Գազայի հատվածում վերջին շրջանում սովից մահացել է առնվազն 193 մարդ, այդ թվում՝ 96 երեխա, հայտնել է անկլավի առողջապահության նախարարությունը թելեգրամյան ալիքում։

Առողջապահության նախարարության տվյալներով՝ միայն վերջին 24 ժամվա ընթացքում Գազայի բժշկական հաստատություններում գրանցվել է թերսնման պատճառով տեղի բնակիչների մահվան հինգ նոր դեպք։

Ինչպես գրում է ՏԱՍՍ-ը, 2025 թվականի մարտի 2-ից ի վեր միջազգային մարդասիրական օգնություն չի մտել Գազայի հատված։ Իսրայելը որոշել է փակ պահել բոլոր անցակետերը և սնունդ բաշխել Իսրայելի և ԱՄՆ-ի կողմից կառավարվող Գազայի մարդասիրական օգնության հիմնադրամի միջոցով։

Մարտին Իսրայելի բանակը վերսկսել է մարտական գործողությունները Գազայի հատվածում՝ խախտելով 2025 թվականի հունվարին հաստատված հրադադարը: Կատարի, Եգիպտոսի և Միացյալ Նահանգների միջնորդությամբ անցկացված մի քանի բանակցությունների ընթացքում հակամարտության կողմերը չեն կարողացել համաձայնության գալ նոր համաձայնագրի պայմանների շուրջ: