Այսօր՝ սեպտեմբերի 7-ին, առեղծվածային ու ողբերգական դեպք է տեղի ունեցել Կոտայքի մարզում։ Ժամը 13:50-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Կոտայքի բաժնում օպերատիվ տեղեկություններ են ստացվել, որ Աբովյան քաղաքի Հատիսի փողոցում գտնվող արագ սննդի կետում 2 քաղաքացի կա կախված։ Այս մասին հայտնում է Shamshyan.com-ը։

Ըստ նախնական տեղեկությունների՝ ներսում 2 տղամարդու դի կա կախված, ովքեր հարազատ եղբայրներ են։

Դեպքի փաստով Աբովյանի քննչական բաժնում նախաձեռնվել է քրեական վարույթ, որտեղ էլ պարզում են մահացածների ինքնությունը։

Դեպքի վայր է ժամանել նաև Աբովյան խոշորացված համայնքի ղեկավար Էդուարդ Բաբայանը։

ԱՄՆ նախագահ Դոնալդ Թրամփը և Չինաստանի նախագահ Սի Ծինփինը հնարավոր է հանդիպեն Ասիա-խաղաղօվկիանոսյան տնտեսական համագործակցության (APEC) գագաթնաժողովի ժամանակ, որը տեղի կունենա Հարավային Կորեայում հոկտեմբերի 31-ից նոյեմբերի 1-ը, հաղորդում է CNN-ը՝ հղում անելով ԱՄՆ վարչակազմի երեք պաշտոնյաների։

Պաշտոնյաների խոսքով՝ ներկայումս լուրջ քննարկումներ են ընթանում երկկողմ հանդիպում անցկացնելու հնարավորության վերաբերյալ, սակայն դեռևս կոնկրետ ծրագրեր չկան։

Հեռուստաալիքը հիշեցրել է, որ Սի Ծինփինը Թրամփին և նրա կնոջը՝ Մելանիային, հրավիրել է ամռանը այցելել Չինաստան։ ԱՄՆ նախագահը ընդունել է հրավերը՝ խոստովանելով, որ այցը կկատարի «որոշ պահի»։ Թրամփի և Սի Ծինփինի հնարավոր հանդիպման մանրամասները դեռևս ճշտվում են։ ԱՄՆ պաշտոնյաների խոսքով՝ ԱՄՆ վարչակազմը սա նաև համարում է նախագահի համար հնարավորություն՝ ամերիկյան տնտեսությունում ավելի մեծ տնտեսական ներդրումներ կատարելու համար։ Այս գործոնը կարևոր դեր է խաղացել Թրամփի վերջին արտասահմանյան ուղևորությունների ժամանակ, այդ թվում՝ Սաուդյան Արաբիա, Կատար և Արաբական Միացյալ Էմիրություններ կատարած այցելությունների ժամանակ, նշում է CNN-ը։

«Քննարկվում է Հարավային Կորեա այցը՝ կենտրոնանալով տնտեսական համագործակցության վրա», - CNN-ին ասել է Սպիտակ տան պաշտոնյան։ Նա հավելել է, որ այլ նպատակներից են առևտրի, պաշտպանության և քաղաքացիական միջուկային համագործակցությունը։

ԱԺ նախագահ Ալեն Սիմոնյանի թելեգրամյան գրառումը․ «Տեսա, որ ArmComedy-ի հաղորդավարները սոցիալական գովազդի էջ են բացել, մարդկանց ասում են, որ տեսնում եք իրար լիֆտ նստելիս՝ փոքր տարածքներում հանդիպելիս, բարևեք:
Բա տղերք, որ ինձ փողոցում դեմ դիմաց տեսնում եք, ինչի՞ եք սառում, աչքերը ապակի դարձնում ու արագ հեռանում:
Ու ոչ մի քաղաքական պատճառ չբերեք, մենք միասին բիզնես ենք արել, իրար տուն ենք գնացել-եկել և այլն:

