Թուրքմենբաշի քաղաքի Ավազա ազգային զբոսաշրջային գոտում օգոստոսի 5-ին բացվում է ՄԱԿ-ի՝ դեպի ծով ելք չունեցող զարգացող երկրների երրորդ խորհրդաժողովը: Դրան մասնակցում են պատվիրակություններ ավելի քան 30 երկրից, այդ թվում՝ Հայաստանից: Այս մասին հաղորդում է ՏԱՍՍ գործակալությունը։

Խորհրդաժողովի լիագումար նիստում նախատեսվում են պետությունների և կառավարությունների ղեկավարների ելույթներ: Խորհրդաժողովը կբացի ՄԱԿ-ի գլխավոր քարտուղար Անտոնիու Գուտերեշը, որից հետո ելույթ կունենա Թուրքմենստանի նախագահ Սերդար Բերդիմուհամեդովը:

Միջոցառմանը մասնակցելու համար Թուրքմենբաշի են ժամանել Հայաստանի, Ուզբեկստանի, Սան Տոմե և Պրինսիպիի Դեմոկրատական Հանրապետության նախագահներ Վահագն Խաչատուրյանը, Շավքաթ Միրզիյոևը և Կառլուշ Մանուել Վիլա Նովան, ինչպես նաև Էսվատինիի թագավոր Մսվատի III-ը: Նախատեսվում է նաև Ղազախստանի նախագահ Կասիմ-Ժոմարտ Տոկաևի ժամանումը: Խորհրդաժողովին ներկա կլինեն նաև Իրանի առաջին փոխնախագահը և ՌԴ փոխվարչապետը։ 

Խորհրդաժողովում քննարկվող թեմաներն են դեպի ծով ելք չունեցող զարգացող երկրների համար առևտրային ընթացակարգերի պարզեցումը, կառուցվածքային բարեփոխումները, դիվերսիֆիկացիան և նորարարությունը, կլիմայի փոփոխությանը և բնական աղետներին հարմարվողականության բարձրացումը, ենթակառուցվածքների ստեղծումը և անարգել տարանցման համակարգերի խթանումը, գլոբալ գործընկերության ամրապնդումը և այլ թեմաներ: Միջոցառումը կտևի մինչև օգոստոսի 8-ը։ 

Աշխարհում կա 32 երկիր, որոնք ելք չունեն դեպի ծով: Նրանց ընդհանուր բնակչությունը կազմում է ավելի քան 500 միլիոն մարդ։

ՄԱԿ-ի՝ դեպի ծով ելք չունեցող զարգացող երկրների առաջին խորհրդաժողովը տեղի է ունեցել Ալմաթիում (Ղազախստան) 2003 թ. օգոստոսի 28-29-ը, երկրորդը՝ Վիեննայում (Ավստրիա) 2014 թ. նոյեմբերի 3-5-ը։