Իսրայելի վարչապետ Բենիամին Նեթանյահուն Երուսաղեմի Ռամոթ խաչմերուկում տեղի ունեցած հարձակման վայրում հայտարարել է, որ Իսրայելն «ահաբեկչության դեմ հզոր պատերազմ» է մղում։ Այս մասին հայտնում է The Times of Israel-ը։ 

«Ահաբեկչության դեմ հզոր պատերազմ է ընթանում բոլոր ճակատներում», – նշել է Նեթանյահուն իր ելույթում՝ ցավակցություն հայտնելով զոհերի ընտանիքներին և շուտափույթ ապաքինում մաղթելով վիրավորներին։

Նա հավելել է, որ այժմ իսրայելական ուժերի կողմից շրջապատվում են այն գյուղերը, որտեղից եկել են ահաբեկիչները։ Նեթանյահուի խոսքով՝ երկու ահաբեկիչները պաղեստինցիներ են Արևմտյան ափից։

«Գազայի հատվածում մարտերը շարունակվում են», – հավելել է Նեթանյահուն՝ մատնանշելով, որ Իսրայելը կոչնչացնի ՀԱՄԱՍ-ին, ինչպես խոստացել է, և կազատի բոլոր պատանդներին։

Իր հերթին Իսրայելի ֆինանսների նախարար Բեզալել Սմոտրիչը Երուսաղեմում տեղի ունեցած հարձակումից հետո հայտարարել է, որ Իսրայելի Պետությունը չի կարող ընդունել Պաղեստինի ինքնավարությունը, որը «դաստիարակում և կրթում է իր երեխաներին հրեաներին սպանելու համար»։

Ավելի վաղ Երուսաղեմի Ռամոթ խաչմերուկում երկու պաղեստինցիներ կրակ էին բացել մեքենաների և հետիոտների վրա, ինչի հետևանքով, իսրայելական աղբյուրների փոխանցմամբ, զոհվել է 6, վիրավորվել՝ ևս 12 մարդ, որոնցից վեցը ծանր վիճակում են։