Դիմակավորված ԱԱԾ աշխատակիցների ուղեկցությամբ իր տնից դուրս եկավ Բագրատ Սրբազանը։

Տան բակում հավաքվածները սկսեցին վանկարկել՝ «սրբազան»։

Ոստիկանները շղթա էին կազմել եւ թույլ չէին տալիս՝ որեւէ մեկը մոտենա Բագրատ Սրբազանին, այդ թվում ԱԺ պատգամավոր Արթուր Սարգսյանին։

Իրավիճակը մի պահ լարվեց։ «Ի՞նչ հիմքով չես թողնում, օրենքն ասա։ Նիկոլն ասել ա՝ ինչ ասեմ, անելու եք, դրա համար անում ե՞ք։ Հետո ի՞նչ պատասխան եք տալու ձեր երեխեքին»,–ասաց պատգամավորը։ Բագրատ Սրբազանն էլ ասաց. «Արթուր, հանգստացի։ Ոչ մի բան, ոչ մի կալանք մեզ չի կարող մեր ճանապարհից դուրս բերել։ Չարիք, լավ լսիր։ Ի՞նչ էլ սարքելու լինես, ինչ էլ ուզում ես անես, քեզ քիչ ժամանակ է մնացել։ Դիմացի կգանք»։

Դա ասելուց հետո նա նստեց մեքենան եւ նրան տարան։

Դրանից հետո վիճակը լարվեց, մի փոքր քաշշոց սկսվեց։

Ավելի վաղ հայտնել էինք, որ այսօր վաղ առավոտյան իրավապահները խուզարկություններ են սկսել Սրբազան Պայքարի աջակիցների տներում։ Նրանք գործողություն են իրականացնում նաև Բագրատ արքեպիսկոպոս Գալստանյանի բնակավայրում։

Բացի այդ, ՀՅԴ–ից հայտնում են, որ այս պահին խուզարկություններ են իրականացվում ՀՅԴ Հայաստանի Գերագույն մարմնի անդամ Իգոր Սարգսյանի, ՀՅԴ Աբովյանի կոմիտեի անդամ Վարդան Ավագյանի, Հրազդանի կոմիտեի անդամ Արտաշես Հունանյանի և Նոյեմբերյանի կոմիտեի անդամ Վարազդատ Ամիրաղյանի բնակարաններում։

Քննչական կոմիտեն էլ հայտարարել է, որ ««Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ»: