ArmNews
Selfies labore, leggings cupidatat sunt taxidermy umami fanny pack typewriter hoodie art party voluptate. Listicle meditation paleo, drinking vinegar sint direct trade.
Ռուսաստանի նախագահ Վլադիմիր Պուտինը շնորհավորել է Հայաստանի, Բելառուսի, Ղազախստանի և Ղրղզստանի ղեկավարներին Եվրասիական տնտեսական միության օրվա առթիվ։
«ԵԱՏՄ-ում ինտեգրացիոն գործընթացները զարգանում են շատ դինամիկ և արդյունավետ։ Ստեղծվել է ընդհանուր շուկա՝ ապահովելով ապրանքների, ծառայությունների, կապիտալի և աշխատուժի ազատ տեղաշարժը։ Կատարվում է ազգային իրավակարգավորման համակարգերի ներդաշնակեցում կարևորագույն ոլորտներում, հաջողությամբ իրականացվում են համատեղ տնտեսական և ենթակառուցվածքային նախագծեր»,- ասվում է ՌԴ ղեկավարի ուղերձում, որը հրապարակվել է Կրեմլի կայքում։
Պուտինը վստահ է, որ ԵԱՏՄ անդամ երկրները կշարունակեն ամեն կերպ ամրապնդել կառուցողական բազմակողմ համագործակցությունը՝ ի շահ իրենց ժողովուրդների, եվրասիական տարածքում բարգավաճման և կայունության ապահովման շահերից։
«Ձեզ մաղթում եմ առողջություն և հաջողություն, իսկ ձեր բոլոր համաքաղաքացիներին՝ երջանկություն և բարեկեցություն»,- եզրափակել է ՌԴ նախագահը։
Եվրասիական տնտեսական միությունը (ԵԱՏՄ) միջազգային ինտեգրացիոն տնտեսական ասոցիացիա է, որի մասնակիցներն են Ռուսաստանը, Հայաստանը, Բելառուսը, Ղազախստանը և Ղրղզստանը։ ԵԱՏՄ-ի մասին պայմանագիրը ստորագրվել է 2014 թվականի մայիսի 29-ին Աստանայում՝ պետությունների ղեկավարների կողմից։ Փաստաթղթի համաձայն՝ ասոցիացիայի նպատակներն են մասնակից երկրների տնտեսական զարգացումը, արդիականացումը և մրցունակության բարձրացումը համաշխարհային շուկայում։
«Արարատ-Արմենիա» ֆուտբոլային ակումբը պաշտոնապես հայտարարել է, որ գլխավոր մարզիչ Վարդան Մինասյանը և նրա մարզչական շտաբը՝ Արտակ Օսեյանը, Արթուր Մկրտչյանը և Դենիս Զմեուն, ավարտում են իրենց աշխատանքն ակումբում։
Մինասյանի ղեկավարությամբ «Արարատ-Արմենիան» հասավ պատմական հաջողությունների՝ դառնալով Հայաստանի կրկնակի չեմպիոն, կրկնակի սուպերգավաթակիր, ինչպես նաև նվաճեց Հայաստանի գավաթը։ Սակայն ակումբը ընդգծում է, որ մարզչական շտաբի ավանդը չի սահմանափակվում միայն այս տպավորիչ ցուցանիշներով։ Նրանք դարձել են ակումբի պատմության անբաժան մասը և միշտ կմնան կապված թիմի հետ։
Ակումբը շնորհակալություն է հայտնում մարզիչներին՝ իրենց նվիրումի, պրոֆեսիոնալիզմի և սրտացավ աշխատանքի համար՝ ընդգծելով, որ նրանց թողած ժառանգությունը կդառնա ոգեշնչման աղբյուր ապագա սերունդների համար։
«Արարատ-Արմենիան» մաղթում է նորանոր հաջողություններ և հաղթանակներով լի ճանապարհ մարզչական շտաբի բոլոր անդամներին։
Հիշեցնենք, որ Վարդան Մինասյանը նախքան «Արարատ-Արմենիա» տեղափոխվելը արդեն իսկ հայտնի էր որպես Հայաստանի ազգային հավաքականի նախկին գլխավոր մարզիչ։
«Փաստ» օրաթերթը գրում է. «Ներքին գործերի նախարարությունն առաջարկում է լրացում և փոփոխություն կատարել «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» օրենքում։ Նշվում է, որ վերջին տարիներին Հայաստանում մեծ տարածում են գտել էլեկտրական շարժիչ ունեցող տրանսպորտային միջոցները, որոնք չունեն բանվորական ծավալով շարժիչ, և «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» օրենքի գործող խմբագրության պայմաններում միանշանակ չէ դրանց նկատմամբ պարտադիր ապահովագրության պահանջի տարածումը: 2010 թվականին ընդունված օրենքի 25-րդ հոդվածում սպառիչ թվարկված են այն տրանսպորտային միջոցները, որոնց օգտագործումից բխող պատասխանատվությունը ենթակա չէ պարտադիր ապահովագրման: Նշված բացառությունների սահմանման ընթացքում, ամենայն հավանականությամբ, որպես հիմք է ընդունվել այն սկզբունքը, որ պարտադիր ապահովագրման ենթակա է այն տրանսպորտային միջոցների օգտագործումից բխող պատասխանատվությունը, որոնք, օրենսդրության համաձայն, ենթակա են գրանցման ճանապարհային երթևեկության անվտանգության ապահովման համար պատասխանատու պետական մարմնում:
2010 թվականից ի վեր ճանապարհային երթևեկության անվտանգության ապահովման համար պատասխանատու պետական մարմնում գրանցվող տրանսպորտային միջոցների չափանիշները պարբերաբար վերանայվել են: Վերանայված որոշման ցանկով սահմանվել է, որ գրանցման ենթակա են նաև այնպիսի տրանսպորտային միջոցներ, ինչպիսիք են մոպեդները, տրիցիկլները, էլեկտրական շարժիչ ունեցող տրանսպորտային միջոցները և այլն: Սա նկատի ունենալով՝ անհրաժեշտություն է առաջացել համապատասխան փոփոխություններ կատարել օրենքում:
Նախագծով առաջարկվում է «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» օրենքի 3-րդ հոդվածի 1-ին մասի 4-րդ կետում որպես ավտոտրանսպորտային միջոց սահմանել նաև մոպեդները, ինչպես նաև օրենքի 25-րդ հոդվածի 2-րդ մասի 1-ին կետի խմբագրման արդյունքում մոպեդները ևս դարձնել պարտադիր ապահովագրման ենթակա տրանսպորտային միջոց: Նախագծի ընդունման արդյունքում ակնկալվում է կարգավորել մոպեդների պարտադիր ապահովագրման գործընթացը:
Առավել մանրամասն թերթի այսօրվա համարում
Միլիարդատեր ձեռներեց Իլոն Մասկը X-ում հայտարարել է ԱՄՆ նախագահ Դոնալդ Թրամփի վարչակազմում հատուկ պետական ծառայողի պաշտոնում աշխատանքի ավարտի մասին։ Խոսքը Կառավարության արդյունավետության դեպարտամենտի նախագահի պաշտոնի մասին է: Այն պայքարում է անարդյունավետ ծախսերի դեմ:
«Իմ պաշտոնավարման ժամկետը, որպես հատուկ պետական ծառայող, մոտենում է ավարտին: Շնորհակալություն նախագահին ոչ արդյուանվետ ծախսերի դեմ պայքարելու հնարավորության համար»,- գրել է Մասկը:
Նա հավելել է, որ Կառավարության արդյունավետության դեպարտամենտի (DOGE) առաքելությունը «միայն կուժեղանա»:
Ապրիլի 22-ին ձեռնարկատերը հայտարարել էր, որ մտադիր է զգալիորեն կրճատել DOGE-ում աշխատելու համար հատկացված ժամանակը և կենտրոնանալ իր Tesla ընկերության վրա։
Մայիսի 29-ին՝ ժամը 01:00-01:15-ն ընկած ժամանակահատվածում, Ադրբեջանի ԶՈՒ ստորաբաժանումները կրակ են բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել է բնակելի տուն։ Այս մասին հայտնում են ՀՀ ՊՆ-ից։
Տուժածներ չկան:
Ադրբեջանական կողմին կոչ ենք անում հետաքննել Խոզնավարի բնակելի տան գնդակոծման փաստը և հանդես գալ հրապարակային պարզաբանումներով։
Գործարար, Tesla-ի և SpaceX-ի ղեկավար Իլոն Մասկը հայտարարել է, որ հեռանում է ԱՄՆ նախագահ Դոնալդ Թրամփի վարչակազմում զբաղեցրած հատուկ կառավարական աշխատակցի պաշտոնից։
«Ավարտելով իմ պաշտոնավարման ժամկետը որպես հատուկ կառավարական աշխատակից, ես կցանկանայի շնորհակալություն հայտնել նախագահ Դոնալդ Թրամփին անիմաստ ծախսերը կրճատելու հնարավորության համար», - գրել է Մասկը X սոցիալական ցանցում մայիսի 29-ի գիշերը։
DOGE առաքելությունը ժամանակի ընթացքում միայն կուժեղանա, քանի որ այն կդառնա ամբողջ կառավարության կյանքի ձև։
Մասկը կարող է զբաղեցնել հատուկ կառավարական աշխատակցի պաշտոնը տարեկան ոչ ավելի, քան 130 օր, այս ժամկետը լրանում է մայիսի 30-ին։
Մասկը Թրամփի վարչակազմում ղեկավարել է Կառավարության արդյունավետության դեպարտամենտը (DOGE), որը ստեղծվել է պետական ծախսերը կրճատելու համար։ Ինչպես նշում է Associated Press-ը, Մասկը կարողացել է ծախսերը կրճատել երկու տրիլիոն դոլարից մինչև 1.15 տրիլիոն դոլար։
Ապարան- Քուչակ ճանապարհին ավտովթարից տուժել են 12 անձ, որից 11 տուժած Ապարանի ԲԿ-ում ստանում են համապատասխան բուժում, ունեն տարբեր տեսակի կոտրվածքներ: Այս մասին ֆեյսբուքի իր էջում գրել է Առողջապահության նախարար Անահիտ Ավանեսյանը:
«27 տարեկան տուժածի առողջական վիճակը ծայրահեղ ծանր է, կազմակերպում ենք սանավիացիայով նրա տեղափոխումը Երևան:
Վանաձոր` տուժել է 5 անձ, որից 4 տուժած տեղափոխվել են Վանաձոր ԲԿ, 2-ը թեթև վնասվածքներով են, չեն հոսպիատալացվել, 2-ի առողջական վիճակը ծայարահեղ ծանր է, գտնվում են վերակենդանացման բաժանմունքում:
Հորդորում ու խնդրում ենք պահպանել ճանապարհային երթևեկության անվտանգության կանոնները, պահպանել արագությունը, կապել ամրագոտիները` խուսափելու նման ողբերգական դեպքերից»,- գրել է նա:
Ներկայացնում ենք տարադրամի փոխարժեքները՝ ըստ rate.am-ի:
ԱՄՆ դոլարի առքի առավելագույն արժեքն է 383 դրամ, վաճառքի նվազագույն արժեքը՝ 386 դրամ:
Եվրոյի առքի առավելագույն արժեքն է 430 դրամ, վաճառքի նվազագույն արժեքը՝ 437 դրամ:
Ռուսական ռուբլու առքի առավելագույն արժեքն է 4.75 դրամ, վաճառքի նվազագույն արժեքը՝ 4.87 դրամ:
Մայիսի 29-ին, ժամը 03:50-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Մարգարյան փողոցի 2-րդ նրբանցքի թիվ 2 շենքի մոտակայքում կայանած ավտոմեքենայում հրդեհ բռնկվել։
Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատից մեկ մարտական հաշվարկ:
Հրդեհը մեկուսացվել է ժամը 04։08-ին, մարվել՝ 04։31-ին։ Այրվել է «Hyundai» մակնիշի ավտոմեքենայի շարժիչի հատվածը և ջերմահարվել «Toyota» մակնիշի ավտոմեքենայի աջակողմյան հատվածը՝ մասամբ։
«Հրապարակ» թերթը գրում է. «Իշխանության ներսում շրջանառվող տեղեկության համաձայն, ՌԴ արտգործնախարար Սերգեյ Լավրովի այցն էլ չի լուծել Սյունիքում ռուսական հյուպատոսություն բացելու հարցը: Հիշեցնենք, որ ռուսական կողմը փորձում է Սյունիքում հյուպատոսություն բացել դեռեւս 2023 թվականից։ Մինչդեռ 2022-ից Կապանում հյուպատոսություն ունի նաեւ Իրանը, մոտ օրերս էլ Ֆրանսիայի հյուպատոսություն է բացվելու Գորիսում։
Չնայած ռուսական կողմը հայտարարել է, որ մինչեւ մայիսի վերջ կլինի կոնկրետ պայմանավորվածություն, սակայն մեր աղբյուրներն ասում են՝ ամեն ինչ արվելու է, որ հյուպատոսությունը չբացվի։
Երեկ կապանցի ՔՊ-ական պատգամավոր Մարինա Ղազարյանը մեր հարցին, թե ինչու է ձգվում բացումը, աբսուրդ պատասխան տվեց, թե խնդիրը համայնքապետի դաշտում է՝ տարածքի խնդիրը չի լուծվում, հյուպատոսության համար տարածք են ման գալիս, ինչն էլ ձգձգման պատճառն է։
Ֆոտո
