Կառավարության հրաժարականից հետո Ֆրանսիայում իշխանության կգան ավելի վտանգավոր քաղաքական ուժեր։ Այս մասին իր X սոցիալական ցանցի էջում հայտնել է Հունգարիայի հիմնարար իրավունքների կենտրոնի վերլուծաբան Զոլտան Կոսկովիչը։

Նա նաև Ֆրանսիայի ներկայիս կառավարությունը անվանել է «խաղալիք»՝ ընդգծելով, որ այն կփոխարինվի «ինքնության վրա հիմնված պոստմոդեռն ձախ շարժման մի ձևով»։

«Սա կլինի Մարքսի հաղթանակը, որը հարություն է առել գերեզմանից», - բացատրել է Կոսկովիչը։

Նրա խոսքով՝ նոր քաղաքական ուժերը լուրջ սպառնալիք են եվրոպական ավանդական արժեքների համար։

Ֆրանսիայի վարչապետ Ֆրանսուա Բայրուն լքել է Ելիսեյան պալատը, որտեղ Մակրոնին հանձնել է հրաժարականի դիմումը: Այս մասին հայտնում է Ռիա Նովոստին:

Ֆրանսիայի վարչապետը  հրաժարական է տալիս այն բանից հետո, երբ նրա կառավարությունը պարտվեց Ազգային ժողովում անցկացված վստահության քվեարկությանը։ Սա ստեղծում է նոր քաղաքական ճգնաժամ և դնում նախագահ Էմանուել Մակրոնի վրա նոր կառավարության ձևավորման ծանր պատասխանատվություն։

Սեպտեմբերի 8-ին կայացած վստահության քվեարկության արդյունքներով՝ Բայրուի կառավարությունը պարտվեց 364 ձայնով ընդդեմ 194-ի։ Քվեարկությունը նախաձեռնել էին ընդդիմադիր ուժերը՝ մեղադրելով կառավարությանը տնտեսական քաղաքականության ձախողման և հարկային բարեփոխումների շուրջ խորացող ճգնաժամի մեջ։ 

Քվեարկությունից հետո Ազգային ժողովում իրավիճակը լարված էր․ ընդդիմության ներկայացուցիչները հայտարարեցին, որ ժողովրդի դժգոհությունը չի կարելի անտեսել:

Նեպալի նախագահ Ռամ Չանդրա Պուդելը հրաժարական չի տվել։ «Արմենպրես»-ի փոխանցմամբ՝ այս մասին հաղորդում է India Today պարբերականը՝ վկայակոչելով նրա գրասենյակի հայտարարությունը։

Ավելի վաղ պարբերականը հայտնել էր, որ նախագահը ցույցերի ֆոնին հրաժարական է տվել, ինչպես և վարչապետը։

Հիշեցնենք, որ Նեպալում հակակառավարական ցույցեր են: Ցուցարարները հրկիզել են նախագահի, վարչապետի նստավայրերը:

Նեպալում հակակառավարական ցույցերի ժամանակ զոհերի թիվը հասել է 22-ի: Հարյուրավոր մարդիկ վիրավորվել են։ Այս մասին հաղորդում է India Today պարբերականը:

Ավելի վաղ հաղորդվել էր 19 զոհի մասին:

Ցույցերի երկրորդ օրը Կատմանդուում անկարգություններն ավելի են սրվել։ Երկու երիտասարդ ցուցարարներ գնդակահարվել են մայրաքաղաքի շրջաններից մեկում, երբ նրանք հրկիզել են տեղի ոստիկանական բաժանմունքի շենքը և հարձակվել դրա աշխատակիցների վրա: Անվտանգության ուժերի ներկայացուցիչները կրակ են բացել: Եվս մեկ մարդ զոհվել է փողոցում տեղի ունեցած բախումների ժամանակ:

Ցուցարարները ծեծի են ենթարկել մի քանի նախարարների, հրկիզել են խորհրդարանի շենքը, վանդալիզմի ենթարկել Գերագույն դատարանի շենքը, ինչպես նաև մի քանի լրատվամիջոցների կառույցներ։ 

Հնդկական մի քանի ավիաընկերություններ դադարեցրել են դեպի Նեպալ չվերթերը։ Հնդկաստանը նաև իր քաղաքացիներին կոչ է արել չճանապարհորդել Նեպալ անկարգությունների ընթացքում։

Իրավիճակը Նեպալում սրվել էր այն բանից հետո, երբ կառավարությունն արգելել էր սոցիալական 26 հարթակներ, քանի որ նրանք չէին գրանցվել՝ իշխանությունների պահանջին համապատասխան։ Ցույցերի ֆոնին սոցցանցերի արգելքը չեղարկվել էր, սակայն բողոքի ակցիաները շարունակվել էին, և երկրի վարչապետը հրաժարական է տվել։

ԱՄՆ դոլարի փոխարժեքն այսօր՝ սեպտեմբերի 9-ին, կազմել է 382.95 դրամ՝ նախորդ օրվա համեմատ աճել է 0.45 դրամով: Այդ մասին տեղեկանում ենք Կենտրոնական բանկի պաշտոնական կայքից։

Եվրոյի փոխարժեքը կազմել է 450.04 դրամ (աճել  է 1.48 դրամով), իսկ ռուսական ռուբլու փոխարժեքը կազմել է 4.60  դրամ (նվազել է 0.06 դրամով): 

Հայաստանյան բանկերում դոլարը գնվում է 380-381.5 դրամով, վաճառվում է 384-385 դրամով: Եվրոն բանկերում գնվում է 441-447 դրամով, վաճառվում է 452–457 դրամով:

Ռուբլին բանկերում գնվում է 4.45-4.57 դրամով, վաճառվում է 4.68-4.80 դրամով:

Փոխանակման կետերում իրավիճակը հետևյալն է. դոլարը գնվում է 381 դրամով, վաճառվում՝ 384 դրամով:

Եվրոն գնվում է 446 դրամով, վաճառվում է 450 դրամով:

Ռուբլին գնվում է 4.50 դրամով, վաճառվում է 4.62 դրամով:

Նեպալի նախկին վարչապետ Ջանա Նաթ Խանալի կինը մահացել է, երբ ցուցարարները հարձակվել են նրանց բնակարանի վրա, հաղորդում է Khabarhub պորտալը։

Ըստ լրատվամիջոցի՝ ցուցարարները նրան փակել են տանը և հրդեհել շենքը։

ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանի գլխավորած պատվիրակությունը սեպտեմբերի 7-10-ն աշխատանքային այցով գտնվում է Մեծ Բրիտանիայի և Իռլանդիայի Միացյալ Թագավորությունում։ Պատվիրակության կազմում են Հայաստանի պատմության թանգարանի տնօրեն Դավիթ Պողոսյանը, Ե․ Չարենցի անվան Գրականության և արվեստի թանգարանի տնօրեն Սյուզաննա Խոջամիրյանը, Հայաստանի ազգային պատկերասրահի տնօրեն Մարինա Հակոբյանը։ Այս մասին հայտնում են ԿԳՄՍՆ-ից: 

Այցի շրջանակում Լոնդոնում ստորագրվել է փոխըմբռնման հուշագիր՝ Հայաստանի պատմության թանգարանի և Բրիտանական թանգարանի միջև։ Հայկական կողմից հուշագիրը ստորագրել է Հայաստանի պատմության թանգարանի տնօրեն Դավիթ Պողոսյանը, բրիտանական կողմից՝ Բրիտանական թանգարանի տնօրեն Նիկոլաս Քուլինանը։

Պաշտոնական արարողությանը ներկա են եղել ԿԳՄՍ տեղակալ Ալֆրեդ Քոչարյանը, Մեծ Բրիտանիայի և Հյուսիսային Իռլանդիայի Միացյալ Թագավորությունում  ՀՀ արտակարգ և լիազոր դեսպան Վարուժան Ներսիսյանը, ՀՀ պաշտոնական պատվիրակության անդամներ, Բրիտանական թանգարանի ստորաբաժանումների ղեկավարներ, հրավիրյալ գիտնականներ: 

ԿԳՄՍ նախարարի տեղակալ Ալֆրեդ Քոչարյանը ողջույնի խոսքում կարևորել է երկու թանգարանների միջև մշակութային և մասնագիտական երկխոսության խորացման հնարավորությունը՝ ընդգծելով, որ ստորագրված փաստաթուղթն ամրագրում է համագործակցության նոր հեռանկարներ: Նրա խոսքով՝ 2024 թ. Հայաստանի պատմության թանգարանում Բրիտանական թանգարանի հետ համատեղ կազմակերպված «Մայր Աստվածություն. Անահիտից Մարիամ» ցուցադրությունը Հայաստանի և Միացյալ Թագավորության միջև դինամիկ և զարգացող համագործակցության մշակութային օրակարգի կարևոր կետերից է, որը նաև ամուր հիմք է  հետագա համագործակցության զարգացման համար:

Ալֆրեդ Քոչարյանը վստահություն է հայտնել, որ հուշագիրը կխորացնի միջմշակութային համագործակցությունը՝ նպաստելով գործընկերության ընդլայնմանը, նոր կապերի ձևավորմանը և մշակութային փոխանակումների զարգացմանը։

Միացյալ Թագավորություն կատարած այցի շրջանակում ԿԳՄՍ նախարարի տեղակալ Ալֆրեդ  Քոչարյանը, Գրականության և արվեստի թանգարանի տնօրեն Սյուզաննա Խոջամիրյանը և ՄԹ- ում  ՀՀ արտակարգ և լիազոր դեսպան Վարուժան Ներսեսյանն այցելել են Բրիտանական գրադարան։ Նրանք ծանոթացել են գրադարանի հավաքածուներին և աշխատանքային միջավայրին։ Քննարկումների արդյունքում ձեռք է բերվել պայմանավորվածություն նոր համագործակցության վերաբերյալ։

Նախարարի տեղակալն այցելել է նաև այլ մշակութային հաստատություններ։

Լեհաստանը սեպտեմբերի 11-ի կեսգիշերին կփակի Բելառուսի հետ սահմանը: Այս մասին հայտարարել է երկրի վարչապետ Դոնալդ Տուսկը, փոխանցում է Սպուտնիկ Բելառուսիան:

Նա բացատրել է, որ այս որոշումը կապված է բելառուս-ռուսական «Զապադ-2025» զորավարժությունների հետ, որոնք սկսվում են ուրբաթ օրը։

«Պետական ​​անվտանգության շահերից ելնելով՝ մենք կփակենք Բելառուսի հետ սահմանը, այդ թվում՝ երկաթուղային անցումները, հինգշաբթի կեսգիշերի», - ասել է Լեհաստանի կառավարության ղեկավարը։

Տուսկը նաև հավելել է, որ սահմանը փակելու որոշման ևս մեկ պատճառ Է դարձել Բելառուսում լրտեսության մեջ կասկածվող լեհի ձերբակալությունը:

Լևոն Տեր-Պետրոսյանն իր առանձնատանը հանդիպել է ՀՀ-ում ՌԴ դեսպան Սերգեյ Կոպիրկինին, հայտնում է ՀԱԿ մամուլի խոսնակ Արման Մուսինյանը։

«Ավելի քան մեկ ժամ տևած զրույցի ընթացքում անդրադարձ է կատարվել, մասնավորապես, հայ-ռուսական հարաբերությունների ներկայիս վիճակին և հարավկովկասյան տարածաշրջանում երկարատև խաղաղության ու կայունության հաստատման հրամայականին:

Առաջին նախագահը հարկ է համարել ընդգծել հետևյալը. Ռուսաստանի ներկայությունն Անդրկովկասում հույժ անհրաժեշտություն է, և պատմությամբ հաստատված իրողություն: Հայաստանի ազնիվ և հուսալի բարեկամներն են Ռուսաստանը, Իրանը, Վրաստանը, Ֆրանսիան, Հունաստանը, իսկ մոտ հեռանկարում՝ Չինաստանը և Հնդկաստանը»:

Թրամփի ուղին՝ TRIPP-ը Հայաստանի և Ադրբեջանի միջև ստորագրվելիք խաղաղության համաձայնագրի կարևոր տարր է և ծառայում է հեռավորությունից երկար ժամանակ բաժանված ադրբեջանական շրջանների վերամիավորմանը: Այս մասին Բաքվում կայացած ասուլիսի ժամանակ հայտարարել է Միացյալ Նահանգների Տնտեսական ֆինանսավորման կորպորացիայի (DFC) գործադիր տնօրեն Քենեթ Անյելը։ 

Նրա խոսքով՝ մոտ 42 կիլոմետր երկարությամբ այս կապող երթուղին ոչ միայն կմիավորի նշված տարածքները, այլև նոր հնարավորություններ կբացի Միջին միջանցքի համար. «Միջին միջանցքի հիմնական նպատակն է ապահովել ապրանքների ավելի արագ և արդյունավետ տեղաշարժը Արևելքի և Արևմուտքի միջև, այսինքն՝ Եվրոպայից Չինաստան և հակառակը։

Նա նշել է, որ փաստորեն, TRIPP երթուղին կդառնա լրացուցիչ և ռազմավարական տրանսպորտային միջանցք Եվրասիայում ապրանքների տեղափոխման համար։