ՌԴ Միներալնիե Վոդի քաղաքի օդանավակայանում 2 բիզնես ջեթ է բախվել. դրանցից մեկը, ըստ ռուսական թելեգրամյան ալիքների տեղեկությունների, պատկանում է միլիարդատեր Ալեքսանդր Տկաչյովին: Վերջինս նախկինում եղել է Կրասնոդարի նահանգապետը:

Նշվում է, որ North-West ավիաընկերության Bombardier Global 6500 ինքնաթիռը, որում եղել է 7 ուղևոր, վայրէջքից հետո հարվածել է կայանված Legacy 600 ինքնաթիռի թևին, ինչի հետևանքով փոխադրամիջոցը վանսվել է: Տուժածներ չկան:

Մենք էլ ենք չէ՞ տարածքային պահանջ դնում, երբ, օրինակ, Ղարաբաղի ներկայացուցիչները նոր նախագահ են ընտրում իրենց համար, հետո ինչ-որ հայտարարություններ են անում, մենք դա չենք նկատում, բայց դրան ի պատասխան Ադրբեջանի արած քայլերին ասում ենք՝ տես ինչ ասեց: Այս մասին խորհրդարանում լրագրողների հետ զրույցում ասաց ԱԺ նախագահ Ալեն Սիմոնյանն, անդրադառնալով Ադրբեջանի հայտարարություններին, թե ՀՀ-ն «Արևմտյան Ադրբեջանն է»:

«Ասում եմ՝ Ղարաբաղի ներկայացուցիչները հայտարարում են, որ նոր Ազգային ժողովի նախագահ են ընտրում, Ադրբեջանի նախագահն էլ ասում է՝ ես էլ հեսա կգամ, կմտնեմ «Արևմտյան Ադրբեջանն» կհիմնադրեմ, բա, այն մի մասը նկատում եք, այն մյուսը՝ ոչ»,- ասաց նա:

Հարցին՝ համեմատությունը տեղի՞ն էր, նա ասաց. «Իհարկե տեղին է»:

Ճշտող հարցին՝ բայց Հայաստանի տարածքում եղե՞լ է «Արևմտյան Ադրբեջան», նա արձագանքեց. «Ախր հայկական մոլորակից դուրս եկեք: Այո, չի եղել, ու չի էլ կարող լինիել: Ասեմ ավելին՝ հարցը դա չի, բայց ինքը հայելային պատասխանում է, իմ ասածը դա է, իմ ասածը դա է: Նորից եմ ասում՝ դուք պետք է հասկանաք, որ բացի մեր ընկալումներից, որոնք ճիշտ են, սխալ են կամ այլ ձևի են, իրենք էլ այդ ձևով են պատասխանում: Իմ ասածը հետևյալն է, որ այդ քայլերը, այդ հայտարարություններն իր հայելային արձագանքն է, այդքան բան։  Հիմա ես չգիտեմ, ինքը կարող է մի օր ուրիշ բան ասի, ես ասում եմ՝ ինչի է ինքը դա անում, ես չեմ ասում, որ նա ճիշտ է, կամ սխալ»:

Ինչ վերաբերում է դիտարկմանը, որ մինչև Արցախի խորհրդարանի նախագահի ընտրությունն էլ այդ «Արևմտյան Ադրբեջան»-ի արտահայտությունները կային, և որ Սիմոնյանը պարզապես փորձում է սլաքները տանել արցախցիների կողմ, նա ասաց. «Ո՛չ, ո՛չ, ո՛չ, ո՛չ, ո՛չ, սխալ եք»: Դուք սխալ եք, խնդիրը կայանում է նրանում, որ ինքը հիմա փորձում է ու մշտապես փորձել է նույն բաները ինչն իր ընկալմամբ արել ենք մենք, անի մեզ հետ: Հիմա այստեղ իրականում մենք իրար հետ վեճ չունենք ու չենք կարող ունենալ, ես որևիցե կողմի չեմ պաշտպանում, ես ասում եմ ինչի է ինքը դա անում: Ինքը որոշել է, որ եթե մենք ասում ենք՝ Ղարաբաղ, ինքը պիտի ասի «Արևմտյան Ադրբեջան», այսքան բան»:

Լեռնային Ղարաբաղից տեղահանվածների հետ կապված մարդասիրական հարցը գտնվում է ռուսական կողմի ուշադրության կենտրոնում. այս մասին ճեպազրույցում ասելէ  ՌԴ ԱԳՆ պաշտոնական ներկայացուցիչ Մարիա Զախարովան:

