Ադրբեջանական վերահսկողության ներքո գտնվող ավելի քան 200 քառակուսի կմ ՀՀ ինքնիշխան տարածքի հարցը պետք է լուծում ստանա սահմանազատման գործընթացում։ Ուղիղ եթերում ժողովրդին հղած իր ուղերձում այս հայտարարությունն արեց ՀՀ վարչապետ Նիկոլ Փաշինյանը` անդրադառնալով վաշինգտոնյան բանակցություններին։

Նա նշեց, որ Հայաստանն ու Ադրբեջանը Վաշինգտոնյան հռչակագրով և նախաստորագրված համաձայնագրով միմյանց սահմանների անխախտելիությունն ու տարածքային ամբողջականությունը ճանաչել են 1991թ․ Ալմա Աթայի հռչակագրի հիման վրա, ըստ որի` ընդունել են, որ այսօր Հայաստանի Հանրապետության տարածքը ճշգրտորեն նույնական է Հայկական ԽՍՀ տարածքի հետ, և այսօր Ադրբեջանի Հանրապետության տարածքը ճշգրտորեն նույնական է Ադրբեջանական ԽՍՀ տարածքի հետ։

«Այս իրողությունը պետք է լուծում ստանա սահմանազատման գործընթացում։ Խաղաղության նոր տրամաբանությունն այն է, որ ասելիս ՀՀ ինքնիշխան տարածքներ կան, որոնք այսօր գտնվում են ադրբեջանական վերահսկողության ներքո, պետք է ասենք, որ կան փոխադարձաբար ադրբեջանական ինքնիշխան տարածքներ, որ գտնվում են մեր վերահսկողության ներքո, և փոխադարձ այս հարցը պետք է լուծում ստանա սահմանազատման ընթացքում»,– ասաց նա։

Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան: ԱՄՆ–ն ճանապարհը վարձակալում է 99 տարով` ևս 99 տարով երկարաձգելու հնարավորությամբ։

Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։