բանակն առաջին անգամ հարձակվել էր Դամասկոսում գտնվող օբյեկտների վրա։ Հարվածներ էին հասցվել Գլխավոր շտաբի, նախագահական պալատի և Սիրիայի պաշտպանության նախարարության շենքերին։ Իսրայելի պաշտպանության նախարար Իսրայել Կացն այն ժամանակ հայտարարել էր, որ գործողություններն ուղղված են Սիրիայի ղեկավարությանը «ցավոտ հարվածներ» հասցնելուն։ 

Նա նաև Սիրիայի նոր ղեկավարներին բնութագրել է որպես «քողարկված ջիհադիստներ» և ընդգծել, որ Իսրայելը թույլ չի տա, որ մարտական ուժերը տեղափոխվեն երկրի հարավ։ Կացի խոսքերով՝ առանձնահատուկ ուշադրություն է դարձվում դրուզական համայնքի պաշտպանությանը, որը հարձակումների վտանգի տակ է։ 

Ավելի ուշ հայտնի է դարձել, որ մի քանի օր տևած բախումներից հետո սիրիացի պաշտոնյաները, դրուզական փոքրամասնության առաջնորդների հետ միասին, պայմանավորվել են վերսկսել զինադադարը։ Այս քայլը դիտարկվել է որպես իրավիճակը կայունացնելու փորձ՝ իսրայելական մի շարք հարվածներից և ներսիրիական բախումներից հետո։

Հայ շախմատիստները շարունակում են ելույթները ՖԻԴԵ-ի «Grand Swiss Tournament 2025 Open» մրցաշարում:

5-րդ տուրում Հայաստանը ներկայացնող շախմատիստներից հաղթանակ է տոնել միայն Հայկ Մարտիրոսյանը: Իրենց պարտիաները ոչ-ոքի են ավարտել Գաբրիել Սարգսյանը, Ռոբերտ Հովհաննիսյանը, Արամ Հակոբյանն ու Շանթ Սարգսյանը:

Ռոբերտ Հովհաննիսյանը, Շանթ Սարգսյանը վաստակել են 3-ական միավոր: Առաջատարը 4,5 միավորով հնդիկ Պարհամ Մաղսուդլուն է:Միաժամանակ ընթացող կանանց մրցաշարում Էլինա Դանիելյանը պարտություն է կրել, իսկ Լիլիթ Մկրտչյանը կիսել է միավորը: 

Դանիելյանն ունի 2,5, իսկ Մկրտչյանը 1,5 միավոր: Կանանց մրցաշարի առաջատարները վաստակել են 4-ական միավոր:Ուզբեկստանի Սամարղանդ քաղաքում ընթացող «Grand Swiss Tournament 2025 Open» մրցաշարն անցկացվում է շվեյցարական մրցակարգով ու բաղկացած է 11 տուրից: Այն կեզրափակվի սեպտեմբերի 15-ին: 

Յուրաքանչյուր մրցաշարում 1-ին և 2-րդ տեղերը զբաղեցրած շախմատիստները իրավունք են ստանում մասնակցելու 2026 թվականի հավակնորդների մրցաշարին։