Նա հավելել է, որ առաջիկայում նախատեսվում է խոշոր մարդասիրական ակցիա տեղահանված արցախցիների համար:

«Այս հումանիտար հարցը գտնվում է Ռուսաստանի ուշադրության կենտրոնում։ Նոր մարդասիրական ակցիա է նախատեսվում Ռուսական մարդասիրական առաքելության կողմից, հայկական կողմից այս խնդրով զբաղվում է «Եվրասիա» ՀԿ-ի հանրապետական մասնաճյուղը», -հայտնել է նա:

Զախարովան մանրամասնել է, որ ՌԴ-ն 2023 թվականի ի վեր Արցախից տեղահանվածներին փոխանցել է 6 տոննա մարդասիրական օգնություն՝ սնունդ, անձնական հիգիենայի պարագաներ և այլն։ 

Լաս Վեգասի Fontainebleau հյուրանոցում կայացել է American Music Awards 51-րդ մրցանակաբաշխությունը։ Երեկոյի հաղորդավարուհի եղել է երգչուհի Ջենիֆեր Լոպեսը։

American Music Awards-ը Միացյալ Նահանգների գլխավոր երաժշտական ​​մրցանակներից մեկն է, որը հիմնադրվել է 1973 թվականին: Ի տարբերություն Գրեմմիի, հաղթողներին ընտրում են ոչ թե մասնագետները, այլ ունկնդիրները: Մրցանակները շնորհվում են՝ հաշվի առնելով  այս կամ այն կատարողի տված արտադրանքի վաճառքի ցուցանիշները և երկրպագուների քվեարկության արդյունքները: Ահա թե ինչու AMA-ները միշտ արտացոլում է այն, ինչ ամերիկացիներն իսկապես լսում և սիրում են:

Երեկոյի հաղթողների թվում էր Բիլլի Այլիշը, որը հաղթեց երկու անվանակարգերում՝ «Լավագույն նոր կատարող» և «Տարվա լավագույն ալբոմ» իր Happier Than Ever ալբոմով:

Լեգենդներ Ջանեթ Ջեքսոնը և Ռոդ Ստյուարտը պարգևատրվել են Icon և Lifetime Achievement մրցանակներով:

Լավագույն համագործակցություն անվանակարգում հաղթել են Լեդի Գագան և Բրունո Մարսը իրենց Die With a Smile երգով։ 

Ադրբեջանի նախագահ Իլհամ Ալիևը, Թուրքիայի նախագահ Ռեջեփ Թայիփ Էրդողանն ու Պակիստանի վարչապետ Շահբազ Շարիֆն օկուպացված Արցախում կմասնակցեն Քաշաթաղում նոր միջազգային օդանավակայանի բացման արարողությանը, հայտնում են ադրբեջանական լրատվամիջոցները:

Օդանավակայանը գտնվում է 1800 մետր բարձրության վրա, այն գտնվում է Բերձորից 30 կմ, Քարվաճառից 60 կմ և Շուշիից 70 կմ հեռավորության վրա։ Ադրբեջանը դրա կառուցումը սկսել է 2021-ին:

«Քաղաքացիական պայմանագիր» խմբակցության պատգամավոր Շիրակ Թորոսյանը ԱԺ նիստերի դահլիճում, դիմելով ՆԳ նախարարի տեղակալ Արմեն Ղազարյանին՝ հարց բարձրացրեց երկքաղաքացիների վարորդական իրավունքներով ՀՀ-ում ավտոմեքենա վարելու ժամկետների հետ կապված օրենքի փոփոխության վերաբերյալ:

Նրա խոսքով՝ մեր հայրենակիցները գալիս են Հայաստան, տուգանվում են, ինչը շատ վատ է:

Ի պատասխան՝ Ղազարյանն ասաց. «Նախագիծը, որն առնչվում է օտարերկրյա վարորդական իրավունքի վկայականներով ՀՀ քաղաքացիների կողմից վարելու իրավունքին, որը թույլատրելու ենք կարճ ժամանակահատվածով, այնուհետև փոխանակման անհրաժեշտություն է առաջանալու մինչև երեք ամիս: Այդպես է, առնվազն, նախագիծը:

Հաստատվել է արդեն Կառավարության կողմից, ուղարկվել է ԱԺ, ըստ այդմ՝ առաջիկա նստաշրջանում կքննարկվի, մենք նաև անհետաձգելիության վերաբերյալ որոշում ենք ավելացրել, որպեսզի, Ձեր ասած, հրատապության ռեժիմով այդ օրենսդրական նախաձեռնությունը ընդունվի, ըստ այդմ, առաջիկա նստաշրջանում կներկայացվի խորհրդարանին»:

Թորոսյանը խնդրեց ևս մեկ հարց պարզաբանել. վերջերս լրատվամիջոցներով տեղեկություն է տարածվել, որ օտարերկրյա վարորդական իրավունքներ ունեցող ՀՀ քաղաքացիները կարող են դիմել նաև առանց օտարերկրյա վարորդական իրավունքի վկայականը հանձնելու և առանց քննության ստանալու հայկական վարորդական իրավունքի վկայական:

«Եթե դա այդպես է, խնդրում եմ պաշտոնապես հայտարարել»,- ասաց պատգամավորը:

Ղազարյանի խոսքով՝ դա օրենքի կարգավորման առարկա է. «Օրենքը հենց այդպես էլ կարգավորում է: Ճանապարհային երթևեկության անվտանգության մասին օրենքը երկքաղաքացիների համար նման հնարավորություն նախատեսում էր:

Ենթաօրենսդրական ակտը չկար, այն ընդունվել է, և սահմանվել է ընթացակարգը, և ըստ այդմ՝ այո, նման հնարավորությունը ներկայումս առկա է»,- պարզաբանեց ՆԳ նախարարի տեղակալը:

Մեր երկիրն ակտիվորեն երկխոսություն է վարում իր անդրկովկասյան գործընկերների հետ՝ տարածաշրջանում անվտանգության ամրապնդման նպատակով։ Մենք սերտ համագործակցություն ենք պահպանում Ադրբեջանի, Հայաստանի, Աբխազիայի եւ Հարավային Օսիայի հետ ահաբեկչության դեմ պայքարի հարցում։ Այս մասին այսօր՝ մայիսի 27-ին, ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։

«Ստեղծվել եւ ձեւավորվել է համապատասխան իրավապայմանագրային դաշտ, եւ մեր երկրների իրավապահ մարմինների եւ հատուկ ծառայությունների միջեւ համագործակցության ուղիներն արդյունավետ են գործում։ Հետեւաբար, մենք մեծացնում ենք այդ աշխատանքը հակաահաբեկչական ուղղությամբ թե՛ փոխադարձ շահերից ելնելով եւ թե՛ հաշվի առնելով դրա համար ջանքերն ու հնարավորությունները համատեղելու անհրաժեշտությունը», - նշել է Զախարովան։

Նրա խոսքով՝ Ռուսաստանը հետեւողականորեն առաջ է մղում «արդար աշխարհակարգ ձեւավորելու անհրաժեշտության գաղափարը, որը կհամապատասխանի համընդհանուր եւ անբաժանելի անվտանգության պահպանման շահերին»։

«Եվ այս համատեքստում մենք, իհարկե, մեծ նշանակություն ենք տալիս բոլոր բարեկամ երկրների, այդ թվում՝ Մերձավոր Արեւելքի եւ Անդրկովկասյան տարածաշրջանների հետ համագործակցության զարգացմանը, առաջին հերթին՝ ՄԱԿ, նրա մասնագիտացված գործակալությունների, ինչպես նաեւ այնպիսի ազդեցիկ միջազգային եւ տարածաշրջանային կառույցների, ինչպիսիք են ՇՀԿ-ն, ՀԱՊԿ-ը եւ ԱՊՀ-ն»,- ասել է ՌԴ ԱԳՆ պաշտոնական ներկայացուցիչը։

Նա ավելացրել է, որ Ռուսաստանը եւ Մերձավոր Արեւելքի երկրները պահպանում են կայուն համագործակցություն հարցերի լայն շրջանակի շուրջ, որոնք հիմնված են հիմնական գլոբալ եւ տարածաշրջանային խնդիրների վերաբերյալ ընդհանուր մոտեցումների վրա՝ «հաշվի առնելով, իհարկե, հակամարտությունների բարձր մակարդակը եւ ճգնաժամային թեժ կետերի բազմազանությունը վերոնշյալ տարածաշրջանում այդ երկրների, այդ թվում՝ Սիրիայի եւ Իրաքի եւ մեր միջեւ»: Ինտենսիվ երկխոսություն է վարվում ահաբեկչության սպառնալիքներին, արմատականությանը դիմակայելու խնդիրների շուրջ, նշել է Զախարովան։

ՆԳ նախարարի հրամանի համաձայն՝ մայիսի 30-ին շրջիկ սպասարկման գրասենյակները ծառայություններ կմատուցվեն Արմավիրի և Արարատի մարզերի հետևյալ բնակավայրերում․

ժամը 10:30-12:30-ը.

