Թուրքիայի արտաքին գործերի նախարար Հաքան Ֆիդանը կիրակի օրը հայտարարել է, որ հույս ունի, որ ԱՄՆ նախագահ Դոնալդ Թրամփը կդադարեցնի Վաշինգտոնի համագործակցությունը Սիրիայի քրդական YPG խմբավորման հետ, հայտնում է Reuters-ը։

Թուրքիայի պաշտպանության նախարարությունը հայտնել է, որ Սիրիայի հյուսիսում թուրքական ուժերի սպանած 23 զինյալները պատկանել են YPG-ի աշխարհազորին և Քրդստանի աշխատավորական կուսակցությանը (PKK)։ Թուրքիան PKK-ն և YPG-ն նույնական է համարում, մինչդեռ Միացյալ Նահանգները դրանք դիտարկում է առանձին խմբավորումներ՝ արգելելով PKK-ն որպես ահաբեկչական, բայց YPG-ին ներգրավելով որպես Սիրիայում իր հիմնական դաշնակից ԻՊ-ի դեմ արշավում։

«Մենք հուսով ենք, որ պարոն Թրամփը որոշում կկայացնի, որը վերջ կդնի տարածաշրջանում շարունակվող այս սխալին»,- ասել է Ֆիդանը Քաթարի իր գործընկերոջ հետ Դոհայում կայացած մամուլի ասուլիսում։

Նա ասել է, որ YPG-ն ի վիճակի չէ պայքարել «Իսլամական պետության» դեմ և միայն դեր է խաղացել խմբավորման բանտարկյալներին բանտում պահելու գործում՝ հավելելով, որ Թուրքիան, Իրաքը, Սիրիան և Հորդանանը նախնական բանակցություններ են վարել «Իսլամական պետության» դեմ պայքարելու համար։

Թուրքիան արդեն վաղուց կոչ է անում Վաշինգտոնին դադարեցնել YPG-ին աջակցությունը, իսկ թուրքական զորքերը և նրանց դաշնակիցները Սիրիայում բազմիցս մարտի են բռնվել քուրդ զինյալների հետ դեկտեմբերին Սիրիայի նախագահ Բաշար Ասադի տապալումից հետո:

Թուրքիան հայտարարել է, որ «Սիրիայի դեմոկրատական ​​ուժերը» կամ SDF-ը` ԱՄՆ-ի աջակցությամբ գործող խմբավորումը, որը ներառում է քրդական YPG-ն, պետք է զինաթափվի, հակառակ դեպքում կբախվի ռազմական միջամտության: ԱՄՆ նախկին նախագահ Ջո Բայդենի վարչակազմի օրոք Միացյալ Նահանգները Սիրիայում 2000 զինծառայող ուներ, որոնք կռվում էին SDF-ի և YPG-ի հետ կողք-կողքի: