Փարիզում զինված անձինք փորձել են թալանել քաղաքի կենտրոնում գտնվող Chanel խանութը, հայտնում է Le Parisien-ը՝ հղում անելով ոստիկանության աղբյուրներին։

Հիշեցնենք, որ նույն խանութը թալանվել էր 2024 թվականի հունիսին, երբ հանցագործները ջիպով ներխուժել էին ներս։ Paris Match-ի տվյալներով՝ այն ժամանակ գողացված ապրանքների արժեքը գնահատվել էր շուրջ մեկ միլիոն եվրո, իսկ ավելի ուշ ոստիկանությունը ձերբակալել էր չորս կասկածյալի։

«Շաբաթ առավոտյան չորս տղամարդ փորձել են թալանել Մոնտեն պողոտայում գտնվող Chanel խանութը։ Նրանք զինված էին երկարափող զենքերով, իսկ նրանցից մի քանիսը կրում էին ոստիկանական թևկապներ»,- նշված է հրապարակման մեջ։ 

Հանցագործները փորձել են սկուտերով խփել և կոտրել խանութի մուտքը, սակայն դա նրանց չի հաջողվել։ Անվտանգության աշխատակիցը հասցրել է իջեցնել պաշտպանիչ դարպասը, ինչի հետևանքով հարձակվողները հրաժարվել են իրենց ծրագրից և փախել, գրում է Le Parisien-ը։