ArmNews
Selfies labore, leggings cupidatat sunt taxidermy umami fanny pack typewriter hoodie art party voluptate. Listicle meditation paleo, drinking vinegar sint direct trade.
Հնդկաստանի Քաշմիրի շրջանում Պակիստանի հարվածների հետևանքով 10 հնդիկ է զոհվել, ևս 48-ը տուժել են: Այս մասին հայտնել Է Հնդկաստանի ոստիկանությունը․ փոխանցում է Reuters-ը։
Պակիստանի բանակի հրամանատարն էլ, իր հերթին, հայտարարել է Հնդկաստանի ռազմական գործողությունների արդյունքում խաղաղ բնակչության շրջանում 26 զոհի և 46 վիրավորի մասին։
Նյու Դելիում ընդգծել են, որ հնդկական հարվածների թիրախները ոչ թե պակիստանյան բանակի օբյեկտներն են, այլ Պակիստանում և Իսլամաբադի վերահսկողության տակ գտնվող Քաշմիրի տարածքում գտնվող «ահաբեկչական ճամբարները»:
Պակիստանն էլ հայտարարում է, որ հետևում է պատերազմի օրենքներին և հարվածներ է հասցնում բացառապես ռազմական թիրախներին:
Ամերիկյան Apple ընկերությունը մոտակա տարիներին iPhone սմարթֆոնի արտադրությունն ամբողջությամբ կտեղափոխի Հնդկաստան։ Այս մասին հայտարարել է հարավասիական հանրապետության կապի նախարար Ջյոտիրադիտյա Սինդիան՝ ելույթ ունենալով Նյու Դելիում կայացած համաժողովում։
«Apple-ը որոշել է առաջիկա տարիներին իր բոլոր բջջային հեռախոսներն արտադրել Հնդկաստանում: Երբ ներդրումներ եք կատարում Հնդկաստանում, դուք ընտրում եք մատչելիությունը, հուսալիությունը և ինքնատիպությունը», - մեջբերում է Press Trust of India-ն Սինդիայի խոսքերը:
Սինդիան ընդգծել է, որ iPhone-ի արտադրության ամբողջ գիծը Հնդկաստան տեղափոխելը «խելացի տնտեսական որոշում է հեռահաղորդակցության սարքավորումներ արտադրող յուրաքանչյուր արտադրողի համար»:
Հեռահաղորդակցության պետնախարար Չանդրա Սեխար Պեմմասանին ասել է, որ Հնդկաստանը խոշոր ներկրողից վերածվել է բջջային հեռախոսների առաջատար արտադրողի և արտահանողի: «2014 թվականին Հնդկաստանն արտադրել է ընդամենը 6 միլիոն բջջային հեռախոս, ներմուծել՝ 210 միլիոն, այսօր մենք տարեկան արտադրում ենք 330 միլիոն բջջային հեռախոս, արտահանում՝ 50 միլիոն»,- ասել է նա։
Ավելի վաղ հաղորդվել էր, որ Վաշինգտոնի և Պեկինի միջև առևտրային պատերազմի ֆոնին Apple-ը ձգտում է iPhone-ի արտադրական բազան Չինաստանից տեղափոխել Հնդկաստան: Մարտին ընկերությունը Հնդկաստանից ԱՄՆ է առաքել 600 տոննա iPhone՝ 2 մլրդ դոլար արժողությամբ, ինչը ամսական ռեկորդային ցուցանիշ է։ Մինչև 2026 թվականի վերջ Apple-ը նախատեսում է ԱՄՆ-ում վաճառվող սմարթֆոնների մեծ մասն արտադրել հնդկական գործարաններում։
Ներկայում Հնդկաստանին բաժին է ընկնում iPhone-ի համաշխարհային արտադրության մոտ 18%-ը: Չինաստանի մասնաբաժինը դրանց արտադրության մեջ կազմում է ավելի քան 75%:
ArmLur.am-ի տեղեկություններով՝ ապրիլի 24-ին Էջմիածին քաղաքում դաժանաբար ծեծի ենթարկված եւ գլուխը ջախջախված տղան քիչ առաջ մահացել է:
Ինչպես ավելի վաղ հաղորդվել էր, ապրիլի 24-ի գիշերը խմբակային ծեծկռտուք էր եղել Էջմիածին քաղաքում։ Անգիտակից վիճակում գլուխը ջախջախված 22-ամյա տղայի էին տեղափոխել Գրիգոր Լուսավորիչ հիվանդանոց: Վիրավորում ստացածներից մեկը Էջմիածին քաղաքի բնակիչ 22-ամյա Պարգև Հակոբյանն է, որին հիվանդանոց են տարել գլուխը ամբողջությամբ ջարդված, և նրա հարևանի որդին, որը բանակից նոր էր զորացրվել։
