Չենք կարող թույլ տալ, որ Իրանը ձեռք բերի միջուկային զենք, որը սպառնալիք կլինի Իսրայելի և ամբողջ աշխարհի համար. այս մասին հայտարարել է Իսրայելի Պաշտպանության բանակի (ՑԱՀԱԼ) մամուլի ծառայությունը: 

«Այսօր առավոտյան Իսրայելի Պաշտպանության բանակը (ՑԱՀԱԼ) նախահարձակ և նպատակային հարվածներ է իրականացրել Իրանի միջուկային ծրագրի օբյեկտների վրա՝ կանխելու մոտ ապագայում միջուկային ռումբի ստեղծումը:

Մենք այլ ընտրություն չունենք։ Մենք գործում ենք ընդդեմ սպառնալիքի, որը անխուսափելի է և գոյաբանական վտանգ է ներկայացնում։ Չենք կարող թույլ տալ, որ Իրանի ռեժիմը ձեռք բերի միջուկային զենք, որը սպառնալիք կդառնա Իսրայելի և ամբողջ աշխարհի համար»,- ասվում է հայտարարության մեջ: 

Ըստ դրա՝ այս գործողությունն իրականացվել է հանուն այս հողի վրա իսրայելցիների ապրելու և ապագայի իրավունքի:

«Իսրայելի պետությունն ունի իրավունք և պարտականություն՝ պաշտպանելու իր ժողովրդին, և այն շարունակելու է դա անել», - նշվում է հայտարարությունում:

Հունիսի 13-ի գիշերը Իսրայելի Պաշտպանության բանակը հայտարարել է «Առյուծների ազգ» գործողության մեկնարկի մասին, որի նպատակն է վնաս հասցնել Իրանի միջուկային և հրթիռային ծրագրերին։ Դրանից հետո Իսլամական Հանրապետության մի շարք բնակավայրերում տեղակայված օբյեկտներ ենթարկվել են հարվածների։

The New York Times թերթի տվյալներով՝ իսրայելական ուժերը հարձակվել են Թեհրանի շրջակայքում գտնվող վեց ռազմաբազաների վրա։ Մինչդեռ Իրանի պետական IRNA գործակալությունը հայտնել է, որ Նաթանզ քաղաքում՝ ատոմային օբյեկտի տարածքում, տեղի է ունեցել պայթյուն։

Դեպքերի կապակցությամբ Իրանի Գերագույն առաջնորդ Ալի Խամենեին հանդես է եկել ուղերձով՝ դիմելով քաղաքացիներին։ Նա հայտարարել է, որ բանակին տվել է «գործելու ազատություն»՝ Իսրայելի հարվածներին պատասխանելու հարցում։