«Լիվերպուլը» չի կարողացել ժամանել Մայնի Ֆրանկֆուրտ՝ Չեմպիոնների լիգայի ընդհանուր փուլի 3-րդ տուրի «Այնտրախտի» դեմ խաղի համար՝ ինքնաթիռի տեխնիկական խնդիրների պատճառով։ Այս մասին գրում է ArmSport.am-ը։

Այս մասին հայտնում է ակումբի պաշտոնական կայքը։ Խնդրի հետևանքով չեղարկվել է նաև թիմի նախախաղային մամուլի ասուլիսը։

Հանդիպումը տեղի կունենա «Ֆրանկֆուրտ Արենա» մարզադաշտում (Ֆրանկֆուրտ, Գերմանիա)։ Խաղը կսպասարկի ֆրանսիացի մրցավար Ֆրանսուա Լետեքսյեն։

ՉԼ լիգայի փուլում երկու խաղից հետո «Լիվերպուլն» ունի 3 միավոր և զբաղեցնում է 17-րդ տեղը մրցաշարային աղյուսակում։ «Այնտրախտը» նույնպես 3 միավորով գտնվում է 15-րդ հորիզոնականում։

Համացանցում «Touch grass» («դո՛ւրս գնա») արտահայտությունն ամենից հաճախ օգտագործվում է որպես հումորային մեմ՝ ինչ-որ մեկին ծաղրելու և խրախուսելու համար դուրս գալ ցանցից և մի քիչ թարմ օդ շնչել: Սակայն պարզվում է, որ դրանում որոշակի ճշմարտություն կա. գիտական ​​հետազոտությունները հաստատում են, որ միայն ֆիզիկական աշխարհում հասանելի զգայական ապրումներին վերադառնալն իրականում օգտակար է ընդհանուր բարեկեցության համար: 

Արտոնագրված կլինիկական սոցիալական աշխատող և հոլիստիկ թերապիայի հետազոտող Միշել Հենդը հավաքել է տվյալներ, որոնք ցույց են տալիս, որ երաժշտական ​​թերապիան և բնության վրա հիմնված թերապիան կարող են բարելավել հուզական, մտավոր և ֆիզիկական առողջությունը: 

Նման մոտեցումների այդքան արդյունավետ լինելու հիմնական պատճառն այն է, որ դրանք մուլտիսենսորային փորձառություն են առաջարկում: Ի տարբերություն ավանդական եղանակների, երաժշտական և բնության թերապիան կարող են միաժամանակ ներգրավել լսողությունը, տեսողությունը, շոշափելիքը և նույնիսկ հոտառությունը՝ օգնելով մարդուն կենտրոնանալ ներկա պահի վրա: Ընդ որում հատուկ ուշադրություն է դարձվում ընտրության ազատությանն ու ճկունությանը, ինչը հնարավորություն է տալիս թերապիան հարմարեցնել անհատական ​​կարիքներին: 

Այս թեմայի վերաբերյալ հոդվածը հրապարակվել է Frontiers of Human Neuroscience գիտական հանդեսում:

Հենդի համոզմամբ՝ երաժշտության և բնության համակցված օգտագործումը նպաստում է ինքնարտահայտմանը, բարձրացնում է տրամադրությունը և բարելավում հուզական վիճակը, ինչպես նաև նվազեցնում է տագնապը, սթրեսը և դեպրեսիայի ախտանիշները, ինչը դրականորեն է ազդում առօրյա կյանքի տարբեր ասպեկտների վրա։ 

Երաժշտական և բնության թերապիաները նախկինում առանձին-առանձին են ուսումնասիրվել, սակայն այս ակնարկը քննում է այն հետազոտությունները, որոնք միաժամանակ են օգտագործվել։ Հենդը, ծերաբանության հետազոտող Էմիլի Իհարայի և Ջորջ Մեյսոնի համալսարանի սոցիալական աշխատանքի շրջանավարտներ Մորգան Մուրի և Մեդիսոն Շոուի հետ միասին, վերլուծել է վեց տվյալների բազաներից 884 հոդված և ընտրել է չափանիշներին համապատասխանող ութ հրապարակում։ Օրինակների թվում են կենդանիների խնամքը, այգեգործությունը, երգեցողությունը և բացօթյա պարերը։ 

Հենդը նշում է, որ երաժշտության և բնության ռազմավարությունները կարող են մատչելի, էժան և հարմարվողական միջոց լինել՝ բոլոր տարիքի մարդկանց, նրանց թվում՝ հաշմանդամություն ունեցող անձանց, տրավմա վերապրած վետերանների և դեմենցիայից տառապող տարեցների հոգեկան առողջությունը բարելավելու համար։

ԱՄՆ վարչակազմն աշխատում է Գազայի հատվածում խաղաղապահ ուժեր տեղակայելու ուղղությամբ՝ առանց ամերիկյան ռազմական միջամտության երկարաժամկետ անվտանգություն պահպանելու համար։

«Արմենպրես»-ի հաղորդմամբ՝ այս մասին Իսրայել այցի շրջանակներում ունեցած ասուլիսին հայտարարել է ԱՄՆ փոխնախագահ Ջեյ Դի Վենսը։

Նրա խոսքով՝ նորաբաց քաղաքացիական-ռազմական համագործակցության կենտրոնում իսրայելցիներն ու ամերիկացիները համատեղ աշխատում են՝ սկսելու Գազայի վերականգնման, երկարաժամկետ խաղաղություն ապահովման ծրագրի իրականացումը, ինչպես նաև փաստացի երաշխավորելու, որ տեղում կլինեն ոչ ամերիկյան անվտանգության ուժեր, որոնք կարող են երկարաժամկետ խաղաղություն պահպանել։

ԱՄՆ Սենատի հանրապետական սենատորներ Ջոն Բարասոն և Բիլ Քեսիդին պատրաստվում են բանաձև ներկայացնել երկրի նախագահ Դոնալդ  Թրամփին խաղաղության Նոբելյան մրցանակի առաջադրելու վերաբերյալ՝ համաշխարհային Covid համավարակի ընթացքում պատվաստանյութերի մշակման համար։

Այս մասին հայտնում է NBC News-ը։ 

«Նախագահ Թրամփի վճռական գործողությունները ոչ միայն փրկեցին միլիոնավոր կյանքեր, այլև վերադարձրեց ամերիկյան տնտեսությունը կյանքի», – ասել է Քեսիդին լրատվամիջոցին՝ համոզմունք հայտնելով, որ հաջորդ Նոբելյան մրցանակը պետք է ստանա Դոնալդ Թրամփը։

Սենատորների խոսքով՝ իրենց ջանքերն արտացոլում են Թրամփի վարչակազմի այլ պաշտոնյաների, այդ թվում՝ առողջապահության նախարարի ցանկությունները։

ԱՄՆ փոխնախագահ Ջեյ Դի Վենսը հայտարարել է, որ բոլոր երկրները պետք է նպաստեն Գազայի հետպատերազմյան վերականգնմանը։

Ինչպես փոխանցում է ՌԻԱ Նովոստին, այս մասին Ջեյ Դի Վենսը հայտարարել է Իսրայել կատարած այցի շրջանակներում տեղի ունեցած մամուլի ասուլիսին։

Նրա համոզմամբ՝ յուրաքանչյուր երկիր պետք է դերակատարում ունենա Գազայի վերականգնման գործընթացում։

Ըստ Վենսի՝ աջակցությունը կարող է լինել ինչպես ֆինանսապես, այնպես էլ դիվանագիտական՝ խաղաղության գործընթացի իրականացումն ու կենսունակությունն ապահովելու համար։

ԱՄՆ նախագահ Դոնալդ Թրամփը խոստացել է շուտով վերջ դնել ևս մեկ պատերազմի։

Այս մասին Դոնալդ Թրամփը հայտարարել է հանրապետական սենատորների հետ հանդիպման ժամանակ։

«Մենք հասել ենք ութ պատերազմի ավարտին։ Կհավատաք, թե՝ ոչ, մոտենում է իններորդի ավարտը», - ասել է ԱՄՆ նախագահը՝ չմանրամասնելով, թե որ պատերազմի ավարտի մասին է խոսքը։