Արմավիրի մարզի Փշատավան համայնքում՝ Փշատավանի համայնքապետարանի հարևանությամբ։

ժամը 13:30-15:30-ը.

Արմավիրի մարզի Ջանֆիդա համայնքում՝ Ջանֆիդայի համայնքապետարանի հարևանությամբ։

ժամը 10:30-16:00-ը.

Արարատի մարզի Արարատ համայնքում՝ Արարատի համայնքապետարանի հարևանությամբ։

Հիշեցնենք, որ շրջիկ սպասարկման շրջանակում քաղաքացիները կարող են փոխանակել անձնագիրը, ստանալ ժամանակավոր պաշտպանության վկայական, տեղեկանքներ, իսկ ԼՂ-ից տեղահանված անձինք ՀՀ քաղաքացիություն ստանալու համար կարող են տեղում դիմումներ ներկայացնել։

Վարորդական իրավունքի ու սեփականության վկայականների, հաշվառման վկայագրի փոխանակման կամ կորստի դեպքում, քաղաքացիները մոտենալով շրջիկ գրասենյակ, կարող են ստանալ նորը, օգտվել նաև հաշվառման-քննական բաժինների կողմից մատուցվող այլ ծառայություններից։ 

Այսօր՝ մայիսի 27-ին, ավտովթար է տեղի ունեցել Երևանում: Ժամը 10:55-ի սահմաններում Կոմիտասի պողոտա-Վրացական փողոցի խաչմերուկում բախվել են Երևանի բնակիչներ 23-ամյա Լևոն Մ.-ի վարած «Hyundai Elantra» և 73-ամյա Գրիշա Գ.-ի վարած «Opel Zafira» մակնիշի ավտոմեքենաները, հաղորդում է Shamshyan.com–ը։

Ըստ նախնական տեղեկությունների՝ վթարի հետևանքով բարեբախտաբար տուժածներ չկան:

Բախման հետևանքով «Opel»-ը դուրս է եկել երթևեկելի գոտուց, անցել հետիոտնի համար նախատեսված հատվածով, հայտնվել մայթին՝ մասամբ կանաչ գազոնի մեջ:

Վարորդները տեղում ենթարկվել են սթափության փորձաքննության, եղել են սթափ:

Վթարի փաստով ՊԾ Երևան քաղաքի գնդի 4-րդ գումարտակում փաստաթղթեր են ձևակերպվում:

Արևմուտքից ցիկլոնի ներթափանցմամբ պայմանավորված մայիսի 27-ին կեսօրից հետո, 28-30-ին գիշերը և կեսօրից հետո շրջանների մեծ մասում, այդ թվում նաև Երևանում սպասվում է կարճատև անձրև և ամպրոպ, առանձին հատվածներում անձրևները կլինեն հորդառատ, հնարավոր է նաև կարկուտ։ Ամպրոպների ժամանակ սպասվում է քամու ուժգնացում՝ 18-22 մ/վ արագությամբ։ Այս մասին հայտնում են «Հիդրոօդերևութաբանության և մոնիթորինգի կենտրոն»-ից:

Երևանում մայիսի 27-ի կեսօրից հետո, 28-30-ին գիշերը և կեսօրից հետո սպասվում է կարճատև անձրև և ամպրոպ, ամպրոպի ժամանակ քամու ուժգնացում՝ 14-17 մ/վ արագությամբ։ Մայիսի 31-ին, հունիսի 1-ին սպասվում է առանց տեղումների եղանակ:

Մարզերում մայիսի 27-ին կեսօրից հետո, 28-30-ին գիշերը և կեսօրից հետո շրջանների մեծ մասում, 31-ի գիշերը և կեսօրից հետո, հունիսի 1-ին կեսօրից հետո առանձին շրջաններում սպասվում է կարճատև անձրև և ամպրոպ, հնարավոր է նաև կարկուտ։ Մայիսի 27-ի ցերեկը, 28-30-ին առանձին հատվածներում անձրևները կլինեն հորդառատ։ Հունիսի 1-ի գիշերը սպասվում է առանց տեղումների եղանակ։

Քամին՝ հյուսիսարևմտյան՝ 2-5 մ/վ, ամպրոպի ժամանակ սպասվում է քամու ուժգնացում՝ 18-22 մ/վ արագությամբ։ Օդի ջերմաստիճանն էապես չի փոխվի։