ԱՄՆ նախագահ Դոնալդ Թրամփի կողմից աշխարհի մի շարք երկրների նկատմամբ սահմանված նոր մաքսատուրքերն ուժի մեջ կմտնեն օգոստոսի 7-ին: «Արմենպրես»-ի փոխանցմամբ՝ այս մասին հաղորդում է CNN-ը։

Ըստ հրապարակման՝ նոր մաքսատուրքերի ռեժիմն ուժի մեջ չի մտնի ուրբաթ օրը՝ օգոստոսի 1-ին, ինչպես սպասվում էր։ Դրա փոխարեն՝ մաքսատուրքերն ուժի մեջ կմտնեն օգոստոսի 7-ին, որպեսզի մաքսատանը և սահմանային ծառայությանը բավարար ժամանակ տրվի նոր մաքսատուրքերը գանձելու նպատակով անհրաժեշտ փոփոխություններ կատարելու համար։

Հուլիսի 31-ի երեկոյան Թրամփը հրամանագիր է ստորագրել 68 երկրի և ԵՄ-ի համար նոր մաքսատուրքեր սահմանելու մասին։ 

Ըստ դրա, օրինակ, Շվեյցարիայից ներմուծումն այժմ կհարկվի ավելի բարձր՝ 39% դրույքաչափով՝ 31%-ի փոխարեն, որն ԱՄՆ նախագահը խոստացել էր սահմանել ապրիլին։

Միևնույն ժամանակ, Լիխտենշտայնի համար դրույքաչափը 37%-ից նվազեցվել է մինչև 15%։

Թուրքիայից կգանձվի 15% մաքսատուրք:

Հուլիսի 31-ին հրապարակված հրամանագրում Թրամփը պաշտոնապես հաստատել է համաձայնագրերն այնպիսի առևտրային գործընկերների հետ, ինչպիսիք են Եվրամիությունը, Ճապոնիան, Հարավային Կորեան, Միացյալ Թագավորությունը, Ֆիլիպինները։

Հրամանագրում չնշված երկրներից կգանձվի 10%-ի չափով բազային մաքսատուրք։

Ապրիլի 9-ին Թրամփը հայտարարել էր, որ որոշում է ընդունել 90 օրով կասեցնել ներմուծման մաքսատուրքերի բարձրացման կիրառումն ավելի քան 75 երկրի նկատմամբ, որոնք երկխոսություն էին խնդրել այս հարցի շուրջ, վերջնաժամկետ սահմանելով հուլիսի 9, ապա այն երկարաձգել էր մինչև օգոստոսի 1-ը։