ՇՀԿ-ին Ադրբեջանի անդամակցության արգելափակումը նախաձեռնել է ոչ միայն Հնդկաստանը, Ռուսաստանը նույնպես ակտիվորեն մասնակցել է այդ գործընթացին:

Այս մասին հայտնում է ադրբեջանական ԱՊԱ գործակալությունը՝ հղում անելով դիվանագիտական աղբյուրները:

Ավելին, ինչպես նշում է ԱՊԱ-ն, այդ գործընթացում առանցքային դեր է խաղացել Ռուսաստանի Դաշնության արտաքին գործերի նախարարությունը:

Ըստ աղբյուրի՝ ՇՀԿ-ին Ադրբեջանի անդամակցության արգելափակման հարցը քննարկվել է Ռուսաստանի և Հնդկաստանի միջև քաղաքական խորհրդակցությունների ընթացքում, և կողմերը համապատասխան պայմանավորվածություն են ձեռք բերել: Սակայն Ռուսաստանը առաջին պլան մղեց Հնդկաստանին՝ մնալով ստվերում։

Ռուսաստանի ԱԳՆ մամուլի քարտուղարի հայտարարությունը, որում ընթացիկ տարվա հուլիսին Ադրբեջանում Ռուսաստանի 13 քաղաքացիների ձերբակալությունը ներկայացվել է որպես ադրբեջանա-ռուսական հարաբերությունների վատթարացման պատճառ, իսկ նրանց ազատ արձակումը՝ որպես հարաբերությունների բարելավման պայման, սխալ է:

Այս մասին ասել է Ադրբեջանի ԱԳՆ մամուլի քարտուղար Այխան Հաջիզադեն:

«Ադրբեջանի և Ռուսաստանի միջև լարվածությունը պայմանավորված է հենց AZAL-ի ինքնաթիռի կործանմամբ և ռուս պաշտոնյաների հետագա վարքագծով։ 

Բացի այդ, Ռուսաստանում էթնիկ հիմքով ադրբեջանցիների հետապնդումները, Եկատերինբուրգում ադրբեջանցիների ծեծն ու սպանությունները լրացուցիչ լարվածություն են ստեղծել։ Դրա հետ մեկտեղ Ադրբեջանի դեմ ռուսական տարբեր պետական կառույցների գործունեությունը նույնպես բացասական գործոն է, որն ազդում է հարաբերությունների վրա»,-ասել է նա:

Վարչապետ Նիկոլ Փաշինյանն Օսակայում այցելել է Expo 2025  համաշխարհային ցուցահանդես, որի շրջանակներում տեղի է ունեցել Հայաստանի ազգային օրվան նվիրված միջոցառումը:

Վարչապետ Փաշինյանն այցելել է ցուցահանդեսում բացված հայկական տաղավար: «Այսօրվա և վաղվա սյուները» խորագրով հայկական տաղավարը ներկայացնում է Հայաստանի առաջատար նորարարական ծրագրերը, մշակութային ժառանգությունը, ներդրումային հնարավորությունները, առաջադեմ կրթական նախաձեռնությունները: Պատասխանատուները նշել են, որ հայկական տաղավար այցելուների թիվը ցուցահանդեսի մեկնարկից ի վեր գերազանցել է մեկ միլիոնը:

Այնուհետև կայացել է Հայաստանի ազգային օրվան նվիրված միջոցառման բացման արարողությունը: Նախ՝ հնչել են Հայաստանի և Ճապոնիայի ազգային օրհներգերը, որից հետո ելույթներով հանդես են եկել վարչապետ Նիկոլ Փաշինյանը և Համաշխարհային ցուցահանդեսի գլխավոր հանձնակատարի տեղակալ Շիգետոշի Իկեյաման: 

Իր ելույթում վարչապետ Փաշինյանը, մասնավորապես, նշել է.

