ԱՄՆ նախագահ Դոնալդ Թրամփը հայտարարել է, որ ՆԱՏՕ-ի դաշնակիցների շրջանում իրեն հաճախ կատակով «Եվրոպայի նախագահ» են անվանում:

«Նրանք ինձ Եվրոպայի նախագահ են անվանում, դա մեծ պատիվ է։ Ես սիրում եմ Եվրոպան, ինձ դուր են գալիս այդ մարդիկ։ Նրանք լավ մարդիկ են, հիանալի առաջնորդներ», - ասել է Թրամփը՝ Սպիտակ տանը մի շարք գործադիր հրամանագրեր ստորագրելիս։

Ամերիկացի առաջնորդը նշել է, որ դաշնակիցների աչքում Միացյալ Նահանգներն «այժմ աշխարհի ամենահարգված երկիրն է»։ Նա հիշեցրել է նաև, որ ինքը համառորեն ձգտում է ավելացնել ՆԱՏՕ-ի երկրների պաշտպանական ծախսերը։ Ըստ Հաագայում դաշինքի հունիսյան գագաթնաժողովի հաղորդագրության՝ դաշնակիցները համաձայնել են ռազմական ծախսերը հասցնել երկրի Համախառն ներքին արդյունքի 5%-ին։

Անդրադառնալով անցյալ շաբաթ Սպիտակ տանն անցկացված հանդիպման թեմային, որին մասնակցել են Մեծ Բրիտանիայի, Գերմանիայի, Իտալիայի, Լեհաստանի, Ֆինլանդիայի, Ֆրանսիայի առաջնորդները, Եվրահանձնաժողովի ղեկավարը, ՆԱՏՕ-ի գլխավոր քարտուղարը և Ուկրաինայի նախագահ Վլադիմիր Զելենսկին, Թրամփը շեշտել է. «Երբեք չի եղել ժամանակ, որ այստեղ ներկայացված լինի յոթից ավելի երկիր։ Իրականում՝ 28։ Իրականում այդ օրը այստեղ ներկայացված է եղել 38-ից 35 երկիր»։