ԱՄՆ նախագահ Դոնալդ Թրամփի մամուլի քարտուղար Քերոլայն Լևիթը Սպիտակ տան ճեպազրույցի իր բացման խոսքում չի հիշատակել Ռուսաստանի կողմից Կիևի վրա գիշերային հարվածի մասին, փոխարենն անդրադարձել է ԱՄՆ ներքին հարցերին, գրում է Sky News-ը։ 

Սակայն լրագրողուհին բարձրացրել է հարձակման հարցը՝ հարցնելով՝ արդյո՞ք Սպիտակ տունը Ռուսաստանի նախագահ Վլադիմիր Պուտինին «խաղաղության խոչընդոտ» է համարում:

Լևիթը պատասխանել է, որ Թրամփը «դժգոհ է, բայց ոչ՝ զարմացած»։

«Դրանք երկու երկրներ են, որոնք շատ երկար ժամանակ պատերազմի մեջ են։ Ռուսաստանը սկսել է այդ հարձակումը Կիևի վրա, և նմանապես, Ուկրաինան վերջերս հարձակում է սկսել ռուսական նավթավերամշակման գործարանների վրա»,- ասել է Սպիտակ տան մամուլի քարտուղարը։ 

Նա հավելել է, որ Թրամփը ցանկանում է, որ պատերազմն ավարտվի, բայց «երկու երկրների առաջնորդները ևս պետք է ցանկանան, որ այն ավարտվի»։