Հեշտա չէ՞ մեծ-մեծ ուրիշների մասին խոսել, սովորեցնել ու էկրանից այն կողմ լավը ձևանալ՝ 0 պատասխանատվությամբ և մակերեսային գիտելիքներով:

Բայց մի նեղսրտեք, ես Ձեզ նորմալ եմ վերաբերվում, առավել ևս, որ վերջերս դուք շատ օբյեկտիվ եք դարձել ձեր ծրագրերում: Տեսեք հանկարծ դրա պատճառով նենց չստացվի, որ Ձեզ էլ ձեր հին ծանոթները վերելակում սկսեն բարև չտալ»:

SHAMSHYAN.com-ի տեղեկություններով՝ սեպտեմբերի 3-ին արտառոց դեպք է տեղի ունեցել Երևանում։ Ժամը 20։50-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Արաբկիրի բաժնում օպերատիվ տեղեկություն են ստացել, որ Արաբկիր վարչական շրջանի դպրոցներից մեկի մոտից հարված ստանալու հետևանքով «որովայնի փակ վնասվածք» ախտորոշմամբ շտապօգնության խումբը «Սուրբ Աստվածամայր» բժշկական կենտրոն բուժօգնության է տեղափոխել մի երեխայի։

Ինչպես հայտնում է ֆոտոլրագրող Գագիկ Շամշյանը, հիվանդանոց է մեկնել ոստիկանության Արաբկիրի բաժնի օպերատիվ խումբը՝ ավագ համայնքային ոստիկանի գլխավորությամբ։

Տեղում ոստիկանները պարզել են, որ տուժածը Երևանի բնակիչ 8-ամյա Հ․ Մ․-ն է, ում մայրը ոստիկաններին հայտնել է, որ նուն օրը ժամը 17։00-ի սահմաններում հիմնական դպրոցի ֆիզկուլտուրայի հանդերձարանում իր որդու վրա են հարձակվել դասընկերներ Կ․ Խ․-ն, Ռ․ Ղ․-ն, Հ․ Հ․-ն և Լ․ Գ․-ն և ոտքերով հարվածներ հասցրել որովայնի և կրծքավանդակի հատվածներում՝ պատճառելով ֆիզիկական ցավ։

Դեպքի փաստով ոստիկանության Արաբկիրի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժին։

Հանրապետության տարածքում սեպտեմբերի 7-ին և 10-ին կեսօրից հետո, 11-ի գիշերը և կեսօրից հետո առանձին շրջաններում սպասվում է կարճատև անձրև և ամպրոպ։ Սեպտեմբերի 8-9-ը, 12-ին սպասվում է առանց տեղումների եղանակ: 

Քամին՝ արևմտյան՝ 2-5մ/վ, ամպրոպի ժամանակ սպասվում է քամու ուժգնացում՝ 17-20մ/վ արագությամբ։

Օդի ջերմաստիճանը սեպտեմբերի 7-ի ցերեկը, 8-ին Լոռիում և Տավուշում աստիճանաբար կնվազի՝ 2-4 աստիճանով, մնացած շրջաններում էապես չի փոխվի:

Երևան քաղաքում սեպտեմբերի 7-ի ցերեկը, 8-10-ը, 12-ին սպասվում է առանց տեղումների եղանակ։ Սեպտեմբերի 11-ի գիշերը և կեսօրից հետո սպասվում է կարճատև անձրև և ամպրոպ։ Սպասվում է քամու ուժգնացում՝ ամպրոպի ժամանակ 16-19մ/վ, երեկոյան ժամերին՝ 13- 16 մ/վ արագությամբ:

Ճապոնիայի վարչապետ Շիգերու Իշիբան որոշել է հրաժարական տալ։ Այս մասին սեպտեմբերի 7-ին հայտնել է NHK հեռուստառադիոընկերությունը։

Կառավարության ղեկավարը իր որոշումը բացատրել է Լիբերալ-դեմոկրատական կուսակցության պառակտումը կանխելու ցանկությամբ։ Կուսակցության ղեկավարի ընտրությունների անցկացման վերաբերյալ վերջնական որոշումը սպասվում է, որ կկայացվի սեպտեմբերի 8-ին։

Հիշեցնենք, որ վարչապետ Նիկոլ Փաշինյանը երեք օր առաջ հանդիպում էր ունեցել Իշիբանի հետ՝ Ճապոնիա կատարած այցի ժամանակ։

Հայաստան-Թուրքիա հարաբերությունների կարգավորման գործընթացի շրջանակում առաջիկա օրերին Հայաստանում նախատեսվում է հատուկ ներկայացուցիչներ Ռուբեն Ռուբինյանի և Սերդար Քըլըչի հանդիպումը:

Այս մասին  հայտնում է ԱԳՆ մամուլի խոսնակ Անի Բադալյանը։

Ներկայացնում ենք տարադրամի փոխարժեքները՝ ըստ rate.am-ի:

ԱՄՆ դոլարի առքի առավելագույն արժեքն է 382 դրամ, վաճառքի նվազագույն արժեքը՝ 384 դրամ:

Եվրոյի առքի առավելագույն արժեքն է 443 դրամ, վաճառքի նվազագույն արժեքը՝ 449 դրամ: 

Ռուսական ռուբլու առքի առավելագույն արժեքն է 4.68 դրամ, վաճառքի նվազագույն արժեքը՝ 4.72 դրամ:

Հայ-թուրքական հարաբերությունների կարգավորման գործընթացում Թուրքիայի հատուկ ներկայացուցիչ Սերդար Քըլըչի գլխավորած պատվիրակությունը շուտով կմեկնի Հայաստան՝ «Ալիջան» սահմանային անցակետով։

Այս մասին, ըստ 168.am-ի, հայտնել է թուրքական NTV հեռուստաալիքը՝ հղում անելով դիվանագիտական ​​աղբյուրներին։

Ակնկալվում է, որ միջկառավարական նիստում կարող են կայացվել երկկողմ հարաբերությունների կարգավորման վերաբերյալ որոշ որոշումներ, ինչպես նաև կքննարկվի նախկինում համաձայնեցված քայլերի իրականացումը։ 

Այցը նախատեսված է հաջորդ շաբաթվա սկզբին։

Ռուսական զորքերը սեպտեմբերի 7-ի գիշերը զանգվածային հարձակում են սկսել Կիևի վրա: Անօդաչու թռչող սարքի հավանական խոցման ժամանակ կառավարության շենքում հրդեհ է բռնկվել, հայտնել է Ուկրաինայի մայրաքաղաքի քաղաքապետ Վիտալի Կլիչկոն, հաղորդում է RBK-Ukraine-ն:

«Պեչերսկի շրջանում, անօդաչու թռչող սարքի հավանական խոցման հետևանքով, կառավարության շենքում հրդեհ է բռնկվել: Հրշեջները աշխատում են դեպքի վայրում», – ասել է նա:

Կլիչկոն նաև հավելել է, որ Սվյատոշինսկի շրջանում կրկին այրվում են պահեստներ: Այնտեղ աշխատում են նաև արտակարգ ծառայությունները: 

Ինչպես հաղորդում է RBK-Ukraine-ն, սեպտեմբերի 7-ի գիշերը ռուսները զանգվածային և համակցված հարձակում են սկսել Ուկրաինայի, մասնավորապես՝ մայրաքաղաքի վրա:

Գիշերը ռուսական զորքերը ակտիվորեն անօդաչու թռչող սարքեր են արձակել Կիևի վրա: Հրթիռակոծության հետևանքով քաղաքում վնասվել են մի քանի բազմահարկ բնակելի շենքեր և մեքենաներ, եղել են հրդեհներ:

Բացի այդ, հրետակոծության հետևանքով կան տասնյակից ավելի վիրավորներ և զոհեր: Ավելին, զոհվածների թվում կա մեկ տարեկան երեխա։

Առավոտյան արդեն մոտ ռուսական զորքերը թևավոր հրթիռներ են արձակել մայրաքաղաքի վրա։ Այս հարձակման ֆոնին քաղաքում լսվել են հզոր պայթյուններ։