Ռուսաստանի արտաքին հետախուզության ծառայության մամուլի ծառայությունից հաղորդել են, որ ըստ ստացված տեղեկությունների՝ Սերբիայում երիտասարդների ակտիվ մասնակցությամբ տեղի ունեցող ներկայիս անկարգությունները մեծ մասամբ Եվրամիության և դրա անդամ պետությունների դիվերսիոն գործունեության արդյունք են: Եվրոպական լիբերալ հոսանքի նպատակն է այս բալկանյան խոշորագույն երկրում իշխանության բերել Բրյուսելին հնազանդ և հավատարիմ ղեկավարության: Պետք է խոստովանել, որ եվրոէլիտաները շատ բաներում հաջողության են հասնում. երիտասարդությունն արմատականանում է՝ խաղաղ բողոքի ցույցերից անցնելով պայքարի և բռնության «հեղափոխական» մեթոդների

Ընդսմին, Սերբիայում ձախողվում է Արևմուտքի կողմից շատ երկրներում հաջողությամբ փորձարկված «գունավոր հեղափոխության» սցենարը: Եվրոբյուրոկրատիայի վերջնական նպատակները չեն իրականացվել: Դրա պատճառը տեղական հասարակությունում պահպանվող ուժեղ հայրենասիրական զգացմունքներն են, Սերբական ուղղափառ եկեղեցու միավորող ազդեցությունը, ինչպես նաև ՆԱՏՕ-ի ագրեսիայի և երկրի ռմբակոծության հիշողությունը, որը հանգեցրեց դրա փլուզմանը:

Եվրաէլիտաները վճռականորեն տրամադրված են օգտագործել Նովի Սադում նոյեմբերի 1-ին տեղի ունեցած ողբերգական իրադարձությունների տարելիցը, որը դարձավ բողոքի ցույցերի առիթ, իրավիճակը իրենց օգտին «շեղելու» նպատակով: Շեշտը դրվում է սերբ երիտասարդության «ուղեղների լվացման» և այսպես կոչված «պայծառ եվրոպական ապագայի» գովազդի վրա: Հատուկ դեր է տրվում իբր անկախ լրատվամիջոցներին: Նրանց «անկախությունը» իբր պետք է ամրապնդվի «ժողովրդավարական» եվրոպական փողերով։

Ըստ ստացված տվյալների՝ սերբական լրատվական պորտալները՝ FoNet-ը, RAM Network-ը, Vreme-ն, Juzne Vesti-ն, Slobodna rec-ը, Boom93-ը, Podrinske-ն, Freemedia-ն, Indjija-ն, Soinfo-ն, FAR, Storyteller-ը, ինչպես նաև Link ՀԿ-ն, ստանում են Բրյուսելին առնչվող ՀԿ-ների ամուր ֆինանսական աջակցությունը։ 

Բրյուսելն ակնկալում է, որ լրատվամիջոցների և ՀԿ-ների ֆինանսական հոսքը մոբիլիզացնելու է դժգոհ ընտրազանգվածին, մարդկանց հանելու է փողոցներ և այդ ամենն ավարտվելու է «սերբական Մայդանով»՝ բազմիցս փորձարկված սցենարով: Սակայն  «փթթող եվրոպական այգի մուտք գործելու» մասին եվրոպացի պաշտոնյաների կեղծ խոստումները պարզապես խայծ են։ Այդ շարունակ նահանջող հեռանկարի գինը պետք է վճարվի նվաճումներով և նախնիների հիշողությամբ։ Հպարտ և միասնական սերբ ժողովուրդը Եվրոպական Միությանը պետք չէ։

Արաբական և իսլամական երկրները պետք է ստեղծեն միասնական գործիք՝ իրենց առջև ծառացած մարտահրավերներին արձագանքելու համար։ 

Այս մասին նշել է Եգիպտոսի նախագահ Աբդել Ֆաթթահ ալ-Սիսին՝ սեպտեմբերի 15-ին ելույթ ունենալով Դոհայում Արաբական պետությունների լիգայի և Իսլամական համագործակցության կազմակերպության արտակարգ գագաթնաժողովին։

«Ժամանակն է մշակել արաբա-իսլամական մեխանիզմ՝ անվտանգության, քաղաքական և տնտեսական ոլորտներում սպառնալիքներին հակազդելու համար։ Սա կօգնի մեզ ամրապնդել մեր ներկայիս դիրքերը և, անհրաժեշտության դեպքում, համապատասխան միջոցներ ձեռնարկել հակամարտությունները լուծելու համար», – ընդգծել է ալ-Սիսին։ Նրա ելույթը հեռարձակվել է կատարյան «Ալ Ջազիրա» հեռուստաալիքով։

Եգիպտոսի առաջնորդի խոսքով՝ հակառակորդը պետք է հասկանա, որ Ատլանտյան օվկիանոսից մինչև Պարսից ծոց ցանկացած արաբական և իսլամական երկիր  պաշտպանված է։ «Մենք թույլ չենք տա ոտնձգություններ մեր պետությունների ինքնիշխանության նկատմամբ և թույլ չենք տա որևէ մեկին արժեզրկել խաղաղության հասնելու մեր ջանքերը», – շեշտել է Եգիպտոսի նախագահը։

Արաբական պետությունների լիգայի և Իսլամական համագործակցության կազմակերպության արտակարգ գագաթնաժողովը հրավիրվել է այն բանից հետո, երբ սեպտեմբերի 9-ին Իսրայելը հարվածներ է հասցրել Կատարի մայրաքաղաք Դոհային, ինչի հետևանքով սպանվել են Գազայի հատվածում պաղեստինյան ՀԱՄԱՍ շարժման ղեկավար Խալիլ ալ-Հայան և նրա ղեկավարության երեք անդամ։

Կատարը դատապարտել է ՀԱՄԱՍ-ի քաղաքական կենտրոնակայանին հասցված հարվածը։ Կատարի արտգործնախարար Մաջիդ ալ-Անսարին հարվածն անվանել է միջազգային օրենքի և նորմերի կոպիտ խախտում։

Հունգարիան և Չինաստանի ատոմային էներգիայի գործակալությունը ստորագրել են համաձայնագիր, որը լայն հեռանկարներ է բացում երկու երկրների առաջ միջուկային ոլորտում համագործակցության համար։

Այս մասին հաղորդում է MTI-ը՝ հղում անելով Հունգարիայի արտաքին գործերի նախարար Պետեր Սիյարտոյին։

«Նախարարը հայտարարեց Չինաստանի ատոմային էներգիայի գործակալության հետ համաձայնագրի ստորագրման մասին, որը վկայում է Հունգարիայի և Չինաստանի միջև միջուկային էներգիայի, անվտանգության և նորարարության ոլորտում համագործակցության լուրջ ներուժի մասին, որը գնալով ավելի կարևոր դեր է խաղում և ավելի ու ավելի մեծ կշիռ է ձեռք բերում այս ոլորտում», – ասվում է հայտարարության մեջ։ 

Սիյարտոն նաև նշել է, որ Հունգարիան ունի բոլոր հնարավորություններն ապացուցելու, որ միջուկային էներգիան կարող է դառնալ Արևելքի և Արևմուտքի միջև քաղաքակիրթ համագործակցության վերականգնման հիմքը, ինչը համապատասխանում է Հունգարիայի ազգային շահերին։

Թուրքիայի նախագահ Ռեջեփ Թայիփ Էրդողանը սեպտեմբերի 15-ին հայտարարել է, որ Իսրայելը կշարունակի իր գործողությունները տարածաշրջանում, ուստի անհրաժեշտ է տնտեսական սահմանափակումներ կիրառել այդ երկրի դեմ։ Նրա խոսքով՝ այդ հնարավորությունն ունեն Արաբական երկրների լիգան և Իսլամական համագործակցության կազմակերպությունը։

«Մենք պետք է ակտիվացնենք մեր ջանքերը՝ Իսրայելի դեմ պատժամիջոցները խստացնելու համար։ Մենք պետք է օգտագործենք միջազգային իրավական մեխանիզմներ՝ Իսրայելի պաշտոնյաներին պատասխանատվության ենթարկելու համար։ Իսրայելն առաջիկայում կանգ չի առնի առանց վճռական արձագանքի և պատժամիջոցների, այլ միայն կարագացնի իր օկուպացիայի և անկայունացման քաղաքականությունը։  Հարկավոր է հիմա ընդլայնել մեր համագործակցությունը՝ հաջորդ 10 տարիներին հաղթանակ տանելու համար», – այս մասին Էրդողանն ասել է Դոհայում կայացած Իսլամական համագործակցության կազմակերպության (ԻՀԿ) և Արաբական պետությունների լիգայի (ԱՊԼ) գագաթնաժողովին։

Ավելի վաղ հայտնի էր դարձել, որ սեպտեմբերի 9-ին Իսրայելի՝ Դոհային հարվածներ հասցնելու հետևանքով սպանվել են Գազայի հատվածում պաղեստինյան ՀԱՄԱՍ շարժման ղեկավար Խալիլ ալ-Հայան և նրա ղեկավարության ևս երեք անդամ։

Կատարը դատապարտել էր ՀԱՄԱՍ-ի քաղաքական կենտրոնակայանին հասցված հարվածը։ Կատարի արտգործնախարար Մաջիդ ալ-Անսարին հարվածն անվանել էր միջազգային օրենքի և նորմերի կոպիտ խախտում։

Տարածաշրջանում արդեն խաղաղության դարաշրջան է հաստատվել։ Նման հայտարարություն է արել Ադրբեջանի նախագահ Իլհամ Ալիևը Թուրքիայի ԶՈՒ գլխավոր շտաբի պետ Սելչուկ Բայրաքթարօղլուի հետ հանդիպման ժամանակ։

Ալիևը նշել է, թե չկան երկրներ, որոնք իրար այնքան մոտ լինեն, որքան Ադրբեջանն ու Թուրքիան: Նա ընդգծել է, որ ադրբեջանա-թուրքական միասնությունը կարևւոր գործոն է համաշխարհային մասշտաբով:

Կադաստրի կոմիտեի ղեկավար Սուրեն Թովմասյանի աշխատասենյակում մի քաղաքացի է ծեծի ենթարկվել, որը գնացել է իր կնոջն աշխատանքից ազատելու հարցի պարզաբանման հետքերով: Այս մասին գրում է ArmLur.am-ը։

Կայքի տեղեկություններով, դեպքին նախորդել է կնոջ՝ աշխատանքից ապօրինի ազատումը։ Վրդովված ամուսինը զանգահարել է Կադաստրի պետին, սակայն պատասխան չստանալով՝ ձայնային հաղորդագրություն է ուղարկել։ Մի քանի ժամ անց, նրա ընտանիքի պնդմամբ, Արթուրին առևանգել են և դաժանաբար ծեծի ենթարկել։ Նշվում է, որ ծեծի տեսարանը շարունակվել է մի քանի ժամ և մասնակցել է շուրջ հիսուն մարդ։

ՆԳՆ–ից կատարվածի վերաբերյալ հայտնել են հետեւյալը. «Քաղաքացուց ծեծի ենթարկվելու վերաբերյալ ստացվել է հաղորդում, որն անմիջապես, պատշաճ կարգով, արձանագրվել է և ուղարկվել նախաքննական մարմին։ Ոստիկանության կողմից ձեռնարկվում են անհրաժեշտ միջոցառումներ՝ դեպքի բոլոր հանգամանքներն ու անձանց շրջանակը պարզելու ուղղությամբ»։ 

Ավելի ուշ կայքին հայտնի է դարձել, որ Կադաստրի պետի աշխատասենյակում ծեծի ենթարկվածի կնոջը՝ Վերոնիկային ոստիկանությունը տարել է Քննչական կոմիտե։  

ՌԴ Ստավրոպոլի տարածաշրջանում պլանային վերանորոգման աշխատանքներով պայմանավորված ժամանակավորապես կդադարեցվի Հայաստան բնական գազի մատակարարումը: Այս մասին հայտնում են «Գազպրոմ Արմենիա»-ից:

Սեպտեմբերի 16-ին ժամը 09։00-ից մինչև սեպտեմբերի 26-ը ժամը 09։00-ն ՌԴ Ստավրոպոլի տարածաշրջանում՝ «Հյուսիսային Կովկաս-Անդրկովկաս» մայրուղային գազատարի (DN 1400) վրա իրականացվելու են պլանային վերանորոգման աշխատանքներ, ինչի պատճառով ժամանակավորապես դադարեցվելու է նշված գազատարով Հայաստան բնական գազի մատակարարումը:

Նշված ժամանակահատվածում հանրապետության սպառողների անխափան և հուսալի գազամատակարարումը կիրականացվի առանց սահմանափակումների՝ ներքին պաշարների և ԻԻՀ-ից մատակարարվող բնական գազի լրացուցիչ ծավալների հաշվին:

Չեխիան ուղղաթիռների խումբ է ուղարկել Լեհաստան՝ ՆԱՏՕ-ի «Արևելյան պահապան» գործողությանն աջակցելու շրջանակներում: «Արմենպրես»-ի փոխանցմամբ՝ այս մասին հաղորդել է Չեխիայի պաշտպանության նախարարության մամուլի ծառայությունը։ 

«Այսօր Լեհաստան են ժամանել երեք ուղղաթիռներ՝ մեր մերձավոր դաշնակցի արևելյան սահմանի օդային տարածքի պաշտպանությունն ուժեղացնելու համար։ Մեր օդաչուները մոտ ժամանակներս ձեռնամուխ կլինեն Լեհաստանի օդային տարածքի պաշտպանությանը», - ասվում է հաղորդագրության մեջ։

Սեպտեմբերի 12-ին ՆԱՏՕ-ի գլխավոր քարտուղար Մարկ Ռյուտեն հայտարարել էր դաշինքի արևելյան թևում «Արևելյան պահապան» գործողության մեկնարկի մասին։ Գործողության հայտարարված նպատակն է «վերացնել անօդաչու թռչող սարքերի հետ կապված կոնկրետ սպառնալիքները»։ 

Սեպտեմբերի 10-ի գիշերը ռուսական մոտ երկու տասնյակ անօդաչու թռչող սարք մտել էր Լեհաստանի օդային տարածք: Վարշավան դա անվանել էր աննախադեպ սադրանք: Ռուսաստանի պաշտպանության նախարարությունը հայտարարել էր, որ Լեհաստանում որևէ օբյեկտ չի թիրախավորվել, և գերատեսչությունը պատրաստ է անհրաժեշտության դեպքում խորհրդակցություններ անցկացնել լեհական կողմի հետ:

Այսօր՝ սեպտեմբերի 11-ին, արտակարգ դեպք է տեղի ունեցել Կոտայքի մարզում։ Ժամը 17։45-ի սահմաններում Եղվարդի խճուղում 36-ամյա Արման Գ․-ի վարած «DAF» մակնիշի կցորդիչով բեռնատարի թափքից բլոկները թափվել են 32-ամյա Պավլիկ Հ․-ի կողմից կայանված «BMW X5» մակնիշի ավտոմեքենայի վրա։ Այս մասին հայտնում է Shamshyan.com-ը։

Թափվելու հետևանքով բարեբախտաբար տուժածներ չկան։

Վթարի փաստով ՊԾ Կոտայքի մարզի գումարտակում փաստաթղթեր են ձևակերպվել։

Երբ մենք եկանք այստեղ, կարողացանք կառավարել բնակչության ակնկալիքները. բոլորը մտածում էին, որ մենք պաշտպանական ուժ ենք, ԵՄ–ի պաշտպանիչ ուժն ենք, որը գալիս է պաշտպանելու Հայաստանը. մենք հստակեցրեցինք, որ դա չէ մեր գործառույթը։ Այս մասին այսօր՝ սեպտեմբերի 15–ին, «Համապարփակ անվտանգություն և դիմակայություն 2025» միջազգային համաժողովում իր խոսքում նշեց Հայաստանում Եվրոպական միության դիտորդական առաքելության ղեկավար Մարկուս Ռիտերը։ 

«Հիմա արդեն մարդիկ գիտեն՝ ինչի ենք մենք այստեղ, և ինչ կարող ենք անել։ Մենք ԵՄ դիտորդական առաքելություն ենք, որն աշխատում է մի երկրում, որը մնում է ՀԱՊԿ–ի անդամ, որտեղ կան ռուսական զորքեր, և կա Ադրբեջանի հետ հակամարտություն և Ադրբեջանը չի ուզում մեզ հետ համագործակցել։ Սա բազմաթիվ ապատեղեկատվական արշավների առիթ է դառնում ընդդեմ մեր առաքելության։ Ոչ միշտ է հեշտ դրան արձագանքել, մենք գտել ենք որոշակի մեխանիզմներ դրան արձագանքելու։ Դա մեր ոճը չէ, որ եթե մեր մասին վատ բան ես ասում, մենք էլ քո մասին ասենք վատ բան։ 

Ներկայումս ապատեղեկատվությունը Ադրբեջանի կողմից լռել է, իրենք դադարեցրել են դա մայիսից։ Մենք դեռ ունենք խնդիրներ ՌԴ–ի հետ, բայց այս պահին կարծես վիճակը  լավ է»,–ասաց նա։