«Հարգելի՛ հանձնակատարի տեղակալ պարոն Իկեյամա,

Հարգարժա՛ն հյուրեր, այցելուներ,

Ուրախ եմ այսօր ձեզ ողջունել «ԷՔՍՊՈ 2025 Օսակա, Կանսայ, Ճապոնիա» համաշխարհային ցուցահանդեսի շրջանակներում Հայաստանի ազգային օրվան նվիրված միջոցառմանը։

Նախ և առաջ թույլ տվեք շնորհավորել բարեկամ Ճապոնիային այս տարի Օսակայում աշխարհի խոշորագույն տնտեսական իրադարձության՝ «ԷՔՍՊՈ 2025» համաշխարհային ցուցահանդեսի հյուրընկալման և հաջող անցկացման առիթով։ Ցանկանում եմ շնորհակալություն հայտնել նաև մեր ճապոնացի գործընկերներին ցուցաբերած աջակցության և ջերմ ընդունելության համար:

Ինչպես գիտեք, Համաշխարհային ցուցահանդեսը մեկ դարից ավելի կարևոր հարթակ է հանդիսանում ամենատարբեր ոլորտներում մարդկության նորագույն ձեռքբերումները և նորարարությունները ներկայացնելու համար: Հայաստանն արդեն 5-րդ անգամ է մաս դառնում այս կարևոր իրադարձությանը, և մեզ համար, իսկապես, մեծ պատիվ է մասնակցել Համաշխարհային ցուցահանդեսին այստեղ՝ Օսակայում, որը լավ հնարավորություն է միմյանց հաղորդակից դարձնելու տնտեսության, տեխնոլոգիաների, առողջապահության, արդյունաբերության և մի շարք այլ ոլորտներում աշխարհում տեղի ունեցող զարգացումներին և նորարարություններին։

Հարգելի՛ բարեկամներ,

Մենք ժամանել ենք Օսակա՝ կիսվելու մեր հարուստ պատմության և մշակույթի վրա հիմնված ներկայիս Հայաստանի ձեռքբերումներով և տնտեսական ու տեխնոլոգիական առաջընթացի ու նորարարական կրթության փիլիսոփայության վրա հիմնված խաղաղ և բարեկեցիկ ապագայի տեսլականով։

«Այսօրվա և վաղվա սյուները» խորագիրը կրող Հայաստանի տաղավարում սյուներից չորսը խորհրդանշում են Հայաստանի «այսօրը»` պատմությունը, մշակույթը, նորարարությունը և տարածաշրջանային հնարավորությունները։ Հայաստանի ապագան խորհրդանշող մյուս չորս սյուները ներկայացնում են տեխնոլոգիական, նորարարական կրթության փիլիսոփայությունը, Հայաստանի տեսլականն ուսուցման և կրթության ապագայի վերաբերյալ, ինչի համատեքստում ներկայացվում են հայկական՝ ապագային միտված կրթական նախաձեռնությունները՝ Թումոն, ՔՈԱՖ-ը, Արմաթը, Հայաստանի կողմից առաջ քաշված նոր նախագծերը՝ «Ակադեմիական քաղաք»-ը, «Ինժեներական քաղաք»-ը:

Այս համատեքստում հպարտությամբ եմ նշում, որ ընթացիկ տարվա հունիսի 1-ին Ճապոնիայում պաշտոնապես բացվեց Թումո ստեղծարար տեխնոլոգիաների կենտրոնի Գունմա մասնաճյուղը, որը հասանելի կլինի պրեֆեկտուրայի համայնքներում բնակվող 1500 պատանիների համար։ Թումոյի յուրահատուկ հեղինակային կրթական մոդելով այստեղ կդասավանդվեն ծրագրավորում, անիմացիա, ֆիլմերի ստեղծում, խաղերի ստեղծում, 3D մոդելավորում, նկարչություն և շարժական գրաֆիկա ոլորտները։

Հարգելի՛ ներկաներ,

Մասնակցությունն Օսակայում ընթացող տնտեսական աշխարհի այս խոշորագույն միջոցառմանը բացառիկ հնարավորություն է ընձեռում ոչ միայն ճապոնացի ժողովրդին, այլև աշխարհին ներկայացնելու Հայաստանի տնտեսական, մշակութային, տեխնոլոգիական, կրթական և զբոսաշրջային գրավչությունը՝ նոր հեռանկարներ ստեղծելով այդ ոլորտներում համագործակցության հետագա զարգացման և խորացման համար:

Տաղավարում առանձնակի ուշադրություն է հատկացված նաև Հայաստանի ապագային միտված խաղաղության տեսլականին` «Խաղաղության խաչմերուկ»-ի իրագործմանը, որը մենք տեսնում ենք ինչպես մի իրավիճակ, երբ երկրներն ապրում են բաց սահմաններով, կապված են ակտիվ տնտեսական, քաղաքական և մշակութային կապերով և բոլոր հարցերը դիվանագիտության և երկխոսության միջոցով լուծելու հանձնառությամբ։

Մեկ անգամ ևս ողջունելով բոլոր ներկաներին՝ ցանկանում եմ հրավիրել բոլորին այցելելու Հայաստանի տաղավար՝ հաղորդակից լինելու դեպի բարեկեցիկ և խաղաղ ապագա տանող Հայաստանի տեսլականին:

Շնորհակալություն»:

EXPO 2025 ցուցահանդեսի շրջանակում հայկական տաղավարը գործելու է մինչև հոկտեմբերի 13-ը:

Ուժայինները «Դոմոդեդովո» օդանավակայանում ձերբակալել են դերասանուհի Ագլայա Տարասովային: Այս մասին, Թերթիփոխանցմամբ, ՏԱՍՍ-ին հայտնել են իրավապահ մարմինները։

«Տարասովան ձերբակալվել է «Դոմոդեդովո օդանավակայանում»:

Նախնական տվյալներով՝ նրա էլեկտրոնային ծխախոտում հայտնաբերվել է կանեփի յուղ»,-ասել է գործակալության աղբյուրը։

Շուտով կհայտարարենք Ժաննա Անդրեասյանի հրաժարականը պահանջելու բողոքի ակցիայի մասին, զուգահեռ տանելով նաև ԿԳՄՍ նախարարին քրեական պատասխանատվության ենթարկելու գործընթացը:

Այս մասին գրել է պատմական գիտությունների դոկտոր, Հայոց ցեղասպանության թանգարան-ինստիտուտի նախկին տնօրեն Հայկ Դեմոյանը:

«Ժաննայի հովհարն ու ազգային ինքնության հովհարային անջատումներ։ 

Շատերն են անդրադառնում «թավշյա կրկեսի» արդյունքում իշխանությունն ուզուրպացրած ու Հայաստանի նկատմամբ նեոգաղութային քաղաքականության գործիքների վերածված իշխանավորների վտանգավորության աստիճանի հասնող անհաշվետու վարքուբարքի, խայտառակ կոռուպցիոն գործելաոճի, անպատժելիության գերագույն զգացումի և զանազան հանցանքների ու զանցանքների դիմաց պատժվելուց ապահովագրված կեցվածքին:

Սա նոր երևույթ չէ ու որպեսզի մեկնաբանությունները «բա նախկինների օրոք...» սկսողներին հակազդելու հնարավորություն չտրվի, հավաստիացնում եմ, որ 2018 թվականից առաջ էլ նույնն էր, բայց մի սկզբունքային տարբերություն, ամեն դեպքում, պարտավոր ենք արձանագրել: 2018-ից հետո թերուս, ինքնահավան ու ինքնամեծար կեղծ ինտելեկտուալների մի դաստա որոշել է «նոր ազգ» կերտել՝ պարտադրելով իր տեսլականն ու արժեհամակարգը նոր սերնդին, այն իրականացնելու հիմնական միջոց տեսնելով դպրոցական դասագրքերը, հատկապես հումանիտար առարկաների գծով: Թարմ օրինակների ականատես եղանք բոլորովին վերջերս:

Նոր աշխարհայացք ու արժեհամակարգ պարտադրելու քաղաքականությունն իրականացվում է բացահայտ կերպով, արհեստական ու շինծու օրակարգեր առաջ բերելով ու հետևողականորեն դրանք գովազդելով: Զավեշտալին այն է, որ իրականացնողները մի հատ էլ զարմանում են, որ իրենց տխմարություններն առաջ տանելու ճանապարհին հանդիպում են խոչընդոտների ու դիմադրության:

Ակադեմիական քաղաքի տեսիլքն ու ֆեստիվառների բոցը պարզ ցնդաբանություններ ու կեղծ մշակութային անճաշակություններ չեն միայն: Դրանք մեծ գումարներ թալանելու ու լուրջ կապիտալ կուտակելու մեծ ծրագրերի լոկ մի մասն են, որոնց կողքին մի քանի միլիոն դոլար արժեցող նախագծերն ու ծրագրերը չեն երևալու: ԿԳՄՍ նախարարը արդեն հանգիստ կարող է հաշիվ չտալ չկայացած համերգի ու պետբյուջեից մսխված հսկայական գումարների համար: Ահռելի միջոցներ է փոշիացվում նաև խոտան ու խայտառակ որակով տասնյակ հազարավոր տպաքանակով տպագրվող դասագրքերի դեպքում: Եվ քանի որ չկա վերահսկողություն ու արդարադատության համակարգ կոչվածը, Ժաննա Անդրեասյանն ու մյուսները դեռ շարունակելու են վայելել անպատժելիության «քաղցր» միջավայրը:

Թավշյա նեոգաղութացումն ուղեկցվում է նեոբոլշևիզմով և տկարամիտ ռևիզիոնիզմով: Ծխախոտի բիչոկներ հավաքող վարչապետը ներկայանում է որպես մեծ գաղափարախոս և ինտելեկտուալ, որի մտագալարումներն ու կեղծ պատումները ոչ միայն լռությամբ են ընդունում մեր «փառապանծ» ակադեմիականները, այլև իրենք են մասնակցում այդ մշակումներին՝ թավիշի գիտական հիմնավորումն ապացուցող հոդվածներով:

Ես Ձեզ վստահեցնում եմ, որ Ժաննայի, Նիկոլի ու մյուսների համար Ծիծեռնակաբերդում տեղի ունեցածն արտառոց ու ցնցող իրադարձություն չի համարվել, քանի որ իրենց մտայնություններում ու արժեհամակարգում Ծիծեռնակաբերդը վանելու ու դուրս մղելու հասկացություն է, որը խոչնդոտում ու խանգարում է "նոր մարդ" կերտելու իրենց բոլշևիկյան նախագծերին: Այն խանգարելու է ինքնությունից զտված ու անդեմ էակների վերածված սպասարկու զանգված ստանալու լաբորատոր փորձերին ու փորձարկումներին, որոնք առատորեն հովանավորվում են դրսի պատվիրատուների կողմից:

Դիմադրությունն այս ավանակային ծրագրերին ու սրանց սպասարկող փալանչիներին պետք է լինի կոշտ ու անզիջում:

Ժաննա Անդրեասյանը պետք է հեռանա ու կոռուպցիոն բազմաթիվ դեպքերի դրվագներով առերեսվի պատժվելու անխուսափելիությանը:

Ցինիզմին էլ վերջ ու սահման կա:

Դիմում եմ հայ ծնողին, հայ ուսուցչին, հայ մարդուն

Մի´ վերածվեք փորձարկումների ենթակա անլեզու ու անինքնասեր օրգանիզմների, տվե´ք ձեր բաժին հակահարվածը:

Շուտով կհայտարարենք Ժաննա Անդրեասյանի հրաժարականը պահանջելու բողոքի ակցիայի մասին, զուգահեռ տանելով նաև ԿԳՄՍ նախարարին քրեական պատասխանատվության ենթարկելու գործընթացը՝ խոտան դասագրքեր կրթական համակարգ ներմուծելու, Ծիծեռնակաբերդը պղծելու, կոռուպցիա հովանավորելու և պետական միջոցները վատնելու դրվագներով:

Մաքրման ու ինքնաառողջացման գործը մենք պետք է անենք ու ոչ մեկը մեզ չի օգնելու այդ գործում, քանզի բոլորին ձեռնտու է անողնաշար, ինքնությունից զուրկ, հեշտ կառավարվող ու պարտվողական տրամադրություններ դավանող հասարակությունից ցանկալի զիջումներ կորզելը»,-գրել է նա:

Աշխարհի 2026թ․ առաջնության եվրոպական գոտու որակավորման փուլի մեկնարկային տուրում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ուժերը կչափի Պորտուգալիայի ընտրանու հետ։ 

Խաղից առաջ կայացած մամուլի ասուլիսի ժամանակ Պորտուգալիայի ընտրանու գլխավոր մարզիչ Ռոբերտո Մարտինեսը կիսվել է իր սպասումներով։

«Նախ և առաջ ցավակցում եմ «Գլորիա» վերելակի ողբերգության զոհերի ընտանիքներին և ընկերներին: Մեր թիմը չեմպիոն է, մենք հաղթել ենք Ազգերի լիգայում, և Դիոգու Ժոտան այդ հաջողության մի մասն էր: Նրա երազանքը կրում է պատասխանատվություն: Դժվար է առանց նրա, բայց հավատում եմ, որ նա միշտ մեզ հետ է։ Յուրաքանչյուր մարդ սուգը տանում է յուրովի: Դիոգու Ժոտան մեր հաղթանակի մի մասն էր և ձևավորում էր մեր հանդերձարանի մթնոլորտը: Նա մեր ուժն էր, մեր մոտիվացիայի աղբյուրը, քանի որ ձգտում էր հաղթել աշխարհի առաջնությունում: Դժվար էր նրա կորստից հետո խաղադաշտ դուրս գալը։ Դա շատ հուզիչ հանդիպում էր՝ դժվար, բայց միաժամանակ գեղեցիկ: Մենք պարտավոր ենք պայքարել պորտուգալացի ժողովրդի, ինչպես նաև Դիոգուի համար, և դա առանձնահատուկ է:

Հայաստանի և Պորտուգալիայի միջև խաղերը միշտ եղել են մրցակցային: Հայաստանն ունի նոր մարզիչ, նոր մոտեցումներ և տարբեր մարտավարություններ: Մենք գիտակցում ենք նրանց որակը: Ամենակարևորն այն է, որ կարողանանք չեզոքացնել Հայաստանի՝ տանը խաղալու առավելությունը: Դա կանենք մեր ինտենսիվ խաղով՝ գնդակը կորցնելուց հետո, և մեր որակով: Սա կլինի առանցքային գործոն։

Ես խոսում եմ ոչ թե մեկնարկային կազմի, այլ խաղացողների մասին: Այսօր կարևոր մարզում է անցկացվում: Ես գոհ եմ մեր պատրաստվածությունից: Խաղից 48 ժամ առաջ այստեղ ժամանելը կարևոր էր: Խաղացողները լի են էներգիայով և կենտրոնացած են: Մենք երկու խաղ ունենք 72 ժամվա ընթացքում: Պետք է խելամտորեն կառավարենք մեկնարկային կազմը՝ Հայաստանի և Հունգարիայի դեմ խաղերի համար: Հնարավոր են փոփոխություններ: Նունու Տավարեշը միակ խաղացողն է, որը մեկ մարզումով կարող է հարմարվել մեր խաղաոճին: Նա մեր 27-րդ խաղացողն է Ազգերի լիգայում: Խաղացողների բազմակողմանիությունը կարևոր է: Նունու Մենդեշը և Ժոաու Նևեշը կարող են խաղալ տարբեր դիրքերում: Օրինակ՝ Ժոաու Նևեշը առանց գնդակի կարող է հանդես գալ որպես պաշտպան: Սա կարևոր կլինի վաղվա խաղում:

Միշտ պետք է ձգտել հաղթանակի: Պետք է ամեն խաղում ցուցադրել ամենաբարձր մակարդակը: Այդպես արեցինք Եվրոպայի առաջնության ընտրական փուլում, որտեղ հաղթեցինք բոլոր խաղերը, ինչպես նաև Ազգերի լիգայում: Կարևոր է մնալ կենտրոնացած և պահպանել կարգապահությունը: Մեր ողջ ճանապարհը կգնահատենք վերջում։

Սա անսովոր ընտրական փուլ է՝ ընդամենը վեց խաղով, որտեղ սխալի իրավունք չկա: Ուշադրությունը կենտրոնացված է ողջ փուլի վրա, ոչ միայն Հայաստանի կամ Հունգարիայի դեմ խաղերի: Հոկտեմբերին ցանկանում ենք ստանալ մեր երկրպագուների աջակցությունը, իսկ դրա համար պետք է լիովին կենտրոնանանք»,- նշել է Մարտինեսը։

— Որքանո՞վ է կարևոր սկսել ընտրական փուլը Հայաստանի դեմ խաղով՝ հաշվի առնելով, որ սա Պորտուգալիայի համար ամենահեռավոր ուղևորությունն է այս փուլում:

— Ասելու շատ բան չկա: Մենք պետք է հարմարվենք: Մենք մեծ հարգանք ունենք Հայաստանի հանդեպ, և սա մեծ փորձություն է մեզ համար: Թիմը ժամանեց խաղից երկու օր առաջ՝ այլ ծրագիր կազմելով, որպեսզի երկու օր շուտ ժամանի Հայաստան: Թիմը շատ կենտրոնացած է: Մենք խորապես հարգում ենք Հայաստանին: Պետք է հիշել, որ վերջին երեք խաղերից երկուսում այստեղ ոչ-ոքի ենք խաղացել, ինչը ընդգծում է այն դժվարությունները, որոնք մեզ սպասվում են վաղվա խաղում։

— Ի՞նչ մարզավիճակում են Պորտուգալիայի հավաքականի խաղացողները: Նրանցից շատերը մասնակցել են Ազգերի լիգային, Աշխարհի ակումբային առաջնությանը, և շատ քիչ արձակուրդ են ունեցել…

— Այն ամենը, ինչ նշեցիք, միջազգային ֆուտբոլի մարտահրավերներն են: Ես սկսել եմ 2016-ին՝ մոտ տասը տարի առաջ, և սա միջազգային ֆուտբոլի անխուսափելի կողմերից մեկն է: Ով հանդես է գալիս այս մակարդակում, պետք է պատրաստ լինի նման իրավիճակների: Թիմը համապատասխանում է այդ պահանջներին, խաղացողները հաղթահարում են բոլոր դժվարությունները և միջազգային ֆուտբոլի օրացույցի սահմանափակումները։

— Կրիշտիանու Ռոնալդուն որևէ տեղեկությո՞ւն է փոխանցել Հայաստանում անցկացրած վերջին խաղերի մասին:

— Ոչ: Կան բազմաթիվ տարբեր ասպեկտներ, սկսած նոր մարզիչից: Սպասվում է հիանալի մթնոլորտ՝ կրքոտ և հուզական երկրպագուներով: Նոր մարզիչ ունենալը նույնպես որոշակի սպասելիքներ է առաջացնում: Վաղը կարող ենք ակնկալել որոշ մարտավարական նորամուծություններ։

— Արդյո՞ք այն, որ Հայաստանը նոր մարզիչ ունի, որևէ տարբերություն մտցրեց այս խաղի նախապատրաստության մեջ:

— Ես ակնկալում եմ նույնը, ինչ ցույց են տվել մյուս հավաքականները Պորտուգալիայի դեմ խաղերում: Սակայն, երբ մարզիչ է փոխվում, զգացմունքային կողմը մեծ նշանակություն է ստանում: Մեր հիմնական մարտահրավերը հիմա Ազգերի լիգայում հաղթանակից հետո մտածելակերպը փոխելն է: Հենց դա է, ինչ մենք ցանկանում ենք անել վաղը։

Կան բազմաթիվ ասպեկտներ, որոնք մնում են անփոփոխ՝ անկախ նրանից՝ մարզիչը աշխատում է ակումբում, թե հավաքականում, քանի որ դրանք բխում են մարզչի մոտեցումից: Ես ճանաչում եմ նրան դեռ այն ժամանակներից, երբ նա աշխատում էր իր վերջին ակումբում, և հենց այդ փորձի հիման վրա եմ վերլուծել վաղվա խաղը: Կարևոր գործոն է նաև այն հաջողությունը, որ նա ունեցել է այդ ակումբում: Նա խորապես ճանաչում է իր խաղացողներին այս խաղի համար:

Երկու հավաքականներն էլ ունեցել են հավասար ժամանակ պատրաստվելու համար, ուստի սա առավելություն կամ թերություն չէ: Հայաստանի հավաքականը խաղադաշտում մեծ մրցունակություն է ցուցաբերելու, և մենք պետք է համապատասխանենք այդ մակարդակին: Մենք պետք է արտահայտենք մեր անհատականությունը Հայաստանի հավաքականի դեմ, որն վաղը կունենա իր երկրպագուների լիակատար աջակցությունը։

— Պորտուգալիան համարվում է ֆավորիտ, սակայն խաղը կսկսվի 0:0 հաշվից, և երկու թիմերն էլ պետք է խաղադաշտում ապացուցեն իրենց առավելությունը: Ի՞նչ արդյունք կլինի ընդունելի Պորտուգալիայի համար, և ի՞նչ արդյունք Ձեզ կզարմացնի 90 րոպեից հետո:

— Արդյունքների մասին խոսելը երկրպագուների համար է: Ես կենտրոնացած եմ բացառապես թիմի խաղի վրա: Հենց խաղն է որոշում վերջնական արդյունքը: Բնականաբար, ես կընդունեմ վաղվա խաղի ցանկացած արդյունք:

Հիշեցնենք, որ Հայաստան-Պորտուգալիա հանդիպումը կկայանա սեպտեմբերի 6-ին։

Միլիոնավոր մարդիկ մահացել են ԱՄՆ-ի և եվրոպական երկրների կողմից Հարավային Աֆրիկայի երկրների նկատմամբ կիրառված պատժամիջոցների պատճառով։ Այս եզրակացությանն են հանգել հեղինակներ Ջեյսոն Հիքելը, Դիլան Սալիվանը և Օմեր Թայաբը Al Jazeera-ի համար գրված հոդվածում։ 

Հոդվածում նշվում է, որ Միացյալ Նահանգներն ու Եվրոպան պատժամիջոցները վաղուց օգտագործում են որպես կառավարությունների վրա ճնշում գործադրելու գործիք։

Հեղինակները շեշտել են, որ 2025 թվականին The Lancet Global Health ամսագրում հրապարակվել է մի ուսումնասիրություն, որը հաշվարկել է 1970-2021 թվականների ընթացքում միջազգային պատժամիջոցների արդյունքում մահացած մարդկանց ընդհանուր թիվը։ 

«Արդյունքները ապշեցուցիչ են։ Հեղինակները պարզել են, որ 1970 թվականից ի վեր ԱՄՆ-ի և ԵՄ-ի կողմից կիրառված միակողմանի պատժամիջոցները կապված են 38 միլիոն մահվան հետ»,- նշվում է Al Jazeera-ում հրապարակված ուսումնասիրությունում: Ինչպես հաղորդում են հեղինակները, ԱՄՆ-ի և եվրոպական երկրների կողմից սահմանված սահմանափակումները մի քանի անգամ ավելի շատ մարդկանց են սպանում, քան պատերազմները։

ԱՄՆ նախկին նախագահ Ջո Բայդենը վերջերս վիրահատության է ենթարկվել՝ մաշկից քաղցկեղի բջիջները հեռացնելու համար, հաղորդում է NBC News-ը՝ հղում անելով նրա մամուլի քարտուղարին։

Բայդենի գրասենյակը հայտնել է, որ վիրահատությունից հետո նրա վերականգնումը լավ է ընթանում: Չի նշվում, թե երբ է նախկին նախագահը ենթարկվել այդ վիրահատությանը։

Բայդենը նմանատիպ վիրահատության է ենթարկվել իր նախագահության տարիներին՝ 2023 թվականի փետրվարին։

2022 թվականի հուլիսին նա ելույթ է ունեցել կլիմայի փոփոխության և աղտոտվածության վերաբերյալ: Նա ասել է, որ Դելավերի Քլեյմոնտ քաղաքում, որտեղ ինքը մեծացել է, կան բազմաթիվ նավթավերամշակման գործարաններ: Այնուհետև Բայդենը պարզաբանել է, որ ինքը և իր հետ ապրող մյուս մարդիկ քաղցկեղ են ունեցել:

Ռուսաստանի նախագահ Վլադիմիր Պուտինը պաշտոնից ազատել է Թուրքիայում Ռուսաստանի դեսպան Ալեքսեյ Երոխովին։ Այս մասին հայտնել է Կրեմլի մամուլի ծառայությունը։ 

«Ալեքսեյ Վլադիմիրովիչ Երխովին ազատել Թուրքիայի Հանրապետությունում Ռուսաստանի Դաշնության արտակարգ և լիազոր դեսպանի պաշտոնից»,- ասվում է փաստաթղթում։

Երխովը Թուրքիայում դեսպանի պաշտոնը զբաղեցնում է 2017 թվականի հունիսից։

ԱՍՀ նախարար Արսեն Թորոսյանը ֆեյսբուքյան իր էջում գրառում է կատարել՝ անդրադառնալով մամուլում տարածվող լուրերին:

«Որոշ լրատվամիջոցներ երեկ և այսօր փորձել են «դեղին մամուլի» գործելաոճին հավատարիմ մնալով մտացածին սենսացիաներ ստեղծել, սա դրանցից մեկն է։ «Իրավունք» օրաթերթում հրապարակված տեղեկությունները, թե նախարարությունում իբր «բունտ» է հասունանում, նուրբ ասած իրականությանը չեն համապատասխանում, իսկ ավելի ճիշտ՝ պարզապես սուտ են։

Նախարարությունում որևէ «գաղջ մթնոլորտի» մասին խոսք անգամ լինել չի կարող։ Աշխատանքային միջավայրը կառուցված է փոխադարձ հարգանքի և մասնագիտական պահանջների վրա։ Ովքեր սպասում էին սենսացիոն սկանդալների, հիասթափվելու են։ 

Ինչպես ավելի վաղ նշել եմ` անկանոն շարժումների կողմնակիցը չեմ, բայց և չեմ նախընտրում որոշումները և քայլերը անհարկի հետաձգելու գործելաոճը: Նախարարության առաջիկա անելիքները ամրագրված են ՀՀ Կառավարության հնգամյա ծրագրով, և մենք հետևողականորեն շարունակելու ենք իրականացնել այն:

Նախարարությունում իմ միակ «խիստ պահանջը» եղել և մնում է քաղաքացիներին մատուցվող ծառայությունների որակի շարունակական բարձրացումը։

Լրատվամիջոցներին կոչ եմ անում զբաղվել իրական տեղեկատվության տարածմամբ, այլ ոչ թե իրենց ընթերցողներին մոլորեցնել կեղծ «բունտերով»։

Հ.Գ. Ավելին ասեմ, դեռ ընդհանուր ժողով էլ չեմ արել. ստի ոտքը իրոք շատ կարճ է»,- գրել է նա: