Ավելի վաղ հայտնել էինք, որ Սոբհանին ավարտում է դիվանագիտական առաքելությունը մեր երկրում։ Փաշինյանն ընդունել է նրան և շնորհակալություն է հայտնել սերտ համագործակցության համար։

Նա նշել է, որ վերջին տարիներին Հայաստանի և Իրանի միջև համագործակցությունը բոլոր ոլորտներում բարձրացել է նոր մակարդակի, և այդ գործում ներդրում է ունեցել Սոբհանին։

Միաժամանակ Փաշինյանը կարևորել է նախորդ ամիս ԻԻՀ նախագահ Մասուդ Փեզեշքիանի հայաստանյան այցը, ինչը նոր ազդակ է հաղորդել երկկողմ հարաբերությունների հետևողական զարգացմանն ու ընդլայնմանը։

Սոբհանին ևս շնորհակալություն է հայտնել վարչապետին ու ՀՀ կառավարությանը ակտիվ և արդյունավետ երկխոսության համար՝ ընդգծելով, որ գործունեության ընթացքում բոլոր ջանքերը ներդրել է երկկողմ կապերի ամրապնդման համար:

«Դեսպանը շնորհակալություն է հայտնել Բարեկամության շքանշանով պարգևատրելու համար և նշել, որ հետագայում ևս կանի ամեն ինչ՝ ՀՀ-ԻԻՀ հարաբերությունների խորացման ու ամրապնդման համար»,– ասված է հաղորդագրությունում: 

Մենք՝ որպես մուսուլմաններ, մեկ քայլով  չենք նահանջի Արևելյան Երուսաղեմի նկատմամբ մեր իրավունքներից: այս մասին հայտարարել է Թուրքիայի նախագահ Դեջեփ Թայիփ Էրդողանը։

«Մենք կկանգնենք նրանց դեմ, ովքեր ցանկանում են մեր տարածաշրջանը վերածել արյան ծովի»,- նշել է նա:

«Ոչ ոք չի կարող մեզ խանգարել աջակցել Գազայի ճնշված ժողովրդին, որը պայքարում է Իսրայելի դաժան հարձակումների տակ գոյատևելու համար։ 

Մենք երբեք թույլ չենք տա, որ Երուսաղեմի սուրբ քաղաքը պղծվի անարժան ձեռքերի կողմից։

Ես գիտեմ, որ նրանք, ովքեր կուռք են համարում Հիտլերին, երբեք չեն հաղթահարի իրենց զայրույթը»,- հավելել է Էրդողանը:

Չինաստանը և Միացյալ Նահանգները գտնվում են ԱՄՆ նախագահ Դոնալդ Թրամփի Պեկին կատարած պետական ​​այցի շուրջ բանակցությունների «վերջնական փուլում» և այդ բանակցությունների կարևոր մասը վերաբերում է ամերիկյան ապրանքների մեծածախ գնումներին, հաղորդում է South China Morning Post-ը։

Պարբերականի աղբյուրների տվյալներով՝ Թրամփը կարող է այցելել երկիր կամ Ասիա-խաղաղօվկիանոսյան տնտեսական համագործակցության գագաթնաժողովից առաջ, կամ դրանից հետո, որը տեղի կունենա Հարավային Կորեայում հոկտեմբերի 31-ից նոյեմբերի 1-ը։

Այս իրադարձությունը տեղի է ունեցել Իսպանիայում երկու կողմերի միջև առևտրային բանակցությունների չորրորդ փուլից հետո և ուրբաթ օրը Թրամփի և Չինաստանի նախագահ Սի Ծինփինի միջև կայանալիք հեռախոսազրույցից առաջ։

Թրամփը Մադրիդում կայացած բանակցությունները հաջող է գնահատել, քանի որ երկու կողմերն էլ շրջանակային համաձայնագիր են ձեռք բերել չինական հանրահայտ սոցիալական ցանցի՝ TikTok հավելվածի շուրջ։

Զեկույցում նշվում է, որ նրանք քննարկել են նաև կարևորագույն հանքանյութերն ու ֆենտանիլը, ի թիվս այլ հարցերի։

ԱՄՆ դոլարի փոխարժեքն այսօր՝ սեպտեմբերի 17-ին, կազմել է 382.94 դրամ՝ նախորդ օրվա համեմատ նվազել է 0.18 դրամով: Այդ մասին տեղեկանում ենք Կենտրոնական բանկի պաշտոնական կայքից։

Եվրոյի փոխարժեքը կազմել է 453.25 դրամ (աճել  է 0.90 դրամով), իսկ ռուսական ռուբլու ոխարժեքը կազմել է 4.62  դրամ (նվազել է 0.01 դրամով):

Հայաստանյան բանկերում դոլարը գնվում է 380-382 դրամով, վաճառվում է 384-385 դրամով: Եվրոն բանկերում գնվում է 445-451 դրամով, վաճառվում է 454.5–461 դրամով: 

Ռուբլին բանկերում գնվում է 4.49-4.59 դրամով, վաճառվում է 4.65-4.82 դրամով:

Փոխանակման կետերում իրավիճակը հետևյալն է. դոլարը գնվում է 381 դրամով, վաճառվում՝ 384 դրամով:

Եվրոն գնվում է 450 դրամով, վաճառվում է 455 դրամով:

Ռուբլին գնվում է 4.53 դրամով, վաճառվում է 4.63 դրամով:

Վրաստանը մինչև 2025 թվականի սեպտեմբերի 1-ը ամբողջությամբ մարել է իր արտաքին պարտքը Ռուսաստանի և Փարիզյան ակումբի վեց այլ երկիր-պարտատերերի նկատմամբ՝ Վրաստանի պարտքի մի մասի վերակառուցման մասին 2004 թվականին ձեռք բերված համաձայնագրի շրջանակներում, հաղորդում է «Ինտերֆաքս»-ը՝ հղում անելով երկրի ֆինանսների նախարարության տվյալներին։ 

Ռուսաստանից բացի, մարվել են նաև Ադրբեջանի, Թուրքիայի, Ղազախստանի, Հայաստանի, Իրանի և Նիդեռլանդների նկատմամբ պարտքերը։ Օգոստոսի 1-ի դրությամբ այս երկրների նկատմամբ չմարված ընդհանուր պարտքը կազմել է 7,32 միլիոն դոլար, իսկ Ռուսաստանինը՝ 4 միլիոն դոլար։

Վճարումները ներառել են մինչև 1999 թվականը ստացված 160 միլիոն դոլարի պարտքեր, 1999 թվականից մինչև 2004 թվականի մայիսը կուտակված պարտավորությունների տոկոսներ, ինչպես նաև ավելի վաղ հաստատված գրաֆիկի համաձայն՝ 2004-2006 թվականներին մարման ենթակա պարտքեր։ Վերակառուցումն իրականացվել է 2004 թվականի հունիսի 1-ից մինչև 2006 թվականի դեկտեմբերի 1-ը, մարման գրաֆիկը նախատեսում էր վճարումները կատարել 20 տարվա ընթացքում։ Վերակառուցման մասին համաձայնագիրը հետևել է 2004 թվականին Վրաստանին օգնության ծրագրին՝ Արժույթի միջազգային հիմնադրամի կողմից հաստատվելուց հետո։ 

Վճարումների ընդհանուր գումարը գերազանցել է 225 միլիոն դոլարը, նշվում է Ֆինանսների նախարարության նյութերում։

2025 թվականի սեպտեմբերի 1-ի դրությամբ Վրաստանի արտաքին պետական ​​պարտքը կազմել է 9.09 միլիարդ դոլար՝ տարեսկզբից աճելով 5.8%-ով: Երկրի արտաքին պետական ​​պարտքի արժութային կառուցվածքում գրեթե 70%-ը եվրոյով է:

Վրաստանում գտնվելու պայմանների խախտման նոր կանոնները ուժի մեջ կմտնեն 2025 թվականի հոկտեմբերի 1-ից, հաղորդում է Գրուզիա Օնլայնը։

Ընդունված օրենքների կայքում թարմացված տվյալների համաձայն՝ ներկայիս 180 լարիի (մինչև 3 ամիս) և 360 լարիի (3 ամսից ավելի) տուգանքների փոխարեն կներդրվեն նոր, շատ ավելի խիստ կանոններ.

Մինչև 6 ամիս ժամկետով կացության կանոնները խախտելու դեպքում՝ 1,000 լարիի (մոտ 365 դոլար) չափով տուգանք և մեկ տարի ժամկետով մուտքի հնարավոր արգելք։

6 ամսից մինչև 1 տարի մնալու կանոնների խախտում՝ 2000 լարիի (մոտ 730 դոլար) չափով տուգանք և 2 տարի ժամկետով հնարավոր մուտքի արգելք։

1 տարուց ավելի մնալու կանոնների խախտում՝ 3000 լարիի (մոտ 1100 դոլար) չափով տուգանք և 2 տարի ժամկետով հնարավոր մուտքի արգելք։

Կրկնակի խախտման դեպքում հնարավոր է մինչև 3 տարի ժամկետով մուտքի արգելք։

Տուգանքները, նախկինի պես, վերաբերում են միայն 16 տարին լրացած անձանց։

Ռուսաստանը աշխատում է Միացյալ Նահանգների հետ ուղիղ օդային հաղորդակցությունը վերականգնելու ուղղությամբ, սակայն ամերիկյան կողմից համապատասխան արձագանք դեռևս չի եղել, լրագրողներին ասել է փոխարտգործնախարար Սերգեյ Ռյաբկովը, հաղորդում է TASS-ը։

«Ի թիվս այլ բաների, այսօր Միացյալ Նահանգների հետ երկկողմանի հարաբերություններում մենք կենտրոնացած ենք ուղիղ օդային երթևեկության վերականգնման խնդրի վրա։ Ցավոք, ամերիկյան կողմից համապատասծան արձագանք չի եղել։ Մենք լրացուցիչ ջանքեր ենք գործադրում, մեր համապատասխան գերատեսչություններն ու կառույցները ներգրավված են դրանում», - ասել է փոխնախարարը։

«Մենք հույս ունենք, որ մինչև այն պահը, երբ վերջին ամիսներին գրգռիչ հարցերի շուրջ երկկողմ խորհրդակցություններ անվանվող ձևաչափը վերսկսվի, Վաշինգտոնում ավելի կառուցողական վերաբերմունք կձևավորվի և մենք իրական առաջընթաց կգրանցենք այս հարցի լուծման գործում», - հավելել է Ռյաբկովը։

Ավելի վաղ նա նշել էր, որ Մոսկվան և Վաշինգտոնը կփորձեն հարաբերությունների «գրգռիչների» շուրջ հերթական հանդիպումն անցկացնել մինչև աշնան վերջ:

Փետրվարի 27-ին և ապրիլի 10-ին Ստամբուլում տեղի են ունեցել բանակցություններ՝ նվիրված Ռուսաստանի և ԱՄՆ-ի դեսպանատների աշխատանքային պայմանների կարգավորմանը և երկու երկրների հարաբերություններում «գրգռիչները» հաղթահարելու ուղիների քննարկմանը։ Խորհրդակցությունների առաջին և երկրորդ փուլերում ՌԴ պատվիրակությունը գլխավորում էր Վաշինգտոնում ներկայիս դեսպան Ալեքսանդր Դարչիևը, իսկ ամերիկյանը՝ Եվրոպայի և Եվրասիայի հարցերով պետքարտուղարի օգնականի տեղակալ Սոնատա Քոուլթերը։ Լրատվամիջոցների համար փակ առաջին հանդիպումը տևել է ավելի քան վեց ժամ, իսկ երկրորդ փուլի բանակցությունների տևողությունը կազմել է հինգուկես ժամ։

HBO-ն պաշտոնապես հաստատել է, որ հանրաճանաչ «Էյֆորիա» սերիալի երրորդ եթերաշրջանի պրեմիերան կկայանա 2026 թվականի գարնանը: Հեռուստաընկերության գործադիր տնօրեն Քեյսի Բլոյսը Variety-ին ասել է. «Դա կլինի գարնանը, բայց ճշգրիտ ամսաթիվը դեռևս հաստատված չէ»:

Նոր եթերաշրջանի պրեմիերան կկայանա երկրորդ եթերաշրջանից չորս տարի անց, ինչը երկրպագուների համար սպասումը հատկապես երկար է դարձնում:

Գլխավոր դերասանական կազմը վերադառնում է երրորդ եթերաշրջանի համար՝ Զենդայա, Հանթեր Շաֆեր, Սիդնի Սուինի, Ջեյքոբ Էլորդի, Էրիկ Դեյն, Ալեքսա Դեմի և Մոադ Ապատաու:

Հեռուստադիտողները կարող են նաև ակնկալել հատուկ ելույթներ այնպիսի հայտնիների կողմից, ինչպիսիք են Ռոզալիան, Մարշոն Լինչը և ուրիշներ։

Պահպանողական ակտիվիստ Չարլի Քըրքի քաղաքական սպանությունից հետո 78-ամյա Առնոլդ Շվարցենեգերը մռայլ կանխատեսում է արել երկրի ապագայի վերաբերյալ: Նա ասել է, որ դեմոկրատների և հանրապետականների միջև խորացող պառակտումը կարող է հանգեցնել այնպիսի իրավիճակի, երբ Միացյալ Նահանգներում ժողովրդավարությունը պարզապես կդադարի գոյություն ունենալուց: 

«Մենք պետք է շատ զգույշ լինենք, որպեսզի չհասնենք անդունդի եզրին: Որովհետև եթե մենք ընկնենք այդ եզրից, այնտեղ ժողովրդավարություն չկա», - ասել է դերասանը և Կալիֆոռնիայի նախկին նահանգապետը Հարավային Կալիֆոռնիայի համալսարանում ունեցած ելույթի ժամանակ: 

Շվարցենեգերը ընդգծել է, որ յուրաքանչյուր քաղաքացի կարող է փոփոխություն մտցնել՝ իրացնելով իր ընտրելու իրավունքը:

Քըրքի սպանությունից հետո, որի համար մեղադրվում է 22-ամյա Թայլեր Ռոբինսոնը, Միացյալ Նահանգները հայտնվել է բուռն քաղաքական բանավեճի մեջ: ՀԴԲ-ն հայտարարել է, որ Ռոբինսոնը հավատարիմ է եղել «ձախակողմյան գաղափարախոսություններին» և կարող է ռադիկալացվել համացանցում: Յուտայի դատախազները նրան մեղադրել են դիտավորյալ սպանության, ծանր հանցագործության և արդարադատությանը խոչընդոտելու մեջ և հայտարարել են, որ կպահանջեն մահապատիժ:

Հայաստան է այցելել Չինաստանի քաղաքական խորհրդատվական խորհրդի 14-րդ ազգային կոմիտեի նախագահի տեղակալ Սու Հույի գլխավորած պատվիրակությունը: Այդ մասին հայտնում են ՀՀ ԱԺ-ից:

Սեպտեմբերի 17-ին «Զվարթնոց» օդանավակայանում բարձրաստիճան հյուրերին դիմավորել է ԱԺ փոխնախագահ Հակոբ Արշակյանը:

Այցի շրջանակում նախատեսվում են հանդիպումներ ՀՀ նախագահ Վահագն Խաչատուրյանի, ՀՀ ԱԺ նախագահ Ալեն Սիմոնյանի, ՀՀ ԱԺ փոխնախագահ Հակոբ Արշակյանի և ԱԺ Հայաստան-Չինաստան բարեկամական խմբի անդամների հետ: