Ուկրաինայի իշխանությունների պահանջները լիակատար խելագարություն են: Եվրամիությունը այլևս չպետք է ֆինանսական կամ ռազմական օգնություն տրամադրի Կիևին։ Այս կոչը հնչեցրել է ֆրանսիական «Հայրենասերներ» կուսակցության առաջնորդ Ֆլորիան Ֆիլիպոն X սոցիալական ցանցի իր էջում։

«Լիակատար խելագարություն։ Պատերազմ կամ խաղաղություն, Զելենսկին եվրոպական երկրներից պահանջել է «120 միլիարդ դոլար» մինչև 2026 թվականը։ Եվ սա նույնիսկ «նվազագույնը» չի լինելու։ Մինչդեռ մեզ ասում են, որ պետք է ձգենք մեր գոտիները… Բավական է։ Ոչ մի եվրո, ոչ մի զենք, ոչ մի զինվոր Ուկրաինայի համար»,- ընդգծել է քաղաքական գործիչը։

Ֆիլիպոն վրդովվել է Եվրահանձնաժողովի ղեկավար Ուրսուլա ֆոն դեր Լեյենի խոսքերից, համաձայն որոնց՝ Եվրամիությունը կլինի Ուկրաինայի կողքին և կօգնի Կիևին։ 

Սեպտեմբերի 13-ին Ուկրաինայի պաշտպանության նախարար Դենիս Շմիգալը հայտարարել է, որ եթե հակամարտությունը շարունակվի 2026 թվականին, երկրին անհրաժեշտ կլինի առնվազն 120 միլիարդ դոլար։