ԱՄՆ նախագահ Դոնալդ Թրամփը չեղարկել է ՌԴ նախագահ Վլադիմիր Պուտինի հետ մոտ ապագայում հանդիպելու ծրագրերը, հաղորդում է Reuters-ը՝ հղում անելով Սպիտակ տան բարձրաստիճան պաշտոնյայի։ 

Գործակալության աղբյուրը հայտնել է, որ արտաքին գործերի նախարար Սերգեյ Լավրովի և պետքարտուղար Մարկո Ռուբիոյի միջև հանդիպումը, որը նախատեսված էր Բուդապեշտում Պուտին-Թրամփ գագաթնաժողովին նախապատրաստվելու համար, նույնպես չի կայանա։

Բուդապեշտում գագաթնաժողովի նախապատրաստական ​​աշխատանքները, որի մասին Թրամփը հայտարարել էր Պուտինի հետ հեռախոսազրույցից հետո, և որը նա հույս ուներ անցկացնել առաջիկա երկու շաբաթների ընթացքում, դադարեցվել են, NBC News-ին հաստատել է աղբյուրը։

Ռոյթերսի տվյալներով՝ Ռուսաստանի և ԱՄՆ նախագահների երկրորդ անձնական հանդիպումը ձախողվել է, երբ պարզ է դարձել, որ Պուտինը պատրաստ չէ զիջումների գնալ և շարունակում է արմատական ​​պահանջներ ներկայացնել։ 

«Ռուսները չափազանց շատ բան էին ուզում, և ամերիկացիների համար պարզ դարձավ, որ Թրամփի համար Բուդապեշտում գործարք չի լինի», – գործակալությանը հայտնել է իրավիճակին ծանոթ եվրոպացի դիվանագետը։

Reuters-ի մեկ այլ աղբյուրի փոխանցմամբ՝ Կրեմլի դիրքորոշումը Անքորիջում կայացած հանդիպումից ի վեր չի փոխվել. Ռուսաստանը դեռևս հրաժարվում է դադարեցնել մարտական ​​գործողությունները ներկայիս առաջնագծի երկայնքով։

ԱՄՆ նախագահ Դոնալդ Թրամփը հայտարարել է, որ Վաշինգտոնի մի շարք դաշնակիցներ պատրաստ են զորք մտցնել Գազայի հատված, եթե ՀԱՄԱՍ շարժումը խախտի խաղաղության համաձայնագրի պայմանները: Նա այդ մասին գրել է իր «Truth Social» սոցցանցում։

«Մերձավոր Արևելքի և հարևան տարածաշրջանների մեր մեծ դաշնակիցներից շատերն ուղիղ և մեծ ոգևորությամբ հայտնել են ինձ, որ իմ խնդրանքով պատրաստ են խոշոր ուժեր մտցնել Գազա և ՀԱՄԱՍ-ի հարցերը լուծել, եթե նա շարունակի իրեն վատ պահել՝ խախտելով պայմանավորվածությունները», – գրել է Թրամփը:

ԱՄՆ–ի առաջնորդը նշել է, որ այդ երկրներին հորդորել է առայժմ չշտապել և հուսալ, որ ՀԱՄԱՍ-ը կկատարի համաձայնագրի կետերը։ 

«Եթե ՀԱՄԱՍ-ը ճիշտ ընտրություն չանի, ապա կունենա արագ, կատաղի և անողոք ավարտ», – ընդգծել է ԱՄՆ նախագահը:

Հիշեցնենք` Իսրայելի և ՀԱՄԱՍ-ի միջև կնքված հրադադարի մասին համաձայնագիրն ուժի մեջ մտավ հոկտեմբերի 10-ին: ՀԱՄԱՍ–ը գործարքի շրջանակում ազատ արձակեց 2023 թվականի հոկտեմբերի 7-ից Գազայում պահվող 20 պատանդներին: Բանտարկյալների գործերով պաղեստինյան գրասենյակը հաստատեց, որ Իսրայելի իշխանություններն էլ, հետևելով պայմանավորվածությանը, ազատ են արձակել 1718 բանտարկյալի, որոնք վերադարձել են Գազա, ինչպես նաև ցմահ ազատազրկման կամ երկարատև ժամկետով դատապարտված 250 պաղեստինցի բանտարկյալների:

Վարչապետ Նիկոլ Փաշինյանն աշխատանքային այցով մեկնել է Վրաստան:
 
Այսօր նախատեսված է Հայաստանի և Վրաստանի վարչապետներ Նիկոլ Փաշինյանի և Իրակլի Կոբախիձեի առանձնազրույցը։ 

Վաղը վարչապետ Փաշինյանը Թբիլիսիում կմասնակցի «Մետաքսի ճանապարհ» 5–րդ համաժողովին։

Հոկտեմբերի 21-ին մեկնարկած Ազգային ժողովի նիստի օրակարգում ընդգրկված է «Տեսալսողական մեդիայի մասին» ՀՀ օրենքում փոփոխություն կատարելու մասին նախագիծը, որը նախատեսում է գործող օրենքով նախատեսված հանրային հեռարձակողների թիվը նվազեցնել՝ հասցնելով երկուսի՝ միևնույն ժամանակ վերացնելով նաև կրթական-մշակութային ուղղվածության ծրագիր պարունակելու պահանջը։ Այս մասին հայտարարություն է տարածել Հայաստանի ժուռնալիստների միությունը։ 

«Ակնհայտ է, որ այս փոփոխության իրական պատճառը «Շողակաթ» հեռուստաընկերությանը հանրային հեռարձակողների ցանկից դուրս թողնելու իշխանության որոշումն է, ինչի սպասարկմանն էլ ուղղված է մակերեսային հիմնավորումներով խորհրդարան բերված օրենքի նախագիծը:

Հանրային հեռարձակողների կազմում կատարվող այս փոփոխությունը գործող իշխանության կողմից Հայ Առաքելական եկեղեցու դեմ վարվող պայքարի տրամաբանական շարունակությունն է, ինչի հիմքերը դրվել էին շատ ավելի վաղ՝ երբ բացահայտորեն սկսվել էր ազգային արժեքների, հայկական ինքնության դեմ ամենաբարձր մակարդակով հովանավորվող քարոզչությունը: Ամենակեղտոտ քաղաքական նպատակադրումներով «Շողակաթ» հեռուստաընկերության դեմ ուղղված այս քայլը բազմապատիկ դատապարտելի է այն դեպքում, երբ Հայ Առաքելական եկեղեցու հետ օրգանապես կապված հեռուստաընկերությունը պահպանել է իր քաղաքական զսպվածությունն ու բացառապես հոգևոր-մշակութային, կրթական ուղղվածությունն անգամ ՀԱԵ-ի դեմ ամենալկտի գործողությունների պայմաններում:

Այսօր՝ Հանրային հեռարձակողների կազմից դուրս թողնելով «Շողակաթ» հեռուստաընկերությանը, իշխանությունը լուծում է ոչ միայն Եկեղեցուն ևս մեկ հարված հասցնելու իրավիճակային խնդիր, այլ փորձում է սահմանափակել եզակի հեռուստաընկերությանը սփռումը, որը հետևողականորեն զբաղված է հոգևոր, ազգային արժեքների պահպանմամբ ու պրոֆեսիոնալ մատուցմամբ: Այն, ինչը հակոտնյա է գործող իշխանության որդեգրած անարժեք, հակաազգային քաղաքականությանը:

Հայաստանի ժուռնալիստների միությունը խստորեն դատապարտում է «Շողակաթ» հեռուստաընկերության դեմ ուղղված ակնհայտ քաղաքական իշխանությունների այս քայլը և պահանջում է հետ կանչել օրինագիծն Ազգային ժողովից: Միևնույն ժամանակ լրագրողական համայնքին, մամուլի ազատության հարցերով զբաղվող կազմակերպություններին հորդորում ենք գործուն միջոցներով պաշտպանել «Շողակաթ» հեռուստաընկերության՝ Հանրային հեռարձակողների շարքում մնալու իրավունքը»,-ասված է հայտարարության մեջ: