Սպիտակ տան բանագնաց Սթիվ Ուիթքոֆը շաբաթ օրը Իրանին միջուկային գործարքի վերաբերյալ «մանրամասն և ընդունելի առաջարկ» է ուղարկել, հայտնել է Սպիտակ տան մամուլի քարտուղար Քերոլայն Լիվիթը։

Ինչպես գրում է Axios պարբերականը՝ հղում անելով ամերիկացի պաշտոնյաներին, ԱՄՆ-ի գրավոր առաջարկը խնդիրը լուծելու փորձ է, որի պատճառով բանակցությունները փակուղի են մտել. Իրանի՝ սեփական տարածքում ուրանի հարստացումը շարունակելու պահանջը։

Գաղափարներից մեկը, որն առաջարկել է Օմանը և ընդունել ԱՄՆ-ն, նախատեսում է տարածաշրջանային կոնսորցիումի ստեղծում, որը ուրան կհարստացնի քաղաքացիական միջուկային նպատակներով՝ Ատոմային էներգիայի միջազգային գործակալության (ՄԱԳԱՏԷ) և ԱՄՆ-ի վերահսկողության ներքո, ըստ ամերիկացի պաշտոնյայի և հարցին տեղյակ աղբյուրի,։

Ինչպես նշում է լրատվամիջոցը, գլխավոր հարցերից մեկն այն է, թե որտեղ են տեղակայվելու ուրանի հարստացման կոնսորցիումի ձեռնարկությունները։ ԱՄՆ-ն ցանկանում է, որ դրանք լինեն Իրանի սահմաններից դուրս, ասել է իրավիճակին տեղյակ աղբյուրը։ 

Մյուս գաղափարն այն է, որ ԱՄՆ-ն ճանաչի ուրանի հարստացման Իրանի իրավունքը, մինչդեռ Իրանը լիովին կդադարեցնի ուրանի հարստացումը։
Իրանը բազմիցս հայտարարել է, որ չի ստորագրի որևէ գործարք, որը թույլ չի տալիս ուրանի հարստացում, մինչդեռ ամերիկացի պաշտոնյաները հրապարակավ հայտարարում են Իրանին այդ հնարավորությունից զրկելու իրենց պատրաստակամության մասին։ Գործարք կնքելու համար պետք է ինչ-որ բան զիջել։

ՄԱԳԱՏԷ-ի՝ շաբաթ օրը հրապարակված զեկույցում ասվում է, որ Իրանը կուտակել է ավելի քան 400 կգ մինչև 60% հարստացված ուրան։ Մինչև 90% հարստացման դեպքում այդ քանակությունը բավարար է 10 միջուկային ռումբ ստեղծելու համար, գրում է լրատվամիջոցը։

«ՄԱԳԱՏԷ-ի երկրորդ զեկույցը, որը հրապարակվել է շաբաթ օրը, հստակ ցույց է տալիս, որ Իրանը բավարար պատասխաններ չի տվել ՄԱԳԱՏԷ-ի հետաքննություններին՝ երկրում գտնվող մի քանի չհայտարարագրված միջուկային օբյեկտների վերաբերյալ։
Թարմացված առաջարկը Հռոմում Իրանի և ԱՄՆ-ի միջև բանակցությունների հինգերորդ փուլի արդյունքն է, որը տեղի է ունեցել մեկ շաբաթ առաջ, ասում են աղբյուրները», հաղորդում է Axios-ը։