Հնդկաստանը հայտարարել է, որ հրթիռային հարվածներ է հասցրել Պակիստանում գտնվող ինը օբյեկտի։ Ըստ Պակիստանի զինված ուժերի՝ Հնդկաստանի հարվածների հետևանքով զոհվել է 26 քաղաքացիական անձ, վիրավորվել՝ 46-ը։ Այս մասին հաղորդում է Reuters գործակալությունը։
Պակիստանը նաև հայտարարել է, որ խոցել է հնդկական հինգ օդանավ, այդ թվում՝ երեք Rafale, մեկ ՍՈւ-30 և մեկ ՄիԳ-29:
Հնդկաստանի ոստիկանությունից հայտնել են, որ Պակիստանի կողմից Հնդկաստանի Ջամու և Քաշմիրի նահանգի գնդակոծության հետևանքով զոհվել է 10 մարդ, վիրավորվել՝ 48-ը։
Հնդկաստանի ներքին գործերի նախարարը X-ում հայտարարել է, որ կառավարությունը վճռական է «համարժեք պատասխան տալ Հնդկաստանի և նրա ժողովրդի վրա ցանկացած հարձակման»։
«Սինդուր գործողությունը», ինչպես Հնդկաստանն անվանում է Պակիստանի վրա հարվածները, երկրի պատասխանն է ապրիլի 22-ին Պահալգամում 26 մարդու կյանք խլած ահաբեկչական հարձակմանը, որի մեջ Նյու Դելին մեղադրում է Իսլամաբադին։
Ամբողջ աշխարհից ավելի քան 130 կարդինալներ հավաքվել են Վատիկանում և այսօր՝ մայիսի 7-ին, կսկսեն նոր քահանայապետի ընտրության գործընթացը։ Այս մասին հաղորդում է BBC-ն։
Առավոտյան Սուրբ Պետրոսի տաճարում պատարագից հետո, կեսօրին կարդինալները կգնան Սիքստինյան կապելլա, որպեսզի իրենց ձայնը տան նախընտրած թեկնածուին։
Մատուռ մտնելուց հետո կարդինալներն այլևս ոչ մի հաղորդակցություն չեն ունենա արտաքին աշխարհի հետ, մինչև չընտրվի Հռոմի նոր պապ։
Այնուհետև բոլորը կսպասեն այնքան, մինչև Սիքստինյան կապելլայի ծխնելույզից ծուխ դուրս կա։ Եթե ծուխը սև լինի, ուրեմն հաջորդ օրը կրկին քվեարկություն կլինի, իսկ եթե սպիտակ ծուխ ելնի ծխնելույզից, ուրեմն կաթոլիկ եկեղեցին նոր առաջնորդ ունի։
Ապրիլի 21-ին Հռոմի Ֆրանցիսկոս պապի մահվանից հետո կարդինալները կընտրեն 267-րդ պապին։
Հայաստանի Հանրապետության տարածքում մայիսի 7-ին և 9-ին սպասվում է առանց տեղումների եղանակ։ Մայիսի 8-ի ցերեկը շրջանների զգալի մասում, 10-11-ին առանձին շրջաններում կեսօրից հետո սպասվում է կարճատև անձրև և ամպրոպ, առանձին վայրերում՝ կարկուտ։ Տեղեկությունը հայտնում է Հիդրոօդերևութաբանության և մոնիտորինգի կենտրոնը։
Մայրաքաղաքում մայիսի 7–ի ցերեկը կլինի 23-25 աստիճան տաքություն, իսկ երեկոյան ժեմորին կգրանցվի +17...+19 աստիճան։
Սյունիքի նախկին մարզպետ, ոստիկանության պետի նախկին առաջին տեղակալ Հունան Պողոսյանին հրավիրել են ապօրինի ծագում ունեցող գույքի բռնագանձման գործերով վարչություն։ Տեղեկությունը հրապարակվել է azdarar.am կայքում։
Վարչություն են հրավիրվել նաև նրա կինը` Նունե Պողոսյանը, և որդին` Հովհաննես Պողոսյանը, որպեսզի ծանոթանան գործի նյութերին և դիրքորոշում ներկայացնեն։
Այս պահին հայտնի չէ, թե դատախազությունն ինչ գույք է ուզում բռնագանձել։
Հիշեցնենք` Հունան Պողոսյանին Սյունիքի մարզպետ նշանակվեց 2018-ի հոկտեմբերի 16-ին, պաշտոնից հրաժարվելու դիմում ներկայացրեց 2020-ի դեկտեմբերի 1-ին։
Հիշեցնենք` Հունան Պողոսյանը 2010–ից մինչև 2018 թվականի մայիսի 11-ը զբաղեցանում էր ՀՀ ոստիկանության պետի առաջին տեղակալի պաշտոնը։
Նա Սյունիքի մարզպետ նշանակվեց 2018-ի հոկտեմբերի 16-ին, պաշտոնից հրաժարվելու դիմում ներկայացրեց 2020-ի դեկտեմբերի 1-ին։
Պակիստանը պատրաստ է դադարեցնել Հնդկաստանի հետ ռազմական հակամարտությունը, եթե Նյու Դելին նույնպես համաձայնի դա անել, հայտարարել է Իսլամական Հանրապետության պաշտպանության նախարար Խավաջա Ասիֆը։ «Վերջին երկու շաբաթների ընթացքում մենք մշտապես հայտարարել ենք, որ երբեք թշնամական գործողություններ չենք ձեռնարկի Հնդկաստանի դեմ։ Սակայն, եթե մեզ վրա հարձակվեն, մենք կպատասխանենք։ Եթե Հնդկաստանը նահանջի, մենք անպայման կդադարեցնենք այս լարվածությունը», - ասել է Ասիֆը Bloomberg TV-ին տված հարցազրույցում։
Մայիսի 7-ի գիշերը Հնդկաստանը հայտարարել է Պակիստանում «ահաբեկչական ենթակառուցվածքների» դեմ ուղղված «Սինդուր» գործողության մեկնարկի մասին։ Դա պատասխան էր ապրիլի 22-ին Ջամմու և Քաշմիրի միութենական տարածքի Անանտնագ բլուրային շրջանի Պահալգամ քաղաքում զբոսաշրջիկների վրա զինված զինյալների հարձակմանը։ Այդ ժամանակ զոհվեց 26 մարդ, տասնյակները վիրավորվեցին։ Հարձակման պատասխանատվությունը ստանձնել է «Դիմադրության ճակատը», որը «Լաշքար-է-Թայբա»-ի ճյուղն է։
«Սինդուր» գործողության շրջանակներում Հնդկաստանը հարվածներ է հասցրել Քաշմիրի Իսլամաբադի վերահսկողության տակ գտնվող «ահաբեկչական ճամբարներին»՝ Բահավալպուրում, Կոտլիում, Սիալկոտում, Մուրիդկեում, Մուզաֆարաբադում և այլ քաղաքներում։ Ըստ Hindustan Times-ի՝ ճամբարներից մի քանիսում տեղակայված են իսլամիստական ահաբեկչական խմբավորումների՝ «Ջաիշ-է-Մուհամմեդ» և «Լաշկար-է-Թայբա» խմբավորումների շտաբներն ու մարզման կենտրոնները։
Թերթը պնդում է, որ Նարովալ շրջանում գտնվող ճամբարներից մեկը ծառայում է որպես անօդաչու թռչող սարքերի բազա, որոնք օգտագործվում են Հնդկաստանի տարածքում զենք, զինամթերք և թմրանյութեր նետելու համար։ Ընդհանուր առմամբ, սպանվել է 12 ահաբեկիչ, ևս 55-ը վիրավորվել են։ Նյու Դելին ընդգծել է, որ Պակիստանի որևէ ռազմական օբյեկտ հարձակման չի ենթարկվել, և որ գործողությունները բնույթով լարվածության սրացում չեն ունեցել։
Սակայն Պակիստանը Հնդկաստանի հարվածները համարել է պատերազմական ակտ։ Հնդկաստանի հարձակման հետևանքով զոհվել է առնվազն ութ և վիրավորվել 35 քաղաքացիական անձ, հայտնել է Իսլամաբադը։
Ի պատասխան՝ Պակիստանը հարվածներ է հասցրել «ինչպես օդից, այնպես էլ ցամաքից» Հնդկաստանում գտնվող ռազմական թիրախներին։ Իսլամական Հանրապետության պաշտպանության նախարարությունը հայտարարել է հինգ հնդկական կործանիչների, այդ թվում՝ ֆրանսիական արտադրության երկու Rafale-ի ոչնչացման մասին։ Բացի այդ, ըստ Samaa հեռուստաալիքի, Պակիստանը հարվածել է Հնդկաստանի զինված ուժերի բրիգադի շտաբ-բնակարանին։ Դրանից հետո, ըստ Պակիստանի տեղեկատվության և հեռարձակման նախարար Աթթաուլլահ Թարարի, հնդկական զորքերը սպիտակ դրոշ են բարձրացրել մի քանի տարածքներում, այդ թվում՝ Քաշմիրի վերահսկողության գծում գտնվող Չորա համալիրում։ Հնդկաստանը չի հաստատել այս տեղեկատվությունը։
Կազանի և Նիժնեկամսկի օդանավակայաններում թռիչքների ժամանակավոր սահմանափակումներ են մտցվել, Telegram ալիքով հայտնել է «Ռոսավիացիայի» ներկայացուցիչ Արտյոմ Կորենյակոն։
Սահմանափակող միջոցառումները ուժի մեջ են մտել Մոսկվայի ժամանակով ժամը 5:40-ից։
«Զվարթնոց» օդանավակայանի տվյալներով՝ Մոսկվայից Երևան հինգ գիշերային և առավոտյան չվերթներ կժամանեն ուշացումով։
Այսպիսով, այն օդանավակայանների թիվը, որտեղ գիշերային ժամերին թռիչքների սահմանափակումներ են մտցվել, հասել է 13-ի: Միջոցառումները կիրառվել են Մոսկվայի չորս օդանավակայաններում, ինչպես նաև Սամարայի, Սարատովի, Վոլգոգրադի, Կալուգայի, Իվանովոյի, Յարոսլավլի և Նիժնի Նովգորոդի օդանավակայաններում:
Մոսկվայի Վնուկովո, Դոմոդեդովո, Շերեմետևո և Ժուկովսկի օդանավակայաններում, ինչպես նաև Սարատովի և Վոլգոգրադի օդանավակայաններում սահմանափակումներն արդեն հանվել են։ Մոսկվայի ժամանակով ժամը 6:00-ին սահմանափակումները չեղարկվել են Սամարայի օդանավակայանում:
Նմանատիպ անվտանգության միջոցառումներ են ձեռնարկվում նաև Ռուսաստանի օդանավակայաններում՝ անօդաչու թռչող սարքերի հարձակումների պատճառով ռազմական գործողության ֆոնին։ Մոսկվայի քաղաքապետ Սերգեյ Սոբյանինը գիշերը հայտնել է, որ ոչնչացվել է քաղաքի ուղղությամբ թռչող 19 անօդաչու թռչող սարք։
Նահանգապետ Օլեգ Մելնիչենկոն նույնպես հայտնել է մայիսի 6-ի գիշերը տարածաշրջանի վրայով տասը անօդաչու թռչող սարքի ոչնչացման մասին: Վորոնեժի մարզի վրայով ոչնչացվել է առնվազն 18 անօդաչու թռչող սարք:
Կազանի օդանավակայանում ինքնաթիռների ժամանման և մեկնման սահմանափակումները վերջին անգամ մտցվել են ապրիլի 24-ին և ուժի մեջ են եղել երկու ժամից մի փոքր ավելի։ Մեկ օր առաջ դրանք մի քանի անգամ ներդրվել էին Նիժնեկամսկում, իսկ միջոցառումները գործում էին նաև Կազանում։
«Հրապարակ» թերթը գրում է. «Ինքնավնասումով բանակից ազատված ՔՊ-ական պատգամավոր Նարեկ Գրիգորյանը երեկ միացավ լրագրողների դեմ արշավի մասնակիցներին եւ ԱԺ ամբիոնից մի «սրտառուչ» ելույթ ունեցավ՝ անդրադառնալով տարիներ առաջ մեր գրած մի լուրին։ «Իմ 3 տարեկան երեխայի վրա հոդված գրեցին. դա բարոյակա՞ն էր, թե՞ անբարո։
Էդ ընթացքում կապնվեցին համայնքապետարան, համայնքապետարանից ճշգրտեցին երեխայի գտնվելու վայրը, սեռը, անունը, ազգանունը եւ այլն, եւ էդ երեխու վրա հոդված գրեցին»,- ասաց նա` չմանրամասնելով, թե խոսքն ինչ լուրի մասին է, եւ փորձելով տպավորություն թողնել, թե մենք մտել ենք իր ընտանիք, թիրախավորել իր անչափահաս դստերը:
Մինչդեռ հրապարակման «գլխավոր հերոսը» ոչ թե իր 3 տարեկան դուստրն էր, այլ հենց ինքը` պատգամավորը, նրա կերպարն էինք ընդամենը բացահայտել` գրելով, որ ՔՊ-ական պատգամավորը 2018 թ․ ծնված իր աղջկա անունը Սմայլիկ է դրել։ Թե այդ լուրի ինչն էր անբարո, եւ որտեղ էր տեսել «ընտանիք մտնելու» փաստը, իր աղջկան Սմայլիկ անվանած պատգամավորն իր ելույթը լսողներին, բնականաբար, չբացատրեց»:
Առավել մանրամասն թերթի այսօրվա համարում
Ֆոտո
