Լեհաստանի վարչապետ Դոնալդ Տուսկը հուլիսի 31-ին հայտարարել է, որ իր կառավարությունը քննարկում է Շենգենյան գոտու առանց վիզայի ռեժիմի ժամանակավոր դադարեցման հնարավորությունը մի շարք երկրների, այդ թվում՝ Վրաստանի և Հայաստանի քաղաքացիների համար՝ կապված օտարերկրյա հետախուզությունների գործունեության վերաբերյալ մտահոգությունների հետ։ Տուսկը պարզաբանել է, որ առաջարկվող սահմանափակումները «թիրախային մեխանիզմ» են՝ հրկիզումների հետաքննությունից հետո, որոնք, ենթադրաբար, իրականացվել են Կոլումբիայի քաղաքացու կողմից՝ ռուսական ուժերի հանձնարարությամբ։ Սահմանափակումները կարող են տարածվել նաև Վենեսուելայի և Կոլումբիայի քաղաքացիների վրա, հայտնում է Caucasus Watch-ը։։

Տուսկը նշել է, որ նախկին խորհրդային հանրապետությունների քաղաքացիները «հատկապես խոցելի են հավաքագրման համար», ինչը սպառնալիք է ստեղծում ազգային անվտանգության համար։ Նա առանձին կերպով անդրադարձել է Վրաստանի քաղաքացիների հետ կապված «քրեական խնդրին»՝ ընդգծելով, որ «դա ոչ մի դեպքում ազգային հատկանիշ չէ», այլ ավելի շուտ «կազմակերպված հանցավոր խմբերի» վերաբերյալ հարց։ Տուսկը հաստատել է, որ Լեհաստանի իշխանությունները «արդեն արտաքսումներ են իրականացրել» և զգուշացրել, որ «չեն վարանի» ու անհրաժեշտության դեպքում կշարունակեն նման գործողությունները։