Ինչպես հայտնում է Sputnik Մոլդովան, երթի մասնակիցները կաթվածահար են արել երթևեկությունը Քիշնևի կենտրոնում, քանի որ միջոցառումը համաձայնեցված չի եղել քաղաքապետարանի հետ, և ոստիկանությունը համապատասխան միջոցներ չի ձեռնարկել տրանսպորտային հոսքն այլ փողոցներով ուղղորդելու համար: Այնուամենայնիվ, ոստիկանության մեծ ուժեր են ուղարկվել մասնակիցներին պաշտպանելու համար՝ կարաբիներներից մինչև ամբողջովին հանդերձավորված հատուկ նշանակության ուժեր։
Միևնույն ժամանակ, ուղղափառ հավատացյալների շարասյունը՝ սրբապատկերներով և խաչվառներով, Մոլդովայի Ուղղափառ Եկեղեցու գլխավոր վանքից՝ Քրիստոսի ծննդյան տաճարից շարժվել է դեպի երթի անցկացման վայր։ Ոստիկանության պատնեշը նրանց կանգնեցրել է այն փողոցի հետ խաչմերուկում, որով անցնում էին երթի մասնակիցները։
Հավատացյալները սկսել են ոստիկանների ուղղությամբ վանկարկել «Ամոթ»։ Ինչ-որ պահի ԼԳԲՏ հակառակորդները փորձել են ճեղքել ոստիկանական պատնեշները։ Սկսվել են կոպիտ ձերբակալություններ։ Մոլդովական ոստիկանությունը ֆիզիկական բիրտ ուժ է կիրառել քահանայի նկատմամբ՝ բառացիորեն նրան գետնին շպրտելով։
Ուժայինները նաև կոպիտ կերպով ձերբակալել են փոքրիկ երեխային գրկած տղամարդուն. տղային խլել են ծնողից, տղամարդն ընկել է ասֆալտին, ինչից հետո նրան հրելով մտցրել են ոստիկանական մեքենա:
Քիշնևում ԼԳԲՏ քարոզչության դեմ ևս մեկ հակակառավարական ցույց են անցկացրել «Հաղթանակ» դաշինքի ակտիվիստները: Ոստիկանությունը փակել է նաև այդ երթի ճանապարհը։
Ռուս Ուղղափառ եկեղեցին խստիվ դատապարտել է մոլդովական ոստիկանությանը, որը ծեծել է Մոլդովայի Ուղղափառ Եկեղեցու հոգևորականին: Մոլդովայի ուղղափառ եկեղեցին 2022 թվականից կոչ է անում արգելել ոչ ավանդական համայնքի փառատոններն ու երթերը։
