Կառավարությունը որոշում է ընդունել, որը կնպաստի ինտենսիվ այգեհիմնմանը և արդիական տեխնոլոգիաների ներդրմանը, այգեհիմնման և ոռոգման առաջադիմական տեխնոլոգիաների ներդրման գործընթացում ռիսկերի կառավարմանը:

Հայաստանի Հանրապետությունում ինտենսիվ այգեգործության ծրագրերի շրջանակում 2025 թվականի մարտի 1-ի դրությամբ կնքվել է շուրջ 7730 հա-ի այգեհիմնման հայտ, փաստացի հիմնվել է շուրջ 3300 հա ինտենսիվ այգի:

Ծրագրի իրականացման ընթացքում խոշոր ներդրումների դեպքում որոշակի խնդիր է առաջացել մեկ կապալառուի միջոցով աշխատանքները իրականացնելու հետ կապված, ինչպես նաև անհրաժեշտություն է առաջացել հստակեցնել կապալառուին ներկայացվող պահանջները և խթանել կարկտապաշտպան ցանցերի ներդրումը։ 

Կարգավորման նպատակը կարկտապաշտպան ցանցերի ներդրումը առավել հասանելի դարձնելն է, ինչպես նաև շահառուի և կապալառուի հարաբերությունների, շահառուին ներկայացվող պահանջների հստակեցումը։

Որոշմամբ փոխհատուցման բաղադրիչով նախատեսվել է կարկտապաշտպան ցանցերի ներդրման աջակցություն բոլոր բնակավայրերի համար։ Կարկտի առավել ակտիվ գոտիներում գտնվող բնակավայրերի համար փոխհատուցման չափը թողնվել է անփոփոխ՝ 75%, իսկ այլ բնակավայրերի համար սահմանվել է 50 %։

Միաժամանակ, որոշմամբ սահմանվում է, որ ծրագրի շրջանակում 10 հա և ավելի տարածքում ներդրում կատարելու կամ 10 հազար խորանարդ մետր և ավելի ծավալով ջրավազանի կառուցման դեպքում շահառուն (միայն իրավաբանական անձ, անհատ ձեռնարկատեր կամ համայնք) կարող է ծրագիրը իրականացնել տարբեր (մեկից ավելի) կապալառու կազմակերպությունների միջոցով՝ պայմանագրեր կնքելով մի քանի կապալառուների հետ, իսկ անհրաժեշտ միջոցների ձեռքբերումը կարող է իրականացվել ինչպես շահառուի, այնպես էլ կապալառուի կողմից, հաշվի առնելով, որ խոշոր ներդրումների դեպքում կապալառու կազմակերպության միջոցով անհրաժեշտ միջոցների ձեռքբերումը հանգեցնում է հավելյալ մեծ ծախսերի։ Նույն մոտեցումը կիրառվել է նաև Հայաստանի Հանրապետությունում ջերմատնային տնտեսությունների զարգացման աջակցության ծրագրի շրջանակում։

10 հա և ավելի տարածքում ծրագրի իրականացման կամ 10 հազար խորանարդ մետր և ավելի ծավալով ջրավազանի կառուցման համար շահառուի կողմից անհրաժեշտ միջոցների ձեռքբերման կամ տարբեր (մեկից ավելի) կապալառուների հետ պայմանագրերի կնքման դեպքերում՝ շահառուն աշխատանքների ավարտից հետո պետք է ներկայացնի «Հաշվապահական հաշվառման և աուդիտորական գործունեության կարգավորման և հանրային վերահսկողության մասին» օրենքի 22-րդ հոդվածի 1-ին մասով սահմանված աուդիտորների, փորձագետ հաշվապահների և աուդիտորական կազմակերպությունների ռեեստրում գրանցված և միջազգային ցանցին անդամակցող աուդիտորական կազմակերպության կողմից տրված, շահառուի ֆինանսական հաշվետվությունների վերաբերյալ աուդիտորական եզրակացություն, որում պետք է արտացոլվի ծրագրի շրջանակում կատարված ծախսերը ֆինանսական հաշվետվություններում։

ԱՄՆ նախագահ Դոնալդ Թրամփը հայտարարել է, որ շատերն իրեն խնդրում են կրկին առաջադրվել նախագահի պաշտոնում 2028 թվականին, և ինքը կմտածի այդ մասին։

«Գիտեք, մենք ուզում ենք վերընտրվել։ Շատերը խորհուրդ են տալիս դա անել։ Ես կմտածեմ դրա մասին, չնայած դա շատ դժվար է», - ասել է նա՝ ելույթ ունենալով Կատարի Ալ Ուդեյդ ամերիկյան ռազմաբազայում։ Ամերիկացի առաջնորդը կատակով առաջարկեց ընտրարշավի կարգախոս՝ «Թրամփ 2028. Խելագարեցրնենք ձախերին»։

Միաժամանակ, Թրամփը նախկինում հայտարարել էր, որ չի մտադիրվում երրորդ անգամ վերընտրվել բարձրագույն պետական ​​պաշտոնում։

Համաձայն 1951 թվականին ընդունված Ամերիկայի Սահմանադրության 22-րդ փոփոխության՝ նույն անձը կարող է պետության ղեկավար ընտրվել ոչ ավելի, քան երկու անգամ։ Միացյալ Նահանգներում հաջորդ նախագահական ընտրությունները կանցկացվեն 2028 թվականին։

Անկարայում ավարտվել է Թուրքիայի նախագահ Ռեջեփ Թայիփ Էրդողանի և Ուկրաինայի նախագահ Վլադիմիր Զելենսկու հանդիպումը:

Հանդիպումը տևել է մոտ 3 ժամ, հաղորդում է Anadolu-ն, փոխանցում է ՌԻԱ «Նովոստին»:

Ավելի վաղ Զելենսկին ասել էր, որ ՌԴ-ի հետ բանակցություններին Ուկրաինայի մասնակցության որոշման մասին կհայտարարի Թուրքիայի նախագահի հետ հանդիպումից հետո:

Էրդողանի և Զելենսկու հանդիպումից այլ մանրամասներ չի հաղորդվում:

Քիչ առաջ 5,2 մագնիտուդ ուժգնությամբ երկրաշարժ է տեղի ունեցել Թուրքիայում։ Ինչպես հաղորդում է ՏԱՍՍ-ը, երկրաշարժը հստակ զգացվել է մայրաքաղաք Անկարայի բնակելի տներում։

Ցնցումների օջախը գտնվել է Անկարայից մոտ 200 կմ դեպի հարավ գտնվող Կոնիա նահանգում, հայտնում է Թուրքիայի  Արտակարգ իրավիճակների կառավարման գործակալությունը։ Ցնցման ալիքը հասել է երկրի մայրաքաղաք:

Անթալիայում ՆԱՏՕ-ի արտգործնախարարների հանդիպման ժամանակ քննարկման գլխավոր թեմաներից մեկը եղել է ռուս-ուկրաինական հակամարտությունը։ Կողմերն իրենց աջակցությունն են հայտնել հակամարտությունը լուծելու՝ ԱՄՆ նախագահ Դոնալդ Թրամփի գործադրած ջանքերին

Ինչպես տեղեկանում է Reuters գործակալությունից, Այս մասին նախարարական հանդիպումից հետո հայտնել է ՆԱՏՕ-ի գլխավոր քարտուղար Մարկ Ռյուտեն։

«Մենք քննարկել ենք Ուկրաինայի դեմ Ռուսաստանի շարունակվող պատերազմը։ Մենք վերահաստատել ենք մեր լիակատար աջակցությունը նախագահ Թրամփի հրատապ ջանքերին՝ հնարավորինս արագ պատերազմը հասցնելու արդար և տևական ավարտի», – ասել է Ռյուտեն։

Նա շեշտել է, որ երբ կողմերի միջև հրադադարի կամ խաղաղության համաձայնություն ձեռք բերվի, այն պետք է լինի տևական։«Գնդակը, միանշանակ, Ռուսաստանի դաշտում է։ Ռուսները հիմա ուղարկել են ցածր մակարդակի պատվիրակություն, և չեն օգտվում հնարավորությունից։ Ուկրաինան, ակնհայտորեն, պատրաստ է խաղալ գնդակ, բայց գնդակը հիմա Ռուսաստանի դաշտում է», – հավելել է Ռյուտեն։

Բացի այդ, ՆԱՏՕ-ի գլխավոր քարտուղարը Եվրաատլանտյան տարածքում կայունության պահպանման գրավականներից մեկն է համարել պաշտպանական ոլորտում ներդրումների ավելացումը։

«Այս ամենը, պաշտպանական ոլորտում ներդրումների ավելացումը, պաշտպանական արդյունաբերական հզորությունների բարձրացումը և Ուկրաինային շարունակական աջակցությունը կօգնեն պահպանել կայունությունը մեր Եվրատլանտյան տարածքում», – ասել է Հյուսիսատլանտյան դաշինքի ղեկավարը:

Ռյուտեն նշել է, որ պաշտպանական ծախսերն ավելացնելու հարցով Գերմանիան սկսում է առաջատարի տեղ գրավել։ Ըստ Ռյուտեի՝ ՆԱՏՕ-ի դաշնակիցները պետք է կենտրոնանան պաշտպանական արդյունաբերական արտադրության վրա։

«Ռուսաստանը, որոշ հաշվարկներով, երեք ամսում զինամթերքի առումով արտադրում է այնքան, որքան ամբողջ ՆԱՏՕ-ն արտադրում է մեկ տարվա ընթացքում, իսկ Ռուսաստանն ունի ՆԱՏՕ-ի ընդհանուր տնտեսության ընդամենը 5%-ը…. Ռուսաստանը երկարաժամկետ սպառնալիք է», –  ասել է ՆԱՏՕ-ի գլխավոր քարտուղարը:

Թուրքիայում մայիսի 15-ին տեղի են ունենում մի քանի կարևոր հանդիպումներ՝ Անկարայում՝ Թուրքիայի նախագահ Ռեջեփ Թայիփ Էրդողանի և Ուկրաինայի նախագահ Վոլոդիմիր Զելենսկիի միջև, Անթալիայում՝ ՆԱՏՕ-ի երկրների արտգործանխարարների միջև, իսկ Ստամբուլում ակնկալվում են ռուս-ուկրաինական ուղիղ բանակցություններ։ 

Իրանի նախագահ Մասուդ Փեզեշքիանը կտրուկ է արձագանքել իր ամերիկացի գործընկեր Դոնալդ Թրամփի՝ Էր Ռիադում ունեցած ելույթին, որում Թրամփը մեղադրել է Իրանի առաջնորդներին վատ կառավարման և Մերձավոր Արևելքի ապակայունացման մեջ։

Այս մասին հայտնում է Tehran Times-ը։

Փեզեշքիանը կտրականապես մերժել է մեղադրանքները՝ մեղքը բարդելով Վաշինգտոնի և նրա դաշնակիցների վրա։

«Մեկ տարվա ընթացքում Գազայում ռումբերի և հրթիռների տակ մե՞նք ենք սպանել վաթսուն հազար կանանց և երեխաների։ Մե՞նք ենք կտրել ջուրը, հացը և դեղորայքը այդ խեղճ մարդկանցից։ Մե՞նք ենք սպառնալիքը», – նշել է նա Իրանի արևմտյան Քերմանշահ քաղաքում ունեցած ելույթում։

«(Թրամփը) միամիտ է, եթե կարծում է, թե կարող է գալ մեր տարածաշրջան, սպառնալ մեզ և հույս ունենալ, որ մենք կնահանջենք: Մենք երբեք բանակցության չենք դնի մեր արժանապատվությունը: Սա յուրաքանչյուր իրանցու արյան մեջ է», – ասել է Փեզեշքիանը։

Նա նաև նշել է, որ Թրամփը հույս ունի ապամոտիվացնել իրանցիներին և պառակտումներ ստեղծել երկրի ներսում:

«Դուք այդ նպատակին կհասնեք միայն ձեր երազներում: Իրանը կշարունակի իր առաջընթացը՝ համաձայնագրով կամ առանց դրա, – ասել է նա։ – Դուք փորձել եք Իրանին ծնկի բերել վերջին 47 տարիների ընթացքում։ Մենք գոյություն ունենք հազարավոր տարիներ և կգոյատևենք նաև առաջիկա տարիներին»։

Փեզեշքիանը նաև հիշեցրել է Թրամփին, որ ինքն էր 2020 թվականին հրամայել սպանել Իրանի գլխավոր ռազմական հրամանատար Ղասեմ Սոլեյմանիին։ «Սոլեյմանին այն մարդն էր, որը դեմ էր «Իսլամականը պետությանը», որին դուք մարզել, աջակցել և սնել եք: Եվ հիմա դուք պնդում եք, որ հաղթել եք նրանց», – նշել է նա: 

Փեզեշքիանը շեշտել է, որ այն ճնշումը, որ գործադրվել է Իրանի վրա, «եթե գործադրվեր որևէ այլ երկրի վրա, այն 24 ժամ էլ չէր գոյատևի»։

Մասուդ Փեզեշքիանն Իրանի նախագահի պաշտոնը ստանձնել է 2024 թվականի ամռանը։ Նա պատրաստակամություն է հայտնել Վաշինգտոնի հետ միջուկային համաձայնագրի շուրջ բանակցություններ վարել առանց սպառնալիքների և ճնշումների։

Չնայած Թեհրանի և Վաշինգտոնի միջև Իրանի միջուկային ծրագրի շուրջ ընթացող բանակցություններին, ԱՄՆ վարչակազմը շարունակում է պատժամիջոցներ սահմանել Իրանի դեմ։

ԱՄՆ նախագահ Դոնալդ Թրամփը հայտարարել է, որ ԱՄՆ-ն և Իրանը մոտ են Թեհրանի միջուկային ծրագրի շուրջ համաձայնության գալուն։ Այս մաիսն գրում է ՏԱՍՍ-ը: 

«Դուք հավանաբար արդեն կարդացել եք, որ Իրանը համաձայնել է այնպիսի պայմանների, որոնց դեպքում մենք, ես դա բարեկամաբար եմ ասում, ռադիոակտիվ փոշի չենք ստեղծի Իրանում (նկատի ունի Իրանի միջուկային օբյեկտների ռմբակոծումը-Խմբ.)։ Ես ցանկանում եմ, որ նրանց համար ամեն ինչ լավ լինի։ Իրանը մեծ երկիր է, բայց չի կարող միջուկային զենք ունենալ։ Դա պարզ է: Ոչ մի 30 էջանոց փաստաթուղթ, ընդամենը մեկ նախադասություն՝ նրանք չեն կարող միջուկային զենք ունենալ։ Կարծում եմ, որ մենք մոտ ենք գործարքին: Մենք Իրանի հետ շատ լուրջ բանակցությունների մեջ ենք երկարաժամկետ խաղաղություն հաստատելու համար»,- ասել է Թրամփը Դոհայում ԱՄՆ-ի և Կատարի գործարարների հետ հանդիպման ժամանակ:

Սպիտակ տան ղեկավարը հավելել է, որ կցանկանար լուծել իրանական միջուկային ծրագրի շուրջ ստեղծված ճգնաժամը «խելամիտ, ոչ թե կոշտ ձևով»։ Թրամփը նաև ասել է, որ չի ցանկանում դիմել «չտեսնված բռնության» և նախընտրում է «ճիշտ ճանապարհը»։

Միացյալ Նահանգները և Իրանը, Օմանի միջնորդությամբ, բանակցությունների չորս փուլ են անցկացրել՝ լուծելու Իսլամական Հանրապետության միջուկային ծրագրի շուրջ տարաձայնությունները: 

Մոսկվան ձգտում է լիարժեք իրագործել Բաքվի հետ հարաբերությունների ամբողջ ներուժը, հայտնել է ՌԴ ԱԳՆ պաշտոնական ներկայացուցիչ Մարիա Զախարովան ճեպազրույցի ժամանակ։

«Գիտեք՝ մենք Բաքվի հետ հարաբերությունները կառուցում ենք 2022 թվականի փետրվարին բարձր մակարդակով ստորագրված Դաշնակցային համագործակցության հռչակագրի հիման վրա։ Մեր կողմը տրամադրված է հետևողականորեն իրագործել այս երկկողմ հարաբերությունների համար առանցքային փաստաթղթի ամբողջ ներուժը, ինչպես նաև լուծել առաջացող բոլոր հարցերը՝ փոխշահավետ և փոխադարձ հարգանքի սկզբունքով», - նշել է նա։

Դիվանագետն ավելացրել է, որ Մոսկվան և Բաքուն անցկացնում են «բարձր մակարդակով մի շարք շփումներ՝ կառավարությունների և արտաքին քաղաքական գերատեսչությունների միջև»։

Այսօր՝ մայիսի 15-ին, շղթայական ավտովթար է տեղի ունեցել Կոտայքի մարզում: Ինչպես հայտնում է Shamshyan.com-ը, ժամը 15:00-ի սահմաններում Արզնու խճուղում բախվել են 39-ամյա Ռոման Գրիգորյանի վարած «Mercedes» մակնիշի, 27-ամյա Հարություն Հովհաննիսյանի վարած «ՎԱԶ 217230» մակնիշի, 34-ամյա Սեյրան Առուշանյանի վարած «Mitsubishi Grandis» մակնիշի և 19-ամյա Գոռ Գրիգորյանի վարած «BYD» մակնիշի ավտոմեքենաները: 
 
Բախման հետևանքով «Mercedes»-ը գլխիվայր շրջվել է: 

Վթարի փաստով ՊԾ Կոտայքի մարզի գումարտակում փաստաթղթեր են ձևակերպվում: 

ԱՄՆ-ն կարող է Գազայի հատվածը վերածել «ազատության գոտու»։ Այս մասին ԱՄՆ նախագահ Դոնալդ Թրամփը հայտարարել է Դոհայում ԱՄՆ-ի և Կատարի գործարար համայնքների ներկայացուցիչների հետ հանդիպմանը։

«Ես Գազայի վերաբերյալ հայեցակարգ ունեմ, որը, կարծում եմ, շատ լավ է՝ թույլ տալ Միացյալ Նահանգներին միջամտել... և այն վերածել ազատության գոտու», - ասել է Սպիտակ տան ղեկավարը, որի խոսքը մեջբերում է CBS News-ի թղթակից Ջենիֆեր Ջեյքոբսը X-ում։

Թրամփը հավելել է, որ իր ծրագիրն է «թույլ տալ, որ լավ բաներ տեղի ունենան անկլավում» և «մարդկանց բնակեցնել տներում, որտեղ նրանք կարող են ապահով լինել»: Նա նաև նշել է, որ պաղեստինյան ՀԱՄԱՍ շարժման հարցով «պետք է զբաղվել»։

Ավելի վաղ ԱՄՆ նախագահն առաջարկել էր Գազայի հատվածի 2,1 մլն բնակիչներին տեղափոխել հարևան երկրներ: Այս առաջարկը բուռն քննադատության էր ենթարկվել:

Մարտի 18-ին իսրայելական բանակը վերսկսել է ռազմական գործողությունները Գազայի հատվածում՝ լայնածավալ հարվածներ հասցնելով անկլավին և դրանով իսկ ընդհատելով այս տարվա հունվարին հաստատված հրադադարը։ Իսրայելի վարչապետ Բենիամին Նեթանյահուի գրասենյակը դա բացատրել է պաղեստինյան արմատական ​​ՀԱՄԱՍ շարժման կողմից միջնորդների և ԱՄՆ նախագահի հատուկ բանագնաց Սթիվեն Վիտկովի կողմից բանակցությունների ընթացքում արված առաջարկներից հրաժարվելով՝ նշելով, որ այդ հատվածում գործողության նպատակը բոլոր պատանդներին ազատելն է։